यूहन्ना 3

निकोदेमसके येशूको शिक्षा

1फरिसीनको समुह मैसे निकोदेमस नाउँको एक आदमी रहए, जौन यहूदी समुहनको धार्मिक अगुवा रहए। 2एकदिन निकोदेमस रातके येशूके ठिन आएके येशूसे कही, “हे महान गुरु, हम जानत हएं, परमेश्वर तुमए हमके सिखानके ताहीं पठाइ हए; काहेकी कोइ शक्तिशाली चमत्कार जो तुम दिखात हओ, अगर परमेश्वर बोकेसँग नाए हुइहए, तओ शक्तिशाली चमत्कार नाए दिखाए पएहए।”

3येशू निकोदेमसके जबाफ दइके कही, “नेहात्तओ मए तोसे कहात हओं, अगर कोइ नयाँ करके नाए जन्मैगो कहेसे बो परमेश्वरको राज्यको कोइ हकदार नाएहोबैगो।” 4निकोदेमस येशूसे पुँछी, “बुढे आदमी फिरसे कैसे जनम लैपएहए? का बो फिरसे अपन अइयक पेटसे जनम लैपएहए?”

5येशू कही, “नेहात्तओ मए तोसे कहात हओं, जब तक कोइ आदमी पानी और आत्मासे नाए जन्मैगो, तबतक बो परमेश्वरको राज्यमे नाए घुस पबैगो। 6आदमी अपन बच्चाके जनम देत हएं, पर आदमीनके नयाँ जीबन पबित्र आत्मासे इकल्लो मिलत हए। 7अचम्मो मत् मानओ, कि मए तुमसे कहो, ‘तुमके नयाँ करके जन्मन जरुरी हए।’ 8हबाके जितए मन लागत हए, उतै बहात हए। हबाको अबाज त तुम सुनत हओ, पर हबा कहाँसे आतहए और कहाँ जातहए, तुमके पता नाए होत हए। अइसीयए पबित्र आत्मासे जनमन बारो आदमी फिर अइसी होतहए।” 9निकोदेमस येशूसे पुछीं, “जा कैसे हुइपएहए?”

10येशू निकोदेमसके जबाफ दइ, “तए इस्राएल देशको बडो गुरु हए, तहुँफिर जा बात नाए बुझत हए? 11नेहात्तओ, मए तोसे कहात हओं, हम जो जानत हएं बहे कहात हएं, और हम देखत हएं बहेको गवाही देत हएं। पर हम जो कहात हएं, तुम बोके उपर बिश्वास नाए करत हओ। 12जब मए तुमसे पृथ्वीमे जो होन बारो हए, बहे बात कहो, सोउँ फिर तुम बिश्वास नाए करत हओ कहेसे, अगर मए तुमसे स्वर्गमे का होबैगो कहिके कएहओं तओ फिर तुम कैसे बिश्वास करैगे? 13कोइ स्वर्गमे नाए गओ हए, पर केबल मए, आदमीको लौंणा स्वर्गसे तरे आओ हओं। 14और जैसी मोशा जंगली इलाकामे पितरको साँपके क्रूसमे टँगाइ रहए, उइसी जा जरुरी हए, कि मए, आदमीको लौंणा फिर टँगोजाओं। 15ताकी जो कोइ मिर उपर बिश्वास करैगो, बो कभी फिर नाश नाए होन बारो जीबन पएहए। 16काहेकी परमेश्वर संसारके आदमीनसे अइसो प्रेम करी, कि बा अपन ठिन रहो एकलौटो लौंणा दइदइ, ताकी बाके उपर बिश्वास करन बारे कोइ फिर नाश नाए होबए, पर कभी फिर नाश नाए होन बारो जीबन पाबए। 17काहेकी परमेश्वर अपन लौंणाके संसारमे जाकेमारे पठाइ, कि संसारके आदमीनके उपर दण्डको आज्ञा देनके नाए, बल्कि संसारके आदमीनके उद्धार दइपाबए। 18जौन परमेश्वरको लौंणाके उपर बिश्वास करैगो, बिनके उपर दण्डको आज्ञा नाए होत हए, पर जौन बाके उपर बिश्वास नाए करत हएं, बे अग्गुवएसे दोषी ठहिरे हएं; काहेकी बे परमेश्वरको एकलौटो लौंणाके नाउँमे बिश्वास नाए करी हएं। 19और दण्डको आज्ञाको कारण जा हए, कि उजियारो संसारमे आइगओ रहए, तहुँफिर आदमी उजियारोसे जद्धा अन्धकारके अच्छो मानीं। काहेकी बिनके काम खराब रहए। 20काहेकी जौनकोइ खराब काम करत हए, बे उजियारोके अच्छो नाए मानत हएं, और बिनको काम कहुँ दिखाइ नाए पणजाबए कहिके बे डरके मारे उजियारोके ढिँगै नाए आत हएं। 21पर जौन सच्चाईमे चलत हएं, बे उजियारोके ढिँगै आत हएं, ताकी परमेश्वर बिनको करो भओ कामके देख पाबए, जो परमेश्वर चाँहत हए।”

बप्तिस्मा देन बारो यूहन्नाकी गवाही

22जाके पिच्छु येशू और बाके चेला यहूदिया परदेशमे आए, और हुवाँ येशू उनके सँग रहिके बप्तिस्मा देनलागो। 23और बप्तिस्मा देन बारो यूहन्ना फिर एनोन गाउँमे, जौन सामारिया परदेशमे सालीम गाउँके ढिँगै रहए, हुनै बप्तिस्मा देत रहए। काहेकी हुवाँ बहुत पानी रहए, और आदमी आत रहएं, और बप्तिस्मा लेत रहएं। 24बप्तिस्मा देन बारो यूहन्ना बो समयमे जेलमे नाए पणो रहए। 25हुवाँ बप्तिस्मा देन बारो यूहन्नाके चेलनके, कोइ यहूदी दलके नेतनके सँग, यहूदीनको पुर्खनको धार्मिक चलनमे भओ, हात धोन बारो चलनके बारेमे बाद-बिबाद हुइगओ। 26और बप्तिस्मा देन बारो यूहन्नाके चेला यूहन्नाके ठिन आएके कहीं, “महान गुरु, जौन आदमी यर्दन नदीयाके अगार घेन तुमर सँग रहए, जौनके बारेमे तुम गवाही दएरहओ, देखओ, बा बप्तिस्मा दइ रहो हए, और सब बाके ठिन जाएरहेहएं।”

27बप्तिस्मा देन बारो यूहन्ना जबाफ दइ, “जब तक आदमीके स्वर्गसे नाए दओ जएहए, तबतक बो कोइ चीज नाए करपए हए। 28तुम अपनए मोसे कहात सुने हओ, कि मए का कहो रहओं, ‘मए ख्रीष्ट नाए हओं, पर मए बासे अग्गु पठाओ गओ हओं।’ 29दुलहा दुल्हिनसे बेहा करलेतहए, पर दुलहाको बाहानुइँया बहेके ठिन ठाणो रहात हए, और दुलहाकी कही बात सुनके बो बहुत आनन्दित होतहए; उइसीयए मेरु मन आनन्दसे भरीगओ हए। 30जरुरी हए, कि बाको महत्त्व जद्धा हुइजाए और मिर महत्त्व काम हुइजाए।”

स्वर्ग मैसे आओ भओ लौंणा

31यूहन्ना कही, “जो स्वर्ग मैसे आतहए बो सबसे भारी हए। और जौन पृथ्वी मैसे आतहए, बो पृथ्वीको हए और पृथ्वीकी बात बत्कात हए। और जौन स्वर्गसे आतहए, बो सबसे भारी हए। 32जो कुछ बे देखीं, और सुनिहएं, बहेको गवाही बे देत हएं, तहुँफिर बहुत कम आदमी बाको गवाही ग्रहण करीं। 33पर जौन बाकी गवाही ग्रहण करी हए, बा जा बातके साबित करी हए, कि परमेश्वर सच्चो हए। 34काहेकी जौनके परमेश्वर पठाइ हए, बा परमेश्वरको बात बत्कात हए: काहेकी परमेश्वर, पुरा रुपसे पबित्र आत्मा देतहए। 35परमेश्वर लौंणाके प्रेम करत हए, और सब चीज लौंणाके हातमे दइदइ हए। 36जौन परमेश्वरको लौंणाके उपर बिश्वास करत हए, बोके कभी फिर नाश नाए होन बारो जीबन मिलिगओ हए, पर जौन लौंणाके बिश्वास नाए करत हए, बो कभी फिर अन्त नाए होन बारो जीबन नाए पएहए, बल्कि परमेश्वरको दण्ड बोके उपर रहो रहाबैगो।”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 3: THRNT

Highlight

ಶೇರ್

ಕಾಪಿ