Saŋ 3
3
Yensa ingi Nikodem
1Ayikyik údiigeen m'aretuh Nikodem. Úmár atohtoh a tilibinaalhu Ñanyahudo, afak atoh a dayraŋo n'anyéjehne ñanfarasiyaŋo. 2Angu ayikyik jaket n'adék ba imbi Yensa. Bapúti ayéjem:
- Arafaŋ, mint ípájulmiŋpájul maro Díino abúuñurenne a binent k'ujellihin mint binaahánam. Ingah! Aji Díino búuñururower, dupiren k’úfunnoh tamaseereŋo n’ófunnohne. Gúmár gípájulminne maro Díino abúuñurenne.
3Angu, Nikodem balóbi nim, Yensa ayéjem:
-Ingah! Janten baŋ k'íteekino marigeno: Wúur dapiren k’atoh a maasayahu Díino ni bosinkindaa.
4Nikodem ayéjem:
- Jah! Ulaamer, neeraŋ gapirenkinehne k’abosinkinaa? Wúur dapiren k’aŋoolin a búyeku nunom k’abosinkinaa!
5Yensa ayéjem:
- Ingah! Janten baŋ k'íteekino marigeno: Aji wúur bosundaa ingi baaruŋo#3.5 Na ka Yensa aretne baaruŋo apiren aguy funaare gafúnnáne, te baaruŋo bámár agune Gúloku Díino. faka ingi Jamméejhu Díino mees, dupiren k’utoh a maasayahu Díino, 6mara uraagofoŋo abosuháneh údinem uraagofo, Jamméejhu Díino gabosohne jamméej. 7Angu biki honj amooniyo n'íyejenne, ninkinan nip uñantaheŋ ubosinkinahaŋ. 8Bawuco, eke upirenkineh uyennehin bi bawuco anaŋuntahne, kanda dúpájul b'afúrumokunehne ingi b'akokhunehne. Bawuco gamalambinemalambin imbi ingi imbi. Beŋen beŋen gasíibane, adék amal maŋ bim. Angu maŋ nim ganik amíirne ingi Jamméejhu Díino. Dúpájul b’akokhunehne ki jamaŋo ampiren ambosinkina a gubaarhu jámár.
9Angu Yensa balóbi nim, Nikodem amiihem ayéjem:
- Kanda bareŋ! Fi, fi neeraŋ jamaŋo ampirenkinehne k’ambosinkina faka?
10Angu Yensa aŋoyindem ayéjem:
- Kanda fi, maŋ ni gurethen ayéegane a gukawandino nanka a didiirahu Israyel, neeraŋ gakankoorunkunehne ki pájiiro hómár?
Yensa abocin ayéj:
11- Janten baŋ k'íteekino marigeno. Mint úteekinahaŋteekin h'épájulminne. H'éfegminne mees úteekinahaŋteekin, kanda haman maŋ nim lahudoŋ mint. 12Gílobi a nintiku honjoŋo h'ayikehne a duniyaŋo inno, dúdomoŋ. Angu neeraŋ gúdomorunkunoŋne a nintiku h'élobohne h’agune arjanna? 13Ingah! Wúur kengahadaŋ k’adék ba arjanna fo Údiigeeno M'acaabenaane bareŋ. Agida bim gafúruntne.
Yensa abocin ayéjem:
14Fég baŋ, maŋ ni Musa ayoofunne busumoolo a gulihano fam f'agune a kanaŋaŋo kalaalinno,#3.14 Ninger Batébo 21 Údiigeeno M'acaabenaane, úmár mees maŋ nim jamaŋo anyoofunkunomne. 15Hómár añantay ayik ki ki wúur gafiyumem, ayikum na kanjébo ka bandór.
Abocin ayéjem:
16Ingah! Díino apokunpokun dáde jamanku duniyaŋo nip. Angu a gubaarhu bupoko búmár b'apokuneeniŋne akucunduteeniŋ Úbárám ba bupahunkánin a kunyoku júnubonkánin. Te Úbárám úmár agune Úbárám úmánduko m'ayikne. Nim Díino akanne ki moŋon moŋon ufiyumne Úbárám, uyikum na kanjébo ka bandór, te faka fi dúdek a kunyoho ku bandór.
17Yensa abocin ayéjem:
Fégeŋ baŋ, Díino búuñururoŋ Úbárám a duniyaŋo ki k’aguy ukitunku jamaŋo. Abúuñurembuuñ a duniyaŋo ki k’aguy upahunku jamaŋo. 18Fégeŋ baŋ, m’anfiyumne Úbáku Díino, immereŋ danyik kayúulen ingi Díino. Kanda mi fiyindeŋeŋne Úbáku Díino, immereŋ mingu Díino aleklek balóbo mees k’ayéj anyúulenyuulen. Ni fiyindeŋeŋne Úbárám úmánduko, gúmár galekne balóbo k’ayéj immereŋ anyúulenyuulen.
Yensa abocin ayéjem: 19Angu, aji úfegi ni Díino ayéjne anyúulenyuulen, maro jiyaaŋo adékridek a duniyaŋo, kanda jamaŋo bumurulo ganfaŋumne n'ampokun maro hakaanankánin jóndoŋne. A gubaarhu hómár Díino ayéjne maro jamaŋo anyúulenyuulen.
Abocin ayéjem:
20Úpájuli, moŋon moŋon m'akaanahne balápuro gara asíiba jiyaaŋo. Gara asíiba k'atéeja jiyaaŋ. Datéeja jiyaaŋo mara síibiiraa ki balápuro b'akaanahne afégaa. 21Kanda wúuro m’atíbehne bukanku ho marigeno amiihulne, úmár adékhineh a jiyaaŋo. Úmár asíibaháneh ki jiyaaŋo ajellihin jamaŋo maro h'akaanahne, nim Díino alókine.
Nim Yensa atéekinne Nikodem dam.
Yensa ingi Yaya
22Angu, afúrumi na, Yensa andék ba a didiirahu Júde ingi ñantaalibehinem k'andék annooh na f’ammiñila. Na Yensa gayicehne jamaŋo. 23Agida Yaya mees gayiceyic jamaŋo. Kanda Yaya adékdek ka baaruŋo alabane a gúbidhu saariŋo n'aretuhne Enon, bi Salim. Angu jamaŋo andékeh ba na k'ayiceheeniŋ. 24Agida a waato nómár ni Yaya fanti bakimbenaa a kasoŋo.
25Bísiba, fo Yaya aŋane buyichu jamaŋo, ñantaalibehinem índukoŋ aŋŋay sinlayay ingi Uyahud úduk a nintiku buyico. 26Angu, ñantaalibeŋo anyéj Yaya:
- Arafaŋ, hóge ulentálalentála údiigeeno m’adékirne a binankan buyicaŋo f’oguyerne gúbido gu beŋen gu jakanku Joodan? Údiigeeno m’uséediyahne úteekineh jamaŋo a nintiku úmár? Úmár ii, ummo bim buyichu jamaŋo. Kanda jamaŋo nip a binaanam gandékehne buruhu k’andéker a binankan!
27Banlóbi nim Yaya ayéjeeniŋ:
-Ingah! Wúur dapiren k'ayik honj ni Díino nédom.
28F’éteekinehne jamaŋo maro me guyri Umaasaŋo Mu Díino Acaabenne, eke ninkinan usoreŋsor k’uyennehineŋ hómár? Me, Díino abúuñureemne k’inohurom. 29Ingah! Hantaŋ amune maañoŋo? Eke údiigenkinem amuyemne? Ingah! Uñanku údiigeeno m’atúyuhomne imbi maañoŋo, aji ayennehinti síngiirhinem gaséwohosewo dáde. Me mees, inini isewosewo dáde a gubaarhu n'iyennehinne síngiirhinem.
Yaya abocin ayéj:
30Úpájuleŋ, Díino asíibáásiib k'ataahul a binaam, abecin imbi úmár. 31-32Fégeŋ baŋ, údiigeeno m'afúruntne arjanna, úmár afaŋfaŋ jamaŋo m'angune nanka a duniyaŋo nip. Ingah! Úmár apirenne aséediya h’afégne ingi h’ayennehinne arjanna. Kanda wúuro m'agune a duniyaŋo inno, úmár honjuronku duniyaŋo bareŋ gapájulne. Úmár, h’afégne a duniyaŋo bareŋ gapirenne atéekin jamaŋo.
Yaya abocin ayéj:
Angu, gúmár gíyejoonuŋne, údiigeeno m'afúruntne arjanna, úmár afaŋfaŋ jamaŋo m'angune a duniyaŋo inno nip. Údiigeeno m’afúruntne arjanna, haani aséediya h'agune arjanna, jamaŋo gara anlahákam. 33Kanda aji wúuro adómi#3.33 Rennireŋ ka gúloku Yaya amukne. Apirenpiren aguy mara 3.30 gamukne, ki 3.31-36 aguy ho Saŋ añaañne. (Saŋ añaññaañ Injilo inno.) kúmbuuñankánam, wúuro úmár apirenkineh aséediya maro Díino, marigeno galóbohne.
Abocin ayéj:
34Fégeŋ baŋ, Díino abúuñurne údiigeeno úmár. Angu, gúmár akanne alóboh h’afúruntne imbi Díino. Díino ganéerumehne Jamméejhinem, te yikireŋ k’amuk. Angu, gúmár gapirenkinehne atéekin jamaŋo kúmbuuñanku Díino. 35Báaho apokunpokun Úbárám k’anéerem sembeŋo nip. 36Ugurumaareŋ afiyumne Úbáku Díino, úmár ayikyik kanjébo ka bandór. Kanda mu fiyundomne, úmár, kunyoku Díino unko bim n'atúyuhom.
Nim Yaya alóbne.#3.36 Índukoŋo anlahlah mara ho Yaya alóbne, hómár amukmuk jandiŋ 3.31. Ki h'atifne a 3.31-36 Saŋ añaañne. (Saŋ añaññaañ Injilo inno.)
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Saŋ 3: GD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Copyright Vision Intégrale, Senegal
