Lukasa 11
11
O Yesusu wadotoko onangika abe hokokia yomaniata
Matiusu 6:9-13
1De o wange moiukuoli de o Yesusu de iwinii-niiki naga o ngi moioka de Una womaniata. De womaniata ipaha de womatengo iwinii-niikino woboa de wogahoko Unangika wato, “Mia Baluhu, ngomi migahoko la Ngona nomidotoko abe hokokia itiai mimaniata, abe imaketero hoka o Yohanesoli naa ma duru wadotokoka iwinii-niikika.”
2De yogahoko hokogea de o Yesusu wotemo wato, “Ngini abe ma oraha nimaniata de nia demo niapake hokonaa, niato,
‘Mia Baba, ngomi duru miagorakiye to Ngona ani romanga angamoi duru nokokurutiye.
De ngomi migahoko la Ngona nagorakiye ani kuaha kohaamoko la nomulaenge o dunia duru nahipareta.
3 De ngomi mimagahoko la Ngona nomihidailako to ngomi mia inomo abe imiwedono o wange-wangeiye.
4 De abe ma titi to ngomi mia howo-howono Ngonaika, gea ngomi mimagahoko la Ngona naofi mia howono abe imaketero hoka ngomioo miaofi o nyawa utu manga howono abe yodiaioka ngomino.
De ngomi mimagahokoo la ma oraha imihitaili de o dorou de Ngona ufa nomihigunoa la miruba o howonuku, done imihikala ngomino.’”
Hokogea o Yesusu wadotoko onangika.
5De ahao o Yesusu wohigila-gilali ai dodotoko ma titi o niniata de wohiketero wato, “Abeika nimafikirohi ahi ade-ade naa. Naga womatengo nginioka abe duru o futu gorona de noiki ani dodiawo ai tauika angamoi noigo nomabau o roti hange. De gea ngona notemo nato, 6‘Dodiawo, ahao naa ahi olo naga womahiadono abe wotagi-tagi duru ma gurutoka de waino woboa ahi tauino, masara ngohioka duru ko iwa o inomo la tileleani unangika.’ Marai hokogea ani gogahoko ma demo. 7Masara abe ma oraha nomagahoko de ani dodiawo gea womahiainoka ai ngidu ma ngioka ho wonipaluhu wato, ‘Ufa nohiruwae! Ahi ngorana ikusioka de ngomi mata-mata mimaiduoka, ngohi de ahi ngofa-ngofaka. Ho ngohi ma oraha naa de ko idadiua tomomiki de tonihidoaka ngonaika.’ Hokogea ai babaluhu ngonaika. 8Masara naa Ngohi tinihingahu nginika abe nako ngini nihigila-gila niwiaho-ahoko nia dodiawoika gea, ika-ika de ahao una womomiki de winihidoaka nginika nia perelu gea. De gea ko ma titiua winihidoaka ai hininga ma sanangioka de aino nginika, masara mangale ma titi ngini ko nimatogu-togumua nimagahoko, de gea ena ma titi hiadono ma bahauku de niamake.”
9“De duru ena gea idadi ahi hiketero ma demo ma titi, abe Ngohi tato nako naga moi nia perelu niongano-nganono nia hiningaka, de ngini kiani ka ihikaika nimagahoko Ma Jouika ma titi ena gea la de ahao Una winihingodumu nia gogahokino. De abe nimagahoko, gea imaketero abe hoka ngini ka ihikaika niolingiri nia wowango ma perelu moi hiadono niamake, de hoka niaho-ahoko nia dodiawo manga tauoka hiadono ona yoboa initutumu. Ho ngini kiani ka ihikaika nimagahoko Unangiye ma titi nia perelu ka hiadono Una winihidoaka nginika. 10Angamoi onagona dika ka ihikaika yomatobagahoko moi, gea ahao ma bahauku de yamake. De onagona dika ka ihikaika yomalingiri, gea ika-ika ahao yamake. De onagona dika yaho-ahoko ahao manga dodiawo yamake. De hokogenangoo imaketero de nia gogahoko Ma Jouika ahao niamake Unangino iti ka ihikaika nimagahoko.”
11“De ngini o ba-baba, tinileha moi nginika. Abe ma oraha nia ngofaka yoboaino nginika de yomagahoko o nawoko, sarakia, ngini ka idadi niahidoaka o dodiha onangika? Koua! 12Eko nako nagali ona yoboaino yomagahoko o kuru-kuru ma gohi, sarakia, gea de niahidoaka o waitota onangika? Duru hokogenangua abe niahidoaka! 13Ho naa Ngohi tato abe nako ngini o howo-howono ma nyawa de ka idadi o hidoaka ma rahai niahidoaka ti ngini nia ngofa-ngofakika, ho Ma Jou Unangoo ka idadi wonabaluhu de ma hidoaka abe utuohi irorahai ngoneino. De hongoli nia Baba o Horogaka ka idadi winihidoaka Ma Jou o Womaha nginika iti ngini nimagahoko hokogea Unangika.” Hokogea o Yesusu ai dodotoko iwinii-niikika abe ma titi hokokia yomaniata.
Ka o Yesusohi ai kuaha duru ilamoko nako de o Ibilihi ma haeke
Matiusu 12:22-30; Maruku 3:22-27
14De ma moiuku naga womatengo womouoka ma titi o tokata iwibarene, de o Yesusu wihitogumu una gea la ka idadi wotemo-temo abe hoka ma dihirali. De abe o nyawa yowoe-woe yamake ma oraha wihitogumu de ona duru yokokiheranga. 15Masara naga utu yotemo ato, “Ngaro ufa hoheranga abe Una ka idadi o tokata wohititoko o nyawaino, angamoi to Una ai kuaha wamake o tokata ma hidimonoka de aino abe ena gea ihiromanga o Beelsebulu.” 16De nagali o nyawa abe yoigo ato iwitaili o Yesusika la iwihioriki nako Una wagou-goungu Ma Jouoka de wauku woboa eko koua, ho ona gea yogahoko Unangika la o heheranga wodiai manga hima-himangoka.
17De o Yesusu wahioriki to ona manga hininga ho Una wapaluhu wato, “Ngini duru niahowonoka nia demo gea, angamoi to Ngohi ahi kuaha ko o Ibilihi ma haekinoua iboa. De naa tohiketero moi la genangino de ka idadi tinihitararono nginika. Abe nako o koano womatengo de to una ai kokawaaha yomahikokoona yomaketeparangi, gea ahao yomahiketehibinaahaka. De hokogenangoo nako o tau moioka de yomaketeliliara hiadono yomakumusu, gea ona ahao yomahiketehikapusakoka. 18Ho hokogenangoo nako o Ibilihi ma haeke ma kokawaaha de yahititoko to ena ma dodiawo o nyawaka de aino. Abe gea imaketero hoka imakumusu, ho ma bahauku de imahikapusakoka de to ena ma kuaha duru ko iwaka. Ho naa genangino de itararono abe to Ngohi naa ahi kuaha ko enanginoua iboa. Angamoi nako hoka ahi kuaha o Ibilihi ma haekino, done sarakia de tohititoko to ena ma kawaaha o nyawaino? Angamoi gea imaketero hoka o Ibilihi ma kokawaaha ena ma hirete imakumusu!”
19“De naa moioli kiani nimaleha. Ahao kangano ngini nihitae Ngohino niato o tokata ihitobabarene mangale o tokata tohititoko o nyawaino. Masara mode niawohangoka abe ti ngini ma hirete nia nyawa ininii-niiki de onangoo ihititoko o tokata o nyawaino? Ho done sarakia nia demo ma titi ona gea? Bote onangoo yabare-barene ma titi ka idadi yahititoko o tokata o nyawaino? Genangoka de duru niahowono. Ho to ona dika manga datoroka de inihitaana nginika abe nia demo gea de niahowonoka. 20De Ngohi tato mangale ma titi ahi kuaha Ma Jouoka de aino iboa la o tokata tohititoko, ho mangale naa itaanoka abe ma oraha adonoka la Ma Jou wahikoano ai nyawaika.”
21De ahao o Yesusu wodiai o hiketero moioli abe ma titi o Ibilihi ma haeke. De Una wato, “Nako o tau ma dutu womatengo ko ai buturungu de naga ai dae ingodumu unangoka abe womahingano-nganono enangika, to una ai kiahonanga o nyawa ko idadiua iwiora. 22Masara nako womatengoli woboaino abe ka unangohi duru de ai bobuturungoka, una gea de ahao ka idadi wihikala ma tau ma dutuika gea. De o tau ma dutu ai dae gea wakokile unangino, de ahao ai kiahonanga utu enangoo ka idadi womahitouna de wahikodoku to unangoli ai nyawaika. De hokogenangoo de o Ibilihi ma haeke, abe igoungu ena duru iputurungu, masara ka Ngohiohi toputurungu de ena, ho imaketero hoka ena tohikalaka la ka idadi to ena ma kokawaaha tohitito-titoko o nyawaino.” Hokogea o Yesusu ai hiketero ma demo.
23De o Yesusu wogila-gila wotemo wato, “De o nyawa onagona dika abe ko ihiduhunua, ona gea ihilawana Ngohino. De onagona dika ko ihidodiawoua la homakutuono hatoomuino o nyawa Ma Jouoka, ona gea imaketero hoka yahikabarihi dika o nyawa Ma Jouoka de aino. De nako yahikabarihi o nyawa, gea mimakalawana ona de Ngohi.”
24“De abe idadi o tokata ma dorou ihititoko o nyawaka de aino ma hoanika, gea iloiki o tonaka ma kakaahaika de imalingi-lingiri o hiaini ma ngi la genangokali imanoa. Masara gea ko imamakeua ho imatemo ma hiningaka ato, ‘Naa ngohi koaho tolio dika ahi dingiika.’ 25De gea yogilio de yabarenokali to ena ma dingii abe o nyawa nengokadauino de ihupuino onangino. De iwohamika de yamake abe ma dingiioka gea ko iwahi utu yomanoa genangoka, masara ma ngi yoodebinoka abe ma wale aparihoka ho mata-mata ihidodiaioka. 26Ho ena isobo de yahokino o tokata tumidoli abe ka enangohi itorou de ena ma hirete, de ma tokata ma gahumu tufange mata-mata imanoa o nyawaka gea. Ho ma bahauku de o nyawa gea manga wowango duru itorouoka, abe ngaro ma dihiraino de ma tokata moi yabarene, masara duru ka ma oraha nenangohi de manga wowango itotorou.” Hokogea o Yesusu ai hitiari ma demo onangika ma titi o toka-tokata.
27De o Yesusu ai demo gea ko wamatauahi de naga momatengo o nyawa yowoe-woeino de ami ilingi maamokiye mato, “Ngona naa ani demo duru ma hohailoa toihene. Ho ngohi tato marai ngoni meme duru mososanangi ma titi abe Ngona nomaboa munangino de abe nohuhu to muna ami huhuika.”
28De o Yesusu wopaluhu wato, “Iya, nagoungu, masara hongoli o nyawa manga sosanangi ilamoko abe yototoihene Ma Jou ai Demo-demoino de yatobaniiki enangika.”
O nyawa yogahoko o Yesusika la wahimatoko o heheranga ma dodunguu
Matiusu 12:38-42
29De abe ma oraha wadoto-dotoko de o nyawa yowoeholi naga o Yesusoka ho hiadono ona duru iwihideefotino Unangino. De Una wotemo wato, “O nyawa abe yowango ma oraha naa naga, to ona manga hininga duru itotorou. Abe ona ka ihikaika yogahoko o heheranga Ngohino la ihioriki toboa Ma Jouoka de tauku eko koua. Masara Ngohi duru toluku o heheranga ma dodunguu todiai nia himangoka abe hoka ngini nioigo todiai. Masara naga moi ma dodunguu ka idadi tinihidoaka nginika. Abe hoka o heheranga moi idadi ma dodihiraino Ma Jou ai uru ma dodofanga o Yunusika, hokogenangoo ahao ma heheranga idadi Ngohino, de gea dika ma dodunguu tinihimatoko nginika. 30Abe idadioka ma dodihiraka o Yunusika ma oraha una ai futu hange o gahi ma goronaka masara Ma Jou wihidoakoli ai wowango unangika, gea idadi o dodunguu o Niniwe ma nyawaika la ka idadi ihioriki de itaana abe Ma Jou wihidingoto o Yunusu onangika. De hokogenangoo ma heheranga abe ahao idadi Ngohino, gea idadi o dodunguu to Ngohi ahi nyawaika naa la ngini ka idadi nihioriki de itaana abe Ma Jou wohihidingoto Ngohi o Nyawa ma Ngofaka abe ngini mata-matauku.”
31“De masara abe ngini naa ka niaoluku nitoihene ahi demoino, ho ahao kiani nia hohowono niamake nginika. De naa ma ade-ade moi tinihihohininga nginika la ka idadi nimafikirohi genangino. Angamoi ahao ma oraha Ma Jou watailako o nyawa mata-mataika de naga momatengo abe ka idadi minitaere nginika ma titi nia howono. De muna abe ma dodihiraino ma oraha o Saloomo de munangoo modadi o koano abe imaketero hoka o Saloomo unangoo wokoano. Masara to muna ami tonaka imakitingaka kohagurutika de o Isiraele ma tonaka, de ami tonaka gea ihiromanga o Seba.#11:31 1 Kokoano 10:1-13 De ngaro ami gogere kohagurutika masara muna motagi-tagi moboaino o Isiraele ma tonakino la mato mitutumu o Saloomo. Angamoi muna moihenoka abe to Saloomo ai sosawaro ka to unangohi ikurutiye nako de o nyawa utu mata-mataika manga sosawaro. De muna duru moigo mototoihene to una ai sosawaro ma demoino. Masara abe ti ngini nia hidogoronaka naa de naga womatengo abe ka to Unangohi ai sosawaro ikurutiye nako de o Saloomo ai sosawaro. De ngaro ma sosawaro naga naangoka masara ngini ko iwa nia magawe la nitotoihene genangika. De genangino ma titi hiadono munangoo abe ma dodihiraino mokoano, muna ahao dokengika ka idadi minitaere nginika Ma Jou ai himangoka. Abe ma titi ahao muna mihigaro Ma Jouika mato, ‘Ngaro ka nahohowono onangika gea mangale ma titi ona manga doihene ko iwa.’” De ahao o Yesusu wato, “De to muna gea ami demo inihitaana nginika angamoi ngini naa ko nitoiheninoua to Ngohi ahi sosawaroino.”
32“De naa tinihihohininga moioli nginika abe ma titi ma dodihiraino o Niniwe ma nyawa abe o Yunusu wadotaka onangika Ma Jou ai Demo-demo.#11:32 Yunusu 1:17, Yunusu 3:1-5 Abe o Yunusu wahingahu-ngahu onangika ma abari Ma Jouino de ona yatotoihene de yodafongo ka hiadono yotoba manga howo-howonino de iwingaku Ma Jouika. Masara nako ngini naa, naga Womatengo nia himangoka abe Ma Jou ai Demo-demo winihingahu-ngahu nginika de ka Unangohi ai kuaha duru ikurutiye nako de o Yunusu. De barikua ka Unangohi duru wokurutiye ma ngini naa ka niaoluku ai demoika de ko nitobaua nia howonino. De mangale ma titi ma dodihiraino o Niniwe ma nyawa ona yotobaka de ngini naa ko nitobaua ho hiadono ona ahao ka idadi initaere nginika. Abe dokengika ma oraha Ma Jou winitailako nginika de onangoo naga genangoka de initaere mangale ngini ko nitobaua abe ma oraha Ma Jou ai Demo-demo inihingahu-ngahu nginika.” Hokogea o Yesusu ai hitiari ma demo onangika.
Abe ma titi o dararono ma gou-goungu
Matiusu 6:22-23
33De ahao o Yesusu wadotoko o nyawa yowoe-woeika abe ma titi o dararono ma gou-goungu, abe Una wotemo wato, “Nako o nyawa o posi yatufukika, ena gea ko yagogonua de ko ihidatamunua de o kiarono done to ena ma dararono atatokoka. Ko hokogenangua yodiai, masara gea kiani yateruiye to ena ma ngioka la o nyawa abe yowohamino ka idadi to ena ma dararono yamake de yomahioriki. 34Ho hokogenangoo abe nako ti ngini nia hininga itagi ka Ma Jouika dika, gea ka idadi totemo tato nia hininga ma lako duru itararono. Abe gea ma titi ti ngini nia badanga ma datoro enangoo irahaioka hiadono niolega irahai o nyawa manga pereluika. Angamoi to ngone nanga hininga ma lako gea imaketero hoka o hilo abe ihitararono nanga ngekomika la haniiki itiai genangika. Masara nako nanga hininga ma lako ko irahaiokaua, gea inahihira-hira ma fufutuika dika, de o nyawa utu ikuranga holega manga pereluika, ho nanga wowango hao ko itiaiua. Abe nako nanga hininga itagi o dunia ma kiahonangika eko utuikali abe ko Ma Jouikaua itagi, gea nanga hininga imanoa ka o fufutuoka dika. 35De gea ho Ngohi tato ngini kiani nimatailakohi nia hininga la nako imanoa o fufutuokahi eko o dararonokau. Angamoi done gea o dunia dika ma hininga nginioka masara ngini niato bote gea o dararono ma gou-goungu. Masara nako niagoungu nia hininga itagi Ma Jouika dika, gea de ahao nimanoa duru o dararono ma gou-goungu ma goronaka. 36De nako Ma Jou ai dararono ma gou-goungu duru inihitawange nia hininga mata-mataika ho hiadono ko iwaka ma fufutu nginioka, gea de ahao duru kohadararono nia hininga abe imaketero hoka nigogere duru o hilo ma dararonoka.”
O Yesusu wataere o Farisi ma nyawaika de onangikaoo abe yotobadotoko o Musa ai Paretaino
Matiusu 23:1-36; Maruku 12:38-40
37De o Yesusu wadotoko ibooto de ahao naga o Farisi manga doomuino ma nyawa womatengo wiahoko la yomakutuono yolomo. De o Yesusu womodeke ho winiiki de wowohama o tauika de wogogeruku la wato wolomo. 38De o Farisi ma nyawa gea duru wiheranga o Yesusika angamoi ko waniikua to ona manga biaha abe ko waihorikaua ai giama de wato ka wolomo. 39De ahao nanga Baluhu idodutu witemo unangika wato, “Abeika notoihene ahi demoino naa! Ngini o Farisi ma nyawa ka idadi tinihiketero ti ngini nia hininga de o mangko. Abe ngini duru nihidodiai niaihoro nia mangko ma riwoto de ma poretino, masara doka ma goronaka de nia mangko aomangoka de o gora de naga utuoli nia hininga ma dorou! Ho doka ma goronaka de duru ko itebinua. De gea tanu imaketero dika abe hoka nginioli angamoi nako o nyawa inimake de ona ato bote ngini nitebinoka Ma Jou ai himangoka, masara doka nia hiningaka de aomangoka de ma dorou. 40Ho gea Ngohi tato ngini duru nibodo! Angamoi Una abe wotobatulaada o nyawa Una wohidadi nanga badanga abe ma poretoka de ma goronakaoo! Ho Una duru winihioriki ti ngini nia kokihiningaka ma dola homoi-homoi! 41Ho koaho ti ngini nia hiningaino gea de o hu-huha ma nyawaika ngini niaduhunu. De nako hokogea nidiai, gea de ahao ngini duru nitebinoka abe nia poretino de nia goronakaoo!”
42“Masara ngini o Farisi ma nyawa ahao nia hohowono duru kohadubuho! Angamoi ngini tanu ko niolegaikaua Ma Jou ai hiningaika. Abe ngini duru nihidodiai la niahidoaka Ma Jouika nia hasili ma utumu o regu moi abe nia regu ngimoiino. De ngaro naga moi duru ma eteteke dika ngini niamake nia redioka masara gea nihidodiai niaregu ngimoi la to ena ma regu moi niahidoaka Unangika. De gea irahai abe niahidoaka ma regu moi, masara naga utuoli ma pareta abe ka enangohi ikurutiye de ena gea ko niolegaikaua! Angamoi ngini naa ko niolegaikaua abe kiani naga nia wowango ma datoro itotiai. De nagali abe ngini niao o nyawaika ko de nia hininga ma doraua. Abe ma pareta ka enangohi ikurutiye Ma Jou ai himangoka masara gea ngini ko nianii-niikua.”
43“De naa tohigalioli tato ngini o Farisi ma nyawa ahao nia hohowono duru kohadubuho! Angamoi ngini naa ka ihikaika nimagorakiye. Abe hoka ma oraha ngini niloiki nanga dodotoko ma tau-tauoka de duru nioigo o nyawa manga himangoka de nigogeruku. De abe o kiaka naga o nyawa yowoe-woe de duru nioigo la o nyawa inihayanga nginika abe ona inifetongo nginika ato, ‘Mia Guru.’ 44De gea nia hohowono duru itubuho ahao niamake, angamoi ngini nimaketero hoka o lungunu abe ko iwa to ena ma dodunguu ho o nyawa ko ihiorikua naga o lungunu dau manga louoka. De ona yadoko ma lungunu ma ko ihiorikua, ho mangale gea yadoko de ko yotebinokaua Ma Jou ai himangoka! De hokogenangoo o nyawa abe initobaniiki nginika ahao ti ngini nia dorou imahora onangika masara ona ko ihiorikua, angamoi ona ato bote ngini Ma Jou ai himangoka de nitebini!” Hokogea o Yesusu wataere o Farisi ma nyawaika.
45De ahao naga womatengo wotobadotoko o Musa ai Paretaino wotemo o Yesusika wato, “Mia Guru, ani demo gea de ka o Farisi ma nyawaua dika nahidaere, masara ngomioo naa abe mitobadotoko o Musa ai Paretaino de gea ngomioo nomihidaere!”
46De o Yesusu wipaluhu wato, “Ngona duru nagoungu, angamoi nginioo abe nitobadotoko o Musa ai Paretaino ahao nia hohowono duru kohadubuho niamake nginika! Angamoi ngini ma titi nia dodotokino de niahitubuho o nyawaika de ma hidogo o huhuloko hiadono manga gina itubuhoholi de ko yakunua yamoku! Abe ma titi ona ko yakunua yaniiki ma pareta mata-mata abe ngini niahuloko onangika niato kiani yanii-niiki. De masara nako ngini ma hirete ko kia-kiaua nidiai la niaduhunu onangika ma titi manga gina gea nihiuwini.”
47-48“De naa ma titi moioli hiadono ti ngini nia hohowono ahao duru itubuho, angamoi ngini nihigoko de niobilere Ma Jou ai uru ma dodofanga manga lungunu ma tau la duru irorahai. De hokogea nia datoro la niato bari genangino de nia horomati niahimatoko Ma Jou ai uru ma dodofangika. Masara ngini ko niodafongua ai uru ma dodofanga manga demo, ho gea tanu nimaketehiningamoi dika de ti ngini nia totofora abe ma dihiraino de yahohonenge de hiadono yalungunu ai uru ma dodofanga gea! De gea igoungu abe ti nginioo nia hininga ka imakadaene dika de nia totofora gea, angamoi ma oraha naa de nagau nia hidee la to Una ai uru ma dodofanga utuoli niahohonenge. De genangino de nimahitaana abe nimaaduru dika hoka nia totoforali manga datoro abe yatomaka Ma Jou ai uru ma dodofanga!”
49“De hokonaa Ma Jou wotemo ai sosawaroino ma titi ngini, abe wotemo wato, ‘Ngohi ahao tahidingoto onangika ahi uru ma dodofanga de ahi hidingoto ma nyawa, masara onangika ahao yahikokangela de yahiodiri de utu hiadono yatoma.’ Hokogea Ma Jou wotemo ma titi ngini, de gea ai demo duru winihitaana.”
50“De naa tagou-goungu tinihingahu abe ahao ka ti nginiohi naa nia hohowono itubuho nako de o nyawa utuika mata-mata manga hohowono. Abe ngaro o nyawa yowango duru ma dodihiraka de ka hiadono ma oraha naa naga, masara ka ti nginiohi nia hohowono duru kohadubuho. De gea inidaene nginika angamoi Ma Jou ai uru ma dodofanga mata-mata abe yatomaka duru ma dodihirainohi abe ma oraha wohidadi o dunia naa de ka hiadono ma oraha naa, masara to ona mata-mata manga awunu idadioka ti ngini nia tagongo ho ma hohowono gea mata-mata inihidotadaene nginiuku! 51Abe ngaro duru ma dodihiraka o Habele ai awunu ikopoa de ino ino ka hiadono Ma Jou ai uru ma dodofanga womatengoli abe ai romanga o Sakaria unangoo iwitoma Ma Jou ai Tau ma loaka, de gea idadi ma huhuba ma ngi de Ma Jou ai Tau ma hidogoronaka genangoka iwitoma. Ho to ona mata-mata manga awunu idadioka ti ngini naa nia tagongo Ma Jou ai himangoka.”
52“De nagahi ma titi moiohi hiadono ngini abe niatobadotoko o Musa ai Paretaino ngini ahao nia hohowono kohadubuho. Angamoi abe ma titi ma gou-goungu Ma Jouino, gea nioluku niangaku enangika, de hongoli ma gou-goungu gea niagogono la niato ufa o nyawa utuoli yamake ma ngekomo Ma Jouika. Ho gea nimaketero hoka o nyawa abe nioluku niwohama o tau moi ma goronaika, de gea ma tau ma ngorana ma kokusi niagogono la niato o nyawa utu ufa onangoo yowohama.” Hokogea o Yesusu ai dodaere ma demo onangika.
53De o Yesusu wotemo ibooto de ka wosobo o Farisi ma nyawa gea ai tauoka de waino. De ma oraha gea de imahikaika o Farisi ma nyawa de ona abe yotobadotoko o Musa ai Paretaino ona mata-mata duru iwingamoholi Unangika. De iwiao ko itiaiokaua de ka ihikaika iwileha-leha abe ma titi ma ngoe, 54la ato ai babaluhu ma demoino ihititi la iwitaoko de iwiurusu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lukasa 11: MJDD
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
