Lukasa 22
22
O Yudasa wihidee la wato o Yesusu wihidoaka o nyawaika
Matiusu 26:1-16; Maruku 14:1-11
1De ahao itigioka o Yahudi ma nyawa manga rame-rame hinooto, angamoi o Totilakuru ma rame-rame ma oraha ngade-ngade adonoka, de o Totilakuru ipaha de ma dawangeino imulaenge ihirame-rame o Roti abe ko Iwa ma Ragi ma rame-rame. 2Ho ma oraha gea de o hidemo ma nyawa Ma Jouika manga hohidimono de ona yotobadotoko o Musa ai Paretaino, ona gea yomakoketemo la yomalingiri o ngekomo abe o Yesusu ka idadi iwitaoko de iwitoma. Masara yomakoketemo de yomahitiari ato ufa hiadono o Yesusu iwitaoko de genangino o huruhara idadi o kokawaahaka, angamoi duru yamodongo o nyawa yowoe-woeika.
3De abe ma oraha gea o Ibilihi ma haeke imahipooteke o Yudasa Isikariotika, abe una gea yangimoi de yahinootoino abe iwitobanii-niiki o Yesusika. 4De imahipootekoka ho o Yudasa wosoboka de watutumu ona abe o hidemo ma nyawa Ma Jouika manga hohidimono de abe Ma Jou ai Tau yotobagoa-goana to onangoo manga hohidimono. De gea ona yomakoketemo abe ma titi ma ngekomo hokokia la una wihidoaka o Yesusu onangika. 5De ona duru yogarago abe o Yudasa woigo o Yesusu wihidoaka onangika, ho yomahiketehibehehongo la o tiwi iwihidoaka o Yudasika abe gea idadi ai datorino ma hasili. 6De o Yudasa unangoo wosanangi de manga behehongo ho womulaenge wolingiri ma ngekomo de ma oraha la ufa o nyawa manga himangoka de wihidoaka o Yesusu onangika.
O Totilakuru ma rame-rame ma ngolo-ngolomoka
Matiusu 26:17-25; Maruku 14:12-21
7De ipahainoli de adonoka ma wange ihira o Roti abe ko Iwa ma Ragi ma rame-rameino, abe ma wange ihira-hiraka gea de kiani o tau homoi-homoiika yomadoma o Totilakuru ma domba. 8De ma wange gea de o Yesusu wahibehehongo o Peturusu de o Yohanesika wato, “Ngini niloikohi de ninahidiaiohi nanga Totilakuru ma rame-rame ma ngolo-ngolomo la bootino ka idadi homakokutuono holomo.”
9De ona yahinooto iwileha ato, “O kiaka Ngona noigo la ma inomo ngomi minahidiai?”
10De wopaluhu wato, “Ngini niloikohi doka o Yerusaleeme ma kotaiye. De doka ngini niaika de ahao niwimake womatengo o akere wohiono-onoko de ai boto ma amoko. Una gea kiani niwiniiki hiadono wowohama o tau moiika. 11Genangoka de ahao womatengoli niwimake abe o tau ma dutu, de unangika niwitemo kiani hokonaa, niato, ‘Hobata, mia guru wohibehehongo wato, “Ma hibau-bau ma ngi o kiaka abe bootino Ngohi de ihinii-niiki genangoka miolomo abe o Totilakuru ma rame-rame ma inomo?”’ 12De gea ma tau ma dutu ahao una winihidumutu nginika o ngi moi duru ilamoko abe ma dangiri ilape hinootoiye. Dakenangoka ma kiahonanga mata-mata ingodu-ngodumoka. De genangoka ngini ninahidiai nanga Totilakuru ma rame-rame ma ngolo-ngolomo.” Hokogea o Yesusu ai behehongo abe ona yahinootoika.
13Wahibehehongo ibooto de ahao ona yahinooto gea yosobo yoiki doka ma kotaika. De ma kotaka aika de idadi duru imaketero hoka o Yesusu wotemoka mata-mata. Ho ma ngi gea yomahiadonoka de ona ihidiai o Totilakuru ma rame-rame ma inomo ka hiadono ihidiai ibooto.
14De ipahaino ma wange ihohomuku de ahao Una de yangimoi de yahinooto abe wahiromangoka ai hidingoto ma nyawa, ona yomatoomuino de yogogeruku ihigororomino ma mejaka la yolomo. 15De o Yesusu wotemo onangika wato, “Ngohi ma dekaninohi tododamaa de tongano-nganono ma oraha naa ena, abe duru toigo la ahi kokangela ko ihidaenuahi de ka idadi o Totilakuru ma ngolo-ngolomo naa homakokutuono holomo. 16De naa tagou-goungu tinihingahu, naa ma batingi abe o Totilakuru ma ngolo-ngolomo gea ko tolomokauahi. Masara ahao abe ma oraha ahi Baba Ma Jou wahikoano o nyawa, gea de ahao ka idadioli tolomo ma Totilakuru ma ngolo-ngolomo. Abe ma oraha gea ahi Baba wohingodumoka o Totilakuru ma rame-rame ma titi ho ai duduhunu o nyawaika duru ingodumoka, ahao gea ka idadi taniikoli.”
17De ahao o Yesusu waleino o angguru ma gohaka ma teongo o mangko moi de wohitarimakaseokahi Ma Jouiye de wahidoaka iwinii-niikika la yomaloliokere o mangko moi. De wahidoaka de gea wotemo onangika wato, “Ngini nimaloliokere ma mangkoino naa, 18angamoi naa ma batingi abe o angguru ma gohaka ma teongo gea ko tokerokauahi. Masara ahao abe ma oraha ahi Baba Ma Jou wahikoano o nyawa, gea de ahao ma hungioli tokere.”
19De ahao o Yesusu o roti waleinoli de wohitarimakaseokahi Ma Jouiye. Wohitarimakase ibooto de o roti gea wakokabelaka de wahikokidoaka iwinii-niikika de wotemo onangika wato, “Abe ma roti gea tinihidoakikaka gea ka idadi niakokiolomo, abe gea ena hoka to Ngohi ahi roehe abe ahao tomahidoaka ma titi ngini. Ho naa de imahikaika ngini nihigali-galioli nidiai la nimahihohininga Ngohi.”
20De ipaha manga inomo yolomo ibooto de ahao waleinoli o angguru ma gohaka ma teongo o mangko moi de genangoo wohitarimakaseokahi Ma Jouiye de wahidoaka iwinii-niikika la yomaloliokere o mangko moi gea. De wahidoaka de ahao wotemo onangika wato, “Ngini nimaloliokere ma mangkoino naa, angamoi ma angguru gea hoka to Ngohi ahi awunu abe ahao ikopoa ma titi ngini. Abe ahi awunu gea idadioka Ma Jou ai behehongo ma hungi ma dodunguu, angamoi ahao ahi awunu ikopoauku la ka idadi o nyawa manga ngoe manga howono aofioka genangino.”
21De o Yesusu wogila-gilali wotemo wato, “Masara naa moi tinihingahu abe idadi o heheranga ma demo nginika, angamoi to ngone nanga mejaka naa de naga womatengo abe ahao una wohihidoaka Ngohi o nyawaika abe ihilawa-lawana! 22Igoungu, Ngohi o Nyawa ma Ngofaka kiani tohonenge duru imaketero hoka Ma Jou ai hidee abe duru ma dekanoka. Masara hiokoo una gea abe wohihidoaka ahi musuika, angamoi ahao ai hohowono ma kangela duru kohaamoko wamake.” 23Hokogea o Yesusu wotemo de ahao ona yomakoketemo de yomakokeleha ato, “Done onaguna ngoneino abe ma datoro ma dorou gea ahao yodiai?”
24De ahao ona yomulaenge yomaketeribuutu abe ma titi ahao dokengika de onagonahi duru yokurutiye Ma Jou ai himangoka abe ma oraha Una wahikoano ai nyawaika. 25De o Yesusu wotemo wato, “O duniaka naa ma kokoano de ma nyawa yokokurutiye ona ka ihikaika yahulo-huloko de ka ihikaika yaribuutu manga kokawaahaika. De ngaro hokogea manga hininga masara yomahiromanga ato ona o kokawaaha manga duduhunu. 26Masara ngini naa, ufa nia hiningaka nimaaduru abe hoka onangoli manga hininga. Abe nginioka onagona dika abe nginiohi duru de nia horomatioka, gea kiani duru nimahitipokouku la nia dodiawoika niatobaleleani. De abe niato nidadi nia dodiawo manga hihira, gea koaho nidadi hoka to ona manga gogilaongo.”
27“De naa moi tinileha la nimafikirohi. Nako o tau ma goronaka, ka onagonahi yokurutiye, abe una wolo-olomo ma mejaka eko una abe wotobaleleani ma inomo gea? Boteua una abe ma mejaka wolo-olomo ka unangohi wokurutiye! Masara abeika Ngohi naa! Angamoi ngaro Ngohi ti ngini nia Baluhu idodutu masara ka tinitobaleleani nginika! Ho koaho nimaaduru abe hoka Ngohioli ahi hininga la nia dodiawoika niatobaleleani!”
28De o Yesusu wogila-gilali wato, “De naa Ngohi duru tinidosanangi nginika angamoi ngaro o nyawa ihihikokangela Ngohino masara ko nihinoaikaua. 29De naa tinihingahu abe ahi Baba wohihidoaka Ngohino la ahao dokengika ma oraha wahikoano de Ngohioo ka idadi tahipareta o nyawaika. De hokogenangoo tinihidoaka nginika la ahao nginioo o nyawaika niahipareta. De gea tinihidoaka nginika mangale ma titi ngini ko nihinoaikaua. 30De hongoli tinihidoaka la ahao dokengika gea de ngone ka idadi homakokutuono holomo ahi mejaka. De nagali abe ngini ahao niborigogeruku abe o kadera ma hohailoauku la niatailako de niatobauru-urusu o Isiraele ma nyawa manga doomu ngimoi de hinooto gea.”
O Yesusu wahingahuohi abe o Peturusu ahao wioluku
Matiusu 26:31-35; Maruku 14:27-31; Yohanese 13:36-38
31De ahao o Yesusu witemo o Peturusika wato, “Simono, naa moi tonihitiari, de ahi demo marai inihiheranga ngonaika. Angamoi o Ibilihi ma haeke ena gea imagahoko la ato initaili ti ngini nia hingounu ma titi o kokangelaino. De abe naa itigioka idadi ena initaili ngonaika. 32Masara Ngohi toniniata ma titi ngona naa la ufa nomahipipidili ani ngongakuino. La ahao ma oraha norehene masara ipahaino de notobaka ho nolioka o totiai ma ngekomino, de gea ahao ka idadi ani dodiawo naa nahiputurungu manga ngongakuoka.”
33Masara abe o Yesusu wotemo wato ahao o Peturusu worehene, gea ena ma demo o Peturusu ko wodafongua, ho una wato, “Ahi Baluhu, ngohi naa tomahidiaioka la ngaro inihingohama o bui ma tauika eko ngaro inihohonenge, ma ko toninoaua Ngona, ho ngaro homahidohonenge ka ma moi masara gea ka todafongo dika!”
34Masara o Yesusu wipaluhu wato, “Peturusu, abeika notoihene ahi demoino naa tonihingahu ngonaika. Bootino o futu naa dika abe ko itebinuahi, de ngona naa nohioluku ma hangeou. Abe o kuru-kuru ko atailuahi de ngona naa nohioluku ma hange ibooto abe nohihioriki Ngohino.”
Abe iwinii-niiki ona kiani yomahidiaioka ma oraha yotagi-tagi
35De ahao o Yesusu waleha iwinii-niikika wato, “Ma dodihiraino ma oraha tinihidingoto la o Abari ma Rorahai niahingahu-ngahu de ma oraha gea naga nia kuranga? Abe ma dihiraino gea tinihibehehongo la ufa nia tiwi nia popojeuku nimagao, de ufa niao nia beta-beta abe biaha nia kiahonanga nihilulu genangino, de o sandaala ufa ma doduruuru nimagao. Ho nia dodagi gea de naga nia kuranga?”
De ona yopaluhu ato, “Koua. Mia kuranga duru ko iwa.”
36De ahao o Yesusu wotemo onangika wato, “Masara abe ma oraha naa imakohowonoka. Ho nako naga nia tiwi nia popojeoka de nia beta-beta la nia kiahonanga nihilulu genangino, gea kiani nimagao la nimahidailako. De hokogenangoo ngini onagona dika abe ko iwa nia humaranga koaho nia baju moiani nifukunu la genangino ma tiwi de ka idadi o humaranga nimaijaino. 37Angamoi ahao o nyawa inatae de inahiromanga ngoneino ato ngone o dorou ma nyawa, de manga demoino gea ihingodumu abe ma dodihiraino atulihukuoka Ma Jou ai Demo-demoka ma titi Ngohi. Abe ma demo gea itemo ato,
‘O nyawa yatae Unangika ato Una ka wotobalawana ma paretaika.’ # 22:37
Yesaya 53:12
De igoungu ahao gea kiani ihingodumoka angamoi ma oraha naa de Ma Jou ai Demo-demoino mata-mata abe ihidumutu Ngohino, gea imulaengoka ihingodumu mata-mata.”
38De ona yotemo Unangika ato, “Mia Baluhu, ngomioka naga mia humaranga o gahumu hinooto.”
De Una wopaluhu wato, “Gea iniwedono.”
O Yesusu womaniata o Saitunu ma lokuoka
Matiusu 26:36-46; Maruku 14:32-42
39De ipahainoli de o Yesusu wohupu ma kotaka de waino gea la woiki o Saitunu ma lokuiye, angamoi hokogea to Una ai biaha o futu-futuiye. De ona iwitobanii-niiki onangoo yomakiniiki de de Una yodoa ma lokuiye. 40De yomahiadonoka ma ngi de Una watemo onangika wato, “Ngini kiani nimaniata la ufa o hiatara inihikala nginika la hiadono niahowono.”
41De ahao o Yesusu womatingaka onangino de woiki hatoli ma gurutika la ka womatengo dika de watilabukuku womaniata wato, 42“Baba, nako ka idadi, iti ufa gea ahi kangela abe itigioka idadi Ngohino. Masara abe togahoko la ahi huha Ngohioka nagorakoka, ma, iti ufa to Ngohi ahi mau naniiki, masara tato Ngona dika Baba ani mau naniiki.” [43De womaniata ipaha de ahao o malaekata woboa o Horogaka de wauku Unanguku la wihiputurungu o Yesusika. 44De to Una ai hininga duru ihuhaholi, ho utuohi womaribuutu la womaniatoli de ai hininga ma gahumu. De hokogea ma amoko ai huha hiadono ai gahauku ihupu ai badangino de gea ma rupa o awunu abe itubukuku ai badangoka de dau ma tonakuku.] 45De womaniata ibooto de womaokoino de wagilio abe iwinii-niikika, de waika de wamake ona yakokikiookoka ma titi onangoo naga de manga hininga ma huha hiadono manga giooko yahikalaka. 46De o Yesusu watumomiki de wataere onangika wato, “Ngini naa adodoa ho inikiooko? Kiani niwangoro de nimaniata Ma Jouiye la ufa ma dorou inihiatara la hiadono niahowono Unangika.”
O Yesusu iwihidoaka o nyawaika la iwitaoko
Matiusu 26:47-56; Maruku 14:43-50; Yohanese 18:1-11
47De o Yesusu ai gogiriakahi wotemo iwinii-niikika gea de naga o nyawa manga ngoe yoboaino, de o Yudasa abe una yangimoi de yahinootoino, una wahihira-hira. De o Yudasa womahitigino la ai tabea womahimatoko abe wibounu o Yesusika. 48De o Yesusu witemo unangika wato, “Yudasa, done sarakia ani hininga? Angamoi Ngohi o Nyawa ma Ngofaka de gea nohihidoaka ahi musuika ma titi nohibounu Ngohino!”
49De abe iwinii-niiki utu ka de yamake abe o kia idadi Unangika de iwileha ato, “Mia Baluhu, sarakia, koaho minihiboa abe miahilawana de mia humaranga onangika?” 50De ka itodokanino de womatengo iwinii-niikino ai humaranga wagoraka de o nyawa womatengoika wioto hiadono ai ngauku ma nirakoka wahahangoka. Abe una gea ai ngauku wahahangoka, una manga hidemo Ma Jouiye manga baluhu wokokurutiye ai gilaongo.
51De o Yesusu wotemo iwinii-niikika wato, “Ibootohi nialawana!” De ahao ma gilaongo gea ai ngauku wagoraka de wohigilio la wihitogumu unangika. 52De ahao o Yesusu watemo o nyawa yowoe-woe manga hohidimonika, abe naga utu o hidemo ma nyawa Ma Jouiye yokokurutiye de utu yotobagoa-goana Ma Jou ai Tau manga hohidimono, de nagali o Yahudi ma nyawa manga balu-baluhu utuinoli. Ho watemo onangika wato, “Adodoa ho hiadono nia humaranga de nia boboha nimagao la niato nihitaoko? Niato bote Ngohi naa o nyawa ma dorou abe totobalawana nanga popareta ho hiadono kiani naga nia dae la ka idadi nihitaoko? 53Masara nengokadauinohi o wange-wangeiye Ngohi naga de de ngini Ma Jou ai Tauoka abe totobadotoko, masara gea de ko nihitaokua. Ma gea adodoaua, angamoi ma oraha naa naga idadioka ti ngini nia oraha la ti ngini dika nia hininga ma igo ilaku, abe ma oraha naa o fufutu ma kuaha itagi o duniaka.”
O Peturusu womahipongono abe o Yesusika wioluku
Matiusu 26:57-58; Matiusu 26:69-75; Maruku 14:53-54; Maruku 14:66-72; Yohanese 18:15-18; Yohanese 18:25-27
54De ahao ona iwitaokino o Yesusu de iwiao manga hidemo Ma Jouiye manga hidimono wokokurutiye ai tauika. De o Peturusu una wihidoo-doduru o Yesusu. 55De hokogea wihidoo-doduru ka hiadono o tau gea ma loaika womahiadono. De ma loaka gea naga manga huhuloko yamuruono naga yogogerukuoka, angamoi o uku moi yomadauloka genangoka. Ho o Peturusu waika de womahisapurika de manga huhuloko gea. 56De ipaha de naga momatengo o nyawa manga huhuloko mimake o Peturusu angamoi ma uku ma dararono iwidararono ai himangika, de muna duru midamaana unangika. De ahao muna motemo mato, “O, marai naa una kangano naga de de Una gea abe doka iwiurusu.”
57Masara o Peturusu ka womahipongono wato, “Hobata, koua! Ngohi ko tihiorikua Una gea!”
58De ipahaino naga womatengoli abe unangoo wimake o Peturusu de ahao witemo unangika wato, “Ngona naa to Una ai doomuino abe niwitobaniiki Unangika!”
Masara o Peturusu womahipongonoli wato, “Koua! Ko ngohiua!”
59De ngade-ngade o jam moioli ipahaino de ahao womatengoli wimake de duru wihioriki ho wahingahu onangika de ai demo ma bobuturungu wato, “Ngohi naa ko tahowonua de duru tohioriki abe una naa witobaniiki Unangika abe ma oraha naa iwiurusu, angamoi itararono unangoo naa o Galilea ma tonakoka ma nyawa!”
60Masara o Peturusu ka de woihene ai demo de womademo wato, “Koua! De duru ko tomangaratiiua ani demo ma dumutu hokokia.” Ka de ai demo gea ipaata ai uruoka de aino de o kuru-kuru ataili. 61De duru ma oraha gea de nanga Baluhu idodutu doka womadogilioro de womalega o Peturusika. De ahao o Peturusu wohininga abe nanga Baluhu ai demo kanganoika abe wato, “Bootino o futu naa dika abe ko itebinuahi, de ngona naa nohioluku ma hangeou. Abe o kuru-kuru ko atailuahi de ngona naa nohioluku ma hange ibooto.” 62Ho o Peturusu ka wanoaka ma tau ma loa gea de wohupuika de ahao duru woari-ari ma titi ai hininga ma huha.
O tentara ma nyawa iwihohedu de iwipoha-poha o Yesusika
Matiusu 26:67-68; Maruku 14:65
63De ahao ma nyawa abe iwigoa-goana o Yesusu ona iwihohedu de iwipoha-poha Unangika. 64De ai lakoko apakitoka de o ngoere ma belaka la ufa wamake. De ahao ona yomakawalimi iwitidingi de ahao iwileha ato, “Ei, nako Ngona igoungu naga ani sosawaro Ma Jouoka de aino, abeika nomihingahu onagona initidingi naa? De naangoli, sarakia onagona initidingi? Abeika nomihingahu!” 65De nagali manga demo utu ma ngoe abe iwihitipokouku de iwingelo Unangika.
O Yahudi ma nyawa manga hohidimono abe yotobauru-urusu o nyawa gea o Yesusu wahimanga
Matiusu 26:59-66; Maruku 14:55-64
66De ipahaino o wange ipotokaiye de ahao o Yahudi ma nyawa manga hohidimono abe yotobauru-urusu o nyawa ona mata-mata yomatoomuino manga hiurusu ma tauoka. Abe ona utu manga hidemo ma nyawa Ma Jouiye manga hohidimono, de nagali abe yotobadotoko o Musa ai Paretaino. Ho yomatoomuinoka de ahao o Yesusu iwiao onangika la womaokoino manga hima-himangoka. 67De ona iwileha Unangika ato, “Sarakia, Ngona nagou-goungu nanga Mesia abe ma dodihirainohi de Ma Jou wonahibehehongoka la ahao wonahikoano?”
De Una wapaluhu wato, “Ngaro hoka Ngohi tomahingahu masara ngini ko nihingakua ahi demoino. 68De nako Ngohioli tinileha ma titi o kia hiadono ko nihingakua, gea nginioli ko nipaluhua. 69Masara itigioka ma oraha abe Ngohi o Nyawa ma Ngofaka ahao togogeruku Ma Jou Wokokurutiye ai nirakoka, de genangoka ahao togogere ka hiado-adonika.”
70De ona mata-mata iwileha ato, “Ho mode gea nomahiromanga nato Ngona naa Ma Jou ai Ngofaka?” De wapaluhu wato, “Nia demoino gea de duru niagoungu.”
71De ahao ona yomakoketemo ato, “De naa ngone ma hirete hoihenoka to Una ai demo ai uruino abe wingelo Ma Jouika wato Una de Ma Jou hoimoi dika. Ho adodoa ho o hakihii ma nyawa halingirohi la iwitae Unangika gea? Ngaro ufa dika!” Hokogea manga ngamo ma demo yomakoketemo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lukasa 22: MJDD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
