यूहन्ना 19

येशूके क्रूसमे दण्ड

(मत्ती. 27:15-31; मर्क. 15:6-20; लूक. 23:13-25)

1तओ पिलातस सिपाहीके आदेश दइ, कि येशूके लैजाएं और बाके कोर्रा लागएं। 2और कोर्रा लगाएके सिपाही येशूके मुणमे काँटोको मुकुट लागए दइं, और राजाके लगान बारो बैजनी रंगको कुर्ता पैँधाएदइं, 3और सिपाही येशूके ढिँगै आएके कहान लागे, “यहूदीनको राजा, प्रणाम!” और बे येशूके थप्पर लगाइं।

4पिलातस फिरसे एक चोटी बाहिर निकरके आदमीनको भिडसे कही, “देखओ, मए जा आदमीमे दण्ड देनके ताहीं कुछु फिर गलत नाएपाओ। जा बात तुमके पता होबए कहिके मए जाके तुमर अग्गु लाओ हओं।”

क्रूसमे टाँगानके ताहीं सौँपनो

5तओ येशू काँटोको मुकुट और बैजनी रंगको लत्ता लगाएके बाहिर आओ। पिलातस बिनसे कही, “लेओ देखओ, जा आदमीके!” 6जब मुखिया यहूदी पुजारी और मन्दिरके पहरेदार येशूके देखीं, तओ चिल्लाएके कहान लागे, “बाके क्रूसमे टाँगओ, बाके क्रूसमे टाँगओ!” पिलातस बिनसे कही, “तुमहीं जाके लैजाएके क्रूसमे टाँगओ, काहेकी मए जामे कोइ गलती नाएपाओ हओं।”

7यहूदी समुहके अगुवा पिलातसके जबाफ दइके कहीं, “हमर नियम कानुन अनुसार जाके मारन पणैगो, काहेकी जा अपनएके परमेश्वरको लौंणा हओं, कहिके ठोकुवा करत हए।”

8जब पिलातस जा बात सुनी तओ बो बहुत जद्धा डराइगओ। 9और फिरसे पिलातस महाल भितर घुसो और येशूसे पुँछी, “तुम कहाँके हओ?” पर येशू बोके कुछु जबाफ नाए दइ। 10जहेमारे पिलातस येशूसे कही, “मोके काहे नाए बतात हओ? का तुम नाए जानत हओ कि तुमके छोड देनको अधिकार मोके हए, और तुमके क्रूसमे टाँगनको अधिकार फिर मोएमे हए?”

11येशू जबाफ दइके कही, “अगर तुमके परमेश्वर अधिकार नाए दइ हुइतो, तओ तुमके फिर मिर उपर कोइ अधिकार नाए हुइतो। जहेमारे मोके तुमर हातमे पकणबान बारो औ जद्धा पापको दोषी हए।”

12येशूको जहे जवाफके कारणसे पिलातस बाके छोडदेनके चाहो, पर यहूदी आदमी चिल्लाए चिल्लाएके कहान लागे, “अगर तए जा आदमीके छोडदेहए तओ तए रोमको महाराजा कैसरको सँगी नाए हए। जो कोइ फिर अपनएके राजा होनके ठोकुवा करत हए बो महाराजाके बिरुद्धमे होत हए।”

13पिलातस जे बात सुनके येशूके बाहिर ल्याइ, और बो न्याय करन बारो सिंहासनमे बैठो। बो सिंहासन अइसो ठाउँमे बनो रहए, जहाँ चक्ले-चक्ले पत्थर बिछे रहएं। जौनसे हिब्रू भाषामे गब्बथा कहात हएं। 14बो दिन तयारीको दिन रहए, जौन पबित्र दिनसे अग्गुको दिन रहात हए। और जा बहे समय रहए जौन हप्तामे यहूदीनको निस्तार तेवहार मानो जात रहए। लगभग दुपहारको समय रहए। तओ पिलातास यहूदीनसे कही, “देखओ, जहेहए तुमर राजा!”

15पर बे अइसे कहात चिल्लान लागे, “बाके मार डर, बाके मार डार, बाके क्रूसमे टँगा!” पिलातस बिनसे पुछीं, “का मए तुमर राजाके क्रूसमे टाँगओं?” मुखिया यहूदी पुजारी जबाफ दइके कहीं, “रोमको महाराजा कैसर बाहेक और कोइ हमर राजा नाए हए।”

16तओ पिलातस येशूके क्रूसमे टाँगनके ताहीं बिनके हातमे सौँपदइ। ताकी येशू क्रूसमे चढाओ जाए।

येशूके क्रूसमे चढाइं

(मत्ती. 27:32-44; मर्क. 15:21-32; लूक. 23:26-43)

17तओ सैनिक येशूके अपन जिम्मामे लैलैं। बे बाको क्रूस बहेके बुकानके लगाइं। और बे बाके यरूशलेम सहर मैसे बाहेर “खोपडीको डाँगा” कहान बारो ठाउँमे लैगए, जौनके हिब्रू भाषामे गलगथा कहात हएं। 18हुवाँ सिपाही येशूके और बाके सँग और दुई आदमीके क्रूसमे टाँगी, एकके दहिना घेन और दुस्रोके दिबरा घेन और येशूके बे दुई जनैके बीचमे। 19और पिलातस एक दोष-पत्र येशूक मुण उपर लिख्बाएके क्रूसमे लगाए दइ और बोमे अइसो लिखो रहए, “नासरत गाउँको येशू, यहूदीनको महाराजा।”

20बो दोष-पत्रके बहुत यहूदीके समुह पढीं, काहेकी बो ठाउँ जहाँ येशूके क्रूस उपर चढाओगओ रहए बो ठाउँ यरूशलेम सहरके ढिँगैयए रहए और बो दोष-पत्र हिब्रू भाषामे, ल्याटिन भाषामे और ग्रीक भाषामे लिखो रहए। 21तओ यहूदीके मुखिया यहूदी पुजारी पिलातससे कहीं, “‘यहूदीनको राजा’ मत् लिखियओ, पर ‘बो कही कि, मए यहूदीनको राजा हओं’ कहिके लिखदेओ।” 22पिलातस जबाफ दइ, “मए जो लिखो हओं, जा जैसो हए बिरकुल उइसी रहाबैगो।”

23जब सिपाही येशूके क्रूसमे टाँगडारीं, तओ बाको कुर्ता लैके चार खण्डा करीं। और चारौ सिपाही कुर्ताको एक-एक भाग लैं, और चदरा फिर लैलैं और चदरा नाए सिलो रहए बल्कि उपरसे लैके तरे तक बिनो भओ सिग्रो लत्ता रहए। 24सिपाही एक-दुस्रे कहीं, “जाके नाए फारएं, पर चदराके ताहीं चिट्टा डारएं, कि जा कौनको हुइहए।” जा जहेमारे भओ। “बे मिर कुर्ता अपनए-अपनामे बाँटीं, और बाहिरको चदराके चिट्टा डारीं” कहिके पबित्र-शास्त्रमे लिखो भओ बचन पुरा होन आओ।

येशू अपन अइयाके चेलनके सौँपी

25जहेमारे सिपाही अइसियए करीं। पर येशूके क्रूसके ठिन बाकी अइयाकी बहिनीया, क्लोफासकी बैयर मरियम और मरियम मग्दलिनी ठाणी रहएं। 26येशू अपनी अइया और अपनो प्रेम करन बारो चेलाके ठाणे देखके अपनी अइयासे कही, “हे अइया देख, जा तेरो लौंणा हए।” 27तओ बो चेलनसे कही, “देख, जा तेरी अइया हए!” और बहे समयसे बो चेला अपनो घरमे लैगओ, और परिवारको हिस्सा बनाइ।

येशूको मृत्‍यु

(मत्ती. 27:45-56; मर्क. 15:33-41; लूक. 23:44-49)

28अब मिर सब काम निभटिगओ हए कहिके येशू जानी, और पबित्र-शास्त्रमे लिखो भओ बचन एक-एक करके सच साबित होबए कहिके येशू “मोके प्यास लागो हए” कहिके कही। 29हुवाँ खट्टो रसासे भरो एक काटोर धरो रहए। जहेमारे कोइ खट्टो रसाके भीजो भओ स्पंजके लकणीकी नोकसे अड्काएके एक हिसपको हाँगामे बे येशूके मुँहुँमे लगाए दइं। 30जब येशू बो खट्टो रसाके चाखी, तओ कही, “अब मिर काम निभटिगओ,” और बा मुण झुकाएके अपन प्राण छोड दइ।

येशूको कोखमे भाला मारीं

31अब जा तयारीको दिन रहए, और अग्ले दिन पबित्र दिन रहए, और यहूदीनको निस्तार तेवहार होन बारो रहए। जा यहूदी आदमीनके ताहीं एक खास दिन रहए, और बे नाए चाँहत रहएं, कि जा दिनमे टँगेभए लहास क्रूसमे रहाएं। जहेमारे बे पिलातससे कहीं, कि बे लोगनके टाँग तोड दे ताकी उनको मौत जल्दी हुइजाए, और लहासके तरे लाओजाए सकए। 32जहेमारे सिपाही आएके पहिले येशू सँग क्रूसमे टँगे भएनके दुई आदमीको टाँग तोरीं। 33पर जब बे येशूके टाँग तोरनके आए तबतक बा अप्नो प्राण छोड दइ रहए, और जहेमारे बाको टाँग नाए तोरीं। 34तहुँफिर सिपाही मैसे एक जनै बाको कोखमे भालासे मारी तओ कोखसे खुन और पानी निक्रो।

35जौन आदमी जा सब देखी, बो गवाही दइ हए, ताकी तुम फिर येशूमे बिश्वास कर पाबओ। और बोकी गवाही सच्चो हए। और बो जान्त हए, कि बो सच्चो बात मस्कत हए। 36“बाको एकफिर हड्डी नाए टुटैगो।” करके पबित्र-शास्त्रमे लिखो भओ बचन सच होबए कहिके जा भओ हए। 37और फिर दुस्रो ठाउँमे पबित्र-शास्त्रमे लिखो भओ बचन अइसे कहात हए, “जौनके बे भालासे मारीं हएं, बेहीं बाके देखंगे।”

योसेफके चिहानमे येशूके दफ्नाओ गओ

(मत्ती. 27:57-61; मर्क. 15:42-47; लूक. 23:50-56)

38जे बातके पिच्छु अरिमाथिया गाउँसे आओ योसेफ नाउँको एक जनै चेला रहए। यहूदी समुहके अगुवनको डरसे, बो औ जनै पता नाए पामएं करके येशूके बिश्वास करी रहए। अब योसेफ येशूको लहासके लैजानके पामओं कहिके पिलातससे बिन्ती करी। पिलातस फिर कही, “ठिक हए, लैजाओ।” योसेफ जाएके येशूको लहासके क्रूससे तरे उतारके लैगओ। 39येशूके रातके भेँटन जान बारो निकोदेमस फिर योसेफके सँग रहए। बो लगभग: तेत्तिस किलो मिठो बासना आन बारो धुप और मिठो बासना आन बारो मूर्रको तेल एकएमे मिलाएके लैके आओ। 40अइसे बे येशूको शरीर यहूदीनके दफ्नान बारो रितिके अनुसार मखमलको लत्ताको एक लम्बी चदरामे धुप और मूर्राको तेल चादरमे लागए दइं। और येशूको लहासमे लपेटके बाँधीं और चिहानमे धरनके ताहीं तयार करीं। 41बहे ठिहाके ढिँगै जहाँ येशूके क्रूसमे चढाओगओ रहए, हुवाँ एक बगिया रहए। और बो बगियामे एक नयाँ चिहान रहए, जौनमे कोइ फिर लहासके कभु नाए धरी रहएं। 42जहेमारे बे येशूको शरीरके बहे चिहानकी गुफामे धरदइं काहेकी बो चिहान ढिँगै रहए और बहे दिन यहूदी समुहनको पबित्र दिनको तयारीको दिन रहए।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 19: THRNT

Highlight

ಶೇರ್

ಕಾಪಿ