Lukasa 21
21
Momatengo o huha ma nyawa ami hidoaka
Maruku 12:41-44
1De ma oraha gea o Yesusu nagahi Ma Jou ai Tauoka angamoi kanganoinohi de wadotoko o nyawaika. De ahao Una womalega Ma Jou ai Tau ma petika, abe ma peti ma goronauku gea o nyawa yotobanoa manga tiwi abe yato yahidoaka Ma Jou ai Tau ma karajaangika. De walega-lega ma oraha ona abe de manga tiwi-tiwioka yatotilakuru de yonoa manga hidoaka ma peti ma goronauku. 2De ipaha de naga momatengo o huha ma nyawa abe mofao-faooka matilakuru de monoa ka o tiwi ise-senge hinooto dika, abe ma tiwi gea tanu duru ko kia-kiaua ma titi. 3De gea o Yesusu wamake de ahao wotemo wato, “Naa moi tagou-goungu tinihingahu. Nako o nyawa mata-mataika masara o bao gea ka to munangohi ami hidoaka duru ilamoko Ma Jou ai himangoka. 4Angamoi ona utu mata-mata manga tiwi ma boloiino ihidoaka masara nagahi ma amoko yagogonika. Masara muna gea, ngaro duru mohuha ma mohidotodoakoka, abe ami tiwi gea ngaro ma hohutulokahi masara ko matumungua.”
O Yesusu wahingahuohi abe hokokia de ahao idadi
Matiusu 24:1-21; Matiusu 24:29-35; Maruku 13:1-19; Maruku 13:24-31
5De abe ma oraha gea de ona iwinii-niikino utu yomakoketemo ma titi Ma Jou ai Tau ma hohailoa. Abe naga ma dadaduhu ma hakaru yodiai duru irahai, de nagali ma tau ma bilere ma ngoe o nyawa manga hidoakino abe duru ihohailoa.
6De gea o Yesusu wahitararono wato, “Igoungu, masara naa tinihingahu moi ma titi Ma Jou ai Tau naa. Ahao naga ma oraha yadono abe to ena ma hakaru gea ko imaritabiokaua, angamoi ma tau gea ahao ikokikiliangoka.”
7De ona iwileha ato, “Mia Guru, abe nato Ma Jou ai Tau gea duru ikiliangoka, ho gea muruonoka de ahao idadi Ma Jou ai Tauika? De ma dodunguu o kia abe ahao idadi la miamake de genangino mihioriki abe itigioka ma karusaka gea?”
8De o Yesusu wapaluhu de wahitararono onangika ma titi o kia abe ahao idadi. De ai bobaluhu onangika hatoli ikurutu, de womulaenge wapaluhu onangika hokonaa, wato, “Igoungu, ahao ma baha ko adonuahi de naga idadioka ma dodunguu. Ho ngini kiani ka ihikaika nimaagoana la ufa o nyawa inibudi abe ona ato, ‘Naa itigioka o dunia ma bobaha.’ Angamoi ahao o nyawa manga ngoe yoboa de ona gea ahao yomahingahu-ngahu ato, ‘Ngohi naa nia Mesia, nia Koano abe ma dodihiraka Ma Jou winihibehehongoka.’ Hokogea yomahingahu angamoi inihioriki abe ngini nia koano gea niwidodamaa la nako woboaka, gea nihioriki o dunia ma bobaha itigioka. De ona gea ma titi manga hingahu ma demo hiadono o nyawa manga ngoeika ahao yabudi hiadono yafikiri ato ma bobaha adonoka. Masara ngini naa ufa inibudi. 9Angamoi ahao naga ma ngoe idadiohi masara gea ma baha ko adonuahi. Abe hoka ngini ahao niihene abe o parangi de o huruhara ma ngoe idadi, de gea ngaro ufa dika de nihawana. Igoungu gea kiani idadi, masara nako gea, ko ma titiua ma baha adonoka.”
10De ahao wogila-gilali wato, “O nyawa yomahipareta moi de manga musu yomaketeparangi, eko o nuuhu hinooto de yomakumusu. 11De ma oraha gea o tonaka idadi duru ihikelu-kelu ma ngoe, de o tonaka utuoli o nyawa ko manga ngoe yohonenge angamoi naga o hafini ma amoko. De ma tonaka moiokali de naga o panyake abe duru imataiti imahora-hora. De nagali ma oraha gea o hohowono duru itotorou yadaene o nyawauku hiadono ona duru yokokihawanoka, de nagaoo o heheranga ma dodunguu ma ago-agomo o Horogaka de auku iboa.”
12“Masara ma dodunguu mata-mata gea ko idadiuahi de ihira ngini inihikokangela o nyawa. Abe ngini ahao initaokino de inihikangela de ahao inihidoaka nanga dodotoko ma tau ma hidimonika ma titi nihiniiki Ngohi. De ngini utu hiadono iniurusu de inihingohama o bui ma tauika angamoi Ngohi nihiniiki. De ngini utu initaokino de iniaoika la o kokoano de o gogubernuuru manga hima-himangoka nimaokoino ma titi to Ngohi ahi romanga niatobaniiki. 13De gea ma oraha abe ka idadi nimahingahu onangika ma titi nia ngongaku Ngohino. 14De abe initaokoka de inihidoakika o nyawaika, gea ngaro ufa nihawana de nimatemo niato, ‘Adoo, ka o kia de ahao totemo onangika?’ 15Gea koua, masara ma oraha adonoka de ahao Ngohi tinihidoaka nginika la nia uru ma demoino de duru isosawaro. La gea nitemo ipaha de ko moiua abe inilawa-lawana ka idadi yopaluhu nia demoika ho ko idadiua inihikala nia demoino gea.”
16“De nagaoo ahao idadi hokonaa ngini utuika, abe ngaro nimahitau moi eko nimaketedodiawo masara ko nimaketehiningamoiua. Ho ahao idadi abe nia dimono eko nia ria-dodoto eko nia dutu adaene eko nia dodiawo de ona inihidoaka o nyawaika la iniurusu, de ngini utu ma bahauku de inihohonenge. 17De o nyawa mata-mata ahao inidohata nginika ma titi nihitobanii-niiki to Ngohi ahi romanga. 18De ngaro hokogea ma kokangela ahao niaohana, masara ti ngini nia jiwa ma hohutuloo de ko ihihangua. 19De abe nia kangela ma goronaka de nimatongohono la ufa nirehene nia ngongakuino, gea inihitaana abe o wowango ma ngango nimamakeoka.”
20“De ma oraha ngini niamake abe o Yerusaleeme ma kota yahigilolitino de o tentara ko manga ngoe de ka idadi nihioriki abe itigioka ma kota ihibinaahaka. 21Ho gea ma oraha abe ona yogogere o Yudea ma tonakoka kiani yokokiloaroka o loku-lokuika, de ona ma kota ma goronaka kiani yokokihupu de yoara, de abe ma hoanoka ufa ona yowohama o kota ma goronaika gea masara koaho yoara dika. 22Angamoi gea adonoka o hibalaha ma oraha, abe Ma Jou wahibalaha de o hohowono onangika abe manga datoro itorou. Ho abe ma dodihiraino atulihukuoka ma titi Ma Jou ai hohowono onangika, gea mata-mata ahao kiani wohingodumu ma oraha gea. 23De hiokoo manga kangela ma ago-agomo o ngo-ngofeka abe de manga bada-badangoka ma oraha gea eko abe manga ngofa-ngofaka ma gogilau de ka yahuhuohi, angamoi duru yokangela yoara ma kangelaka de aino. Abe ma oraha gea de o kokangela ma amoko yadaene ma tonakuku gea de to Una ai dohata duru itagi to ena ma nyawaika. 24De utu ma oraha gea yohonenge ma titi o humarangino, de utu yataokino de yaoika o tonaka utuikali. De o Yerusaleeme ma kota ahao ona ko o Yahudi ma nyawaua yahikala enangika de adoko-doko ma kotaka gea. De ona gea ka ihikaika yadoko ka hiadono to ona manga oraha ko iwaka ho gea ahao ko yahiparetakaua.”
25“De abe ma oraha ma baha itigioka de naga o dodunguu ma ngoe idadi daku ma hoanino. Abe ahao o nyawa ka idadi yamake ma dodunguu o fara moi o wangeoka de o medeoka de o muru-murumoka. De abe o duniaka o nyawa duru manga hininga ihuha de iloo-loliti ma titi yohawana o gahi ma moku-moku ma tuuhu ma amoko de abe ma aere de ma gowaha duru o fara moioli itagi. 26De o nyawa ahao manga hininga ihihihanga ma titi duru yohawana de yomafiki-fikiri abe ma bodito hokokia ahao yahidotadaene o duniauku, angamoi daku ma hoanino ma kiahonanga mata-mata ihikelu-kelu hiadono ma dodagi ko itiaiokaua.”
27“De gea mata-mata idadiokahi de ahao o nyawa ihimake Ngohi, o Nyawa ma Ngofaka, abe ma oraha gea toboa o lobi-lobioka. De gea Ngohi naga de ahi kuahaka de ahi medebini ma dararono enangoo duru ilamoko, de gea mata-mata ahao o nyawa amake de manga lako ma hirete. 28Ho naa tinihigaro la nako ma dodunguu gea mata-mata imulaenge idadi o duniaka de ngini ka idadi nimaokoiye de nimamatagaiye la nimorenoka dika, angamoi ma oraha gea de ahao duru itigioka ti ngini nia duduhunu.”
29De ahao o Yesusu woade-ade de o hiketero ma ade-ade onangika wato, “Abeika nimafikirohi o gogilioro ma gota eko o gota utuino. 30Abe nako ma jaga-jaga iboleoka de hiadono ihokali, gea ka de hamake de hohiorikoka hato, ‘O, marai itigioka o hiwara ma oraha, angamoi hamakeoka ma dodunguu ma hokaino.’ 31De gea imaketero hoka o kangela ma dodunguu mata-mata abe tinihingahuokau kangano. Nako ma dodunguu gea hiadono niamake idadioka, gea ka idadi nimatemo niato, ‘O, marai duru itigioka ai gahe abe Ma Jou wahikoano ai nyawaika.’ 32De naa moi tagou-goungu tinihingahu. Abe ma dodunguu tinihingahuoka naa, gea mata-mata, abe ngaro ma dodunguu ihira-hira ka hiadono ma dodunguu duru itoturuino, masara gea mata-mata ko itedekanokaua de idadioka. Abe ma titi nako o nyawa yowango ma oraha naa naga, ona utu ko yohonenguahi de yadaene mata-mata ma dodunguu de ma kokangela gea. 33De mangale ma titi to Ngohi ahi demo-demo duru ko iwa ma baha, ho ka idadi nihioriki abe gea ahi demo nginika duru igou-goungu ka hiado-adonika. Angamoi ahao naga ma oraha abe igoungu o dunia naa de o dihangoo duru ko iwaka, masara ahi demo-demo duru itongohono ka hiado-adonika.”
34-35“De naa Ngohi tinihitiarioli la ka ihikaika nimagoana done nia hininga irehene Ma Jouoka de aino ma titi o rame-rame ma daluku inihipareta eko o dunia naa ma perelu nihitihira nia wowangoka. Angamoi done Ma Jou ai hohowono ma wange adonoka de ko nimahidiaiua ho duru initodokana nia hiningaka. De ufa hiadono inihidiliko ma hohowonoka angamoi ko nimagoanua ho ko nimahidiaiua ma oraha iboaino ai hohowono. Angamoi ai hohowono gea ahao yakokidaene o nyawa mata-mata o dunia ma lokuoka. 36Ho ngini koaho ka ihikaika niwangoro, de nimagahoko Unangika la ma oraha idadi de ufa ma hohowono gea mata-mata tofetongoka inidaene nginika. De nimagahokoo la ma oraha Ngohi o Nyawa ma Ngofaka toboali de ka idadi tinidafongo ma titi nia hingounu Ngohino. De mangale ma titi tinidafongo ho ngaro ufa dika de nihawana ahi himangoka.” De hokogea o Yesusu ai hitararono ma demo onangika abe ma titi ma dodunguu ahao hokokia idadi.
37-38De o minggu gea o wange-wangeiye o Yesusu naga Ma Jou ai Tauoka watobadotoko o nyawaika. Ho duru o ngoru-ngorumino o nyawa mata-mata yokokimomiki la yoboa Ma Jou ai Tauino de yototoihene o Yesusu ai demoika. De wadotoko ipaha de o futu-futuiye Una wohupu ma kotaino de womanoa o Saitunu ma lokuoka.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lukasa 21: MJDD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
