ယောဟန် 6
6
ယေရှုဟှ လူငါးထောန်ဟှို ကျွေးမွေးတော်မူဟှူကြောန်း
(မဿဲ ၁၄.၁၃–၂၁; မာကု ၆.၃၀–၄၄; လုကာ ၉.၁၀–၁၇)
1အယ်ဘီးန ယေရှုဟှာ ဂါလိလဲအိုင်ဟှို ကူးတော်မူဟှယ်။ တိဗေရိအိုင် ဆိုဘီးလည်း ခေါ်ဂေ့ဟှယ်။ 2လူနာလေဟှို နာပျော့‑က်စေတော်မူဟှူ နိမိတ်လတ်ခဏာလေဟှို ဗြင်ဟှားဘီးကြောန့် လူအောက်ဂီးဟှာ နော့‑က်ဟှို လိုက်ဂေ့ဟှယ်။ 3ယေရှုဟှာ တောန်ထတ်ဟှို တတ်ဟှားဘီး တဗဲ့တော်လေနတူးဒူ ထိုင်ဂေ့ဟှယ်။ 4ခုခီဟှာ ယုဒလူလေရဲ့ ပသခါပွဲတော် နီးကပ်လာဟှယ်။ 5ယေရှုဟှာ ပတ်စစ်မွှိကေ့လိုက်ဟှူ ခီမာ သူ့နားဟှို လူအောက်ဂီးလာနေဇာဟှို ဗြင်ဟှားဟှယ်။ အယ်ကြောန့် ဖိလိပ္ပုဟှို “အယ်လူလေဟှို ကျွေးဟှို့စားဇာ ဖယ်နေရာမာ ဝယ်ရမယ်နူး” ဆိုဘီး မေးတော်မူလေဟှယ်။ 6ကိုယ်တော်ဟှာ ဖိလိပ္ပုဟှို စမ်းသပ်ဟှို့တွပ် မေးလိုက်ဟှယ်။ ဖြားဖြစ်ကြောန့်နူးဆိုဟှာ ကိုယ်တော်ဟှ ဖြားဇာလောက်ရမယ် ဆိုဇာဟှို သိတော်မူဟှားပီးဘီ။
7ဖိလိပ္ပုဟှ “သူးနို့ဟှာ စားဇာဒစ်သားစီ စားရဟှို့တွပ် ငွေဒန်းဂါး#၆.၇ ငွေဒန်းဂါး၊ ငွေဒန်းဂါးတပ္လားဟှာ ကျေးဝါမာနေဟှူ လောက်သမား တယော့‑က်ရဲ့ တနေ့လောက်အားခ ဖြစ်ဟှယ် (ရှု မ ၂၀.၂)။လေ ၂၀၀ ထတ် ပိုမှဘဲ့ လော့‑က်အောန်ဝယ်နိုင်မယ်” ဆိုဘီး ပ္လန်လျှော့‑က်လေဟှယ်။
8တဗဲ့တော်လေထဲဟှ တယော့‑က်ဖြစ်ဟှူ ရှိမုန်ပေတရုရဲ့ညီ အန္ဒြေဟှ၊ 9“အယ်နေရာမာ မုယောမုငါးလောင်းန ငါးနှေ့ကောန်ရှိဟှူ ကောန်သားတယော့‑က်ရှိဟှယ်။ အယ်ဘေမဲ့ အယ်မုန ငါးလေဟှာ အယ်လူလေဘောင်ဂီးတွပ် လောင်းဝလော့‑က်ဟှို့ မှုဟှ” ဆိုဘီး လျှော့‑က်လေဟှယ်။
10ယေရှုဟှ “လူလေဟှို ထိုင်ခိုင်းလိုက်” ဆိုဘီး မိန့်တော်မူဟှယ်။ အယ်နေရာမာ ဗြစ်ပ္လန်လေ ရှိဟှယ်။ အယ်ကြောန့် ၅,၀၀၀ လော့‑က်ရှိဟှူ ယော့‑က်ကျားလေဟှာ ထိုင်ဂေ့ဟှယ်။ 11ယေရှုဟှာ မုဟှိုယူဘီးဟှာ ဘုရားသခင်ဟှို ကျေးဇူးတော် ချီးမွမ်းဘီးန ထိုင်နေဟှူ လူလေဟှို ဝီပေးလိုက်ဟှယ်။ အယ်မျိုးဘဲ့ ငါးဟှိုလည်း သူးနို့စားရှင်မျိုးစား#၆.၁၁ သူးနို့လေဟှာ ဗိုက်ပ္လဲ့အောန် စားဂေ့ဟှယ်။ဂေ့ဟှို့တွပ် ဝီပေးလေဟှယ်။ 12သူးနို့လေ အားလောင်းဂူဟှာ ဗိုက်ပ္လဲ့ဟှားဟှူ ခီမာ ကိုယ်တော်ဟှ တဗဲ့တော်လေဟှို “တခုလည်း ပစ်စလတ်ခတ် ဖြစ်ဘဲနေအောန် ကျန်နေဟှူ ပိုင်းစလေဟှို စုသီးဂေ့” ဆိုဘီး ပြောဟှယ်။ 13အယ်ကြောန့် တဗဲ့တော်လေဟှာ စုသီးလိုက်ဟှူ ခီမာ လူလေစားဟှားဟှူ မုယောမုငါးလောင်းန ငါးနှေ့ကောန်ဟှနေ ကျန်နေဟှူ ပိုင်းစလေဟှာ ဆယ့်နှေ့တောန်းပ္လဲ့ ရဂေ့ဟှယ်။
14အယ်နေရာမာရှိဟှူ လူလေဟှာ ယေရှုလောက်ဟှူ အယ်နိမိတ်လတ်ခဏာဟှို ဗြင်ဘီး “အယ်လူဟှာ လောကဟှို ရော့‑က်လာမယ့် ပရောဖက်#၆.၁၄ ပရောဖက်၊ ရှု ၁.၂၁။ စစ်မှန်ဖြစ်ဟှယ်” ဆိုဘီး ပြောဂေ့ဟှယ်။ 15သူးနို့ဟှာ မိမိဟှို တင်းကြပ်ခေါ်ဆောန်ဟှားဘီးဟှာ မန်းဂီးလောက်ခိုင်းဟှို့ ကြံနေဂေ့ဟှယ် ဆိုဇာဟှို ယေရှုသိတော်မူကြောန့် နော့‑က်တခါ တောန်ထတ်ဟှို တယော့‑က်ဒဲ ထွပ်ဟှားဟှယ်။
ယေရှု ရေထတ်မာ လမ်းရှော့‑က်ကြောန်း
(မဿဲ ၁၄.၂၂–၃၃; မာကု ၆.၄၅–၅၂)
16နေဒန်ဇာရော့‑က်လာခီမာ ယေရှုရဲ့ တဗဲ့တော်လေဟှာ ဂါလိလဲအိုင်ထဲဟှို ဆင်းဟှားဘီး၊ 17လှေထတ်ဟှို တတ်ဘီး၊ အိုင်ဟှို ဖြတ်ဘီး ကပေရနောင်ဗြို့ဟှို ပ္လန်ဟှားဂေ့ဟှယ်။ ညဉ့်ခန်းဇာရော့‑က်လာလည်း ယေရှုဟှာ သူးနို့နားဟှို ရော့‑က်လာသေးဟှ။ 18အယ်ခီမာ လေပြင်းတိုက်လာဘီး လှိုင်းကီးလာဟှယ်။ 19အယ်ဘီးန တဗဲ့တော်လေဟှာ သောင်းလေးမိုင်လော့‑က် လှော်ခတ်ဘီးခီမာ ယေရှုဟှာ ရေထတ်မာ လမ်းရှော့‑က်ဘီးဟှာ လှေနားဟှို လာနေဇာဟှို ဗြင်ဟှားဘီး ကြော့‑က်လန့်ဟှားဂေ့ဟှယ်။ 20ယေရှုဟှ “ကြော့‑က်ဂေ့န။ ငါဘဲ့ဖြစ်ဟှယ်” ဆိုဘီး သူးနို့ဟှို မိန့်တော်မူလေဟှယ်။ 21အယ်ဘီးန သူးနို့ဟှာ ဝန်းသာအားရန ကိုယ်တော့်ဟှို လှေထတ်ဟှို ဆွဲဒန်ဘီးန လှေဟှာ သူးနို့သွားမယ့် ကမ်းခြေဟှို ရှင်းရှင်းဘဲ့ ရော့‑က်ဟှားဟှယ်။
ယေရှုဟှို လူလေ လိုက်ရှာဟှူကြောန်း
22နတ်ကီးတိုင်ရော့‑က်မှ အိုင်တဖတ်မာနေခဲ့ဟှူ လူအောက်ဂီးဟှာ အယ်နေရာမာ လှေတစင်းဘဲ့ရှိနေဇာဟှို ဒိထားမိဂေ့ဟှယ်။ အယ်လှေထဲမာ ယေရှုဟှာ တဗဲ့တော်လေနတူးဒူ လိုက်ဟှားဘဲ့န တဗဲ့တော်လေဘဲ့ ထွပ်ဟှားဇာဟှို သူးနို့ဟှာ သိဟှားဂေ့ဟှယ်။ 23တိဗေရိဗြို့ဟှ တခြားလှေလေဟှာ သခင်ဘုရား ကျေးဇူးတော် ချီးမွမ်းဘီးန လူအောက်ဂီးမုစားခဲ့ဟှူ ကမ်းခြေအနီးဟှို ရော့‑က်လာဂေ့ဟှယ်။ 24လူအောက်ဂီးဟှာ အယ်နေရာမာ ယေရှုန တဗဲ့တော်လေရှိဟှ ဆိုဇာဟှို သိဟှားဟှူ ခီမာ အယ်လှေလေထဲဟှို ဝမ်ဘီးန ကိုယ်တော့်ဟှို ရှာဟှို့တွပ် ကပေရနောင်ဗြို့ဟှို သွားဂေ့ဟှယ်။
သတ်မုဖြစ်ဟှူ ယေရှု
25အိုင်တဖတ်ကမ်းမာ ကိုယ်တော့်ဟှို လူလေတွိဟှူ ခီမာ သူးနို့ဟှ “ဆရာ၊ အယ်နေရာဟှို ဖယ်ခီဒူးဟှ ရော့‑က်လာနူး” ဆိုဘီး ကိုယ်တော့်ဟှို မေးလျှော့‑က်လေဟှယ်။
26ယေရှုဟှ “နန်းနို့ဟှို ငါ မှန်တိုင်းပြောမယ်၊ နန်းနို့ ငါ့ဟှို လိုက်ရှာနေဇာဟှာ ငါ့ရဲ့ နိမိတ်လတ်ခဏာလေဟှို နားလည်ဟှူကြောန့် မှုဟှ။ နန်းနို့ဟှာ မုဟှို စားရှင်မျိုးစားရကြောန့် ဖြစ်ဟှယ်။ 27ပုပ်ပျစ်တတ်ဟှူ စာတွပ် လောက်ဘဲန ထာဝရသတ်တွပ် တည်မြဲဟှူ စာဟှို လောက်ဂေ့။ အယ်မူဇာဟှာ လူ့ရဲ့သားဟှ နန်းနို့ဟှို ပေးမယ့် စာဖြစ်ဟှယ်။ ဖြားဖြစ်ကြောန့်နူးဆိုဟှာ ဖဘုရားသခင်ဟှာ အယ်လူ့ရဲ့သားဟှို ဇိခတ်ဟှားတော် မူဟှယ်” ဆိုဘီး ဖြေတော်မူလေဟှယ်။
28အယ်ကြောန့် သူးနို့ဟှ “ကျွန်တော့်ဟှားလေဟှာ ဘုရားသခင် လိုရှင်ဟှူ လောက်ဟှို လောက်ဟှို့တွပ် ကျွန်တော့်ဟှားလေဟှ ဖြားဇာ လောက်ရဟှို့နူး” ဆိုဘီး ကိုယ်တော့်ဟှို မေးလျှော့‑က်ဂေ့ဟှယ်။
29ယေရှုဟှ “ဘုရားသခင် လောက်စေရှင်ဟှူဇာဟှ ဘုရားသခင် စေလွတ်လိုက်ဟှူ သူဟှို ယောင်ကြည်ဟှို့ဘဲ့ ဖြစ်ဟှယ်” ဆိုဘီး ဖြေတော်မူဟှယ်။
30သူးနို့ဟှ “အယ်ဆိုဟှာ ကျွန်တော့်ဟှားလေ ဗြင်ဘီး ကိုယ်တော့်ဟှို ယောင်ကြည်ဟှို့တွပ် ဖယ်မျိုး နိမိတ်လတ်ခဏာဟှို ကိုယ်တော်ဟှ လောက်ပြမယ်နူး။ ကိုယ်တော်ဟှ ဖယ်မျိုး လောက်ပေးမယ်နူး။ 31‘ကိုယ်တော်ဟှာ ကောန်းဂန်ဟှ မုဟှို သူးနို့စားဟှို့ ပေးတော်မူဟှယ်’ ဆိုဘီး ကျမ်းစာမာ ရေးဟှားမျိုးဘဲ့ ကျွန်တော့်ဟှားလေရဲ့ ဘိုးဘေးလေဟှ ကန္တာရမာ မန္နမုဟှို စားဂေ့ဟှယ်” ဆိုဘီး ပ္လန်ဖြေဂေ့ဟှယ်။
32ယေရှုဟှ “နန်းနို့ဟှို ငါ မှန်တိုင်းပြောမယ်၊ ကောန်းဂန်ဟှ မုဟှို နန်းနို့ဟှို ပေးဟှူ သူဟှာ မောရှေ မုဟှ။#၆.၃၂ နန်းနို့ဟှို ပေးဟှူ သူဟှာ မောရှေ မုဟှ၊ အယ်မျိုးမှုဘဲနေဟှာ နန်းနို့ဟှို မောရှေပေးဇာ မှုဟှ။ ငါ့ဖဟှ ကောန်းဂန်ဟှနေ စစ်မှန်ဟှူ မုဟှို နန်းနို့ဟှို ပေးတော်မူဟှယ်။ 33ဘုရားသခင်ပေးဟှူ မုဟှာ ကောန်းဂန်ဟှနေ ဆင်းလာဘီး လောကသားလေဟှို သတ်ပေးဟှူ သူဖြစ်ဟှယ်” ဆိုဘီး မိန့်တော်မူဟှယ်။
34သူးနို့ဟှ “သခင်၊ အယ်မုဟှို ကျွန်တော့်ဟှားလေဟှို မြဲဒမ်း ပေးပါ” ဆိုဘီး တောန်းလျှော့‑က်ဂေ့ဟှယ်။
35ယေရှုဟှ “ငါဟှာ သတ်မု ဖြစ်ဟှယ်။ ငါ့နားဟှို လာဟှူလူလေဟှာ လောင်းဝ ငတ်မွတ်လေ့မယ် မှုဟှ။ ငါ့ဟှို ယောင်ကြည်ဟှူ လူလေဟှာလည်း လောင်းဝ ရေငတ်လေ့မယ် မှုဟှ။ 36ခု နန်းနို့ဟှာ ငါ့ဟှို ဗြင်နေဘေမဲ့ ယောင်ကြည်လေ့ဟှို့ မှုဟှ ဆိုဇာဟှို နန်းနို့ဟှို ငါပြောဟှားဟှယ်။ 37ငါ့ဖဟှ ငါ့ဟှို ပေးဟှားဟှူ လူတိုင်းဟှာ ငါ့နားဟှို လာလေ့မယ်။ ငါ့နားလာဟှူလူဟှို ငါဟှာ လောင်းဝ ပစ်ပယ်ဟှို့ မှုဟှ၊ 38ဖြားဖြစ်ကြောန့်နူးဆိုဟှာ ငါဟှာ ငါလိုရှင်ဟှူတိုင်း လောက်ဟှို့မှုဘဲ ငါ့ဟှို စေလွတ်ဟှူ သူရဲ့ လိုရှင်ဟှူတိုင်း လောက်ဟှို့တွပ် ကောန်းဂန်ဟှနေ ဆင်းလာဟှယ်။ 39ငါ့ဟှို စေလွတ်ဟှူ သူရဲ့ လိုတော်ဟှာ ငါ့ဟှို ပေးအပ်ဟှားဟှူ လူလေ အားလောင်းဂူ ဆောင်းရှောင်းစေဘဲန နော့‑က်ဆောင်းနေ့မာ သူးနို့လေ အားလောင်းဂူဟှာ ရှင်ပ္လန်ထမြော့‑က်စေဟှို့တွပ် ဖြစ်ဟှယ်။ 40ငါ့ဖလိုရှင်ဇာဟှ သားတော်ဟှို ဗြင်ဘီး ယောင်ကြည်လာဟှူ လူအားလောင်းဟှာ ထာဝရသတ်ရဟှို့ဖြစ်ဟှယ်။ ငါဟှလည်း နော့‑က်ဆောင်းနေ့မာ သူးနို့ဟှို ရှင်ပ္လန်ထမြော့‑က်စေမယ်” ဆိုဘီး မိန့်တော်မူလေဟှယ်။
41ကိုယ်တော်ဟှ “ငါဟှာ ကောန်းဂန်ဟှနေ ဆင်းလာဟှူ မုဖြစ်ဟှယ်” ဆိုဘီး မိန့်တော်မူလိုက်ဟှူကြောန့် ယုဒလူလေဟှာ ကိုယ်တော်ကြောန်းဟှို စဘီးဟှာ ဝေဖန်ဂေ့ဟှယ်။ 42အယ်ကြောန့် သူးနို့ဟှ “အယ်လူဟှာ ယောသပ်ရဲ့သား ယေရှု မှုဟှလော။ နို့လေဟှာ သူ့ရဲ့ မိဖဟှို သိဟှယ်။ အယ်ဆိုဟှာ သူဟှာ ကောန်းဂန်ဟှနေ ဆင်းလာဟှယ် ဆိုဘီး ဖယ်မျိုးဖြစ် ပြောနေရနူး” ဆိုဘီး ပြောနေဂေ့ဟှယ်။
43ယေရှုဟှ “နန်းနို့ရှင်းရှင်းထဲမာ ဝေဖန်နေဇာဟှို ရပ်ဂေ့။ 44ငါ့ဟှို စေလွတ်ဟှူ ဖဟှ သူးနို့ဟှို ဆွဲခေါ်ဟှ ဆိုဟှာ လူလေဟှာ ငါ့နားဟှို လာနိုင်ဂေ့ဟှ။ ငါ့နားဟှို လာဟှူလူလေဟှို နော့‑က်ဆောင်းနေ့မာ ငါဟှာ ရှင်ပ္လန်ထမြော့‑က်စေမယ်။ 45ပရောဖက်ကျမ်းလေမာ ‘လူတိုင်းဟှာ ဘုရားသခင်အားဖြင့် သွန်သန်ပေးဇာဟှို ခံရလေ့မယ်’ ဆိုဘီး ရေးဟှားဟှယ်။ ဖနားဟှ ကြားရဘီး သန်ယူဟှူ ဖယ်သူမဆို ငါ့နားဟှို လာဂေ့ဟှယ်။ 46အယ်မျိုးဆိုဟှာ ယော့‑က်ယော့‑က်ဟှ ဖဟှို ဗြင်ဖူးဟှယ် ဆိုဘီး ပြောရှင်ဇာ မှုဟှ။ ဘုရားသခင်နားဟှနေ ရော့‑က်လာဟှူသူ တယော့‑က်ဘဲ့ ဖဟှို ဗြင်ဖူးဟှယ်။ 47နန်းနို့ဟှို ငါ မှန်တိုင်းပြောမယ်၊ ငါ့ဟှို ယောင်ကြည်ဟှူ လူဟှာ ထာဝရသတ်ဟှို ရဟှယ်။ 48ငါဟှာ သတ်မု ဖြစ်ဟှယ်။ 49နန်းနို့ရဲ့ ဘိုးဘေလေဟှာ ကန္တာရထဲမာ မန္နမုဟှို စားရဘေမဲ့လည်း သေဟှားဂေ့ဟှယ်။ 50အယ်ဘေမဲ့ အယ်မုဟှာ ကောန်းဂန်ဟှနေ ဆင်းလာဟှူကြောန့် စားဟှူလူတိုင်းဟှာ သေရလေ့ဟှို့ မှုဟှ။ 51ငါဟှာ ကောန်းဂန်ဟှနေ ဆင်းလာဟှူ သတ်မု ဖြစ်ဟှယ်။ နန်းနို့ဟှာ အယ်မုဟှို စားမယ် ဆိုဟှာ ထာဝရသတ်ရှင် လေ့မယ်။ လောကသားလေ သတ်ရှင်နိုင်ဟှို့တွပ် ငါပေးဟှူ မုဟှာ ငါ့ရဲ့သား ဖြစ်ဟှယ်” ဆိုဘီး မိန့်တော်မူလေဟှယ်။
52အယ်န ယုဒလူလေဟှ “အယ်လူဟှ သူ့ရဲ့သားဟှို နို့လေစားဟှို့ ဖယ်မျိုးပေးနိုင်မယ်နူး” ဆိုဘီး သူးနို့ရှင်းရှင်းဟှာ စဘီး ဂြင်းဂေ့လေဟှယ်။
53ယေရှုဟှ “နန်းနို့ဟှို ငါ မှန်တိုင်းပြောမယ်၊ နန်းနို့ဟှာ လူ့သားရဲ့ သားဟှို စားဟှ။ သူ့ရဲ့သွီးဟှို သော့‑က်ဟှ ဆိုဟှာ နန်းနို့ရဲ့ထဲမာ သတ်မှေ့ဟှို့ မှုဟှ။ 54ငါ့သားဟှို စားဘီး ငါ့သွီးဟှို သော့‑က်ဟှူသူလေဟှာ ထာဝရသတ်ဟှို ရဟှယ်။ ငါဟှာ သူးနို့ဟှို နော့‑က်ဆောင်းနေ့မာ ရှင်ပ္လန်ထမြော့‑က်စေမယ်။ 55ဖြားဖြစ်ကြောန့်နူးဆိုဟှာ ငါ့သားဟှာ စစ်မှန်ဟှူ စားဇာဖြစ်ဘီး ငါ့ရဲ့ သွီးဟှာ စစ်မှန်ဟှူ သော့‑က်ဇာဖြစ်ဟှယ်။ 56ငါ့ရဲ့ သားဟှို စားဘီး ငါ့သွီးဟှို သော့‑က်ဟှူ လူလေဟှာ ငါ့ရဲ့ ထဲမာ သတ်ရှင်နေဟှယ်။ ငါဟှာလည်း သူးနို့ရဲ့ ထဲမာ သတ်ရှင်နေဟှယ်။ 57သတ်ရှင်ဟှူ ဖဟှ ငါ့ဟှို စေလွှတ်တော်မူဘီး ငါဟှာလည်း ဖအားဖြင့် သတ်ရှင်ဟှယ်။ အယ်မျိုးဘဲ့ ငါ့ဟှို စားဟှူ လူတိုင်းဟှာလည်း ငါ့အားဖြင့် သတ်ရှင်ရလေ့မယ်။ 58အယ်မျိုးဆိုဟှာ အယ်မုဟှ ကောန်းဂန်ဟှနေ ဆင်းလာဟှူ မုဖြစ်ဟှယ်။ နန်းနို့ ဘိုးဘေးလေဟှာ မန္နမုဟှို စားဘီး သေဟှားဂေ့ဟှယ်။ အယ်ဘေမဲ့ အယ်မုဟှို စားဟှူ လူတိုင်းဟှာ ထာဝရ သတ်ရှင်လေ့မယ်” ဆိုဘီး သူးနို့ဟှို မိန့်တော်မူလေဟှယ်။
59ယေရှုဟှာ ကပေရနောင်ဗြို့ဟှ ဝါလယ်ဇရပ်မာ သွန်သန်ပေးဒူးဟှ အယ်မူဇာလေဟှို မိန့်တော်မူလေဟှယ်။
ထာဝရသတ်နဆိုင်ဟှူ စကားတော်လေ
60ကိုယ်တော်ရဲ့ တဗဲ့တော်လေ ဘောင်ဂီးဟှာ အယ်မူဇာဟှို ကြားဘီးန “အယ်မျိုး သွန်သန်ဇာဟှာ ရရာတိုင်း ခတ်ဟှယ်။ အယ်မူဇာဟှို ဖယ်လူဟှ နားထောန်နိုင်ဟှို့နူး” ဆိုဘီး ပြောဂေ့ဟှယ်။
61တဗဲ့တော်လေဟှာ အယ်ကြောန်းရာဟှို ဝေဖန်နေဂေ့ဟှယ် ဆိုဇာဟှို ယေရှုဟှ လိုလိုသိနေဟှယ်။ အယ်ကြောန့် ကိုယ်တော်ဟှ “အယ်စကားကြောန့် နန်းနို့ စိပျစ်ဟှားဘီလော။ 62အယ်ဆိုဟှာ လူ့ရဲ့သားဟှ ရင်ဒူးဟှ နေရာဟှို ပ္လန်တတ်ကြွဇာဟှို နန်းနို့လေ ဗြင်ရမယ် ဆိုဟှာ ဖယ်မျိုးထန်ဂေ့မယ်နူး။ 63ဘုရားသခင်ရဲ့ ဝိညာဉ်ဟှ သတ်ဟှို ပေးဟှယ်။ လူ့ရဲ့ တဂိုးဟှာ လောင်းဝ သောင်းဇားဟှို့ ရဟှ။ နန်းနို့ဟှို ငါပြောဟှူ စကားလေဟှာ သတ်ပေးဟှူ ဘုရားသခင်ရဲ့ ဝိညာဉ်တော်န ဆိုင်ဟှယ်။ 64နန်းနို့ထဲဟှ တချို့ဟှာ ခုထိ ယောင်ကြည်ဂေ့ဟှ” ဆိုဘီး သူးနို့ဟှို မိန့်တော်မူဟှယ်။ ဖယ်လူလေဟှ ယောင်ကြည်ဂေ့ဟှ။ ဖယ်လူဟှ မိမိဟှို သစ်စာဖော့‑က်မယ် ဆိုဇာဟှို ယေရှုဟှာ စစဒူးဟှ သိနေဟှယ်။ 65အယ်ဘီးန ကိုယ်တော်ဟှ “အယ်ကြောန်းကြောန့် ဖဟှ ခွမ့်ပေးဟှ ဆိုဟှာ ဖယ်လူလည်း ငါ့နားဟှို လာဂေ့ဟှို့ မှုဟှ ဆိုဘီး နန်းနို့ဟှို ငါပြောဟှားဟှယ်” ဆိုဘီး မိန့်တော်မူလေဟှယ်။
66အယ်ခီဟှစဘီး ယေရှုရဲ့ တဗဲ့တော်လေဘောင်ဂီးဟှာ လှည့်ပ္လန်ဟှားဘီး နော့‑က်ထပ် ကိုယ်တော်နတူးဒူ လိုက်ဂေ့ဟှမ်း။ 67အယ်ကြောန့် ယေရှုဟှ တဗဲ့တော်ဆယ့်နှေ့ပါးဟှို “နန်းနို့လည်း ထွပ်ဟှားရှင်ဂေ့လော” ဆိုဘီး မေးတော်မူလေဟှယ်။
68 #
မ ၁၆.၁၆; မာ ၈.၂၉; လု ၉.၂၀ ရှိမုန်ပေတရုဟှာ ကိုယ်တော့်ဟှို “သခင်၊ ကျွန်တော့်ဟှားလေဟှ ဖယ်လူနားဟှို သွားရဂေ့ဟှို့နူး။ ထာဝရသတ်နဆိုင်ဟှူ စကားတော်လေဟှ ကိုယ်တော်မာဘဲ့ရှိဟှယ်။ 69အယ်ဘီးဟှာ ကိုယ်တော်ဟှာ ဘုရားသခင်နားဟှနေ ကြွလာဟှူ သန့်ရှင်းသူဖြစ်ဟှယ် ဆိုဇာဟှို ခု ကျွန်တော့်ဟှားလေ ယောင်ကြည်ဘီး သိဂေ့ဟှယ်” ဆိုဘီး ဖြေတော်မူလေဟှယ်။
70ယေရှုဟှ “နန်းနို့ဆယ့်နှေ့ပါးဟှို ငါဝီးကော့‑က်ဟှားဟှယ် မှုဟှလော။ အယ်ဘေမဲ့ နန်းနို့ထဲဟှ တယော့‑က်ဟှာ နတ်ဆိုးဖြစ်ဟှယ်!” ဆိုဘီး ပ္လန်မိန့်တော်မူလိုက်ဟှယ်။ 71ကိုယ်တော်ဟှ ရှိမုန်ရှကာရုတ်ရဲ့သား ယုဒကြောန်းဟှို ပြောနေဇာဖြစ်ဟှယ်။ ဖြားဖြစ်ကြောန့်နူးဆိုဟှာ ယုဒဟှာ တဗဲ့တော်ဆယ့်နှေ့ပါးထဲဟှ တပါးဖြစ်ဘေမဲ့လည်း ကိုယ်တော့်ဟှို သစ်စာဖော့‑က်မယ့်လူဖြစ်ဟှယ်။
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ယောဟန် 6: NTDWB24
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
