Luka 13
13
Nimina koae aunu na-gialimindare nimi komeme lee ei
1Go dinare go para aisimiya wenaali mendaparame Yesu para ipuma angele menda nipu para la alisimiya. Gurupa lisimiya. Galili andasu wenaali mendapareme go ree anda para ipuma Gode repara alinau pula-ainyaloma gapamani kalu ali Pailadi nipumi mo wenaali luma ma-komaripaya, lisimiya. 2Go einare Yesu nipumi nimuna angelenu yango liada ara lalore, Mango liimi Galili wenaali mendapare go rupa liimindare nimina konemere mango liimi wenaalinuna koae aunumiri mo pa aeme Galili andasu wenaalinuna koae aunu lu angulaeme kone sialemepae, lisaya. 3Ora dia. Gurupa kone na-sialepapeae, lisaya. Go einare neme nimi para lalo. Nimimi nimina ambalana ao-paluaeme rupa na-gialimindare nimi pange mo Galili wenaalinu komeme rupa komeleme, lisaya. 4Wala mo Sailome anda para yaa ropuma pi anda menda rombala ara ki laapo pereyoma mendane ange pereyoma mendane angena repo liisaya wenaaliri ale kone sialemepae, lisaya. Nimina konemere go liia wenaalinuna koae einumi mo Diurusaleme ree anda rupara paleme wenaalinuna koae koae einu lu angulayapae, lisaya. 5Ora dia. Gurupa kone na-sialepape, lisaya. Go einare neme nimi para lalo. Go angelere nimimi nimina ambala ao-paluaeme rupa na-gialimindare nimi pange go wenaalinu komeme rupa komeleme, lisaya.
Kili na-ele repanana siapi angele lee ei
6Go einare Yesu nipumi siapi angele menda lalore, Ali mendana e mapu rupara kili noaeme repana menda aripaya, lisaya. Nipumi kilinu edea paleme andola puayapare komenda na-elaya, lisaya. 7Go einare nipumi nipuna e andere-aya ali para lalore, Andae, lisaya. Kuni gipa repo rupara ni go repanana kili edea paleme andolandi puayopare komenda ora na-eloaya, lisaya. Go peale koae repaname su mupapana polopae, laya, lisaya. 8Go layapare mo e andere-aya alimi lalore, Andaa alio, neme go repana ma-kopalio su romboma koae koae alenu lopaluale go kuni gipa komea koma pa ainyalae, laya, lisaya. 9Go au pilipapare mo kuni gipana kili ora na-edeandare gore mandana polopapana, laya, lisaya.
Isaraelimi mandu rangala pae wenaalinumi koro piri naarena Yesumi wena menda ma-epeaisaya ei
10Isaraelimi mandu rangala pae wenaalinuna koro piri naare mendana Yesu nipumi Godena angele kuruaeme anda para ara angele walala aisaya. 11Go anda rupara koae remo piri wena menda pirisaya. Go nipu rupara pirisaya koae remomere nipu para yainya koae ei menda aisaya eimi kuni gipa ki laapo pereya ange mendane pereya mendane angena repopu perelisaya. Go yainya komisaya eimiri mo wenana kou koi puma nipu rendepona ora reka ape rupa ma-marisaya. 12Go einare Yesumi mo wena andoma nipu para lalore, Wenao, neme nena yainya apo ma-epeadondae, lisaya. 13Gupi lomare nipumi nipuna ki mo wena mandaa wisayandare go gole mo wena nipuna kou rindapeaoma rekoma aisaya. Gupuma mo wename Godena bi ma-minyasiaisaya.
14Go einare mo Godena angele kuruaeme anda andere-aisaya andaa ali mendame mo nimuna koro piri naarena mo wena ma-epeaisayanda Yesu para rono andaai waru pangisaya. Gupuma mo kalu alimi mo wenaalinu para lalore gurupa la alisaya. Pupudengi nape yapi diri su mindipu apo wiandae, lisaya. Go peale go naare rupara ma-epeainya ipula ara koro piri naarenare na-ipulupape, lisaya. 15Go angele lisayanda Realimi nipuna angele yango liada ara lalore, Nimiri yayapi aunu puaeme alinu, lisaya. Nimi mendamere Isaraelimi mandu rangala pae wenaalinuna koro piri naarena mo nimina gawa menanu pange mo dongi menanu pange mo kuda para koya muma ipa nenaya ma-peleme, lisaya. 16Go peapare go wenare Eparamena mandu rangala pae wena nipu Sadanimi rongaoma ainya kuni gipa ki laapo pereya ange mendane pereya mendane angena repopu perelea, lisaya. Go einare neme mo koro piri naarena mo wenana koae remome rongaya kope neme mandana kepe rapadore ana pea, lisaya. 17Yesu nipumi go angelenu lisayandare mo nipuna yanda runguli alinumi go ei pangoma yalame waru komisimiyapare wenaali menda paramere nipuna epe aunu pisaya einu andoma raname ora waru komisimiya.
Masidadi repana kilina siapi angele lee ei
(Madiu 13:31-32; Maka 4:30-32)
18Yesumi wala loma lalore, Gode nipuna Ki Rambuao-aya Ei ale manda kone wilimipae, lisaya. Neme ale manda mealuapae, lisaya. 19Godena Ki Rambuao-aya Eiri gurupa mandana, lisaya. Ali mendame masidadi kili muma nipuna e mapuna poaya, lisaya. Ande kili opoma ora andaa repana au da popeandare pala pala waru aoma yaanumi pange mo repana palanuna nimuna anda elama elama peme, lisaya.
Palawa ma-poyao-ae dangana siapi angele lee ei
(Madiu 13:33)
20Gupuma Yesumi wenaali wala angaa meala ara lalore, Godena Ki Rambuao-aya Einare akipuma manda mealuapae, lisaya. 21Gurupa manda, lisaya. Wena mendame palawa ma-poyao-ae danga muma pange ipa pange andaa palawanu muma kopona koyaoma lekeyoma kiruaemenda poya eiri pupula ei mandana Godena Ki Rambuao-aya Eiri gurupa mandana, lisaya.
Rengepele pora gapena angele lee ei
(Madiu 7:13-14,21-23)
22Gupuma Yesu nipumi mo Diurusaleme ree anda para opopala polameyandare enge andasunu pange ree andanu lopola pamuala ara wenaali repara angele wala eiri pamisaya. 23-24Go dinare mendame Yesu para angaa meala ara lalore, Realio, Godemere wenaali pa reposinda o ora andapupe rambamiliayapae, loma angaa misaya. Go einare Yesumi nimu para angele yango liada ara lalore, Nimimi mo rekepembae pora gape para konda pambelema, kone wilimindare gore nimina gole nimi kalakala ma-siaoma puri waru padapape, lisaya. Akepeandare wenaali andapupeme konda pambolame puri waru pada pemepare anana na-konda pambola peleme, lisaya. 25Gupuma mo anda Reali rekoma mo anda pora polea, lisaya. Go au piliandare nimi kama nane ara pora gape epa lambi lambi liala ara gupi deme, lisaya. Realio, Realio, naa epomana pora lombae demendare nipumi nimi para angele yango liada ara lalore, Niri nimi na-andele ane aoma ipulumipae, dea, lisaya. 26Go deandare nimimi nipu para gurupa la deme, lisaya. Naare nee rapu enda ipanu namande pange neeme mo naana ree anda para angelenu pange walaende, loma deme, lisaya. 27Gupi demendare nipumi nimi para wala la gilia, nimiri ane wenaalinu pae, dea. Ni ora na-ande dea, lisaya. Go peale go alinu nimiri koae remonuna reenuyale na lee angaana na-epa ae pane pulupa, dea, lisaya. 28Nimimi Eparame pange Aisake pange Dieikopo pange Godena poropedi alinu raayosi Godena Ki Rambuao-aya Eina alimi ei andeleme, lisaya. Nimimi go ei andomare rono ora andaai pangoma pange anda ambala lu kopaliaoma ree demendare kama ralu lopa alia, lisaya. 29Gupumare wenaalinu so naare ipula naneyame pange no naare pambala naneyame pange perali laapo naneyame pange ipuma Godena Ki Rambuao-aya Eina epa piri enda ora andaai neleme, loma lisaya. 30Go einare ambia narali pi aeme wenaalinuri werepe nanere nimu kalu alinu alimi, lisaya. Gupuma ambia kalu alinu aeme wenaalinuri werepe nanere nimu ora narali pambe wenaali alimi, lisaya.
Yesumi Diurusaleme ree anda para nipuna pumi yarame kome ei
(Madiu 23:37-39)
31Go angelenu lisaya naarenare mo Parisi alinu mendapare go gole Yesu para ipuma go lisimiya. Kini Erodimi nee lu ma-komaluame rapalale neeme go andasu minyapalaoma nee ora ambia gole pane puae, lisimiya.
32Go einare Yesu nipumi nimuna angele yango liada ara lalore, Nimimi puma apo kapa yana para gupi pua la dapape, lisaya. Pangae, ongepusi mone pua pereyalua, lisaya. 33Go einare na pi einu pa pari Diurusaleme ree anda para pola, lisaya. Go eiri akepeandare Godena poropedi ali menda pa andasu menda para liialore ana na-peapare Diurusaleme ree anda para koma manda dimi, lisaya.
34Diurusaleme wenaalinuo, Diurusaleme wenaalinuo, yarae, lisaya. Nimimiri Godena poropedi alinu rapao-aya alinuri liia au kama puaeme pange Godena angele ma-epada alinu pange kana pongopame lu komao-aeme, lisaya. Neme nimiri naare raayosi yaa kembome nipuna sisinu nipuna popaa laapo para ma ma-mombe-ao-aya rupa neme pange nimi para go au pulame kone suayopare nimina gole giao-aeme, lisaya.
35Go pea eimiri Godeme nimina mo Gode para alinau puaeme andare minyapalalia lenare luda alia, lisaya. Neme nimi go la gialonda. Neme nimi para lalo, Mo naare epeleanda nimimi lalore,
Realina bina ipula aliri, Godeme yakili ainyae,
deme, lisaya.
Go naare epeleandare gore ni andelemepare go naare ambe na-epea-ainyalomare ni na-andeleme, lisaya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luka 13: POLENT23
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
