लूका 9

बाराह चेले भेजणे

(मत्ती 10.5-15; मरकुस 6.7-13)

1तेऊकी यीशु ये बारह चेले आपु सेटा शादी करे तयाबे सारी बीमारी होर दुष्टात्मा काहड़ने होर ठीक करने रे सामर्थ्य होर अधिकार दीने। 2तेबा यीशु ये त्या बारह चेले परमेश्वरा रे राज्य रा प्रचार करने होर बीमारी ठीक करदे भेजी। 3यीशु ये चेले बे बोलू, “बाता बे किछे नांई नीणा, नाह डाहुले, नाह झोली, नाह रोटी, नाह ढवै, होर नाह दुई-दुई कुरते। 4जासु-जासु घरे तमे नाहले, तखे रहा, तखी का निख्ला। 5जोह तमा नांई मनले, तेऊ नगरा का निख्ली करे आपणी टांगा ठुडकी करे तखा का निख्ला की त्याह् प्रेंदे गुआही हो।” 6तखा का निख्ली करी ग्राए-ग्राए नाशी करे सुसमाचार शुणाउदे होर लोका ठीक करदे सारे हाण्डदे लागे।

हेरोदेसा रा डरना

(मत्ती 14.1-12; मरकुस 6.14-29)

7राजा हेरोदेस एता शुणी करे डरु, किबेकी एखे बोलू की यूहन्ना मरी करे जिऊंदअ होऊ। 8होर एखे बोलू कि एलिय्याह हेरू, होर कई होर बोलू यह पुराणअ भविष्यद्वक्ता मेंजा का कोई जी उठु दअ आसा। 9पर राजे हेरोदेसे बोलू, यूहन्ना रअ माई मुडअ काटू दअ आसा, एवा यह कुण आसा जासरे बारे एडी गल्ला शुणद लागअ? होर तेऊ हेरने री इछा करी।

पांज़ा हज़ारा वै खाण खलाउणा

10तेऊकी प्रेरिते त्याह इच्छी करे, जोह त्याहे करू थी, तेऊवे खोजू, होर सह त्यहा अलग करी करे किस्ती में चढ़ी करे, बैतसैदा नगरा वे नी। 11एता जाणी करी भीड तेऊ पीछे नाठी होर सह खुशी संघे मीलू, होर त्याहे संघे परमेश्वरा रे राज्य री गला करदे लागे, होर जोह रामडे हुणा चाहंदा थी त्या रामडे करी 12जेबरे ब्याल्क होई तया बारह चेले इच्छी करे तेऊबै बोलू, “भीडा भेजी करे ग्राए नाशी करे खाणे रा इतजाम करा, किबेकी हामे अखे सुनसान जगहा में आसा।” 13तेऊ त्याहा का बोलू, “तमे त्याहा वे खाणे बे देया।” त्याहे बोलू, “हामा सेटा पांज रोटी होर दुई माछी छाडी करे होर किछे नांई आसा। अगर हामे नाशी करे याह बै खाणे वै लई आणे। तेबा होई सका।” या लोका पांच हजार आसा। 14तेबा तेऊ आपणे चेले व बोलू, “त्याहा पजाहा-पजाहा री घेडी में बश्यागा।” 15त्याहे तेहडा ही करू होर सबे बिश्यागी। 16तेबा तेऊ त्याह पांच रोटी होर दुई माछी ढाकी, होर सरगा फेरा बै भाल़ी करे धन्यवाद करु , होर चोडी करे चेले बै दिनी की लोका बे खलाए। 17तेबा सबे खाई करे रजी, होर चेले बची दे टूकडे रै बारह टोकरे भरी करे चुआकी।

पतरसा रा यीशु मसीह मनण

(मत्ती 16.13-20; मरकुस 8.27-30)

18जेबरे सह केलहे में प्रार्थना करदअ लागअ दअ थी, तेऊरे चेले तेऊ संघे थी, त्याहा का तेऊ पुछु, लोका महा वे केह बोला। 19त्याहे उतर दिना, “यूहन्ना बपतिस्मा दिहंण आल़अ होर एखा एलिय्याह, होर एखा पुराणअ भविष्यद्वक्ता जिऊंद होऊ।” 20होर त्याहा का पुछु, “पर तमे महा वे क़ह बोल्दा? पतरसे उतर दिना, परमेश्वर रअ मसीहा।” 21तेबा यीशु आपणे चेले बै बड़ी चतैनगी दिनी कि एता कासी जेंह नांई खोजे।

आपणी मऊती रे बारे में यीशु री भविष्यवाणी

(मत्ती 16.21-23; मरकुस 8.31-33)

22तेऊकी तेऊ बोलू, मणशा रे शोहरु बे जरूरी आसा की सह बहू दुःख चुयाके होर पुरनिए होर प्रधान याजके होर बजुर्गे होर शास्त्री तेऊ नीच समझी करे मारी पाए, होर सह चिहुणे धियाड़े जिऊंद हूँणअ

यीशु पीछे हाडणे रा मतलब

(मत्ती 16.24-28; मरकुस 8.34-38; 9.1)

23तेऊए सबी बै बोलू, “जेबा कोई महा पीछे ईणा चाहंदा, सह आपणे आपा कअ पहिले नांई करे, होर रोज आपणे क्रुसा चकी करे माह पीछे हांडे, 24किबेकी जोह कोई आपणा प्राण बचाऊणा चाहनदा, तेऊ सह नाश करणअ, पर जोह कोई मेरी तणी आपणी जान देलअ तेऊ आपणी जान बचाऊणी। 25जेवा मणश सारे संसारा पाये, होर आपणे प्राणा रा नाश करे या प्राणा रा दुःख होये तेबा तेऊ तेत्का केह फायदा हुणा? 26जोह कोहे महा का होर मेरी गल्ला का शर्म करलअ, मणशा रअ शोहरू भी जेबरे आपणी तरफा का होर आपणे बापू री तरफा का पवित्र स्वर्ग दूता री महिमा संघे इछलअ, सह भी तेबरे तेऊ मणशा का शर्माऊण। 27हाउ तमा का सच्चअ बोला कि जोह अखे खड़े आसा त्याहा में एखा एडे आसा कि जेबरे तणी परमेश्वरा रे राज्य नांई हेरले तेबरे तणी मरने रा स्वाद नांई परेखी सकते।”

मूसा होर एलिय्याह संघे यीशु

(मत्ती 17.1-8; मरकुस 9.2-8)

28याहा गल्ला रे आठा धयाडी वाद सह पतरस, यूहन्ना होर याकूब संघे नी करे पहाडा पैंदे प्रार्थना करद नाठअ 29जेवा सह प्रार्थना कर्दअ लागअ थी तेबरे तेऊरा चेहरा बदलू होर तेऊरे झिकड़े शेते होई करे चमकते लागे। 30होर हेरा मूसा होर एलिय्याह दुई मर्द तेऊ संघे गला करद हेरी थी। 31यह महिमा रे बिना रिहाऊ होर तेऊरी मरने री चर्चा करदे लागेदे थी, जोह यरूशलेमा में पूरा हुण आल़ा थी। 32पतरस होर तेऊरे संघी सुतदे थी होर जेबरे त्या उठी त्याह महिमा संघे दुई मर्द भाल़ी जोह त्याहा संघे खड़े थी 33जेवा त्या तेऊ सेटा नाह्ंदे लागे तेबा पतरसे यीशु वे बोलू, हे गुरू, महारा अखे रहणा ठीक आसा हामा चिण तांबू बणाउणे एक ताहवे एक मूसा वे होर एक एलिय्याह वे सह नांई जानदअ थी कि सह केह बोला थी। 34सह एता बोलदअ लागअ थी तेवरी एक वादल आउय तेऊये त्या घेरी, होर जेवा सह वादल घेरदअ लागअ थी तेबा त्या डरी। 35तेबा बादला का यह शब्द निखदअ यह मेरअ चुनु दअ शोहरू आसा एउरी शुणा। 36याहा शब्दा शुणी करे यीशु तखे केलह हेरू होर त्यहा चुप रही होर जोह त्याहे हेरू थी तेत्की गल्ला कासी सेटा नांई खोजी।

एकी शोहरू का दुष्टात्मा काहडणी

(मत्ती 17.14-18; मरकुस 9.14-27)

37दूजी धिहाडी जेबा त्याह पहाडा का आउये तेबा एक बड़ी भीड़ त्याहक मिली। 38होर भिड़ा मेंज़ा का एक मणश जोर बोलू हे गुरु हाऊं तहा कअ बिनती करा, मेरे शोहरू पैंदे दया कर मेरे सह एक शोहरू साहा दअ। 39होर तेऊ दुष्टात्मा शाती दी आसा होर सह जोर-जोर बोल्दा होर सह आत्मा तेऊ एडी मरोड़ा की तेऊर मुहा का शेफा निख्ला होर यह तेऊ बड़ी मुशिकला संघे छाडा। 40माई तेरे चेले का बिनती करी थी पर त्याह नांई काडी सके । 41यीशु ये उतर दिना हे अबिश्बासी होर हठी लोको महा केबरे तणी तमे संघे रहणा, आपणे शोहरू अखे आणा। 42सह शोहरू आउअ ही थी तेबरी दुष्टात्मा सह मरोडू पर यीशु ये दुष्टात्मा डांटी होर शोहरू ठीक करी करे बाबा वे दिनअ। 43तेबा सभे लोका परमेश्वरा रे चमत्कार का हेरान होई।

आपणी मउता रे वारे मे यीशु री भीआ का भविष्यवाणी

(मत्ती 17.22,23; मरकुस 9.30-32)

परमेश्वरा रा यह चमत्कार हेरी करे सबे लोका हेरान होई। 44“या गला थारे कनेटे शुहणदी रहे, किबेकी मणशा रअ शोहरू मणशा रे हाथे ढाकणे आलअ साहा।” 45पर त्याहे यह गल्ला नांई समझी थी, होर एसा गल्ला रा त्यहा पता नांई लागा, होर एसा गल्ला पूछणे का त्याह तेऊका डरा थी।

सभी का बडअ कुणअ

(मत्ती 18.1-5; मरकुस 9.33-37)

46तेऊकी चेले में यह झगड़ा हुंदा लागा, कि हामा में बढ़अ कुंण साहा? 47पर यीशु त्यारा मना रा विचार जाणी करे यीशु एक बालक आंणि करे खड़अ करू, 48होर त्याह वै, “बोलू, जोह कोहे मेरे ना का एउ बालका मनलअ महा भी सह ग्रहण करनअ होर जो कोई महा ग्रहण करलअ सह मेरे भेजणअ आले ग्रहण करा किबेकी जोह तमामें होछे का होछअ आसा सह बडअ साहा।”

जोह बिरोधा में नांई, सह पक्ष में साहा

(मरकुस 9.38-40)

49तेबा यूहन्ना बोलू, हे गुरु, हामें एक मणश तेरे ना कअ दुष्टात्मा काहड़दअ हेरु, होर हामें तेऊबे नाँई करु किबेकी सह हामें सगे होई करे ता पीछे नाँई होई सकदअ, 50यीशु ये तेऊबै बोलू, तेऊ नांई रोका किबेकि जोह थारे बिरोध में नांई सह तमें संघे साहा।

सामरी नगरे यीशु रा बिरोध

51जेबरे तेऊर स्वर्गा नाहण री धियाडी पूरी होई, तेबा तयुये यरूशलेमा वै नाहणे रा बिचार करु। 52तेऊये आपु जेह दूत भेजी: त्याहे एकी सामरिया रे ग्राए, तेऊवै जागा त्यार करी। 53पर त्याहे लोके तेऊवे तखे नांई ईहणे दीना, किबेकि सह यरूशलेमा वै चालूदअ थी। 54एता हेरी करे, तेऊये आपणे चेले यूहन्ना होर याकूबा वै बोलू, “हे परमेश्वर तूह चहान्दा की हामा बे आज्ञा दे की सरगा का आग ईछी करे त्या भस्म करे?” 55पर तेऊये त्याह भी डांटी करे बोलू, तमे नांई जानदे की कासु आत्मा रे साहा। किबेकि मणशा रे शोहरू लोका रे प्राण नाश करदअ नांई पर बचाऊदअ आउअ दअ साहा। 56होर त्याहे कासु दूजे ग्राए वै नाठ।

यीशु रे चेले बणने रा मुल्य

(मत्ती 8.19-22)

57जेबा त्या बाता हाड़दे लागदे थी, कासूये त्याह का पुछु, “जखे कई भी तमे नाहले, महा तमा पीछे इंहणा।” 58यीशु तेउ बे बोलू, शयाली होर सरगा रे चेलू रे कोलह हुँदा; पर मणशा रे शोहरू बे मुंड़ा ढोपणे री भी ज़ागा नांई आंधी। 59तेऊ दूजे वै बोलू, “महा पीछे ईच्छ।” तेऊये बोलू, “प्रभु! महा पहिले नाहणे दे की हाऊं आपणे बाबा दबाई ईछु।” 60यीशु तेऊबै बोलू, होर मुडदे आपणे मुडदे गाढ़ने दे, पर तूह परमेश्वर रे राज्य रा प्रचार सुणा। 61एकी होरी भी बोलू, हे परमेश्वर महा भी ता पीछे ईहंणा, पर पहिले महा घरा वै नाही करे बोली दे हीणे 62यीशु ये तेऊबै बोलू, “जोह कोई आपणं हाथ हला पैंदे डाही करे पीछे हेरलअ, सह परमेश्वरा रे राज्य में नांई नांही सकादअ।”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 9: ISJNT

Highlight

ಶೇರ್

ಕಾಪಿ