Madiu 21
21
Yesu kini ali mandana Diurusaleme anda para kondo pambisaya ei
(Maka 11:1-11; Luka 19:28-40; Dioni 12:12-19)
1Gupuma Yesu pange nipuna kou nane rali alinu Diurusaleme ranamena opopaore Olipi Kana Rumu para wisaya su menda nipuna bi Bedepasi lee alena opopaisimiya. Nipuna kou nane raluae ali laapo ambala pulupa loma rapaisaya. 2Niipu laapo para go angele lisaya. Niipi mongo anda rupara pumare dongi mena menda pange nipuna si apo andibao aliale niipi puma ni para ma-ipulupape lisaya. 3Ali mendame niipi para ale menda deandare gore gupi dapape. Andaa alimi pua mipa landa papa dependare gore rana komeasi niipi para gilia.
4Go au pisaya eiri monde poropedi alinumi lisimiya ei ora minyayanda pisaya. Go alinumi gupi lisimiya.
5Nimimi mo Sioni wenaali para go angele dapape.
Andalepa, nimina Kini aliri nimi para ipula.
Nipuri kalu andainyaoma pamuaya pange
nipu dongi menana kou mandaa pia.
Nipu mo dongi menana si mandaa pia, lea.
6Gupuma monde Yesuna kou nane rali ali laapo puma ande lisaya aunu pua pisipiya. 7Go gole monde dongi mena pange nipuna si ma-ipisipiya. Aka monde menana kou mandaa lopaisipiya pange go alena Yesu monde menana kou mandaa pirisaya. 8Wenaali waru andapumi nimuna akanu porana rambolisimiya pange repana keranu andapu lu rambolisimiya. 9Wenaali andapu ririna paisimiya pange wenaali andapu nipuna kou nane ipisimiya. Go au pulu ara lalore gupi angele lisimiya.
Deipidina Nakina bi minyasiaminya.
Godena bina epelea Aliri
Godeme ora epe aunu andapu walena lisimiya.
Godena bi minyasiaminya, lisimiya.
10Yesu mo Diurusaleme anda para kondo pambisayandare mo wenaali rungulu mealo pambalo arare lalore, Go aliri apiyapae, lisimiya. Gupuma wenaali raayo poya waru laoaisimiya. 11Monde paisimiya wenaalimi lalore gupi lisimiya. Gore poropedi ali Yesu pange ali Galili nane aoma epea lisimiya.
Yesumi mo Gode repara alinau puae andaa anda para paisaya ei
(Maka 11:15-19; Luka 19:45-48; Dioni 2:13-22)
12Yesu mo alinau puaisimiya anda para pua kondo pamboma go para makedi wapu pirisimiya wenaali pua ralu lu rumbisaya. Gupuma monde rapulumanu mandaa wisimiya alenu pange pua lapalumbi pisaya. Nipumi no para aisimiya repaa pange nimumi ropo pulu aisimiya muni rapuluma pange yaanuna rapuluma pange lapalu rumbisaya. 13Nimu para lalore gupi lisaya. Ande Godena angele wia bukamere gupi lea lisaya.
Nina andare Gode repara yainya pape anda komea
lea lisaya.
Go peapare nimimiri wala pake noae alinuna
panga pidandi pape anda waru wimi lisaya.
14Yesu mo anda para pirina loma lee rumbu pinu pange ki ange kolenu ma-ipisimiyapare nipumi ma-epeaisaya. 15Mo kalu alinumi pange Rudule Angele waloaisimiya alinumi monde Yesumi epe aunu pisaya ei andoma pange mo nongo nakinu mo alinau puae anda para raname komalo ara wi andapu lalo ara Deipidina Naki para raname komalema lisimiya einu pangomare rono waru pangisimiya. 16Nimumi Yesu para lalore, Neeme mo dame angele pangalepae lisimiya.
Yesumi lalore Eae pangalo lisaya. Nimi go Godena angele wia bukare na-yarepelemepae lisaya. Go bukanare gupi lisaya.
Godeme nongo nakinu pange andu nala pimi nongo
nakinuna angaa ma-lomboma
nipuna bi minyasiainya lea.
17Gupuma Yesumi Diurusaleme ree anda minyapalaoma Bedani ree anda para puma rimba komea go para pua pirisaya.
Yesumi angele lisaya dina poke repana kapulisaya ei
(Maka 11:12-14,20-24)
18Palumusi Yesu monde Diurusaleme ree anda pora nane paisayapare nipu reame komisaya. 19Nipumi poke repana mo reena aisaya ei andayapare ale menda na-elisayanda poke keranu komea andaya. Go einare monde repana para lalore, Neeme ale menda na-edeae lisaya. Go lisayandare monde repana go aleme gole kapulisaya. 20Nipuna kou nane rali alinumi monde repana kapulisaya ei go gole andomare go repanare akepuma kapuleapae lisimiya.
21Yesumi lalore, Go ei kone waru sialepa lisaya. Nimimi Gode repara kone rulaoma kone menda na-wilimindare gore neme go repana para pawande ei manda pilimi. Go ei kome diayapare nimimi mo kana rundu para lalore rekoma no ipa lee para pua lopa demendare ora go au pilia lisaya. 22Nimi Gode repara kone rulalimindare gore nimina konge de alenu pange manda palia.
Yesuna puri angaa misimiya ei
(Maka 11:27-33; Luka 20:1-8)
23Yesu monde alinau puaeme anda para epa angele walalo pirina lomare ande alinau puaeme kalu alinu pange Diu alinuna kalu alinu ipuma lalore gupi epa lisimiya. Neeme go au painyayare puri apimi giapae lisimiya.
24Yesumi wala nimu para gupi lisaya. Nimi para neme lora pi angele menda la gula lisaya. Go einda la gilimindare gore nina puayo einuna puri me para la gula lisaya. 25Dionimi baparaisi au paya puriri a para ipuma peapae. Gode para ipuma pea o ali para ipuma peapae, lisaya.
Monde alinu nimuna gole pini pini angele lisimiya. Naame ake laminyapae lisimiya. Gode para epea demendare gore naa para lalo akepeanda Dioni Baparaisi para kone na-rulaisimipae dea lisimiya. 26Gupuma naame lalore ali para demandare wenaalimi naa rapu yanda dimi lisimiya. Akepeare Dioniri poropedi ali kone wimi lisimiya. 27Monde alinumi wala Yesu para lalore Naa marea lisimiya. Go lisimiyandare gore Yesumi pange gore Neme go aunu puluamere nina puri me parare neme nimi na-la gula lisaya.
Naki laapona siapi angele lea ei
28Go peandare ambia ale kone widamepae. Ali komeame naki laapo mandisaya. Gupuma mo mupa naki para puma lalore gupi lisaya. Nina nakio, nee ambia no waini e para puma pupudengi pua na, lisaya. 29Monde nakimi ni gipia lisayapare wala werepe nane arame lande rupa paisaya. 30Monde alimi nipuna werepe nane naki para pange mendaa angele pua lisayapare monde nakimi lalore, Pulua lomayapare gole na-pula paisaya. 31Naki apimi nipuna apame laya aunu pisayapae. Mo alinumi lalore, Mupa nakimi lisimiya. Go einare neme nimi para go angele la gialo lisaya. Dakisi muni muaeme alinu pange pake noaeme wenanu pange Godena Ki Rambuao-aya Eina nimu ambala ririna pulu alimi lisaya. 32Dioni Baparaisi nimi para epe auri nimi ora pora wadoame epayapare nimi nipu para kone na-rulaisimiyapare dakisi muaeme alinumi pange pake noaeme wenanumiri nipu para kone rulao-aeme pange nipu raluma paisimiya. Go aunu andomayapare nimimi werepe nimina konenu na-ropo pisimiya pange nipu repara kone na-rulaisimiya.
Waini e andabao-aisimiya alinuna siapi angele lisaya ei
(Maka 12:1-12; Luka 20:9-19)
33Go siapi menda pangalepa loma Yesumi lisaya. Mo su reali mendame mapu para waini wai nongopelisaya pange pape pu kopeliaisaya pange waini ipa singipima muaeme ale pange wapuaya pange andere-alapea alina anda pange mo mapu runa paisaya. Gupuma mo mapuri nipuna pupudengi nalua lisimiya alinu para alomare nipu anda menda kimisu paisaya. 34Monde waini nape lisaya naare ipisayandare mo nipuna pupudengi naisimiya alinu rapado ara lalore, Mo mapu andere-aeme alinumi mo waini rapaoma meme muni menda ginya pulupa lisaya. 35Monde mapu andere-aisimiya alinumi monde alinuri seseka loma mendare ora lu komaisimiya pange mendare lu yambuma rapaisimiya pange mendare kaname lisimiya. 36Gupuma monde realimi pupudengi noaeme ali andapu rapaisayapare monde mapu andere-aeme alinumi mendaa au pu rapaisimiya. 37Werepe nanere monde alimi lalore Nina naki rapaluandare manda anda muma ademe kone suma rapaisaya. 38Monde alinumi monde alina naki epaya ei andomare gupi lisimiya. Gore ande alina naki ipulale nipu luma go mapu naame minyabaminya lisimiya. 39Monde naki seseka loma monde mapu pape reena ma-kupi rumbumare ora lu komaisimiya.
40Yesumi nimu lora pulu arare gupi lisaya. Ambiare monde mapu reali epeleandare ake au piliayapae, lisaya.
41Go gole monde alinu epa dia pange mo mapuri alinu menda para andambao-ainya ma-adea pange waini ralape naare epeleandare gore go alinumi ma-ademe lisimiya.
42Yesumi nimu para lalore, Nimimi go Godena angele wia eina lea angelere na-yarepeamena lisaya. Go bukame gupi lea.
Ande anda eloaeme alinumi pakama kana
kone wisimiyapare ande kanare wala puri pale
kana auda popayae.
Go au pi auri ande Realimi pinya lisaya.
Ora epe au pisaya.
43Go peanda nimi para lalo loma Yesumi angele menda ma-runaisaya. Godena Ki Rambuao-aya Eiri nimi para pane mu paoma mo epe rupa kili elala pula peme repaa puama adea lisaya. 44Ali menda apimi go pingi mandaa lopeleandare gore go ali ora do danga wilia pange go pingi ali menda mandaa lopeleandare mendaa au pilia lisaya.
45Gupuma monde Gode repara alinau puaeme andaa alinu pange Parisi alinumi Yesumi lisaya ei pangomare gore naa para gole da lisimiya. 46Go einare nipu seseka doame pisimiyapare wenaali andapu aisimiyandare paalame komisimiya. Akepeare mo wenaalimi kone sialore Yesuri poropedi ali kone wisimiya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Madiu 21: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
