Luqaasa Mishiraachcho 1
1
1Bonchcho Tofiloosaa! Nu achchan hanida yo7ota gishshas daro asati baas hanida mala xaafida. 2He taarikezikka koyroppe denththidi ba ayfera be7ida markkatinne Xoossa qaala yootidayti nuus aaththidayssa. 3Tanikka ta baggara xaphoppe denththada keeha naagettadanne paacca xeellada taarikeza wursa sinththe xaafettanaas bessizayssa sinththasada kaallidi xaafettanaas bessizayssa kaaleththada naagettada nees xaafana mala taas lo7o gidi beettides. 4Hayssa ubbaa ta ooththizay ne tamaardayssi tuma gididayssa nena ero guussassa.
Xammaqiza Yohannisi Yelettanayssa Kiitanchcha Gabreeley Kasetidi Yootida Qaala
5-6Herdoosi Yuhuda biittan kawotida wode Abiya geetettiza qeeseta halaqaza baggafe qeeseteththa ooso taray iza gakkida Zakaraasa geetettiza issi qeesey dees. Iza machcheyakka Elsabeexo geetettawus; izakka Aaroone bagga asa. Nam7atikka Godaa azazonne iza wogaa wosoy baynda naagidi dizaytanne Xoossa sinththan xillo asa.#1Taari 24:10
7Gido attiin Elsabeexa naa yelontta maynne gidida gishshas isttas nay baa; nam7atikka wodey bida asa.
8Zakaraasi Xoossa sinththan qeeseteththa ooso taray iza gakkiin izi ooththishin 9qeesetas diza wogaa mala Xoossa Keeththan gelidi exaane cuwasana mala exay iza gakkides. 10Exaaney cuwattishin asay wurikka karen diidi woossees.
11Godaa kiitanchchay exaaney cuwattiza sooppe ushachcha baggara eqqidi Zakaraasas beettides. 12Zakaraasikka iza be7idi keehi dagammidi babbides. 13Kiitanchchay Zakaraasas, «Babbofa! Ne woosay seetettides; ne machcheya Elsabeexa nees attuma naa yelana; iza sunththaaka ne Yohannisa gaada sunththana. 14Iza yeletan neni daro ufayettana; Daro asaykka ufayettana. 15Godaa sinththan izi gita gidana. Woyneppe oosettida cajje gidiinkka hara maththosiza ushshu gidiinkka izi uyenna; izi buro ba aayey qanththan dishe Xillo Ayanan kumana.#Tay 6:3 16Isra7eele asaappe darota istta Xoossako zaarana. 17Aawata wozina istta naytakko, azazettonttaytakka gede Xillota cinccateththaako zaarana malanne Godaas bessiza dere giigsana mala Eelaasa Ayananinne iza wolqqan Godaappe sinththara izi baana» gides.#Mil 4:5-6
18Zakaraasi kiitanchchazas, «Tani cima; ta machcheyakka cimmadus; tani hayssa aazan eranee?» giidi oychchides.
19Kiitanchchazikka zaaridi, «Tani Xoossa sinththan eqqiza Gabreele. Tanikka ha Mishiraachchoza nees gaththanaas kiitettada yadis.#Daane 8:16; 9:21 20Hekko neni ba woden polettana ta qaala ammanontta ixxida gishshas ne doonay duudana; nenikka haasayana dandayakka» gides.
21He wode derey Zakaraasi, «Xoossa Keeththaafe kezontta aazas gam7idaakko» giidi modhettishe naagides. 22Izi Xoossa Keeththaafe kezidi asa haasayssanaas dandaybeenna; malati malati besoppe attiin haasayanaas dandayontta aggiin asay izi Xoossa Keeththan Xoossafe ooraththa miish be7idayssa erides.
23Zakaraasikka ba ooso taray polettidaappe guye baso simmides. 24Hessafe guye iza machcheya Elsabeexa naa qanththatadus, ichchashanththo aginay gakkanaas asi bana be7ontta mala qotettadus. 25Izakka, «Goday ba maarotan ta leqettidayssa asaa giddofe digganaas ha wodezan hayssa taas ooththides» gadus.
Yesusi Yelettanayssa Gabreeley Kaseti Yootides
26Elsabeexa qanththatida usuppunththa aginan, Xoossi ba kiitanchcha Gabreele, Galila biittan diza Naazirete geetettiza katama yeddides. 27Izikka kawo Dawite zereth gidida Yooseefe geetettiza asas giiga uttida Maaramo geetettiza geela7oykko kiitettides.#Mato 1:18 28Yiidinne iza dizaso gelidi, «Hanne Xoossi nena anjjidaare saro! Xoossi Goday nenara dees nenikka anjjettidaaro» gides.
29Maarama kiitanchchaa haasayan keeha dagammada, «Hayssi ay giza sarokaa?» gaada yo7oza keeha qoppadus. 30Kiitanchchayka Maaramo, «Xoossi nenan ufayettiza gishshas babbofa! 31Neni qanththatana; attuma naakka yelana; sunththaaka Yesusa gaada sunththana.#Mato 1:21 32Izikka gita gidana; ubbaafe bolla gidida Xoossa naa geetettana; Godaa Xoossi iza aawaa Dawite kawoteththaa izas immana. 33Izi Isra7eele nayta bollan mernaas kawotana; iza Kawoteththaskka wurseththi deenna» gides.
34Maaramakka kiitanchchaas, «Tani adde gelabeekke shin hayssi waani hananee?» gaada oychchadus.
35Kiitanchchayka Maaramis, «Xillo Ayanay ne bolla wodhdhana; ubbaafe bolla Xoossa wolqqay ne bolla kuwasana; hessa gishshas yelettana naazi Geeshsha Xoossa naa geetettana. 36Asi yelukku; iza maynne giidi haasayza ne dabboya Elsabeexa cimateththan attuma naa qanththatada yelanaas usuppunththo agina oykkadus. 37Xoossas hanontta miishshi deenna» gides.#Medhe 18:14
38Maaramakka zaarada, «Hekko tani Xoossa aylle diikkinaa; ne gida mala taas hano» giin kiitanchchay izippe shaakettidi bides. Maarama Elsabeexo beyana badus.
39Maaramakka he wode matara eesota dendada pude gezze deren diza issi Yuhuda katama badus. 40Zakaraasa keeththe gelada Elsabeexo sarotadus. 41Elsabeexa Maarami sarokaa siyida mala qanththan diza naazi izi qanththan guppides, Elsabeexinkka Xillo Ayanay kumides. 42Izakka ba qaala dhoqqu histtada, «Maccassa ubbaafe ne anjjettidaaro; Ne qanththan diza naazikka anjjettidayssa. 43Ta Godaa aaya taakko yaada tana oychchanaas tani oonee? 44Ne saroka qaala ta siyida mala ta ulo giddon diza nay ufayssan guppides. 45Polettana giidi Goday izis yootidayssa ammanidaara iza anjjettidaaro» gadus.
Maarami Galata Woosa
46-49Maaramakka,
«Izi ba aylley
kawushshateththaa
xeellida gishshas
ta shemppiya Godaa dhoqqu
ooththada bonchchawus.#1Same 2:1-10
Ta Ayanaykka tana ashshiza
ta Xoossaan ufayettawus.
Wolqqama Goday taas
gita miishshe ooththida gishshas
hachchife sinththan asi wuri tana
anjjettidaaro gaana.
Iza sunththayka geeshsha.#1Same 1:11
50Iza maaroy izas babbizaytas
naa naa gakkanaas daana.
51Ba wolqqan daro mino
ooso ooththides;
ba wozina qofan
otorettizayta laallides.
52Kawota kawoteththafe woththides,
ashketa qasse
dhoqqu dhoqqu histtides.#Iyo 5:11; 12:19
53Gafidayta lo7o miishshan kalssides;
dureta gidikko
mela kushe yeddides.
54-55Kase nu aawatas
Abrahaamessinne iza
qommotas gida hidota qaala
naaganaas ba maareteththaa
yuushshi qoppidi
ba aylle Isra7eele
maaddides» gadus.#Medhe 17:7
56Maaramakka Elsabeexi achchan heedzdzu agina sire gam7ada baso simmadus.
Xammaqiza Yohannisa Yeleteth
57Elsabeexis yelo gallassay gakkiin attuma naa yeladus. 58Izi gutatinne dabbotikka Goday izis gita maareteth ooththidayssa siyidi izira issife ufayettida.
59Yelettida osppunththa gallas qaxxaras yida. Iza aawaa sunththan Zakaraasa giidi sunththana koyida.#Lewe 12:3 60Gido attiin aayeya, «Hanenna; iza sunththi Yohannisa geetetto» gadus.
61Isttika izis, «Ne dabbotappe Yohannisa geetettidi xeygettida asi oonikka baa» gida. 62Aaway Zakaraasi Naaza oona giidi sunththana koyidaakko malatan oychchida.
63Zakaraasikka xaafiza miish izas immana mala oychchi ekkidi sunththay, «Yohannisa» gi xaafiin asay wurikka malalettides. 64Heerakka Zakaraasa doonay pogettidi inxarsi birshettiin Xoossaa galata oykkides.
65Iza gutati wuri daro babbida. Hayssi wurikka dhoqqa gezze biittan Yuhuda deren, ubbason haasayettides. 66Hayssaka siyida asi wurikka, «Ha guuththa nay ay hananeeshaa?» giidi hanoza wursika ba wozinan oykkides; Godaa kushey tumappe izara issife dees.
Zakaraasi Yootida Tinbite
67Naaza aaway Zakaraasi Xillo Ayanan kumidi tinbite haasayshe,
68«Yiidi ba asaa ashshida gishshas
Isra7eele Xoossi galatetto.
69-70Beni wode ba geeshsha nabeta
doonan haasayettidayssa mala
ba aylle Dawite keeththan
ashshiza wolqqa
nuus denththides.
71Izi nuna nu morkketappenne,
nuna ixxizayta
kusheppe ashshees.
72Hayssa izi ooththiday
nu aawatas
ba maaroteth bessanaassa,
ba geeshsha caaqoza
yuushshi qoppanaassa.
73-75Kase nu aawaa Abrahaames
caaqqidayssa qoppana malanne
nu morkketa kusheppe
izi nuna kessiin
nuni izas baboy baynda
ooththanaassinne
nu diza wode ubbaan
ba sinththan nuna
geeshshateththaninne
xilloteththan essanaassa.
76Godaa oge giigsanaas
ne izappe sinththara biza gishshas
ta naazoo neni wogga
Xoossaa nabe geetettana.#Mil 3:1
77Asay ba nagarappe
maarettida gishshas
deres atoteththa erateth
ne immana mala,
78nu Xoossaa lo7o maaroteththaafe
dendidayssan Saloppe nuus
arshey kezides.
79Hessika dhuman dizaytassinne
hayqo kuwa giddon dizaytaska
poo7isana malanne
nu tohotakka saroteththa
oge kaaleththanaassa» gides.
80Guuththa naazikka diccides; Ayanankka minnides; Isra7eele asaas qonccen beettana gakkanaas bazzo biittan de7ides.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luqaasa Mishiraachcho 1: GM
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The Word for the World International
