Luka 14
14
Yesumi yainya kome ali ma-epeaisaya ei
1Mo Isaraelimi mandu rangala pae wenaalinuna koro piruae naare mendana Yesu nipu Parisi alinuna kalu ali mendana anda para enda nolame paisaya. Gupuma go para aeme alimi Yesu waru andambaisimiya. 2-3Go dina, ki ange pambe ali menda Yesu para ipisaya. Go einare Yesumi mo Mosesimi Rudule Angele kone suma Walaoaisimiya alinu para pange mo Parisi alinu para angaa meala ara lalore, Naana Mosesimi Rudule Angelemere mo Isaraelimi mandu rangala pae wenaalimi koro piruae naarena wenaali ma-epeape piri leapae, loma lisaya.
4Mo alinumi nipuna angele pangoma ale menda na-lisimiya. Gupuma Yesumi monde yainya aisaya ali nipuna yainya ma-epeaoma rapaisaya. 5Gupuma Yesumi nimu para lalore, Nimi menda konda nimina naki o gawa mo Isaraelimi mandu rangala pae wenaalinuna koro piruaeme naarena no pasa para lopola payalore nimimiri mo koro piruae naarena no pasa para yolo mula pamepae, lisaya.
6Go lisayapare nimumi nipuna angele yango liape pora menda na-wisaya.
Kimisu alinu pange anda realinuna angele lee ei
7Yesumi andisayapare monde enda nenaya wi lameya alinumiri monde ririna alinu piruaeme einu pamu misimiya. Gupisimiyandare Yesumi go siapi angele la alisaya. 8Mendame nee alimi pena nongo lamu meainyayanda enda pambaleme naarena nee ipu pinda demendare ora ande ririna alinu pirala puaeme alena na-arere pala pape, lisaya. Mendare nee lu angulaoma ora mundu ali menda apo epeanda.
9Gupiliandare niipi ipulupa loma wi lea alimiri nee para ipula ara lalore, Go mundu ali neeme go anda panda neeme mea, dea, lisaya. Go pi deandare gore neeme yalame waru komoma mo werepe nane pida pele, lisaya. 10Go au na-piri, mendame nee enda nainya ipu pinda deandare kou nane ma-suyame pirala pape, lisaya. Na andami alio, ipuae, dea. Go epea lena epa pirae, dea, lisaya. Go au piliandare nee wenaali ambunana lee rona nee andasioma andaleme, lisaya. 11Akepeare menda ali apimi nipu andaa ali ma-aulaliandare Gode nipumi nipuna kalu andainyaoma ma-pamualia pange menda ali apimi nipu kalu andainyao pamiliandare, Godeme nipu andaa ali ma-alia, lisaya.
12Gupuma Yesumi mo nipu wi lea ali para lalore, gupi lisaya. Neeme wenaali naarena enda nola epenaya wi denda pange rimba enda nenayanda pangere nena andami repaasi pange o nena amenu pange nena repaanu pange o nena amenu amo alinu aliminda pangere ipulupa pi na-lape, lisaya. Akepeare nimumi neere wala gonde rupa wala wi deme pange neere go eina yangi gilimi, lisaya. 13Neeme enda menda pambelendare narali wenaali para ipulupa lape pange dolopake pi pange ki ange kole pange lee rumbu pi wenaali raayo ipulupa lape. 14Gupumare Godeme nee yakili alia. Akepeare nimumi nee go eina yangi na-gilimi, lisaya. Godeme neere wala mo nipuna angele pangoma puaeme wenaali komoma rekeleme naarena yangi gilia, lisaya.
Enda pambe eina siapi angele lee ei
(Madiu 22:1-10)
15Ali menda mendaa para piri alimi Yesu para lala ara lalore, Godena Ki Rambuao-aya Eina ara yawe andaai pambaleme wenaaliri yakili alia, lisaya.
16Go lisayanda Yesumi nipu para lalore, Ambaisenande ali menda aisayapare nipumi yawe andaai duame wenaali andapupe ipulupa, laya, lisaya.
17Monde yawe liape naare meayandare nipuna pupudengi nao-arimi alinu ralu luma mo yawe pambola epola peme wenaalinu pua lamu mipa, laya, lisaya. Gupuma nipumi lalore, Olemole raayosi analaoma wili ipulupa, laya, lisaya. 18Go payapare ali mendame lalore, Ni gupa gupa lo one mone angelenu raayo laya, wala andaya alimi pange lalore, Ni gupa gupa lama lama puma ali raayosimi mendaa pi la ria puameya. Ririna alimi mo pupudengi nao-ae ali para lalore, gupi lisaya. Neme su menda kambawae, laya, lisaya. Go eimiri neme go su andola polameyanda pili neme yarae angele apo lalondae, laya, lisaya. 19Gupuma mendame lalore, Neme gawa mena ki laapo kambawa eimi neme go menanu e poaleme paleme ma-pamu andola polame pululi neme yarayoae angele apo lalondae, laya, lisaya.
20Mendame lalore, Ni wena pena lamuawae, laya, lisaya. Go einayandare ni na-ipuluae, laya, lisaya.
21Ande pupudengi nao-ae ali wala lekeya puma nipuna andaa ali pua la alisaya. Go lisayanda ande andaa aliri rono andaai pangoma nipuna pupudengi nao-ae ali para lalore, Wangepulu no ree andana andaa pora naini pange onge porasi para puma ande narali wenaali pange ki ange kole wenaali pange ande lee rumbu pi wenaali pange dolopake pi wenaali raayo pua karu meae, laya, lisaya. 22Monde ali puma wala lekeya ipulu ara lalore, Nena laende angele pangawande, laya, lisaya. Go peapare andaa alio, wenaali andapupe meape eina anda panda ora andapupe wiae, laya, lisaya. 23Go layandare ande andaa alimi lalore, No onge onge andasi paranu puma go para pidimi wenaalinu para ipulupa, loma, na anda epa ma-rumbialepae, laya, lisaya. 24Go eina neme nimi para lalo, mongo neme ipulupa loma wi lawande alinumiri na enda menda mandana ora na-nelemeae, laya, lisaya.
Yesuna kou nane raluma pelenda pula pea eina lee ei
(Madiu 10:37-38)
25Rana menda Yesu rapu wenaali andapupe pula-ainyaloma nipumi nimu repara lekeyala ara lalore, gupi lisaya. 26Ni repara raluma epola pea alinuri ni rapu pamulopalore ana na-peapare, nipumi nipuna ni repara pu gea eiri nipuna apa pange ama pange nipuna wena nipuna nongo nakinu nipuna amenu pange nipuna ainyanu pange nipuna gole nipu rana komo pea rupa raayosi lu angulaliandare gore nipu ana pea, lisaya.
27Menda apimi nipuna ekeraisia wape pi repana na-ma-ruma ni na-raluma epeleandare gore nipu na kou nane raluae ali mandana na-alia, lisaya. 28Nimi menda mendame warepana ele anda menda pulameyandare nipumiri ririsina piriri mo go pupudengina pola pea kana pange nipu kana go pupudengi no pereyape ei anana siambayapae, lo piri kone wia. 29Nipumi go leenu anana na-siambaliandare nipumi mo anda keeranu ambala nongopemayapare na-pereyalia ei andoma nipu giri lalimi, lisaya. 30Go aliri kini puma go anda ropapare wala anda manda na-pereyada, deme, lisaya. 31Kini ali menda daoseni ki laapo rapu puma kini ali menda rapu yanda pulame peleandare go kini ali nipuna alinuri daoseni ali ria komea ora karu siambaliandare mo ririsina kini ali nipumiri piri kone ambala siala ara nipuri go aliri manda lu ma ma-bembolaluapae, kone ambala wia, lisaya. 32Nipu manda na-piliandare nipumi angele ma-puaeme alinu mendapare mo kini ali mandala puma yanda rambulape eina angele rapada ara nipu papere alia, lisaya. 33Yesumi pereyala pula ara lalore, Nimi mendame nina kou nane nipuna siambaya alenu raayosi rumbumare ni manda raluma epeleme, lisaya.
Rende na-pi aipana angele walisaya ei
(Madiu 5:13; Maka 9:50)
34Gupuma Yesu nipumi lala ara lalore, Aipare epe rende pula peapare nipuna rende pi ei mareleandare wala wenaalimi rende na-ma-palimi, lisaya. 35Su para kusalore ana na-pilia pange mena i kumburaya para lopadore ana na-pilia. Go au piliandare go aipare rumbilimi, lisaya. Kale ayale deandare gore pangalepape, lisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 14: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
