Marcos 2
2
Jesús mynguera pente kuimbai vatamba vekua
1Mbovy aramajyrã Jesús ichejy Capernaumpe. Kuaahamajy oo'ipe ĩme'ẽrã, 2heta kuaretare oho jatyhe õche javeveãpeve, haipe Jesús mbeushu reta Tũpa ĩñee. 3Haipe vãhẽ jyveru urũndy kuimbai veruva pente vatamba vekua. 4Katynga hetaite kuaretare haipe'õrã katuã myvãhẽ reta Jesús ẽvãpe, hãrã mbijupi reta oo ĩãrẽ, haipe hese peashu retarã, mbyvejy reta kuimbai vatamba vekua hupa ryheve. 5Jesús heshama marãra haire jyrojaherã, heishu vatambava: Shyray, mbai porãmba rijapo vekua hejareiima ndyhevi. 6Haipe vapy ñynoĩ mbovy Moisés mbypara vekua pyrỹmboi'iheare pyapeĩ hei ñynoĩ: 7“Marã'ĩrãra kova kuimbai kyrã ijeta? Jaitamba rãnga he'i! Mbavarapo hejareii ñande mbai porãmba jajapo vekua? Penteĩ rãnga'ẽ, hokava hai Tũpa”. 8Tẽvã Jesús kuaaravĩĩ mbaivara hei ñynoĩ pyape, hãrã heishu reta: Marã'ĩrãra kyrã pypya pimbijetapẽĩ? 9Mbaivara javaĩa jaishu ko vatambava: “Hejahareiima ndyhevi mbai porãmba rijapo vekua”, maĩrã jairaposhu: “Pũã hupi ndurupa, ekuajyvy?” 10Pikuaa verã, kuareta Tay ĩmere mbaikatu yvy'ĩãrẽ hejareii verã mbai porãmba vekua. Hãma heishu vatamba vekua: 11She hainde: “Pũ'ã Hupi ndurupa, ekuajy nyrẽtape”. 12Hãma haipevãĩ vatamba vekua pũã, hupi huparã hetavare hesapẽĩ õhẽjy oho, hãma mbyrymaĩ reta, hareka õmombaivasu Tũpaperã hei jyre: Maĩpia rãnga kyrãva mbai jahesha!
Jesús hẽno Leví
13Haivi Jesús ohojy yyvasu hymbeype, haipe heta kuaretare ou jatyhe hãrã hai mboishu reta. 14Oho'irã hesha Leví, Alfeo tay, vapy'ẽ tenta Roma pevarã kyrypoti okorase'õpe, Jesús heishu: Ei shimi'ĩrũ. Leví pũãrã oho hãndi. 15Hãma jehumba, Jesús vapyma'ẽ mesape Leví hentaperã, kyrypoti mbatyse'iare Roma pevarã, mbai porãmba japo'ia retaave ou vapy hãndi, hareka mboirea reta jyve; shara heta'ẽ ouva haykue. 16Hãma Moisés mbypara vekua pyrỹmboi'iheare hareka fariseore, hesha Jesús karu ñynoĩ hãndi mbai porãmba japo'iare kyrypoti okorase'iare Roma pevarã pyrãndu jyreshu Jesús mboireare: Marã'ĩrãra pynymboi'ia karu hãndi heko porãmba'iare hareka tenta jurureva okorase'iare? 17Jesús hendu hokavarã heishu reta: Mambaimba'ia ikotẽveãhe pyrỹpỹhãno'ia, koñeĩ ñymbairasy'ivaĩ. She aiã ãhẽno heko kavivape, koñeĩ mbai porãmba japo'ia retaĩ.
Jesús pyrãndu jyreshu karumba ryheva
18Juan Bautista mboireare hareka fariseore haipe kavi karuã ñynoĩ reta, hãma ĩme'ẽ ou pyrãndushua Jesús: Marãĩra Juan hareka fariseo mboireare karuã ñynoĩ hai, tẽvã rỹmboiryrea retamba japoã hai? 19Jesús heishu reta: Katura karuãkuei omendavape'õre ĩme ñynoĩ hãndi omendavarã? Katuã rãnga japo ĩmeteri ñynoĩ hãndirã. 20Tẽvã, vãhẽpokui ara hoka temerã hekyashi verãre, haiperãpo karuã ñynoĩkui. 21Mba'ety mbyvyvy verã mondeava py'ahuva tuja vekuare, hoka mondeava pysẽvẽ py'ahuva matarã tivishaitevepo tuja vekua myndoro. 22Hareka mba'ety ñonova vino py'ahuva vakapi tuja vekuapy, kyrã japorã vino py'ahuva myndoroĩpo vakapi tuja vekua hãma opapo iñohẽ vino, kyrãĩpojy vakapi; vino py'ahuva mbyhyruañoĩpo mbai hyru py'ahuvapy.
Jesús mboireare mynoõ jyre trigo putu'uava arape
23Putu'uava arape Jesús hasa oho koo hupirã, mboireare õñepyrõ mynoõ jyraha jyre trigo. 24Hãma fariseore heishu: Maĩhe, marã'ĩrãra rymboiryreare japo japoamba verã putu'uava arape? 25Jesús heishu reta: Mape'ãiteira pimbijeta mbaivara David japo ñymbahy'irã hareka iko'i hãndiare? 26Marãra David tũpaope iche, pai ruvisha vasu Abiatar jy'arape, hai hou pãhã kapyryva Tũpa pevarã, mbavamba katu houva, pai retaĩtẽ oĩshu hou verã, hãma meẽ jyveshu opaite iko'i hãndiare. 27Jesús heivejyshu reta: Hoka putu'uava ara rãnga japoha kuaretare pevarã, japohãã kuareta ara putu'uava pevarã. 28Hãrã kuareta Tay hai jyve putu'uava ara Ija.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Marcos 2: TPJ
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©2023 LETRA Paraguay
