यूहन्ना 20

खाली चिहान

(मत्ती. 28:1-8; मर्क. 16:1-8; लूक. 24:1-12)

1हप्ताको पहिलो दिन आइतबार सुबेरे भोरभए मरियम मग्दलिनी गुफामे गइ और पत्थरके गुफासे हटो भओ देखी। 2तओ बो दौडके सिमोन पत्रुस और येशूके प्रेम करन बारे औ दुई चेलनके ठिन गइ और कही, “बे प्रभुको शरीरके चिहान मैसे बाहिर निकारके लैचलेगए हएं, और हम नाए जानत हएं, कि बे बाके कहाँ धर दइ हएं।”

3तओ पत्रुस और बो दुस्रो चेला बाहिर निकरके गुफा घेन गए। 4और बे दोनए सँगएसँग दौरनडटे रहएं, पर दुस्रो चेला पत्रुससे जोडके दौरके गुफामे पहुँचो। 5बो चेला गुफा भितर झुको और देखी, कि हुवाँ चदरा इकल्लो पणो रहए, पर बो भितर नाए घुसो।

6सिमोन पत्रुस बाके पिच्छु-पिच्छु आओ, और सुधे गुफा भितर घुसीगओ, और हुवाँ चदरा इकल्लो उइसीयए पणो देखी। 7और बो अंगउछा जो बाको मुणमे बंधो रहए, बो चदराके सँग नाए पणो रहए, बल्कि अलग एक घेन लिप्टो भओ देखी। 8तओ दुस्रो चेला फिर जो चिहानमे पहिले पहुँचो रहए, भितर गओ और देखके बिश्वास करीं, कि येशू मरो भओ मैसे जिन्दा हुइगओ हए। 9पबित्र-शास्त्रमे येशूकी बारेमे जा निक्षित रुपसे लिखोगओ रहए, कि येशू अपनी मृत्युसे फिर जिन्दा होबैगो, पर बे अभएतक नाए समझ पाइ रहएं।

येशू मरियम मगदलीनीके ठिन दिखानो

(मत्ती. 28:9-10; मर्क. 16:9-11)

10तओ पिच्छु बे दुई चेला अपन घर घुमीगए। 11पर मरियम चिहान जौँणे बाहेर रोत ठाणी रहए। और रोतए-रोत चिहान घेन झुकके देखी, 12जहाँ येशूको मरो भओ शरीर धरो रहए हुनै दुई स्वर्गदूतन्के सेतो लत्ता पैँधेभए एकके मुण घेन और दुस्रो पाओ घेन बैठे देखी। 13परमेश्वरके दूत मरियमसे कहीं, “हे अइया, तए काहे रोत हए?” बो बिनसे कही, “बे मिर प्रभुको शरीरके लैगए, और मए नाए जानत हओं, कि बाके कहाँ धरीहएं।”

14इतका बात कहिके मरियम पिच्छु घुमी और येशूके ठाणो भओ देखी। पर येशूए हए कहिके बो नाए चिन पाइ।

15येशू मरियमसे कही, “हे अइया, तए काहे रोत हए? तए कौनके ढुणत हए?” मरियम बाके बगियामे काम करन बारो मालीके बताएके कही, “हजुर, अगर तुम बाको शरीरके उठाएलए हओ तओ मोके बताए देओ, कि कहाँ धरे हओ और मए बाको शरीरके लैजामंगो।”

16येशू बोसे कही, “मरियम!” येशूको अबाज सुनके मरियम पिच्छु घुमके बासे हिब्रू भाषामे कही, “रब्बोनी,” जौनको अर्थ हए “हे गुरु!”

17येशू बोसे कही, “मिर पाउँ पकणके मोके मतरोक, काहेकी मए अभएतक दौवाके ठिन उपर नाए गओ हओं, बल्कि मेरे बिश्वासी ददाभइयनके ठिन जाएके उनसे कहिदे, कि मए अपनो दौवा और तुमर दौवा, और मिर परमेश्वर और तुमर परमेश्वरके ठिन उपर जातहओं।”

18मरियम मग्दलिनी गइ, और चेलनके बताइ, “मए प्रभुके देखो और बा मोसे बात करी।”

चेलनके ठिन येशू दिखानो

(मत्ती. 28:16-20; मर्क. 16:14-18; लूक. 24:36-49)

19बेहे दिन आइतबार संझाके जब सब चेला एकठिन इकट्ठा भए तओ बे फाटक बन्द करलैं काहेकी बे यहूदी समुहके अगुवासे डराने रहएं। तओ येशू आओ और बीचमे ठाणके उनसे कही, “तुमके शान्ति मिलए!” 20और इतका बात कहिके येशू बिनके अपनो हात और अपनो कोख दिखाइ तओ चेला येशूके देखके खुसी भए। 21येशू फिर बिनसे कही, “तुमके शान्ति मिलए! जैसी दौवा मोके संसारमे पठाइ हए, उइसीयए मए फिर तुमके पठाएरहो हओं।” 22इतका कहिके येशू चेलनके उपर अपनो साँस फुक्के कही, “पबित्र आत्मा लेओ। 23जौनके पाप तुम क्षमा करैगे, बिनको पाप क्षमा हुइजए हए, पर जौननको पाप तुम क्षमा नाए करैगे, बे पापको क्षमा नाए पामंगे।”

येशू थोमाके ठिन दिखाइ दइ

(मत्ती. 28:16-20; मर्क. 16:14-18; लूक. 24:36-49)

24येशू आत पेती बाह्र जनै चेला मैसे एक चेला दिदुमस कहान बारो थोमा हुवाँ नाए रहए। 25तओ औ दुस्रे चेला कहान लागे, “हम प्रभुके देखे रहएं,” तओ थोमा उनसे कही, “जब तक मए बाको हातको किलाको दुखौनो नाए देखओं और बो किलाको दुखौनोमे अपन उँगरी नाए डार लेमओं और बाको कोखमे अपन हात डारके नाए देखओं तबतक मए बिश्वास नाए करंगो, कि बा मरो भओ मैसे जिन्दा हुइगओ हए।”

26एक हप्ताके पिच्छु बाके चेला फिरसे घरके भितर रहएं, और जा चोटी थोमा फिर सँगमे रहए। और फाटक बन्द रहए, तओ येशू आएके बीचमे ठाणके कही, “तुमके शान्ति मिलए।” 27तओ येशू थोमाके अपनो हात देखाएके कही, “अपनी उँगरी हियाँ लाएके मेरे हातके देख और अपन हात लाएके मेरे कोखमे डार और शंखा करन बन्द कर बल्कि बिश्वास कर, कि मए जिन्दा हुइगओ हओं।” 28जा सुनके थोमा येशूके जबाफ दइके कही, “हे मिर प्रभु, हे मिर परमेश्वर!” और अइसे कहात येशूके पाउँमे पणो। 29तओ येशू बोसे कही, “तए त मोके देखके बिश्वास करो हए। पर धन्य हएं बे, जौन मोके नाए देखके फिर बिश्वास करीं।”

जा किताबको उदेश्य

30येशू औ फिर बहुत शक्तिशाली चमत्कार चेलनके अग्गु करि रहए, जौन जा लिप्टो भओ खलरीको चिट्ठीमे नाए लिखेगए। 31पर जा जहेमारे लिखोगओ हए, कि तुम बिश्वास करओ, कि येशू इकल्लो परमेश्वरको लौंणा ख्रीष्ट हए: और बामे बिश्वास करके बाके नाउँसे कभी फिर अन्त नाए होन बारो जीबन मिलए।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 20: THRNT

Highlight

ಶೇರ್

ಕಾಪಿ