Luka 23

Pilato anamukoha Yesu

(Mat 27.1-2,11-14; Mrk 15.1-5; Yoh 18.28-38)

1Athu attheene a vanthatoni namillatu waatimulla omukusalle Yesu oyaana wa Pilato, 2Wenko yahaamba omuhumullulla wi oochimwa voollotani wi, “Naamphwanya aweerihaka athu a mutundwaahu wi ewukile nave aahiihaka okhoma musonkho wa Kaisara.* Nave aniiromolla yeekha wi tti Mesiya,* mwene.”

3Sika Pilato aamukoha wi, “We tti Mwene a Ayuda?”

Yesu aallota wi, “Mullotillethi nyookha.”

4Vano Pilato aallota wa allupa mukutho uullupalli ni mulloko waathwaayo wi, “Nginaphwanya mullatu wawi kimwiipe muthoolla.”

5Koma athwaayo yaallipihellave ollota wi, “Ni ehuddihwaaye annaweeriha athu a mu Yudeya mutthemwene wi ewukile. Aambeelle o Galileya, vano ari wuno.”

Yesu wa Herode

6Pilato ahiiwa ddenndda, aakoha wi, “Muthu yoolla tti a o Galileya?” 7Vano iiwalleeye wi Yesu anavenyera o echigawo yoolamulelliwa ni Herode,* aamurumiha wa Herode, oyo enthawi yooyo aari o Yerusalemu. 8Herode amoonilleeye Yesu aahakallalla ni murimaaye muttheene vawi ahiiwa dda olliye nave aanapaalla omoona. Aanatiyerella omoona eeraka ddoottikhiniha. 9Vano Herode aamukoha Yesu ddinchichi koma Yesu khaakhunlle ello. 10Allupa mukutho uullupalli ni ahuddihi a malamulo* yahiimella emullotella Yesu wi oochimwa. 11Vano Herode ni akhotwaaye yaamweerella ni omullotella epewe Yesu. Yaamuwariha mukanjo woomwene, emuhokollosella wa Pilato. 12Herode ni Pilato yaari awiitana ddihineereye ddenndda koma vano yahaattana.

Mullatu waakamulliwa wi Yesu iiphiwe

(Mat 27.15-26; Mrk 15.6-15; Yoh 18.39—19.16)

13Pilato aamwiithana allupa mukutho uullupalli, attekweene a Ayuda* ni athu attheene. 14Aallota wi, “Mwaawaana muthoolla wa miyaano wi annaweeriha athu wi ewukile. Vano koomukoha vamiitthoni vanyu koma nginamphwanya ni mullatu wa ddeko munamullotelleenyu wi oochimwa 15Naari Herode khaamuphwanyille ni mullatu, ella sika ekaambiiwa amuhokolloselleeye wa hiyaano. Khenre ello yoophwanella okhwa. 16Kineeromoona omuwashulla nave kimuhiye aroweke.”#23.16: Ddoolemba ddimodda ddakhalle ddaanaanjereravo evesi 17: Erive ehakallallo ya Paska Pilato aanamuttaphulla oomakiwa mmodda oyo yamupaalliiwa (onani Mrk 15.6).

18Nave athu attheene yaakhuwave wi, “Iiphiwe! Attaphulliwe Baraba!” 19(Baraba aahiyiwa mundende kaambiiwa aawukila niboma m'muzindanimmo navettho aamwiipha muthu.) 20Pilato apaalla omuttaphulla Yesu sika ahaavekattho athwaayo. 21Koma yaakhuwave wi, “Mutthomeyeni vamutandani! Mutthomeyeni vamutandani!”

22Pilato ahaakohattho waneeraru wi, “Achimwalle mullatu wawiidde? Nginamuphwanyella mullatu woophwanella wi iiphiwe! Kineeromuwashulla kimuhiye aroweke.”

23Koma athwaayo yaavirellellave okhuwa wi Yesu atthomeyiwe vamutandani nave omamallihelloni wene yaamugonjiha Pilato ni okhuwa wiwanko. 24Vano Pilato aakamulla wi ddoopaalla dda athwaalle ddeereye. 25Aamuttaphulla muthu yamupaalleewoolle, oyo ahiyiwe mundende ekaamba ya owukila niboma navettho omwiipha muthu. Koma amuvelleella Yesu wa alliwaayo wi yeerena ddoopaalla ddiwa.

Yesu anatthomeyiwa vamutandani

(Mat 27.32-44; Mrk 15.21-32; Yoh 19.17-27)

26Akhotwaayo yamukusalliiwa Yesu wi yamutthomeye vamutandani, yaakumana ni muthu oovenyera o Kurene nnddina naye Simoni. Olliye avenyera m'muzi ayaaka otawoninko nave yaamureya mutanda moomuwatihera nave aneeta vatulli va Yesu.

27Mulloko wa athu anchichi waamuthwara navettho atthiyana ayo yadduukutha veethirimani emwinllellaka Yesu. 28Koma Yesu aarukunuwa allota wi, “Nyu atthiyana a o Yerusalemu, muhinakinllellaka miyaano koma muddinllelleke nyookha ni aniinyu. 29Vawi mallapo enimawa ayo athu enaallotekiiwa wi ‘Oodalisiwa tti atthiyana awumma, ayo eri oohiyara nave ayo ehinamwaamwiheke mwaana!’ 30#Hos 10.8; Yaw 6.16Enthawi yeeyo Athu eneerollota wa miyaango wi ‘Nimorelleni!’ Eneerollota wa asimiyaango wi ‘Niphitteereni!’ 31Ddeko wonanko ddenndda ddineereye wa muteekho ori mukitthi, onaakhalle wawiidde wumma?”

32Athu eelli ayo yaari ezigawenga, yaakusiwattho wi yiiphiwe vamodda ni Yesu. 33Nave yaphiyalliiwa onipuroni nooromolliwa “Nipuro na Nikharakadda,”#23.33 Nikharakadda: Mu Eheberi nipuronna ninaromolliwa wi Gologota. yaamutthomeyawo vamutandani Yesu ni ezigawenga, mmodda onnattanatta naye nave mmoddooyo onnatta noonyottho naye. 34#Mas 22.18Yesu aallota wi, “Attiitthaaka, mwaakhululukelle vawi khenadduwella eyo eneeriiwa.”#23.34: Ddoolemba ddimodda ddakhalle khaddinna mawu awi Yesu aallota wi, “Attiitthaaka, mwaakhululukelle vawi khenadduwella eyo eneeriiwa.”

Vano akhoto yaakawana ddoowara ddaye mwawoombesa. 35#Mas 22.7Athu yahiimella enoonella nave attekweene a Ayuda yamullotelliiwa epewe wi, “Aanaavullusa amodda, muhiyeni iivulluse yeekha, aari Mesiya ootthoolliwa ni Mulluku!”

36 # Mas 69.21 Akhotwaayo yaamweerellattho epewe Yesu, yaamwaatamella, emuvaha vinyo oonyuunya wi amuwirye. 37Nave yaallota wi, “Wiivulluse weekha waari Mwene a Ayuda!”

38 Vaddullu va murwaaye vaakhalla yoolembiwa yawi, “Olla tti Mwene a Ayuda.”

39Nave mmodda a ezigawenganndde aamullotella epewe wi, “We khe Mesiya valle? Wiivulluse weekha ni hiyaano!”

40Mmoddooyo aamusimwella wi, “Ethiyo weyaano khonamoova Mulluku? Vawi naweenettho onaakhella ollaka omoddamodda wenngu. 41Hiyaanothi ninnaphwanella ollakiwa kaambiiwa ninaakhella ollikana ni ddaweera ddahu koma olliyoolla khenre yoonanara.” 42Nave aallota wa Yesu wi, “Yesu, mwakuupuwelle mwawa muphiya mu omwenaanyu!”

43Yesu aallota wi, “Kinimuulleella ddawoona wi ollello vaava oneerokhalla ni miyaano mu Paradizo.”

Okhwa wa Yesu

(Mat 27.45-56; Mrk 15.33-41; Yoh 19.28-30)

44 # Eks 26.31-33 Waambeella 12 koloko otthaana ophiyera 3 koloko waakhalla epiphi mu ellapo ettheene vawi nndduwa naathiima. 45Owala wa nndduwa waatthattuwa epiphi nave ekatani yoohiyaniha mapuro meelli a mu enyumba ya Mulluku yahaahuwa okawaneya variyari. 46#Mas 31.5Vano Yesu ahinlla mookhuwa wi, “Attiitthaaka, kinavelleella munepaaka m'mattani mwanyu!” Amallihalleeye aakhwa.

47Akhoto muullupalli a o Roma oonilleeye ddeereyillennddo aamutitimiha Mulluku allota wi, “Ddawoona, muthoolla aari oolungama!”

48Athu attheene yatthukumanne wi yoonelle ddaweereyannddo yoonilliiwa ddennddo, yaarowa owaniwa edduukutha ekhakadda ekaamba yooddiiwella ethakaraka. 49#Luk 8.2,3Attheene yadduwellana phaama ni Yesu navettho atthiyana yamuthwanre ovenyera o Galileya, yahiimella voorekamella enoona ddaweereyannddo.

Ovitthiwa wa Yesu mu mahame

(Mat 27.57-61; Mrk 15.42-47; Yoh 19.38-42)

50-51Waakhalla muthu mmodda nnddina naye Yosefe oovenyera o Arimateya, etawoni ya Ayuda. Aari muthu aphaama ni oolungama. Nave aari oodduwanyeya a attekweene a millatu a Ayuda* nave aanatiyerattho owa wa omwene wa Mulluku. Nave muthoolla khaawiiwanane ni attekweene a millatu a Ayuda ddawi Yesu iiphiwe. 52Aaya wa Pilato aveka mutembo wa Yesu. 53Vano aaya akitthiha mutembooyo, awuhuruwella ni ekuwo, awuvittha mu mahame oosemiwa vanllukuni ayo yaari ehinavitthiwekemo muthu. 54Naari nllapo nookhozekella nave nllapo na Sabata naari vakhuviru waambeya.

55Atthiyana yamuthwanre Yesu ovenyera o Galileya yaathaanana ni Yosefe wi yoone mahamaayo ni mavitthello a mutembwaayooyo. 56#Eks 20.10; Deu 5.14Vano yaarowa owaniwa yakhoza makhura a nthuko naphaama wi yazoze mutembooyo.

Va nllapo na Sabata yahiithuuwa, ollikana ni malamulo a Mose.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 23: MW2019

Highlight

ಶೇರ್

ಕಾಪಿ