Иоанн 2
2
Канаса рьвяямань илась
1Сяда меле колмоце шиня Галилеянь Кана ошса ётафтовсь рьвяямань ила, и Иисусонь тядяц ульсь тоса. 2Иисусовок тонафниензон мархта тертьфоль тя илати. 3Мзярда тоса ашезь сата винасна, тядяц пшкядсь Иисусти: «Синь винасна аделавсь». 4Иисус мярьги тейнза: «Вай, ава, кали тя Монне али тонне тевсь? Монь пингозе нинге ашезь са». 5Тядяц пшкядсь покодихненди: «Мезе Сон мярьги, сянь тиесть».
6Тоса ульсть кевста тиф кота оцю кукшетть. Синь путфтольхть тоза евреень аруяфтомань койхнень ванфтоманкса. Эрь кукшенти тяльгондсь кафтошка али колмошка мера#2:6 мера – тя сядошка литра. ведь. 7Иисус корхтай покодихненди: «Пяшкодесть кукшеттнень ведьта». Пяшкодезь синь вельф. 8И мярьги тейст: «Тяни амолдада и кандость рьвяямань илань вятити». Сят амолдасть и кандозь. 9Мзярда илань вятись копордась ведьта, кона тиевсь винакс, – а сон ашезе сода, коста тя винась; содазь аньцек покодихне, конат амолясть ведь, – эста илань вятись тердезе рьвяяйть 10и корхтай тейнза: «Эрь ломанць васенда канды цебярь вина, а мзярда инжихне иредихть – сяда кальдявня; а тон тнярс ванфтыть цебярь винать».
11Тяфта Иисус Галилеянь Кана ошса тиезе васень тяштьксонц и тянь вельде няфтезе Эсь оцюшинц, и тонафниенза кармасть кемама Тейнза.
12Тяда меле Сон сась Капернаум ошу: Сонць, тядяц, брадонза, тонафниензовок; тоса ащесть аф куватьс.
Иисус панцесыне Шкаень кудста мишендихнень-рамсихнень
(Матф. 21:12,13; Марк 11:15-17; Лук. 19:45,46)
13Малаткшнесь еврейхнень Очижисна, и Иисус тусь Иерусалиму. 14Сон няезе: Шкаень кудса мишендевсть букат, учат, гуленят, тязк озсефтольхть ярмаконь полафнихне. 15Иисус тись лама пикскаста локша, сембонь панезень Шкаень кудть пирьфстонза учаснон и букаснон мархта; ярмаконь полафнихнень ярмакснон ёрязень келес, а шраснон веляфнезень. 16Гуленянь мишендихненди мярьгсь: «Сявость тяста семботь тянь; и тясть тиенде Алязень кудонц мишендемань-рамсемань вастокс!» 17Ся ёткть Сонь тонафниенза лятфтазь, мезе азфоль Сёрматфксса: «Кельгомась Тонь кудцти пидесы седизень».
18Тянь каршес еврейхне мярьгсть: «Кодама тяштьксса Тон няфтьсак тейнек, ули али аш азорксшице тяфта тиендемс?» 19Иисус мярьгсь тейст: «Калафтость тя Шкаень кудть, и Мон колма шиста путса сонь меки». 20Еврейхне каршезонза: «Тя Шкаень кудть эса путсть нильгемонь котува киза, и Тон колма шиста путсак сонь?» 21Но Иисус, Шкаень кудть колга корхтамста, корхтась Эсь ронгонц колга. 22Мзярда Сон вельмась кулофнень эзда, эста тонафниензон мяльс лядсь азфоц, и кармасть кемама Сёрматфксти и валти, конань азозе Иисус.
Иисус содасыне ломаттнень потмонь мяльснон-арьсемаснон
23Мзярда Иисус Очижинь ёткова ульсь Иерусалимса, ламотне кемасть Тейнза тиф тяштьксонзон няемста. 24Сонць Иисус марнек седиенц тейст ашезе панчсе, сяс мес содазень, кодапт синь. 25Тейнза ашезь эряв: кивок мезевок азондоль ломаттнень колга, Сон Сонць содазе, мезе эрь ломанть седиса.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Иоанн 2: ОС16
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Библиянь ётафтома институтсь, 2016
