ယောဟန် 7
7
ယေရှုန သူ့ညီလေကြောန်း
1အယ်ဘီးန ယေရှုဟှာ ဂါလိလဲနယ်ဟှို လှည့်လည်တော်မူလေဟှယ်။ အယ်နေရာမာရှိဟှူ ယုဒအာဏာပိုင်လေဟှာ ကိုယ်တော့်ဟှို သတ်ဟှို့ရှာနေဂေ့ဟှူကြောန့် ယုဒနယ်ဟှို သွားရှင်ဟှမ်း။ 2ယုဒလူလေရဲ့ သစ်ခတ်တဲပွဲ နီးလာဟှူ ခီမာ 3ယေရှုရဲ့ ညီလေဟှာ ကိုယ်တော့်ဟှို “နို့နောန် လောက်နေဇာလေဟှို နို့နောန်ရဲ့ တဗဲ့တော်လေ ဗြင်ရဟှို့တွပ် အယ်နေရာဟှ ထွပ်ဟှားဘီးဟှာ ယုဒနယ်ဟှို သွားပါ။ 4ပေါ်ရှင်ဟှူလူလေဟှာ သူးနို့ဖြားဇာဘဲ့လောက်လောက် လှည့်ဝှက်ဘီးလောက်ဂေ့ဟှ။ နို့နောန်ဟှာ အယ်မူဇာလေဟှို လောက်မယ် ဆိုဟှာ နို့နောန်ကြောန်းဟှို တလောကလောင်း သိစေပါ!” ဆိုဘီး ပြောဂေ့ဟှယ်။ 5ကိုယ်တော်ရဲ့ ညီလေဟှိုမှ ကိုယ်တော့်ဟှို ယောင်ကြည်ဂေ့ဟှ။
6ယေရှုဟှာ သူးနို့ဟှို “ငါ့ခီရော့‑က်သေးဟှ။ နန်းနို့တွပ် ခီတိုင်းဟှာ ဆင်သင့်ဖြစ်ဟှယ်။ 7လောကသားလေဟှာ နန်းနို့ဟှို မူးဂေ့ဟှ။ အယ်ဘေမဲ့ ငါ့ဟှို မူးဂေ့ဟှယ်။ ဖြားဖြစ်ကြောန့်နူးဆိုဟှာ သူးနို့ရဲ့ ကျင့်လေဟှ ဆိုးညစ်ဟှယ် ဆိုဘီး ငါဟှ သတ်သေခံဟှယ်။ 8နန်းနို့ အယ်ပွဲတော်ဟှို သွားဂေ့။ ငါ့ခီပ္လဲ့ဇောင်သေးဘဲဟှူကြောန့် အယ်ပွဲတော်ဟှို ငါသွားဟှ”#၇.၈ ငါသွားဟှ၊ တချို့ မူရင်းလတ်ရေးမူလေမာ ငါသွားဟှို့မှုသေးဟှ၊ ဆိုဘီး ရှိဟှယ်။ ဆိုဘီး မိန့်တော်မူလေဟှယ်။ 9အယ်မျိုးပြောဘီးန ကိုယ်တော်ဟှာ ဂါလိလဲနယ်မာဘဲ့ ဆစ်ဘီးနေလေဟှယ်။
ယေရှုဟှာ တဲတော်ပွဲဟှို ကြွတော်မူဟှူကြောန်း
10ကိုယ်တော်ရဲ့ ညီလေဟှာ ပွဲတော်ဟှို သွားလိုက်ဘီးန ယေရှုဟှလည်း တိတိဟှား လိုက်ဟှားဟှယ်။ 11ယုဒအာဏာပိုင်လေဟှာ အယ်ပွဲတော်မာ ကိုယ်တော့်ဟှို ရှာဂေ့ဟှယ်။ သူးနို့ဟှ “အယ်လူဟှာ ဖယ်မာနူး” ဆိုဘီး မေးဟှယ်။
12လူအောက်ဂီးထဲမာ ကိုယ်တော်ကြောန်းဟှို တီးတိုးပြောနေဂေ့ဟှယ်။ လူတချို့ဟှ “အယ်လူဟှာ လူကောန်း ဖြစ်ဟှယ်” ဆိုဘီး ပြောဂေ့ဟှယ်။ လူတချို့ဟှ “မှုဟှ။ အယ်လူဟှာ လူလေဟှို လှည့်ဇားနေဟှယ်” ဆိုဘီး ပြောဂေ့ဟှယ်။ 13အယ်ဘေမဲ့ သူးနို့ဟှာ ယုဒ အာဏာပိုင်လေဟှို ကြော့‑က်ဂေ့ဟှူကြောန့် ဖယ်လူလည်း ကိုယ်တော်ကြောန်းဟှို ပွမ့်ပွမ့်လန်းလန်းဟှား ပြောဂေ့ဟှ။
14ပွဲတော်ကာလခီဟှာ တဝပ်ကျော်လာဟှူ ခီမာ ယေရှုဟှာ ဗိမာန်တော်ဟှို သွားဘီးဟှာ စဘီးသွန်သန်လေဟှယ်။ 15ယုဒအာဏာပိုင်လေဟှာ ရရာတိုင်း အံ့ဩဟှားဘီး “အယ်လူဟှာ ပညာသန်ဖူးဘဲ့န အယ်ပညာလေ ဘောင်ဂီးဟှို ဖယ်မျိုးသိနေရနူး” ဆိုဘီး မေးဂေ့ဟှယ်။
16ယေရှုဟှ “ငါ့သွန်သန်ချစ်ဟှာ ငါ့ရဲ့ကိုယ်ပိုင် သွန်သန်ချစ် မှုဟှ။ အယ်ဘေမဲ့ ငါ့ဟှိုစေလွတ်ဟှူ ဘုရားသခင်ရဲ့ သွန်သန်ချစ်ဖြစ်ဟှယ်။ 17ဖယ်လူဘဲ့ဖြစ်ဖြစ် ဘုရားသခင်ရဲ့ လိုတော်ဟှို လောက်ရှင်ဟှူ ဆန္ဒရှိမယ် ဆိုဟှာ ငါ့သွန်သန်ချစ်ဟှ ဘုရားသခင်နားဟှလာဇာလော အယ်မျိုးမှုဘဲနေဟှာ ငါ့ရဲ့ကိုယ်ပိုင်ခွမ့်အာဏာန ပြောနေဇာလော ဆိုဇာဟှို သိလေ့မယ်။ 18သူးနို့ရဲ့ ကိုယ်ပိုင် ခွမ့်အာဏာန ပြောဟှူလူလေဟှာ သူးနို့တွပ် ဖောင်းသရေတော်ဟှို့ဘဲ့ ရှာဂေ့ဟှယ်။ အယ်ဘေမဲ့ သူ့ဟှို စေလွှတ်ဟှူသူရဲ့ ဖောင်းသရေတော်ဟှို ရှာဟှူလူဟှာ ဖြောန့်မှန်ဟှူလူဖြစ်ဘီး သူ့မာ လီညာဇာမှေ့ဟှ။ 19မောရှေဟှ နန်းနို့ဟှို ပညတ်တရားဟှို ပေးဟှားဟှယ် မှုဟှလော။ အယ်ဘေမဲ့ နန်းနို့ထဲမာ အယ်ပညတ်တရားဟှို နားထောန်ဟှူလူ ယော့‑က်လည်းမှေ့ဟှ။ ဖြားဖြစ်ကြောန့် ငါ့ဟှို သတ်ဟှို့ကြိုးစားနေဂေ့နူး” ဆိုဘီး မိန့်တော်မူလေဟှယ်။
20လူအောက်ဂီးဟှ “နန့်ထဲမာ နတ်ဆိုးတကောန် ရှိဟှယ်! ဖယ်လူဟှ နန့်ဟှို သတ်ဟှို့ ကြိုးစားနေဂေ့နူး” ဆိုဘီး ပ္လန်ပြောလေဟှယ်။
21ယေရှုဟှ “နိမိတ်လတ်ခဏာတခုဟှို ငါလောက်ဟှူ ခီမာ နန်းနို့အားလောင်းဟှာ အံ့ဩဟှားဟှယ်။ 22မောရှေဟှ နန်းနို့ရဲ့ သားလေဟှို ရေဖျားလှီးဟှို့ နန်းနို့ဟှို ခိုင်းဟှားဟှူကြောန့် အယ်မူဇာဟှို မောရှေဟှ စဟှားဇာ မှုဟှ။ နန်းနို့ရဲ့ ဘိုးဘေးလေဟှ စဟှားဟှယ် နန်းနို့ဟှာ ဒန်းနေ့မာလည်း သားဂန်းဟှားဟှို ရေဖျားလှီးပေးဟှယ်။ 23#ယော ၅.၉မောရှေရဲ့ ပညတ်တရားဟှို ခ္လိုးဖော့‑က်ရာရော့‑က်ဘဲအောန် သားဂန်းတယော့‑က်ဟှို ဒန်းနေ့မာ ရေဖျားလှီးပေးဟှယ် ဆိုဟှာ ငါဟှာ ဒန်းနေ့မာ လူတယော့‑က်ဟှို ကျန်းမာစေဟှူကြောန့် နန်းနို့ဟှာ ငါ့ဟှို ဖြားဖြစ်ဟှိ မျစ်ဖြစ်ရနူး။ 24ပြင်ပလတ်ခဏာအားဖြင့် စီရင်ဂေ့ဘဲန မှန်းမှန်ကန်းကန်ဟှား စီရင်ဂေ့” ဆိုဘီး မိန့်တော်မူလေဟှယ်။
အယ်လူဟှာ မေရှိယဘဲ့လော
25ယေရုရှလင်ဗြို့သားတချို့ဟှ “အယ်လူဟှို အာဏာပိုင်လေဟှ သတ်ဟှို့ ရှာနေဂေ့ဟှယ် မှုဟှလော။ 26ကေ့ကေ့! အယ်လူဟှာ လူဘောင်လယ်မာ ဟောပြောနေဇာဟှို အာဏာပိုင်လေဟှာ တားဂေ့ဟှမား! အယ်လူဟှာ မေရှိယဖြစ်ဟှယ် ဆိုဇာဟှို သူးနို့ဟှာ မှန်တိုင်း သိဟှားဘီလော။ 27အယ်ဘေမဲ့ မေရှိယကြွလာဟှူ ခီမာ ဖယ်နေရာဟှနေ လာဟှယ် ဆိုဇာဟှို ဖယ်သူလည်း သိဂေ့ဟှ။ အယ်လူဟှာ ဖယ်ဟှလာဟှယ် ဆိုဇာဟှို နို့လေအားလောင်း သိဂေ့ဟှယ်” ဆိုဘီး ပြောဂေ့ဟှယ်။
28ယေရှုဟှ ဗိမာန်တော်ထဲမာ သွန်သန်ဟှူ ခီမာ သံက္လယ်ဂီးန “နန်းနို့ဟှ ငါ့ဟှို တကယ်သိဘဲ့လော။ ငါဟှာ ဖယ်ဟှလာဟှယ် ဆိုဇာဟှို သိဘဲ့လော။ ငါဟှာ ငါ့ရဲ့ ဆန္ဒန လာဇာ မှုဟှ။ အယ်ဘေမဲ့ ငါ့ဟှို စေလွှတ်ဟှူ လူဟှာ သစ်စာန ပ္လဲ့ဇောင်လေဟှယ်။ နန်းနို့ဟှာ သူ့ဟှို သိဂေ့ဟှ၊ 29အယ်ဘေမဲ့ ငါဟှာ သူ့ဟှို သိဟှယ်။ ဖြားဖြစ်ကြောန့်နူးဆိုဟှာ ငါဟှာ သူ့နားဟှနေလာဘီး သူဟှ ငါ့ဟှို စေလွှတ်လိုက်ဟှယ်” ဆိုဘီး မိန့်တော်မူလေဟှယ်။
30အယ်ကြောန့် သူးနို့ဟှ ကိုယ်တော့်ဟှို ဖမ်းဟှို့ ကြိုးစားဘေမဲ့ ကိုယ်တော်ရဲ့ခီ ရော့‑က်သေးဘဲဟှူကြောန့် ဖယ်သူလည်း ကိုယ်တော့်ဟှို ဖမ်းဂေ့ဟှ။ 31အယ်ဘေမဲ့ လူအောက်ထဲဟှ များစုဟှာ ကိုယ်တော့်ဟှို ယောင်ကြည်ဂေ့ဘီး “မေရှိယ ရော့‑က်လာဟှူ ခီမာ အယ်လူလောက်ဇာလေထတ် ပိုများဟှူ နိမိတ်လတ်ခဏာလေဟှို ပြုတော်မူဟှို့လော” ဆိုဘီး မေးဂေ့ဟှယ်။
ယေရှုဟှို ဖမ်းဟှို့တွပ် စောန့်လေဟှို စေလွှတ်ကြောန်း
32ယေရှုကြောန်းဟှို လူအောက်ဂီးဟှ တီးတိုးပြောနေဇာလေဟှို ဖာရိရှဲလေ ကြားဟှူကြောန့် ယဇ်ပုရောဟိတ်ဂီးလေန ဖာရိရှဲလေဟှာ ကိုယ်တော့်ဟှို ဖမ်းဟှို့တွပ် စောန့်တချို့ဟှို စေလွှတ်ဂေ့ဟှယ်။ 33ယေရှုဟှ “ငါဟှာ နန်းနို့နတူးဒူ ရှစ်ဟှားနေဘီးဟှာ ငါ့ဟှို စေလွှတ်တော်မူဟှူ သူနားဟှို သွားရမယ်။ 34နန်းနို့ဟှာ ငါ့ဟှို ရှာဘေမဲ့ တွိဟှို့ မှုဟှ။ ဖြားဖြစ်ကြောန့်နူးဆိုဟှာ ငါရှိဟှူ နေရာဟှို နန်းနို့လာနိုင်ဂေ့ဟှ” ဆိုဘီး မိန့်တော်မူလေဟှယ်။
35ယုဒအာဏာပိုင်လေဟှ “နို့လေရှာတွိဘဲအောန် သူဟှ ဖယ်နေရာဟှို သွားဟှို့နူး။ နို့လူမျိုးလေနေဟှူ လူမျိုးခြားလေနေဟှူ ဗြို့ဟှို သွားဘီး လူမျိုးခြားလေဟှို သွန်သန်ဟှို့လော။ 36နို့လေဟှာ သူ့ဟှို လိုက်ရှာဘေမဲ့ ရှာတွိဟှို့ မှုဟှ။ သူရှိဟှူ နေရာဟှို နို့လေ လာနိုင်ဟှို့ မှုဟှ ဆိုဘီး ပြောဇာဟှ ဖြားဓိပါယ်နူး” ဆိုဘီး ရှင်းရှင်း ပြောနေဂေ့ဟှယ်။
သတ်ပေးဟှူ ရေခ္လောန်း
37ပွဲတော်ရဲ့ ရေးကီးဆောင်းနေ့ဖြစ်ဟှူ နော့‑က်ဆောင်းနေ့မာ ယေရှုဟှာ ထရပ်ဘီးဟှာ “ရေငတ်ဟှူ လူဟှာ ငါ့နားဟှို လာဘီး သော့က်ဂေ့ပါ။ 38ငါ့ဟှို ယောင်ကြည်ဟှူ လူတိုင်းဟှာ သော့‑က်ရမယ်။ ကျမ်းစာမာ ပြောဟှားမျိုးဘဲ့ ‘သတ်ဟှိုပေးဟှူ ရေခ္လောန်းဟှာ သူ့ရဲ့ နှလောင်းထဲဟှနေ စီးထွပ်လာလေ့မယ်’ ”#၇.၃၈ ခန်းငယ် ၃၇–၃၈ ထဲဟှ ယေရှုရဲ့ စကားလေဟှို “သတ်ရေထွပ်ဟှူ စမ်းရေဒွမ်း ဖြစ်လေ့မယ်။ ၃၈ ကျမ်းစာမာ ပြောဟှားမျိုးဘဲ့ ‘သတ်ဟှိုပေးဟှူ ရေခ္လောန်းဟှာ သူ့ရဲ့ နှလောင်းထဲဟှနေ စီးထွပ်လာလေ့မယ်၊’ ” ဆိုဘီး ဘာသာပ္လန်ဟှားဟှယ်။ ဆိုဘီး သံက္လယ်ဂီး မိန့်တော်မူလေဟှယ်။ 39ကိုယ်တော့်ဟှို ယောင်ကြည်ဟှူ လူလေဟှာ လတ်ခံရရှိမယ့် ဝိညာဉ်တော်ကြောန်းဟှို မိန့်တော်မူလေဟှယ်။ ယေရှုဟှာ ဖောင်းသရေတော် ထန်ရှားဟှို့တွပ် ထမြော့‑က်ရသေးဘဲကြောန့် ဝိညာဉ်တော်ဟှို ပေးတော်မူသေးဟှ။
လူလေထဲမာ စိဝန်းကွဲဟှားကြောန်း
40လူအောက်ထဲမာ တချို့ဟှာ ကိုယ်တော်ရဲ့ စကားလေဟှို ကြားရဘီးန “အယ်လူဟှာ ပရောဖက်#၇.၄၀ ပရောဖက်၊ ရှု ၁.၂၁။ စစ်မှန် ဖြစ်ဟှယ်!” ဆိုဘီး ပြောဂေ့ဟှယ်။
41တချို့ဟှလည်း “အယ်လူဟှာ မေရှိယ ဖြစ်ဟှယ်!” ဆိုဘီး ပြောဂေ့ဟှယ်။
အယ်ဘေမဲ့ တချို့ဟှ “မေရှိယဟှာ ဂါလိလဲနယ်ဟှနေ ပေါ်ထွပ်လာဟှို့ မှုဟှ! 42မေရှိယဟှာ ဒါဝိဒ်မန်းဂီးရဲ့ မ္လေးမ္လစ်ဖြစ်ဘီး ဒါဝိဒ်နေဖူးဟှူ ဗက်လင်ဗြို့မာ မွီးမယ် ဆိုဘီး ကျမ်းစာဟှ ပြောဟှားဟှယ်” ဆိုဘီး ပြောဂေ့ဟှယ်။ 43အယ်ကြောန့် ယေရှုကြောန့် လူအောက်ထဲမာ စိဝမ်းကွဲဟှားဂေ့ဟှယ်။ 44တချို့ဟှ ကိုယ်တော့်ဟှို ဖမ်းရှင်ဘေမဲ့ ဖယ်လူလည်း ကိုယ်တော့်ဟှို ဖမ်းဆီးဂေ့ဟှ။
ယောင်ကြည်ဘဲဟှူ ယုဒအာဏာပိုင်လေကြောန်း
45စောန့်လေ ပ္လန်ရော့‑က်လာဟှူ ခီမာ ယဇ်ပုရောဟိတ်ဂီးလေန ဖာရိရှဲလေဟှ “ဖြားဖြစ်ကြောန့် သူ့ဟှို ခေါ်လာဟှနူး” ဆိုဘီး သူးနို့ဟှို မေးဂေ့ဟှယ်။
46စောန့်လေဟှ “အယ်လူမျိုး ဖယ်လူလည်းပြောဖူးဟှ!” ဆိုဘီး ပ္လန်ဖြေဂေ့ဟှယ်။
47ဖာရိရှဲလေဟှ “နန်းနို့လည်း လှည့်ဇားခံရဂေ့ ဟှားဘီလော” ဆိုဘီး သူးနို့ဟှို မေးဂေ့ဟှယ်။ 48“အာဏာပိုင်လေန ဖာရိရှဲလေထဲမာလည်း သူ့ဟှို ယောင်ကြည်ဟှူလူ ယော့‑က်ယော့‑က်ရှိနေဘီလော။ 49အယ်လူအော့‑က်ဟှာ မောရှေရဲ့ ပညတ်တရားဟှို သိဘဲကြောန့် သူးနို့ဟှာ ကီဇာမိနေဟှူ လူလေ ဖြစ်ဟှယ်!”
50 #
ယော ၃.၁,၂ ဖာရိရှဲလေထဲဟှ တယော့‑က်ဖြစ်ဘီး ရင်ဒူးဟှ ယေရှုနားဟှို လာဖူးဟှူ နိကောဒင်ဟှ 51“နို့လေရဲ့ ပညတ်တရားဟှာ လူလေနားဟှ ကြားနာရသေးဘဲ့န လူလေ လောက်ဟှားဇာလေဟှိုလည်း သိရသေးဘဲ့န စီရင်မယ်ဘဲ့လော” ဆိုဘီး တခြားလူလေဟှို မေးဟှယ်။
52သူးနို့ဟှ “အယ်မျိုးဆိုဟှာ နန်ဟှာလည်း ဂါလိလဲနယ်သားဘဲ့လော။ ကျမ်းစာဟှို လေ့လာဂေ့။ အယ်ဆိုဟှာ ဂါလိလဲနယ်ဟှနေ ဖယ်ပရောဖက်လည်း ပေါ်ထွန်းဂေ့ဟှ#၇.၅၂ ဖယ်ပရောဖက်လည်း ပေါ်ထွန်းဂေ့ဟှ၊ မူရင်းလတ်ရေးမူ တခုမာ ပရောဖက်ဟှာ ပေါ်ထွန်းလာဟှို့ မှုဟှ၊ ဆိုဘီး ရှိဟှယ်။ ဆိုဇာဟှို နန်းနို့သိလာဂေ့မယ်” ဆိုဘီး ဖြေဂေ့ဟှယ်။
အီထောန်ရေးဖော့‑က်ပ္လန်နေဟှူ မီးမဟှို ဖမ်းမိကြောန်း
[ 53အယ်ဘီးန သူးနို့လေဟှာ ကိုယ့်အီဟှိုကိုယ် ပ္လန်ဟှားဂေ့ဘီး၊
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ယောဟန် 7: NTDWB24
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
