Иоанн 1
1
Валсь арась ломанькс
1Ушетксса ульсь Валсь,
Валсь Шкайть мархтоль,
и Валсь ульсь Шкай.
2Сон ушетксстокиге Шкайть мархтоль.
3Сембось вельденза тиевсь,
Соньфтомонза мезевок ашезь тиев.
4Сонь эсонза ульсь эряма,
и эрямась ульсь ломаттненди валдокс.
5Валдсь шобдашиса валдопты,
сон изь сяськов шобдати.
6Сась Шкаень ширде кучф ломань, лемоцоль Иоанн. 7Сон сась кулянь пачфтема, Валдть колга азондома, тянь вельде сембе кемальхть. 8Аф сон ульсь Валдсь, сон кучфоль Валдть колга азондома.
9Ульсь афкуксонь Валда,
кона сась масторлангти
и валдоптозе эрь ломанть.
10Валдсь масторлангсоль,
и масторлангсь Сонь вельденза тиевсь,
аньцек масторлангстотне ашезь сода Сонь.
11Валдсь сась Эсь масторозонза,
но Эсь ломаненза ашезь васьфте Сонь.
12А конат васьфтезь и кемасть Тейнза,
сятненди макссь вий арамс Шкаень идькс,
13конат шачсть аф вер эзда, афи ронга,
афи мирдень мяльста-арьсемаста,
а Шкайть эзда.
14Валсь арась ломанькс
и эрясь ётксонк
пароказнеда и видешида пяшкотьфста.
И минь няеськ Сонь оцюшинц, ся оцюшить,
кона максф фкя-тяка Цёрати Алянц эзда.
15Иоанн азондсь колганза и вярьгак вайгяльхть корхтась: «Тя – Ся, конань колга азондонь: мельган Молись мондедон оцю, сяс мес ульсь мондедон инголи».
16И Сонь пяшксешинц эзда
тейнек сембонди максовсь
пароказнеть лангс пароказне.
17Вдь койсь максф Моисеень вельде,
а пароказнесь и видешись састь
Иисус Христость вельде.
18Шкайть кивок мзярдовок ашезе няе.
Фкя-тяка Шкай Цёрац,
кона Эсь Алянц маласа,
панжезе Сонь тейнек.
Иоанн Кстиндайть куляц
(Матф. 3:1-12; Марк 1:2-8; Лук. 3:15-17)
19Вов мезе азондсь Иоанн, мзярда еврейхнень оцюнясна кучезь Иерусалимста озксвятихнень и левиеннетнень сонь кизефтемонза: «Кият тон?» 20Иоанн азозе, ашезе сёпа, видеста мярьгсь: «Аф мон Христоссь». 21Сонь кизефтезь: «Кият ина? Тон Илиясь?» Сон мярьгсь: «Аф». «Тон ся учсеф пророксь?» Сон каршезост мярьгсь: «Аф». 22Тейнза мярьгсть: «Кият ина тон? Мезе астама колгат кучиеньконди, мезе тонць азондат эсь колгат?» 23Сон мярьгсь:
«Мон шавмодаса серьгядить вайгялецан:
"Видептесть кить Азорти"#1:23 Исаия 40:3,
кода мярьгсь Исаия пророксь».
24Кучфне ульсть фарисейхнень ёткста. 25Синь кизефтезь Иоаннонь: «Мес ина кстиндакшнят, кда тон аф Христоссь, аф Илиясь, аф ся пророксь?» 26Каршезост Иоанн мярьгсь: «Мон кстиндан ведьса; но ётксонт ащи Ся, конань тинь аф содасасть. 27Сон Ся, кона моли монь мельган, но Сон мондедон оцю. Мон Сонь сандалиянзон юкссемска аф кондястян».
28Тя тевсь ульсь Вифавараса, Иордан ляйть шинь стяма ширдень трвасонза, коса кстиндакшнесь Иоанн.
Иисус – Шкаень Верозсь
29Омбоце шиня Иоанн няезе ширезонза сай Иисусть и корхтай: «Вов Шкаень Верозсь#1:29 вероз – агнец, ягнёнок, кона сявсы Эсь лангозонза сембе масторлангонь пежеть! 30Сон Ся, конань колга мярьгонь: "Мельган моли Ломань, кона мондедон оцю, сяс мес Сон ульсь мондедон инголи". 31Мон ашине сода Сонь; но сань ведьса кстиндама, Сонь содафтомонза Израилень ломаттненди».
32И Иоанн азозе: «Мон няине, кода Шкаень Ваймопожфсь менельста гуляня лаца валгсь Сонь лангозонза и ащесь лангсонза. 33Мон ашине сода Сонь; но ведьса кстиндама Кучиезе мярьгсь тейне: "Ся, кинь лангс няйсак Ваймопожфть валгоманц и лангсонза ащеманц, Ся и ули Иняру Ваймопожфса кстиндайсь". 34Мон тянь няине и азондса: Сон – Шкайть Цёрац».
Иисусонь васень тонафниенза
35Омбоце шиня Иоанн и кафта тонафниенза тага ащесть тоса. 36Иоанн няемок аф ичкозе моли Иисусонь, мярьгсь: «Вага Шкаень Верозсь». 37Ня валхнень марямста кафцьке тонафниенза тусть Иисусонь мельге. 38Иисус шарфтсь и няезе – сят молихть мельганза, и кизефтезень: «Мезе тейнть эряви?» Синь каршезонза мярьгсть: «Равви, – лиякс мярьгомс: тонафты, – коса эрят?» 39Иисус корхтай тейст: «Аряда, и няйсасть». Пингсь ульсь кемонце частть маласа. Синь тусть мархтонза и няезь, коса Сон эряй; и ащесть пялонза шоподемс.
40Фкясь кафттнень эзда, кит марязь Иоаннонь валонзон и тусть Иисусть мельге, ульсь Андрей, Симон Пёторонь брадоц. 41Андрей васендакиге вешезе Симон брадонц и азозе тейнза: «Минь муськ Мессиять» – тя валть смузец: Христос.
42И Андрей вятезе Симононь Иисусти. Иисус варжакстсь лангозонза и мярьгсь: «Тон – Симонат, Ионань цёрацат; тон лемдеват Кифакс» – тя валть смузец: кев, Пётр.
Иисус тердьсыне Филиппонь и Нафанаилонь
43Омбоце шиня Иисус срхкась Галилеяв. Сон музе Филиппонь и корхтай тейнза: «Мольхть мельган». 44А Филипп ульсь Вифсаидаста, сяка ошста, костоннетольхть Андрей и Пётр. 45Филипп музе Нафанаилонь и корхтай тейнза: «Минь муськ Сянь, конань колга Моисей сёрмадсь койса и конань колга сёрмадсть пророкневок, – Назарет ошста Иисусть, Иосифонь цёранц». 46Нафанаил кизефтезе: «Дяряй Назаретста мзярдовок лисендсь кодамовок пара?» Филипп корхтай тейнза: «Сак и ванк».
47Иисус няезе Нафанаилонь маладоманц и мярьгсь колганза: «Вага афкуксонь Израилень аля, кона мзярдонга аф васькафни». 48Нафанаил корхтай Тейнза: «Коста Тон содасамак?» Иисус мярьгсь каршезонза: «Филиппонь тердемда инголе Мон няихтень ни тонь смоква шуфтть ала». 49Нафанаил пшкядсь Тейнза: «Равви! Тон – Шкайть Цёрацат, Тон – Израильть Оцязороцат». 50Иисус мярьгсь каршезонза: «Тон кемат сяс, мес азыне тейть: "Мон няихтень смоква шуфтть ала"; тон кармат няема сяда оцю тефт». 51И поладозе: «Видеста корхтан тейнть: тинь няйсасть панжада менельть и Ломанень Цёрати куценди-валгонды Шкаень ангелхнень».
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Иоанн 1: ОС16
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Библиянь ётафтома институтсь, 2016
