Marcos 3
3
Jesús mynguera kuimbai ipo opa vỹrãkuava
1Jesús ichejy Judiore ñymbatyseape, haipe'i pente kuimbai ipo opa vỹrãkuava. 2Hãma ñemiãpẽĩ mãĩ jyrehe, hesha verã mynguerarapo putu'uava jy'arape, ĩmere verãre mbaivarapo heihe reta. 3Hãrã Jesús heishu kuimbai ipo vỹrãkuava: Pũ'ã, ñymbou mbytepe. 4Haipe pyrãndushu yngare: Mbaivara katu jajapo putu'uava jy'arape, haikavivara maĩrã porãmbara? Ñamondojeperapo pente tykove, maĩrã jajukarapo? Tẽvã haire mba'ẽã heishu reta. 5Haipe Jesús poshy ryheve mãĩ jurirã mbyvy'ã pya tãntaĩte retarã, hãma heishu hoka kuimbai: Mysymyĩ ndepo. Ko kuimbai ipo mysymyĩrã, kuera. 6Haivi fariseore opajy õhẽ oho, hareka jyraha ijeta hãndi Herodes ryhevare marãrapo juka reta Jesús.
Kuareta hetava ñymbaty yyvasu hỹmbeype
7Jesús hareka mboireare hãndi jyraha yyvasu hymbey kyty, hareka kuareta hetava oho haykue Galileaivi. 8Kuaama reta mbai vasu haikaviva japorã, ou jyve hesha verãre Judeavi, Jerusalenvi, Idumeavi, Jordan kuarasy õhẽaivi, Tiro hareka Sidonvi. 9Hãrã Jesús jurureshu mboireare myhẽvã verãre kanoa, shara potãã kuareta hetava jasoirã. 10Shara hetavapema mynguerarã, ñymbairasy vekuare opa jasoi pota pokoherã. 11Haipe mbaiposhyre heshamarã, ĩñesu hỹnonderã, sapuke: Nde hai Tũpa tay! 12Jesús ñyngãtape heishu reta potamba mbeu verãre, mbavara hai.
Jesús pyhỹrõ 12 mboi verã
13Jesús jupi yvyturusurerã, haipe hẽno pota hẽnovare, hãrã haire ou hai ẽvãpe, 14hãrã 12 kavi pyhỹrõ ikoñoĩ'i hãndi verãre, hareka mondo verã mbeu verãre Ñee kavi. Kovare mbyhee Apostol. 15Hãrã meẽshu reta mbaikatu mynguera verã ñymbairasyvare hareka mohẽ verã mbaiposhyre. 16Kova hai 12 õre hai pyhỹrõvare: Simón, mbyheejyva Pedro; 17Jacobo hareka tyvy Juan Zebedeo tayre, mbyheejy Boanergues, he'iseva: “Hy'apua rayre”; 18Andres, Felipe, Bartolome, Mateo, Tomas, hareka Jacobo Alfeo tay, Tadeo, Simón Canaanva, 19hareka Judas Iscariote, Jesús pysyka vekua.
Ñee porãmba Espiritu Santore
20Hãma Jesús hareka mboireare iche pente oope, haipe kuareta heta vekua jatyjyhe, hãrã katũa karushi reta. 21Jesús hẽtãrãre kuaamarã jyverujy heka; shara heimbahe reta, kuakuamba'ia. 22Tẽvã Moisés mbypara vekua pyrỹmboi'iheare, ouva Jerusalenvi, hei reta: “Kova kuimbai rãnga ĩmere Beelzebu, Ãña juhuvisha, hãmẽ rãnga Beelzebu ñymbai katukue rupii mohẽ'i mbaiposhykue”. 23Jesús hẽnorã mbeushu reta pente ñee ñymyhã'ãnga heiva: Marãrapo Satanas mohẽjy yngava Satanas? 24Pente tentavasu ijupii ñymbyvaishorã, katuãpo kỹỹ iko. 25Hãma pente oope'õre ñymbyvaisho jyre ijeherã, oho porããñõĩpo. 26Kyrãijy Satanas ñimbijaorã hareka pũã ijupiirã katuã kỹỹ'ẽ, vãhẽñõĩpo japyape. 27Mbavẽapo iche kuimbai pỹrãtava hoo'ipe manarõshu verã, ñapĩnti rãniãrã, hãmerãpo kapyry manarõshu. 28Añeteĩteva hai pee, Tũpa hejareiiposhu kuimbaire mbai porãmba japo vekua hareka ijeta porãmba'iheare. 29Tẽvã Espiritu Santo ijeta porãmbaheva mbaipe'ãĩteipo hejahareiishi, koñeĩ mbai porãmba pytapohe opa ara. 30Kyrã Jesús hei, shara heihe reta mbaiposhy ĩmerea.
Jesús ishy hareka tyvyre
31Haivi vãhẽ jyveru Jesús ishy hareka tyvyre, tẽvã katuapeĩ ñynõi, haivĩĩ hẽnõka reta. 32Hãrã kuaretare Jesús vapy'i jurivare heishu: Ndesy, ndyryvyre hareka niindyre katuape ndyreka jyre. 33Jesús heishu reta: Mbava retara shesy hareka shyryvyre? 34Haivi maĩhe juri vapy'õva retarã hei: Kova reta rãnga hai shesy hareka shyryvyre. 35Opaite japoshuva Tũpa potava, hai reta rãnga, shyryvy, shiindy hareka shesy.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Marcos 3: TPJ
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©2023 LETRA Paraguay
