Saŋ 2
2
Da Yensa afúnnáne tamaseero aliiho
1Afúrumi na, dahankánam ayikyik bajah a saariŋo n’aretuhne Kana a didiirahu Galile. Angu nunku Yensa adék asor. 2Anhuyhuyer Yensa mees ingi ñantaalibehinem k'andék. 3Bampút a bajaho, a jégenenku bajaho, baaruku reseŋo adét. Baaruku reseŋo badéti nunku Yensa ahuy Yensa k’ayéjem:
- Yensa! Baaruku reseŋo adédet.
4Úmár ayéjem:
- Ayo, hóge me iñantay ikaan na honj? Me waato no Díino ayéjeemne aroŋroŋ.
5Na nunku Yensa aŋoolin adék alahun ñantédaŋo k'ayéjeeniŋ:
- Inini, Yensa aji apútri, neŋen neŋen gayéjoonuŋne, ukaanaŋ. Hogeh uyennehineŋyennehin?
6Agida ayikyik na dinhan dínde d’alódumaa ingi bawaalo, te Ñanyahudo andokuneh baaruŋo b'agune na k'ampiren anyica maŋ ni luwaŋankánin amiihulne. Angu, ahanaŋ amákilaŋ ingi ímbenduk agune na. Te ahanaŋo ámáráŋ, beŋen beŋen gadoohodooh litaraŋ jamaŋirenek ba keme ingi buruhur.
7Angu, bamiñaamiñ Yensa adéker, adék ayéj ñantédaŋo:
- Inini ahanaŋo innoŋ, dínteŋ k’ukaanaŋ na baaruŋo!
Andak andíin. Bandíini ahanaŋo f’arumun tip baman a habilo, 8adéker ayéjeeniŋ:
- Yikiteŋ na ulaameku gújuŋo!
K’andak anlahun ulaameku gújuŋo k’annéerem baaruŋo. 9Údiigeeno aruuh baaruŋo b'akúbulane aguy angu baaruku reseŋ, kanda pájiireŋ bi baaruŋo bámár afúruntne. Agida ñantédaŋo mim ampápájul n’adékorumne maro immereŋ andínne baaruŋo. Angu ulaameku gújuŋo bañumay mees, ahuy ummu bajaho 10k’ayéjem:
- Kanda fi! Neeraŋ gakaanorumne k’úneer mint baaruku reseŋo f’édek ideerumiŋ kukur úneer mint b'afaŋumne n'asúum? Hóge nim gakankuhne? Eke mintor, gúputi a bajaho, annéero b’afaŋumne n’asúum guliih, guruuhi f’ódek uhay k'ankir ambiyam báduko. Kanda fi ubiyambiyam b’afaŋumne n’asúum dáde!
Nim ulaameku gújuŋo alóbne.
11Angu tamaseero nómár, nómár agune aliiho no Yensa ajellihinne jamaŋo. Akankaan nómár a saariŋo n'aretuhne Kana. Agida Kana agune a didiirahu Galile. Na gajellihinne jamaŋo bafukunom b'afúruntne imbi Díino. Angu ñantaalibehinem, banfégi hómár, anfiyumem.
12Angu, bafúrumi na, Yensa ingi nunom ingi índoonenenkinem ingi ñantaalibehinem andék ba a saariŋo n'aretuhne Kapáneyum, k’andak annooh na ásibaŋ.
Da Yensa atibaarne ñanjuliyaŋo a Jaameŋo Adénno
13Afúrumi na, fo gújuŋo g’ayéjuhne Gújunku Guwusunaamo atéejarne, Yensa adék ba Jerusalem, úmár ingi ñantaalibehinem. 14Bampút Jerusalem andék ba a Jaameŋo Adénno. Bampúti a Jaameŋo Adénno anlahun na ñanjuliyaŋo a buteereŋo. Immi anjuliya ahayaŋo, immi anjuliya saahaŋaŋo, immi anjuliya bakuyeereŋo ba bukaanunku leeyaŋaŋo. Immi anwocálahineh bakodiŋo maŋ na a buteerehu Jaameŋo Adénno. 15Yensa bafégi h'aŋŋane bukaano, jifahánam anuy k’adooh ñankindo k'akaan sihonj k'atibaareeniŋ na ingi saahaŋankánin ingi ahayankánin nip. Ñanwocálahinku bakodiŋo mungu, Yensa afooŋulfooŋul taabálankinin ingi bakodiŋo nip. 16Adék ayéj ñanjuliyahu bakuyeereŋo:
- Kengereŋ nanka! Fúteŋ nanka ingi bakuyeerenkinan nip! Dahu udoohoŋ díku Bááhum ukaanaŋ kanjuliyah!
17Angu, ñantaalibehinem banfégi ho Yensa akanne, anlentála ho anabiyoŋo añaañne a Hañaañeno. Añañaañ ayéj:
Díino!
Bupoko b'ipokunne díken, awusunawusuna bikino.
Bupoko búmár adak abujhunum. # 2.17 Bákimo 6.9
Nim gañaañne.
18Angu ñanlaameku Ñanyahudo, banfégi ho Yensa akanne, andak ammiihem anyéjem:
- Fi nuko! A gubaarhu horaŋ gutibaarunkunehne ñanjuliyaŋo nanka a Jaameŋo Adénno? Inini, kandut mint tamaseer n’épájulorunkuneminne maro uyikyik sembe k’utibaar ñanjuliyaŋo nanka!
19Yensa aŋoyindeeniŋ ayéjeeniŋ:
- Inini, filiireŋ jaameŋo inno! Ufiliyeŋdir mees, unahamuŋ ásibaŋ alallaŋ k’ikengun adúk.
20Immereŋ anyéjem:
- Ingah! Jaameŋo inno n’íloduminne buruhu díineŋ jamaŋinak ingi amákilaŋ ingi amánduk (46), f’úduk úyej úlodhuneh jaameŋo inno buruhu ásibaŋ alallaŋ bareŋ!
21Agida Yensa, f'alóbne nim ni immereŋ pájiireŋeŋ maro funaare galóbne a gubaarhu arinkinem ingi jankenghinem a biniiroŋo. 22Da Díino akenguntemne a biniiroŋo, ñantaalibehinem anlentála k'andóm ho Yensa alóbumne. Te anfak anfaŋunum n'anfiyum Hañaañeno.
23Angu, a gújuŋo g’ayéjuhne Gújunku Guwusunaamo, Yensa gakaanakaan tamaseereŋo Jerusalem. Ñanlabahi banfégi tamaseereŋo nómáráŋ, anfiyumem a gubaarhu hómár. 24Kanda Yensa mumum fiyundeeniŋ maro apájuleeniŋpájul arenn fet. 25Jadaŋ k'amiih wúur maro moŋon moŋon Yensa apápájul h'agune a hafithinem.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Saŋ 2: GD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Copyright Vision Intégrale, Senegal
