Madiu 22
22
Enda pambe eina siapi angele lisaya ei
(Luka 14:15-24)
1Yesumi siapi angele menda loma wenaali para la alisaya. 2Godena Yaa Nane Wia Ki Rambuao-aya Eiri ali mendame nipuna naki wena lamualanda enda pambaisaya ei manda lisaya. 3Mo kini alimi nipuna pupudengi nao-ae alinu para lalo arare Ninande enda nola epenayanda wi lawande wenaali pua lamu mealepa lisaya. Go loma rapaisayapare monde ipulupape lisaya wenaali na-ipisimiya. 4Go lamendare monde alimi wala mendane alinu rapado arare gupi lisaya. Neme nina gawa menanu ambala analao wili pua wilioma karu ipulupa lisaya. 5Go lisayapare monde wenaalimi angele ora na-pangisimiya. Ali menda nipuna mapuna paisaya pange ali menda nipuna sidoa para paisaya. 6Monde alinu mendaparemere ande kinimi rapaisaya alinu kupi muma lu yambuma ora lu ma-komala pisimiya. 7Monde kini ali rono pangoma nipuna endali mini alinu raayo rapaomare monde alinuna anda kirunyaomare nimu pange ora lu komaisimiya. 8-9Monde kini alimi nipuna pupudengi nao-aeme alinu para lalore gupi lisaya. Nina endare analaoma wipare ande ipulupa lawande wenaali na-epamele mo anda pora naini puma nina enda nola epena lalole pua lamualepa lisaya. 10Monde alinu pumare koae wenaali pange epe wenaali raayo karu ipumare monde enda nola pame andare raayo rumbilisaya.
11Mo kini alimi mo enda nola ipisimiya wenaali pamu andoma ali mendare mo enda nolameyanda yamo-aeme aka na-yamisaya. 12Mo kini alimi lora pulu ara lalore, Neeme go enda nolameyanda marao-aeme aka na-yame auri akepea paepae lisayapare mo alimi ale menda na-lisaya. 13Monde kini alimi nipuna pupudengi nao-aeme repaa para lalore, Go ali nipuna ki ange koraoma kama mo rimbaloae para pua lopalepa lisaya. Go para ara nipumi e waru loma angaa lengere pao-ali lisaya.
14Gupuma Yesumi monde angele lo pereyadore gupi lisaya. Wenaali andapu ipulupa loma Godeme wi leapare pa repondame kome ipuaeme lisaya.
Sisa para dakisi muni alomonoyapae, lo Yesu para lora pisimiya ei
(Maka 12:13-17; Luka 20:20-26)
15Ande Parisi alinumi Yesuna ki kinyalu kondo duame lora pi angele menda Yesu para laminya loma nimuna gole angele angele lisimiya. 16Gupuma nimuna kou nane raluae alinu pange Erodi rapu runao-aeme repaa Yesu repara rapaisimiya. Go alinumi Yesu para lalore Waloale Alio, lisimiya. Neeme loale angelenuri ora loale. Neeme Godena auri ora rupa waloale lisimiya. Wenaalimi pimi aunu andomare nena konere na-ropo puale lisimiya. 17Neeme naa la gi, lisimiya. Ande Diu wenaalinuna Rudule Angelemere naame dakisi muni mo gapamani ali Sisa para alalore ana peapae o diayapae lisimiya. Neeme naa la giae lisimiya.
18Yesumi mo alinumi koae kone wisimiya ei andomare, Nimimi nina ki kinyalu akepeanda kodo diamepae lisaya. 19Mo dakisi muni adapeme eiri ni repara ambala andano ma-ipulupa lisaya.
20Monde muni andoma lalore gupi lisaya. Go munina wia lee angaa pange biri apina ayapae lisaya.
21Monde alinumi lalore Sisa nipuna bi pange lee angaanu wia lisimiya. Yesumi lalore, Gore go au piliandare Sisana alenuri Sisa para adapape pange Godena alenuri Gode para adapape lisaya.
22Nimumi go angele pangomare rungulu mealo pambomare nipu minyapalaoma paisimiya.
Komoma wala reke eina Yesu lora pisimiya ei
(Maka 12:18-27; Luka 20:27-40)
23Go naarenare Sadusi alinu Yesu para ipisimiya. Go repaamere wenaali komomare wala na-rekeleme loaisimiya repaa. 24Waloale Alio lisimiya. Mosesimi lalore ali mendame nakinu pange na-mandi-ainya nipu komeleandare gore mo ali nipuna waisa wena nipuna ameme lamuma monde ririna alina naki maindainya lea lisimiya. 25Naare mendana go andasu para mendane ki pereyaoma mendane kina laapo amealu aisimiya. Go pameyapare monde ririna ali nongo nakinu pange menda na-mandu wi monde ali komayandare nipuna kou nane alimi mo wena misaya. 26Mendaa au monde ali para pisaya. Ame menda komala pisayandare ame mendame meari puama puama puma monde mandu poropoe ali ora komisaya. 27Pereyadore monde wena nipu komisaya. 28Werepenare mo komeme alinu rekelemendare mo wenare apinya eiyapae lisaya. Akepeare monde alinu raayome meamende eina lalo lisimiya.
29Yesumi nimuna angele yango lialo arare gupi lisaya. Nimiri ande Godena angele wia bukare na-yarepeleme lisaya. Gupuma Godena puri pale aunu pange kone na-wimi einare nimimi komeme wenaali wala na-rekeleme dame lisaya. 30Mo komeme wenaali wala rekelemendare nimuri yaa nane aeme eindiolo alinu manda alimi. Gupuma yaa nanere repaalu ae auri na-pilimi lisaya. 31Nimi lora pi lisaya. Mo komeme wenaali Godeme wala rekeleme lea eiri na-yarepealepae. 32Go angelenare gupi lea, Niri Eparamena Gode pange Diekopona Gode pange Aisakena Gode ayo, lea. Godere na-kome pa aeme wenaalina Gode aya, lisaya.
33Mo wenaalimi Yesuna lisaya angele pangoma rungulu mealo pambisimiya.
Godena ora kalu ei Rudule Angele lisaya ei
(Maka 12:28-34; Luka 10:25-28)
34Sadusi alinu Yesumi nimuna angelenuna reenu raayo yokoma la alisayandare nimu wala Yesu rapu lape angelenu dialisayandare angelenu menda na-lameya.
Go ei pangomare Parisi alinu Yesu epa kopoliaoma aisimiya. 35Ali menda Rudule Angele waloaisaya ali menda go para aisaya alimi Yesu angele menda lora paya. 36Waloale Alio lisaya. Rudule Angele aimi mo Rudule Angelenu raayo lu angulayapae lisaya.
37Yesumi go angelere gurupa lisaya.
Nena Reali Godere nena pu raayome pange nena remo raayome pange nena kone raayo nipu para alape lisaya.
38Go Rudule Angele ora andaai pange ora kalu ei lisaya.
39Go eina kou para Rudule Angele pange pa go eimi andea.
Nena gole nee raname komale rupa nena yangonu pange go au pape lea lisaya.
40Go Rudule Angele laapore ora ririna kalu angele laapo go lalonda lisaya. Ande poropedi alinumi waloaeme angelenu pange ande Mosesimi giaya Rudule Angelenu raayore go ei laapo mandaa wia lisaya.
Yesumi mo Parisi alinu para Keriso lora pisaya ei
(Maka 12:35-37; Luka 20:41-44)
41Mo Parisi alinu mendaa para pa mombea-ainya Yesumi go angele lora pisaya. 42Nimimiri Kerisore api kone widamepae lisaya. Nipuri apina nakiyapae lisaya. Nimumi nipuna angele liala arare gupi lisimiya. Deipidina nakiyara lisimiya.
43Go ei lisimiyandare Yesumi gupi lisaya. Ande Epe Yaakopi Sipiridimi ma-layandare Deipidimi go Keriso para Reali piri akepa lisayapae lisaya. 44Deipidimiri gupi lea.
Reali Godeme nina Reali parare gupi lea,
Neere nina popeke ki nane piralea.
Go au pumare werepenare nena yanda runguli
alinuri nena rolo para ma-piralua lea.
45Go peandare Deipidimi gole Kerisore Reali deandare wala Kerisore Deipidina naki lea auri akepumayapae lisaya. 46Yesumi go angele lisayandare nipuna angele yangi na-liaisimiya. Gupuma go alinumi Yesu repara werepenu wala angelenu menda ora na-lisimiya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Madiu 22: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
