Luqaasa Mishiraachcho 2
2
Yesusa Yeleteth
(Mato 1:18-25)
1He wode biitta bollan diza asi wurikka taybettidi xaafettana mala Oroome kawo Awugisxoosappe awajjay kezides. 2Hessika Qerenewoosa geetettizayssi Sooriya dere haariza wode hanida koyro dere taybo. 3Hessa gishshas asi wuri xaafettanaas ba dere dere bides.
4Yooseefeykka asho dabboteththan Dawite baggafe gidida gishshas Galila awuraajja giddon diza Naazirete katamappe Yuhuda awuraajja Beeteliheeme geetettiza Dawite katamappe yides. 5Izi xaafettana bishin izas giigetta dashe yelana matida Maaramira bides. 6Isttika heen dishin izis yelo wodey gakkides. 7Izakka koyro attuma naa yelidayssafe guye imaththi aqiza keeththan aqizasoy baynda gishshas naaza carqqara xaaxada miiza sinththan ishisadus.
Mehe Heemmizaytanne Kiitanchchata
8Beeteliheeme achchan dors heemmiza asati dorsa naagishe omarsara karen aqizayti deettes. 9Godaa kiitanchchayka isttako yides; Godaa bonchcho poo7oykka istta lanqen yuuyi aadhdhanaas poo7ides. Isttika keehi dagammida gishshas, 10Kiitanchchay istta, «Babbofte! Tani asa ubbaas gidiza gita ufayssa mishiraachcho ekka yadis. 11Hach kawo Dawite katama Beeteliheemen shempo dhaley yelettides. Izikka Godaa Kirstoosa geetettees. 12Carqqara xaaxetti ichchida gacino naa demmandeta; hessika inttes malata gido» gides.
13Izarakka hara daro salo kiitanchchati beettida. Xoossa galatishe,
14«Bolla salon Xoossas
bonchchoy gido;
saroteththika biitta bollan
izi dosiza
asaa ubbaas gido» gida.
15Kiitanchchati isttafe shaakettidi salo simmiin dorsa heemmizayti ba giddon issoy issaa, «Ane haa yiite Goday nuus qonccisidayssanne hanidayssa Beeteliheeme katama biidi beyoos» gida.
16Isttika eleli biidi Maaramira, Yooseeferanne miiza sinththan ichchida naaza demmida. 17Be7idaappe guye Godaa kiitanchchay naaza gishshas isttas yootidayssa ubbaa zaari yootida. 18Heemmizayti yootidayssa siyida asay wuri keehi malalettides. 19Gido attiin Maarama yo7oza wursa ba wozinan woththa denththa qoppashe gam7adus. 20Heemmizaytikka hanidayssi wurikka kiitanchchay isttas yootida mala gididi beettida gishshas siyidayssassinne be7idayssas ubbaas Xoossa galatishenne bonchchishe simmida.
Gacino Naa Yesusa Xoossa Keeth Efida
21Naazi yelettiin osppunththa gallassan qaxxarettiza wodey gakkiin aayeya iza qanththatanaappe kase kiitanchchay gida mala Yesusa geetettidi summides.#Lewe 12:3; Luqa 1:31
22-23Muse wogaa mala istti geeyza wodey wuriin Yooseefeynne Maarama guuththa naaza Yesusa Godaa Xoossa sinththe shiishshanaas ekkidi Yerusalaame kezida. Hessika Godaa wogaan koyro yelettiza attuma nay wuri Godaas dumma gidana geetettidi xaafettidayssa polanaassinne#Kessa 13:2,12 24qasseka Godaa wogaan nam7u haraphphetanne woykko nam7u haraphphe ciyeta geetettidayssa mala yarsho shiishshanaassa.#Lewe 12:6-8
25He wode Yerusalaame kataman xillonne Xoossa babbiza issi Simoona geetettiza asi dees; izikka Isra7eele nayta atoteththaa naagiza asanne Xillo Ayanay iza bolla shempida asa. 26Qasseka Kirstoosa be7ontta dishe hayqqontta mala Xillo Ayanay izas qonccides. 27Izikka he wode Xillo Ayanay kaaleththiin Xoossa Keeththe lasha gaath gelides. Naaza aayeyranne aawara Muse wogaan bessizayssa polanaas guuththa naaza Yesusa ekkidi gelida wode, 28Simooni naaza ekki idimmidi Xoossaa galatishe,
29-31«Godoo! Ne caaqqida qaalaa mala
ha7i tani ne aylley
ne ashshizayssa
ta ayfera be7ida gishshas
hi7a tana saron ekka;
asa ubbaa sinththan
ne giigsida atoteththaa
ha7i tani ta ayfera beyadis.
32Hayssika ubba deres
geemettidayssa qonccisiza poo7o;
ne dere Isra7eelesikka
bonchcho» gides.
33Iza aawaynne aaya iza gishshas haasayettida yo7ozan malalettida. 34Simoonikka istta anjjides; Maaramokka, «Daro asa wozina qofay qonccana mala hayssi Isra7eelen diza darotas dhayossinne atoteththassa; Iza ixxizaytas qasse malata gidana mala doorettides. 35Qasseka darota wozina qofay qonccana mala naaza mishay qara mashsha mala ne wozina phalqana» gides.
36Qasseka Aaseere baggafe Fanu7eele naa Haanna geetettiza cimmida nabey dawus; izakka ba koyro azinara laappun layth kumeth de7adus. 37Layththay izis osppun tammanne oyddu layth gidana gakkanaas omarsinne gallas xoomashenne woossashe Xoossa Keeththafe shaakettontta am7eteththan gam7adus. 38He wodekka shiiqada Xoossaa galatadus; Yerusalaame wozzeteth naagishe dizaytas ubbaas guuththa naaza gishshas yootadus.
Naazirete Simo
39Yooseeferanne Maaramira Godaa wogaan azazettidayssa polidi Galila awuraajjan diza baso Naazirete katama simmida.#Mato 2:23 40Guuththa naazikka diccidi minni minni bides; aadho erateththan kumides; Xoossa aadho kiyateththika iza bolla dees.
41Iza aawaynne iza aaya layththan layththan Paaziga bonchchanaas Yerusalaame beettes.#Kessa 12:1-27; Zaare 16:1-8 42Naazas layththay tammanne nam7u layth kumida wode kase lose gididayssa mala Paaziga bonchchana kezida. 43Paaziga ba7aaleza bonchchidi baso simmishin Yesusi Yerusalaamen attides. Yelidaytikka izi attiddayssa eribeettenna. 44Banara issife biza oge asaara dees gishe issi gallassa oge bida. Gido attiin izi isttara bayndayssa eridi ba dabbota achchaninne laggeta achchan dizaakko giidi koyida.
45Koyi koyidi beettontta ixxiin Yerusalaame simmida.
46Heedzdzu gallassafe guye Xoossa Keeththan tamaarsizayta giddon uttidi siyishe, asata oychchishenne istta oysha zaarishe Xoossa Keeththan dishin demmida. 47Siyidayti wuri Yesusa akeekaninne iza zaarozan daro malalettida.
48Yooseefeynne Maarama iza be7ida wode malalettida. Maaramakka, «Ta naazoo ays hayssa mala ooththadii? Ne aawaynne tani nena koyishe keehi metotettidos» gadus.
49Izikka zaaridi, «Tana ays koyidetii? Tani ta aawa keeththan daanaas bessizayssa eribeekketii?» gides. 50Gido attiin isttas izi yootidayssi gelibeenna.
51Hessafe guye isttara issife Naazirete wodhdhidi isttas azazettishe de7ides. Iza aaya Maaramakka he hanida miishshaa ubbaa ba wozinan naagashe gam7adus. 52Yesusi aadho erateththan, geesaninne saban Xoossa sinththaninne asa sinththan diccides.#1Same 2:26; Leemi 3:4
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luqaasa Mishiraachcho 2: GM
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Word for the World International
