लूका 10

सतर चेले भेजणे

1याहा गल्ला वाद प्रभुये सतर होर मणश चुनी होर जासु-जासु नगरे होर जागहा आपे चालूद थी, तखा वै तेऊ त्याह दुई-दुई करी करे भेजी। 2तेऊ त्याहवै बोलू, पाके खेच बहू साहा, पर कामा करन आले थोड़े साहा; तेबा खेचा रे मालका का बिनती करा कि आपणे खेचे काम करन आले होर भेज। 3नाश; हेर हाऊं, ताह्बे भेडा रे गाभू जेह भेड़िया बीचा में भेजा। 4तेबा नाह बटु, नाह झोली, नाहा बूट; होर नाह बाता कासी वै नमस्ते करे। 5जासु घरा में नाहदे वक्ते तेऊबै सभी का पहिले यह बोले आशीष दे, एउ घरा रा कल्याण हो। 6अगर तखे कल्याण हूंणा होला तेबा थारा कल्याण तखे हूंणा, नांई होला तेबा तेऊ तमा सेटा बे बापस इहंणा। 7तेऊ घरे रहा, होर जोह त्याह का भेटा तेथी खाए, किबेकि मज़दूरा री आपणी मज़दूरी भेटी लोडी; घरे-घरे नांई नाशे। 8जासू नगरे नाहले, होर तखले लोका तमा बशयागले, तेबा तमा सेटा जोह खाणे वै देले तेऊ खाए। 9तखले बीमारा ठीक करे, होर त्याह वै बोले, परमेश्वरा रा राज्य नेड साहा। 10होर जासु नगरे नाहले होर तखले लोका तमा ग्रहण नांई करले होर तखले बजारे नाशी करे बोले। 11आपणी टांगा रे माटे ठुडकी करे बोले थारे ग्रां रा धुडा हामा थारे सामने ठुड़कणा; होर तेवरी एता भी जाणा कि परमेश्वरा रा राज्य नेड साहा। 12हाऊं तमाक बोला कि तेसा धियाड़ी तेऊ नगरा री दशा सदोमा री दशा सभी का बखे बुरी हुणी।

अबिश्बासी ग्रा वै अधिकार

(मत्ती 11.20-24)

13हे खुराजीन! हे बैतसैदा हाय! जोह सामर्थ्य रै काम तमा मे करी, अगर त्याह काम सूर होर सैदा मे करी हुँदै, होर टाट प्लेटि करे छारा पैंदे बेशी करे केबरका मन फेरले । 14पर न्याय री धियाड़ी थारी दशा सूर होर सैदा री दशा का खासी सहणे लाईक हुणी। 15होर हे कफरनहूम, कैह तुह सरगा तणी उछटअ करनअ तुह अधोलोका का भी उन्धे नाहण। 16जोह थारी शुणा, सह मेरी भी शुणा; जोह तमा तुच्छ जाणा त्याह महा भी तुच्छ जाणा होर जोह महा तुच्छ जाणा, सह मेरे भेजणे आले भी तुच्छ जाणा।

सतर चेले रा इछणा

17त्या सहतर चेले खुशी-खुशी आउये होर बोलदे लागे हे, “परमेश्वर तेरे ना का दुष्टात्मा भी मेरा बशा में साहा।” 18तेऊ त्याह का बोलू, माई शैतान सरगा का विजली साही पडदअ हेरु थी। 19हेरा माई तमावै सर्पा होर विछु फिंजणे रा अधिकार दिना दा साहा, होर दुश्मना री सारी बुराई रे सामर्था पैंदे अधिकार दिना दा साहा, 20तेबा भी खुश नांई होऊ की दुष्टात्मा थारे बशा में साहा पर एताका खुश होए की थारे ना स्वर्गा में लिखी दे साहा।

यीशु रा खुश हुणा

(मत्ती 11.25-27; 13.16,17)

21तेवरी सह पवित्र आत्मा री खुशी संघे भरू, होर बोलू, “हे बापू, स्वर्ग होर धरती रे परमेश्वर, हाऊं तेरा धन्यवाद करा की ताए या गल्ला ज्ञानी होर समझदारा का छुपाई डाही, होर बालका पैंदे प्रकट करी। हे बापू, किबेकी महा यह ठीक लागा। 22मेरे बापू महा वै सब सा दिना; होर कोहे नांई जांणदअ कि शोहरू कुण साहा बापू ही जाणा, होर बापू कुण साहा कोहे नांई जांणदअ सिरफ शोहरू ही जाणा होर जासू पैंदे तेऊ शोहरू प्रकट करणा चाहे।” 23तेबा चेले फेरा वै फिरि करे बोलू, “धन्य साहा त्याह री आछी, जोह याह गला तमा हेरा। 24किवकि हाऊ तमावै बोला कि बहू भविष्यद्वक्ता होर राजा चाहू की जोह गल्ला तमे हेरदा पर नाँई हेरी; होर जोह गल्ला तमे शुणदा पर नांई शुणी।”

दयालु सामरी रा दृष्टान्तअ

25होर हेरा, एक व्यवस्थापक यीशु परखणे री तणी पुछु, “हे गुरु! अनन्त जीबन रा बारिस हुणे री तणी हाऊं कैह करू?” 26तेऊये तेऊका बोलू, “व्यवस्था में कैह लिखूदा साहा? तुह कैह पढ़ा?” 27तेऊ उतर दीना, तुह प्रभु आपणे परमेश्वर आपणे सारे मन होर आपणे सारे प्राण होर आपणी सारी शक्ति होर आपणी सारी बुधि संघे प्रेम डाहे होर आपणे पड़ोसी का आपु जेड़ा प्रेम डाहे। 28तेऊये तेऊक बोलू, ताई ठीक उतर दिना एथी कर तेबा तुह जिऊंदअ रहण। 29पर तेऊ आपणे आपा वै धर्मी हुणे री इच्छा री तणी यीशु कअ पुछु, मेरअ पड़ोसी कुण होऊ? 30यीशुये उतर दिना, एक मणश यरूशलेमा कअ यरीहो वै हाडदअ लगदअ थी, कि डाकू सह ढाकु होर तेऊरे झिकड़े चिरी होर चिकि करे आधअ मुअदअ तखे शोटू। 31होर एडा होऊ की एक याजक तेसी नाह्न्द लग्दअ थी, पर तेऊ हेरी करे कतराई करे नाठअ। 32एडअ ही एक लेबी तेसी बाता आउअ, सह भी तेऊ भाल़ी करे कतराई करे नाठअ। 33पर एक सामरिया तेसा बाता आउअ, तेऊ हेरी करे तेऊ दया आयी। 34सह तेऊ सेटा इच्छी करी तेऊरे घावा पैंदे तेल लेसी करे होर दाखरस पाई करे पाटी बानी होर आपु संघे घोड़े पैंदे बश्यागी करे एकी सराई बे निऊ होर तेऊरी सेवा करी। 35दूजे धिहाडे तखले मालका वै दुई दीनार देई करे, बोलू एउरी सेवा करे जोह थारा लागला तेऊ हाऊं इच्छी करे देलअ। 36एवा तेरी समझा में या चीई में का डाकू चिकुद मणश रअ पड़ोसी कुण होऊ। 37तेऊये बोलू, सह जासु तेऊ पैंदे दया करी यीशु ये त्याह वै बोलू, नाश, तूह भी एडा कर।

मारथा होर मरियमा रे घरे यीशु

38जेबरे त्याह नाहदे लागे थी, सह एकी ग्राए नाठअ, मार्था ना री एक बेटड़ी सह आपणे घरा वै आणू। 39होर मरियमा ना री तेसरी एक बहीण थी। सह परमेश्वरा रे चरने वैशी करे तेऊरे वचना शुणदी लागी। 40पर मार्था सेवा करदे-करदे घबराई, होर तेऊ सेटा इच्छी करे बोल्दी लगी, हे परमेश्वर, कैह ताहा मेरी किछे चिंता नांई साहा मेरी बहीणे हाऊं सेवा करने बे केहली डाही? तेबा तेसा बे आज्ञा दे मेरी सहायता कर। 41परमेश्वरे तेसा वै उतर दिना, हे मार्था, तुह बहू गल्ला री फिकर किबे करा होर तूह डरा किबे। 42पर एक गला जरुरी साहा, होर एउ भले भाग जोह मरियमे चुनु दअ साहा तेउ कोहे छिनि नांई सकते ।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 10: ISJNT

Highlight

ಶೇರ್

ಕಾಪಿ