Luka 12

Yisiti a Afarisi ni Asaduki

(Mat 10.26-27)

1 # Mat 16.6; Mrk 8.15 Vano athu anchichi yatthukumanniiwa, wawi yaananyingallana, Yesu aallota vawaamba wa oohudderaaye wi, “Muchenjere ni yisiti a Afarisi,* kinaaka dda woottha wiwa. 2#Mrk 4.22; Luk 8.17Erive ello yawiipittheya vano eneerewuupullulliwa navettho erive yookhuweya eneerodduwanyeya. 3Vano ddittheddene munalloteenyu mwiipiphini ddineerewiiweya vawooneya nave erive ello munanong'oneenyu mookhuweya mpa mwanyu omullakoni muwanllewo, ddineerollalleyiwa vaddullu va enyumba.

Oophwanella wooviwa

(Mat 10.28-31)

4“Kinimuulleellani, akhwaaka wi muhinawoovaka ayo eniipha mwiillive oohikhallattho ni yaweera yookhwaranya vaavo. 5Kineerewuutthoonyiherani oophwanella omoova. Mumooveke Mulluku oyo iipha mwiilli annakhallattho ni olamulello womuvokha muthu mu gehena. Kikhulupilileni miyaano, kinimuulleellani ddawoona wi yooyo sika munaphwanelleenyu wi mumooveke!

6“Munnawora okulla epallame dda kattiitti dditthanu ni makobiri meelli. Nave naari emodda khenatiwalliwa vamiitthoni va Mulluku. 7Naari meehi mattheene a m'muruni mwanyu aheerengiwa. Sika muhooveke, nyuwaano tti oopaalleyathi wunchichi ohiyana ni mulloko wa akattiitti anchichi!

Omwaakhullella apaalle omukhoota Khrisitu

(Mat 10.32-33; 12.32; 10.19-20)

8“Kinimuulleellani nyuwaano, muthu anaakhullella wi tti aaka vamiitthoni va athu, miyaanottho Mwaana a Muthu, kineeromwaakhullella vamiitthoni va angelo a Mulluku. 9Koma oyo anaakirune vamiitthoni va athu miyaano kineeromurunattho vamiitthoni va angelo a Mulluku.

10 # Mat 12.32; Mrk 3.29 “Nave arive muthu anakillotella epewe, mi, Mwaana a Muthu, ttuuworeya okhululukelliwa koma oyo anallotella epewe Munepa Waweella khakhululukelliwa.

11 # Mat 10.19,20; Mrk 13.11; Luk 21.14,15 “Yaawuukusakani wi yawiipeni millatu mu enyumba ddamavekello* apaalle wa attekweene oolamulella, muhikhupanyeke wi munaaye mwallote tini apaalle munaallote mwawiidde. 12Vawi Munepa Waweella sika anaawuuhuddiheni yoophwanella ollota enthawi yeeyo.”

Niphwanaphwaniho na muthu eeyuuma ookarangeya

13Muthu mmodda a m'mullokonimmo aallota wa Yesu wi, “Ahuddihi, mulleelleni mwanamunnaka akikawelle eyuuma yoohiyiwa ni attiitthiihu.”

14Koma Yesu aamwaakhulla wi, “Muthuwe, akivahille mutteko wookamulla millatu ddanyu ttaani apaalle wi kuukawelleni eyuuma yoohiyiwa?” 15Nave aallota wi, “Chenjerani, muhikhalle a nrima vawi okumi wa muthu khonallikana ni waata wa ddeko ariiyena naari arina eyuuma yinchichi.” 16Vano ahaalleella niphwanaphwaniho, nawi, “Emata ya muthu eeyuuma mwaakhalla ddoohata ddinchichi. 17Vano aallota yeekha wi, ‘Kineere tini vano vawi nginna ekhokwe yoohiyamo ddoohata ddaka?’ 18Nave aallota wi, ‘Kinaweere ddiidda, kineerokumulla ekhokwe ddaka, kimake dduullupalli, kihiyemo ddoohata ddaka ni eyuumaaka. 19Vano kineerollota wa murimaaka! Wookhalla ni ddeko ddookwakhwana miyakha ddinchichi. Sika ithuuwa, oche, owirye, ohakallalle.’ 20Nave Mulluku aallota wa olliyooyo wi, ‘Muthu ookarangeya we! Mahiiyu vaava okumaawo oneeromalla, ttaani anaavahiwe ddeko ddittheddene odduukellenlleewe weekha?’ ”

21Voomallihani Yesu aallota wi, “Ddinaakhalle ddiiddo ni athu oodduukellellella weekhiiwa eyuuma koma khenakhallattho allupa a eyuuma vamiitthoni va Mulluku.”

Muhikhupanyeke

(Mat 6.25-34)

22Vano Yesu aallota ni oohudderaaye wi, “Sika tti kaambiiwa kinuulleelleemini nyuwaano wi muhikhupanyeke dda okumaanyu wi munaache tini apaalle dda mwiillaanyu wi munaaware tini? 23Vawi okumi onnakhwaranya yoocha. Navettho mwiilli onnakhwaranya yoowara. 24Ganizerani dda anakhuku, khenamidda mmiddo apaalle otthukumaniha ddoohata, kheyinna moosungella apaalle ekhokwe koma Mulluku annaachiha. Nyuwaano munnapaalleya wunchichi ohiyana ni epallame. 25Ttaani a nyuwaano anaanjerere okumaaye nllapo nimodda#12.25 anaanjerere…nimodda: apaalle waanjerera orekama. vookhupanyani? 26Mwaahiworaka weera dding'onong'ono wonanko ddenndda, munakhupanyellati ni ddeko ddimoddannddo? 27#1 Mam 10.4-7; 2 Epi 9.3-6Ganizerani wunnuwa wa malluwa a muhakani, khenaphara mutteko apaalle wiisowella weekhiiwa ddoowara. Nave kinimuulleellani nyuwaano wi mwene Solomoni ni eyuumaaye ettheene ariiyena, khaarina ddoowara ddooreera wonanko nimodda na malluwaalla. 28Mulluku sika anareeriha manasi a muhakani ayo enakhallavo ollellove koma osiisello enavokhiwa viikho. Nyu athu eechikhulupililo yooyeva. Olliyoolla khawora wuuwarihani nyuwaano?

29“Sika muhinakhupanyaka wi munaache tini apaalle munaawirye tini apaalle ddeko ddimodda. 30Athu oohimullapella Mulluku, Attiitthaanyu, ennakhupanya dda ddeko ddenndda. Attiitthaanyu ennadduwella wi munnapaalla ddeko ddittheddenenndda. 31Koma yawaamba mwaashaasheke omwenaaye nave aneerewuuvahani ddeko ddenndda.

Dda eyuuma yooddullu

(Mat 6.19-21)

32“Muhoove, nyuwaano ayo muri wonanko mulloko wa enkhosa ddooweerengeya vawi Attiitthaanyu yaakonda wi yuuvaheni omweniiwa. 33Kullihani ddeko ddanyu ddittheddene nave makobiraayo mwaavahe oohoowa. Mwiiphwanyelle mathumba a eyuuma ayo ehinaahuwa ni wiisungella eyuuma oddullu nko ehinayevawiiwa kaambiiwa allupaawiiya khenaphiyawo naari enjenjete khaddinoononga. 34Vawi wenko onakhalla eyuumaawo, murimaawo onakhallattho wenko.

Mullupa mutteko ootiyera

35 # Mat 25.1-13 “M'makelleni laamba okhozekella mutteko nave enyali ddanyu ddikhareke, 36#Mrk 13.34-36nave mukhalle wonanko allupa mutteko ayo enamutiyera pwiiwa ovenyera o ehakallallo yookwati. Aphiya nave ookotha nchiwi, eneeromuhullella enthawi yeeyo. 37Oodalisiwa tti allupa mutteko ayo pwiiwa aawaaka anaaphwanyeeye ehinakone, emutiyeraka! Ddawoona, kinimuulleellani wi, pwiiwooyo aneerom'makella laambaaye, aakeraatthiha voochella nave aamba waarumeyella. 38Oodalisiwa tti allupa mutteko ayo pwiiwa anaaphwanyeeye etiyeraka naari awaaka variyari va mahiiyu apaalle naari oyaaka ni osa. 39#Mat 24.43,44Nave munnadduwellattho wi mwaneena a enyumba adduwenlleke enthawi yooweella mullupaawiiya, aaweerotiyera wi mullupaawiiyooyo ahikhuvulle enyumbaayeeyo. 40Nyuwaanottho mukhozeke kaambiiwa va enthawi eyo muhinadduwelleenyu mi, Mwaana a Muthu, kineeroowa.”

Dda mullupa mutteko oororomelleya ni mmodda oohiroromelleya

(Mat 24.45-51)

41Petro aallota wa Yesu wi, “Apwiya niphwanaphwanihonna munallota wa hiyaano apaalle wa athu attheene?”

42Apwiya yahaakhulla wi, “Ttaani ari mullupa mutteko oororomelleya ni eezeru? Tti oyo apwinnya enaamutthoolliiwa wi aawehereke allupa mutteko attheene a mpa mwaye ni waavaha ddoocha va enthawi yaphaama. 43Oodalisiwa tti mullupa mutteko oyo apwinnya yaawaaka enaamuphwanyiiwa eeraka ddawi ddiidda. 44Ddawoona, kinimuulleellani wi aneeromweera mullupa mutteko yooyo wi awehereke ddeko ddaye ddittheddene. 45Koma mullupa muttekooyo allota m'murimani mwaye wi apwinnya emmaselliwawo, aamba owuukutha allupa mutteko akhwaaye, aallopwana ni aatthiyaneene navettho anacha, anawirya ni olezela, 46vano apwinnya a mullupa muttekoolle eneerophiya va nllapo nno ahinamutiyereeye ni va enthawi eyo ahinadduwelleeye. Apwinnyaalle eneeromuphaddaphadda#12.46 eneeromuphaddaphadda: apaalle eneeromutathillella vaatte. nave eneeromullaka wonanko athu oohikhulupilila.

47“Mullupa mutteko oyo anadduwella ello apwinnya enapaalliiwa wi eere koma khanakhozeka weera nave khaneera, aneerewuukuthiwa mwawoopiha. 48Koma mullupa mutteko oyo ahinadduwella ello apwinnya enapaalliiwa wi eere nave eera ddoophwanella ollakiwana, aneerewuukuthiwa vang'ono. Nave muthu avahiwe ddeko ddinchichi aneerohokollosa ddinchichi nave muthu avahiwe ddawaatesesa aneerohokollosa ddawaatesesa.”

Dda murendelle ni okawaneya wa athu

(Mat 10.34-36)

49Yesu aallotattho wi, “Kawiille wi kikharihe munllo va ellapo yavatthi nave kaawerohakallalla wakharihiweke khalle. 50#Mrk 10.38Kinapaalleya ovollowa mu ddoohoosa wonanko mmo muthu anavolloweeye m'maaddini aabatiziwaka. Nave murimaaka onnahoosiwa ophiyera omanlle. 51Muhiganize wi koowa wi kuuvaheni murendelle va ellapo yavatthi. Naari mano, ngaawiille wi kuuvaheni murendelle koma wi kiweena okawaneya wa athu. 52Vano nibanja na athu atthanu nineerokawaneya; araru eneerokokangana ni eelli nave eellaayo eneerokokangana ni ararwaayo. 53#Mik 7.6Oneerokhalla okawaneya variyari va attiitthiiwa ni aniiwa aallopwana, anamwani aallopwana ni attiitthiiwa, amoowe ni aniiwa aatthiyana, anamwani aatthiyana ni ameewa, akwegwawo ni avokohiiwa nave avokohi ni akwegwawiiwa.”

Wiiwesesa dda enthawi

(Mat 16.2-3)

54Yesu aallotattho wi, “Moona murapo ovenyeraka woovollowa nndduwa, munnallota wi, ‘Murimu aneerorupa’ nave ddinneereya. 55Nave moona ephevo yoopaka ovenyera omwera munnallota wi, ‘Oneeroviha ollello’ nave ddinneereya. 56Nyu awoottha, munnadduwella ollotella wooneya wooddullu ni ellapo yavatthi koma khamunawora ottaphullella ezizindikiro dda enthawi yeella. Munnadduwella ollotella wooneya wa va ellapo yavatthi ni oddullu koma kaambiiwa tini muhinadduwellaanyu ottaphullella wa enthawi yamuttano?

Waattana ni adanaanyu

(Mat 5.25-26)

57“Kaambiiwa tini muhinaganizeenyu nyookha yoophwanella weera? 58Muthu uukusella vanthatoni namillatu amba weeseesa waattana ni oyo uusumenlle mwawaakuva. Waaheera ddiiddo aneerewuuvelleella wa aweeruza nave ooweeruzooyo aneerewuuvelleella wa akhoto wi akhotooyo uuhiye mundende. 59Kinimuulleella wi khokhuma ophiyera ollivenlle makobiri mattheene.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 12: MW2019

Highlight

ಶೇರ್

ಕಾಪಿ