Lukasa 12
12
O Yesusu wahuloko la ufa yamodongo o nyawaika masara kiani iwimodongo ka Ma Jouika dika
Matiusu 10:26-33
1De ma oraha gea ona abe yoboa o Yesusino duru yodogo-dogo hiadono duru yosana, ho ona gea yomakodoko manga louuku angamoi yomahideefotinoholi. De Una womulaenge wotemo iwinii-niikika de wahitiari wato, “Ngini kiani nihidodiai o Farisi ma nyawa manga hininga abe gea tohiromanga to ona manga ragi, angamoi done manga hininga gea imahora nginika de inihirehene genangino. Abe ahi demo gea ma titi kiani nihidodiai ma titi to ona gea manga hininga angamoi ona yomadokangeluku dika ato yomahinganono Ma Jouika masara tanu ko Unangikaua manga hininga itagi. Ho iti ufa ngini nimaaduru abe hoka onangoli manga hininga. 2Angamoi ahao naga ma oraha abe o nyawa homoi-homoi manga hininga ma dola Ma Jou wahimatoko o nyawa mata-mataika. De ma oraha gea duru ko iwaka o nyawa manga dogogono manga hiningaka. 3Abe ngaro nia demo abe nitemoka ko o nyawa manga himangokaua masara ka nia dodiawoika dika, ma gea nia demo ahao o nyawa mata-mata yoihene. De ngaro nia dogogono ma demo abe ka ngini dika nimakoketemo, masara nia demo gea ahao o nyawa mata-mataika o dunia ma amokika ihioriki!”
4“De naa ma titi moioli kiani nitotoihene, abe tato ufa ngini niamodongo o nyawaika. Abe ngaro o nyawa inihikangela nginika de inihidee la ato initoma, ma gea ti ngini nia badanga dika abe ka idadi yatoma. Ho nako ti ngini nia jiwa, gea o nyawa ko yakunua atoma enangika. 5Masara abe kiani niwimodongo Unangika, gea Ma Jou dika abe ka idadi wahibinaaha o nyawa manga badangoo de manga jiwaoo o Naraka ma ukuika. Ho koaho niwimodongo Unangika dika de niwihoromati ma titi ai kuaha kohaamoko gea.”
6“De masara ngaro itiai niwimodongo Ma Jouika ma ufa niawohanga ma titi to Una ai dora de ai baliara ngoneino. Abe ngaro o totaleo duru ma hohumuduru abe ka idadi o dutu motoa homaijaino de o tiwi duru ma hohutulu dika, masara Ma Jou ko wawohangua ma totaleo gea ho wogoana enangika. 7De hongoli to Una ai hininga itagi nginika nako de o totaleo ma hohumuduru gea! Abe ngini naa winihiorikoka abe ti ngini nia tadauru ma ngoe nia pea homoi-homoioka! De mangale ai dora gea nginika hiadono Ngohi tato ufa ngini nihawana, angamoi nako ngini de o totaleo ma hohumuduru ngaro o duduono moi, ma ka nginiohi duru nikurutiye Ma Jou ai himangoka, ho Una duru winigoana de winipaliara nginika.”
8“De naa moioli tagou-goungu tinihingahu nginika, abe onagona dika o duniaka naa de yomahingahu o nyawa manga hima-himangoka ato, ‘Ngohi naa tingaku o Yesusika,’ de ona gea ahao Ngohioli tomahingahu abe tadafongo ona gea. Abe gea ma oraha Ma Jou ai momalaekata manga himangoka de Ngohi tatemo o nyawaika gea tato, ‘Igoungu ngona naa nagau ani gogao Ngohioka.’ 9Masara onagona dika abe o duniaka naa de yotemo ato ko ihihiorikua de ko iwa manga gogao Ngohino, de ona gea ahao Ma Jou ai momalaekata manga himangoka de Ngohioo totemo tato ko tahiorikua de ko iwa ahi gogao onangika. 10De masara onagona dika ihihitipokouku Ngohi o Nyawa ma Ngofakino, ona gea ahao ka idadiohi manga howono aofioka. Masara nako o nyawa iwingelo Ma Jou o Womahika, onangika gea duru ko iwaka o howono ma ngongofi.”
11“De ahao nako ma oraha idadi abe initaoko de iniurusu ma titi Ngohi nihitobaniiki, gea ufa nihawana. Abe ngaro iniurusu nanga dodotoko ma tau-tauoka eko o popareta ma nyawa manga hima-himangoka, ma ufa nihawana abe ma titi o kia ahao nitemo onangika la nimademo. 12Angamoi ma oraha gea abe ngini nimaokoino o nyawa yokurutiye manga hima-himangoka de Ma Jou o Womaha Una winidotoko abe hokokia ahao nitemo.”
O hiketero abe ma titi naga womatengo wokaya abe duru wobodo
13De ahao naga womatengo yowoe-woeino abe wotemo o Yesusika wato, “Ahi Guru, nako ka idadi, Ngona nihuloko ahi riakika la to ngomi mia baba ai kiahonanga waregu hinooto la ngohioo ka idadi tamake ahi oara mia babaino.”
14De o Yesusu wopaluhu wato, “Hobata, done sarakia Ngohi naa todadi o tobauru-urusu ma nyawa la tinihuloko nginika ma titi nia oara nia babaino?”
15De ahao o Yesusu wotemo o nyawa mata-mataika gea wato, “Ngini nihidodiai de nimagoana la ufa nia hininga ma horoodo inihipareta nginika. Angamoi nanga wowango ko ihititiua abe nanga kiahonangoka de aino.”
16De o Yesusu wogila-gila wadotoko onangika de o hiketero ma ade-ade wato, “Naga womatengo wotobaredi-redi abe una duru wokaya angamoi ai redi ma hasili duru ikutufuru. 17De ika-ika de ai rawongo ma tau ko apoakaua angamoi ma hasili duru itou-touniye hiadono ko iwaka ma ngi la ihingohama doka ma goronaika. Ho wokaya-kaya womatemo doka ai hiningaka wato, ‘Naa done o kia todiai?’ 18De ahao womatemo wato, ‘Aa, hokonaa ma ngekomo. Ngohi kiani takilianga ahi rawongo ma tau la tohigoko ma tau abe ka utuohi ilamoko, de tohigoko ibooto de ahao ka idadi ahi redi ma hasili de ahi kiahonanga mata-mata tohingohama doka ma tau ma hungi ma goronaika. 19De ma oraha ahao tohingohamoka mata-mata de ahao ka idadi tomahigiriiri tomatemo tato, “Ngohi naa duru toutumoka! Angamoi ahi kiahonanga naa duru itou-touniye de ihiwedono o taongo muruonohi ahi himangika. Ho naa ibootohi tokarajaanga, masara ka idadi tomahiaini dika. Abe ngohi ma hou ka totobaolomo de totobaokere de tomahisosanangi dika.”’ Hokogea wokaya-kaya ai demo womatemo ai hiningaka.”
20“Masara de ahao Ma Jou witaere unangika wato, ‘Ngona duru nobodo! Angamoi duru o futu naa dika de ani bobaha adonoka. Ho bote onagona ahao yamake to ngona ani kiahonanga mata-mata abe ka nomatobatoomuino ngonaika?’ Hokogea Ma Jou ai demo wokaya-kayaika.”
21De o Yesusu wotemo wato, “De hokogea igoungu ahao idadi o nyawaika abe yahitihira to ona ma hirete manga kiahonanga o duniaka naa. Abe ona gea manga hininga ko itagiua Ma Jouika ho duru ko iwa manga kaya abe Unangoka.”
Ufa hopusingi ma titi o kiahonanga
Matiusu 6:25-34
22De ahao o Yesusu wotemo iwinii-niikika wato, “De mangale ma titi ngone koaho ufa hahitihira o duniaka ma kiahonanga nanga wowangoka naa, ho naa Ngohi tinihigaro moi nginika. Abe nako niwiniiki ka Ma Jouika dika, gea ngaro ufa dika de nihawana de nipusingi abe niato nia wowango ma perelu o duniaka naa marai ko iniwedonua. Abe ngaro ti ngini nia inomo eko nia baju, ma ufa nipusingi enangika. 23Angamoi ti ngini nia wowango ko ihititiua o inomino de o bajuino dika. Hokogenangua.”
24“De abeika ngini niafikiri ma titi o koyo-koyo ma totaleo daku ma hoanino. Abe ma koyo-koyo gea ngaro ufa dika de ma inomo imadatomo eko imagutuku, de gea ena ngaro ufa yagogono ma inomo o rawongo ma goronaka la ahao naga to ena ma inomo. Angamoi Ma Jou Una gea ahao wohidailako to ena ma inomo enangika. De nako ngini naa de ma koyo-koyo, gea duru ka nginiohi nikurutiye Ma Jou ai himangoka. Ho mangale ma titi Una wohidailako to ena ma inomo ho ka idadi nihioriki abe ti nginioo nia inomo winihidailako.”
25“De nako hoka nia hiningaka de nihuha eko nihawana abe ma titi nia hidailako, masara gea nia huha duru ka parahaja dika ho ko idadiua iniduhunu nia hiningaka. Ho mode nia hininga ma huhaino gea de ka idadi iniduhunu ho hiadono nia wowango o duniaka naa niato utuohi niumuru? Duru ko idadiua! 26De igoungu abe nia hininga ma pusingi ko akunua iniduhunu la hiadono nia ngumuru ma hohutulohi ikurutu, de hokogenangoo nia pusingi ko iniduhunua ma titi nia wowango ma perelu nimahidailako. Ho nia hininga ma pusingi gea mata-mata ka parahaja dika!”
27“De hokogenangoo abe ma titi ti ngini nia baju. Abeika nimalega o bunga-bungaika abe ena ma hirete iwangoiye ma hoanoka de abe ma rupa duru ma hohailoa. De nionganonohi abe ma titi hokokia idadi hiadono to ena ma rupa ihailoa. Angamoi ena gea ko ikarajaangua de ko imadiaiua ma baju, masara abeika duru ma hohailoa ma rupa. De ngaro ma bunga-bunga gea ka iwangoiye dika, masara nako hohidotelega to ena ma hohailoa de abe ma dihiraino to nanga koano o Saloomo ai baju ma rupa ma hailoa, ma ka o bunga-bungahi duru ihohailoa ma rupa. De gea o Saloomo ai tiwi duru ilamoko ho ai baju duru ma rorahai, masara ma bunga-bunga naa iwihikala unangika ma titi ma hohailoaino.”
28“De naa ka idadi nimafikirohi. Abe Ma Jou Una gea duru wapaliara irahai ma bunga-bunga naa abe ka jai-jai dika de ipahaka, abe o wange naa nagahi masara ka de itebinino de ko iwaka. De mangale ma titi Una wapaliara irahai enangika abe jai-jai dika iwangoiye, ho hongoli ngini winipaliara duru irahai de winihidailako nia wowango ma perelu. Masara nako ngini ko nimahinganonua Unangika ma titi nia wowango ma hidailako, gea nimahitaanoka abe ti ngini nia ngongaku duru ko ibaluhuahi Unangika. 29Ho ngini naa ufa nipusingi nia hiningaka de ufa nimatemo niato, ‘Naa bootino o kia haolomo? De o kia ngone haokere?’ 30Abe ngini ufa nia hiningaka itagi imaketero hoka o nyawa abe ko iwihiorikua Ma Jouika manga hininga. Angamoi ti ngini nia Baba Una wohiorikoka abe ma titi ngini homoi-homoi nia perelu mata-mataika, ho ngini ngaro ufa nipusingi nia wowango ma hidailakoika. 31Masara koaho ngini niwileleani duru de nia hininga ma gahumu Ma Jou nia Koanoika. De nako nia hininga hokogea, Una ahao ka ihikaika winihidailako ti ngini nia perelu.”
32“De igoungu abe ngini Ma Jou ai nyawa ko niwoeua de nia kuaha hatoli ko iwa. Masara ufa nihawana, angamoi ti ngini nia Baba duru wosanangi dika winigorakiye la nidadi to Una ma hirete ai nyawa hiadono Una winihikoano nginika.”
33“Ho ngini naa ka idadi nia kiahonanga niafukunu dika de ahao abe ma tiwi gea niahikodoku o hu-huha ma nyawaika. La nia datorino gea de ngini ka idadi hoka nimahidailako nia kaya abe duru itongohono ka hiado-adonika. Angamoi nia utumu o Horogaka gea ko iwa yotobatohi-tohiki abe ka idadi inidohiki, de ko idadiua o goguhu yaolomo, ho nia utumu gea duru itongohono ka hiado-adonika. 34De Ngohi tato nako ngini nihitou-touniye nia kiahonanga naa o duniaka dika, gea inihitaana abe nia hininga ma dumutu duru o duniaika dika itagi. Masara nako ngini ka ihikaika nihitou-touniye nia utumu daku o Horogaka, gea imakohowono. Angamoi gea de ahao inihitaana abe nia hininga ma dumutu duru itagi ka o Horogaika dika. De gea ho Ngohi tinihigaro tato koaho ngini ka ihikaika nimahidailako nia utumu daku o Horogaka.” De hokogea o Yesusu ai dodotoko onangika abe wato ngaro ufa de yopusingi ma titi o duniaka ma kiahonanga.
Kiani nimahidiai ma titi nanga Baluhu idodutu ahao woboali
Matiusu 24:43-51
35-36De ahao o Yesusu wadotoko abe ma titi kiani ai nyawa ka ihikaika yomahidiai angamoi ko moiua ihioriki muruonoka de ahao woboali. De Una wodotoko wato, “Ngone naa ka idadi tonahiketero abe Ngohi hoka o tau ma dutu tomatengo abe tosobo taniiki o gogilaka ma rame-rame, de ngini ahi duduhunu ahi tauoka. Ho ngini ahi duduhunu kiani ka ihikaika nimahidiai la ma oraha toboali de ka idadi nihileleani Ngohino. Abe ma titi ngaro o futu-futu ma nimahinoaukuoka de o baju de nia hilo niatufukoka la ma oraha ma rame-rameoka de taino toboa ahi tau ma ngoranino de ka de tiniahoko, gea nimahidiaioka la nimataiti niafelenga ma ngorana la Ngohi towohamika. 37De ngini ahi duduhunu abe nako nimahidiaioka de nihigoa-goana ma titi Ngohi nia dutu ahi boa, ngini gea ahao duru nia hininga isanangi. De gea ka idadi tinihingahu abe ahao duru nisanangi angamoi gea Ngohi nia tau ma dutu Ngohi ma hirete ahao tinileleani nginika. Abe Ngohi ahao taturuuru ahi baju la o duduhunu ma bajuoli tomahinoauku de toboa nginika de tinileleani de o inomo de o ngokere nginika. 38De gea ngini ko nihihiorikua nako nia dutu ahao toboa duru o futu gorona eko abe itigi-tigi itebini, ho iti ngini ka ihikaika nimahidiaioka nihidafongo irahai. De abe nimahidiaioka, gea ngini nia utumu ma hohailoa ahao niamake!”
39De Una wogila-gila wadotoko ma titi kiani yomahidiai wato, “De o tau ma dutu womatengoli nako una wohioriki muruonoka o tobatohiki ma nyawa yoboa de abe duru o takoro muruono yoboaino la iwidohiki, gea ma tau ma dutu ko wahigunoaua iwidohiki angamoi una ahao womahidiaioka la womaduhunu. 40Ho nginioo kiani duru nimahidiai, angamoi ngini ko nihihiorikua ahao muruonoka de Ngohi o Nyawa ma Ngofaka ahao toboali.”
41De o Yesusu wadotoko ibooto ma titi ona kiani yomahidiai de ahao o Peturusu wileha Unangika wato, “Mia Baluhu, ani hiketero ma demo gea nomihidumutu ngomino dika abe minitobanii-niiki eko o nyawa mata-mataikaoo ma dumutu?”
42De o Yesusu wopaluhu wato ai demo ma dumutu onagonaika dika abe yodadi to Una ai duduhunu ma gou-goungu. Abe Una wohitararono wato, “De naga o tau ma dutu ai duduhunu womatengo abe ai karajaanga wao duru irahai ma dutu ai tauoka. Ho ma dutu gea widosanangi unangika ma titi ai tagongo mata-mata wodiai irahai, abe hoka ma duduhunu gea wahiaturu ma duduhunu ma nyawa utuoli manga karajaanga ma tauoka gea, de wohiaturoo abe manga inomo o kia yaolomo o tau ma goronaka gea.”
43“De nako ma dutu kiani wanoaikahi la woiki ai dodagioka, gea de wihitagongo ai duduhunika gea la una ahao wohiaturu mata-mata o tau ma goronaka. De nako ma duduhunu gea ai tagongo wao irahai ma oraha ai dutu ko iwiwa, ahao ma oraha ai dutu wolioino de wihidoaka ma utumu ai duduhunika gea ma titi ai karajaanga wao irahai. 44De gea tagou-goungu tinihingahu abe ai duduhunu gea ai dutu ahao widosanangi unangika hiadono wigoraka de wihidogoli o tagongo unangika la wohiaturu ma dutu ai kiahonanga mata-mataika ai tauoka.”
45“Masara naa tinileha moi. Nako hoka ma dutu wosoboka ai dodagioka de ahao ai duduhunu gea ai hininga ma dorou ipuda de womafikiri wato, ‘Marai ahi dutu ko ai dekanohi de ahao woboa, ho ka idadi taniiki to ngohi dika ahi mau naa ai tauoka.’ Nako ai hininga ma dorou hokogea, sarakia, ahao ma dutu widosanangi unangika eko koua? Abe nako ma duduhunu gea womulaenge wapoha-poha ai dodiawo abe onangoo yomahikarajaanga moi o tauoka gea, de watobaniiki o rame-rame, de hiadono ka iwitobadaluku, gea ahao done hokokia idadi? 46De gea tinihingahu abe una kiani wamake ai hohowono. Abe ahao ma tau ma dutu woboali masara ma duduhunu gea duru ko wohiorikua muruonoka woboa eko o takoro muruono de woboa, ho duru iwitodokana ma oraha o tau ma dutu woboali. De ma dutu woboaka de ahao kiani wihohowono abe duru wihikangela ai duduhunika gea, de ka hiadono wihihupu ma homoaika abe genangoka naga o nyawa utuoli abe ko iwa manga hingounu Ma Jouika la yomakutuono yamake o hohowono genangoka. 47De ma duduhunu gea wamake ai hohowono duru itubuho abe duru iwipoha-poha angamoi una ngaro wohioriki to ai dutu ai mau masara ko wodiaiua. Abe ngaro wohioriki ai dutu ahao woboali masara ko iwa ai hidiai.”
48“Masara nako ma duduhunu onagona dika abe ko ihiorikua ai dutu ai mau, ona gea manga hohowono itaana, abe hatoli ihutulu dika manga hohowono. De hokogenangoo nako hiadono Ma Jou ai nyawa ihiorikoka to Una ai mau, ipahaino de ahao Una kiani wagahoko onangino ma hibalaha abe duru itaana. Abe ma titi onagona dika abe Ma Jou wahidoaka ma amoko onangika, ipahaino ahao kiani Ma Jou wagahokoli ma hibalaha ma amoko onangino. De onagonaika dika abe wahitagongo de o tagongo eko o hiakunu ma amoko, ipahaino de ona gea ahao kiani Ma Jou wagahokoli ma hibalaha ma amoko onangino.”
De hokogea o Yesusu ai demo onangika abe wato kiani ka ihikaika ai nyawa yomahidiai angamoi o nyawa duru ko moiua de ihioriki ai gahe ma wange gea muruonoka de woboali.
O Yesusu wahingahu abe ahao o nyawa yomaketeribuutu ma titi Una
Matiusu 10:34-36; Matiusu 5:25-26
49De ahao o Yesusu wotemo wato, “Ngohi naa toboa la o hikeregu idadi o dunia ma nyawaka, de ma hikeregu ka idadi tohiketero de o uku kohaamoko angamoi ahao idadi o kokangela o nyawa manga ngoeika. De tanu ahi mau la ma uku gea atufukoka la imulaengoka itagi ma hikeregu gea. 50De ngaro Ngohi toigo la ma hikeregu imulaengoka, masara Ngohi tohioriki abe ma oraha gea imulaenge de nagali iboa to Ngohi ahi kangela ma amoko abe kiani Ngohi taohana. De gea duru toigo la imataiti iboaino ahi kangela la hatoli imataiti ipaha, angamoi ahi hininga duru ihuha abe ko ibootuahi ma kangela gea.”
51“De ngini ufa niataoko ihowono ma titi ahi boa o duniauku naa. Abe ufa niataoko niato mangale ma titi Ngohi toboaino hiadono o nyawa mata-mata yomahikokadameoka o dunia ma amokika. Masara tanu ma titi Ngohi ahi boa la hiadono o nyawa yomaketeribuutu de hiadono yomakitingaka manga gogianongoruino de yomahikeregu. 52De mangale ma titi Ngohi toboaino hiadono yomaketeliliara o nyawa de to ona ma hirete manga dutu. Angamoi o tau moioka de yahinooto eko yaruange ihingaku Ngohino masara abe utu ma tauoka gea ko ihingakua. 53Abe utu o giangofakoka de ai ngofaka yomakalawana de ai babaika, de utu o ngofeka yomakalawana abe momatengo de ngomi meme, de utuoli naga abe momatengo de ngomi hunungu yomaketeliliara ma titi Ngohi.”
54De ahao o Yesusu wotemo o nyawa yowoe-woeika wato, “Ngini naa ka idadi nihioriki ma dodunguu abe daku o hoanino ma rupa niamake de gea nihioriki abe ma titi hokokia. Abe nako nimalega dinaiha de niamake o lobi imatoomu de ma ngele itagi, gea nihiorikoka ma titi ho niato, ‘Bootino o awana.’ De gea duru niagoungu. 55De abe nako o kolehara ma hidaloko itagi dakuku, gea de nihiorikoka niato, ‘Abeika ma koleharauku. Bootino duru ma hauku.’ De genangoo nia demoino de duru niagoungu. 56Masara nagali abe ngini niamakeoka ma dodunguu muruono naga Ma Jouino abe ihidumutu Ngohino. De ngaro niamakeoka ai dodunguu gea masara nioluku niataoko, ho gea ma titi hiadono tinihiromanga tato ngini nimadokangeluku dika. Angamoi ma dodunguu utu nisosawaro nihioriki, masara ma dodunguu abe niamakeoka Ngohino de duru ko niataokua. Abe Ma Jou winihidoakoka ma dodunguu gea nginika ma titi to Ngohi ahi datorino la ka idadi nihioriki to Una ai karajaanga o duniaka ma oraha naa, masara ma dodunguu gea ngini nioluku niataoko.”
57“Ho ngini naa tanu koaho nimafikiri de nimaputuhu la nihioriki o kia itiai nia wowangoka. Abe ma titi kiani nianiiki ma totiai la ufa Ma Jou winiurusu de hiadono winihohowono. 58Angamoi ngini nimaketero de o nyawa abe yataeoka onangika ato yahowonoka ho ona yoiki o hiurusu ma ngiika. De manga dodagi ma goronaka de yomakamake de o nyawa abe yatae onangika. Ho koaho ona ko yomahiadonuahi o tobauru-urusu ma nyawaika de yomakadameohi. Angamoi nako yomahiadonoka de una wotobauru-urusu o nyawa ai putuhu wato ona yahowonoka, gea yahidoaka o gogoana ma nyawaika abe ahao yahingohama o bui ma tau ma goronaika. 59De nako hiadono yahingohamoka, gea duru ko idadiokaua yohupu ma rorahaiika ka hiadono ka idadi manga nagimi de manga bobangu duru yofanguoka mata-mataika ka hiadono yabootoka. De hokogenangoo ngini naa koaho nimakadameohi de Ma Jou angamoi ka itigi moduku ai hohowono ma oraha, done niamake o hohowono kohadubuho nginika.” Hokogea o Yesusu ai demo onangika.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lukasa 12: MJDD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
