Luka 11

Dda nivekello

(Mat 6.9-13; 7.7-11)

1Nllapo nimodda Yesu aavekella vanipuroni nimodda nene. Amallihalleeye, mmodda a oohudderaaye allota wi, “Apwiya nihuddiheni ovekella wonanko Yohane aahuddihalleeye oohudderaaye.”

2Nave Yesu aallota wi, “Mwaavekellaka, mulloteke wi,

‘Attiitthiihu,

nnddina nanyu naweella nititimihiwe,

omwenaanyu owe.

3Munivahe nllapo ni nllapo yoocha ya nllapo ni nllapo.#11.3 yoocha…nllapo: apaalle yoosiisello.

4Munikhululukelle machimwaahu,

vawi ninnaakhululukella attheene enanilakwella.

Nave muhinikuselle woweesiwa.’ ”

5Yesu aallotattho wa oohudderaaye wi, “Ngaphwanaphwanihani wi nyuwaano mooya o enyumba ya mukhwiinyu variyari va mahiiyu mullota wi, ‘Mukhwaaka, okipolleye buledi mitthi miraru. 6Mukhwaaka ari voolendonaaye sika oophiya onyumbani wakanngu nave nginna yoocha yawi kimuvahe.’ 7Nave ngaganizerani wi mukhwiinyu awaakhullani wi, ‘Ohikihoose! Mullako tti woowalla khalle nave anaaka aakona, sika ngiwora ovenya wi kuuvahe weyaano ello.’ 8Kinimuulleellani wi aahivenya awinnya buledi kaambiiwa tti mukhwaawo, aneerovenya ekaamba ya ntthitti nawo na ovekanko uuvaha ddittheddene onapaalleewe. 9Sika kinimuulleellani wi, vekani nave muneerewaakhella; ashaashani nave muneerophwanya; okothani nave nchiwi nineerohulliwa wa nyuwaano. 10Vawi attheene ayo enaveka eneerewaakhella nave ayo enaashaasha eneerophwanya nave oyo anookotha aneerohullelliwa nchiwi. 11Ttaani mwa nyu attiitthi anaamuvahe mwanaye enowa mwaanooyo avekille ehomba? 12Apaalle uuvekani nooche munaamuvahe namukalizi? 13Naari muri oonanara munnadduwella waavaha aniinyu ddeko ddaphaama. Vano Attiitthiihu ooddullu enaalephele mwawiidde waavaha Munepa Waweella ayo enamuveka olliye!”

Yesu ni Belezebulu

(Mat 12.22-30; Mrk 3.20-27)

14Vano Yesu aakhumiha munepa woonanara woomweeriha muthu ohillota. Munepooyo wakhumalliiwa, muthooyo aallota nave mulloko wa athu yaari vaavwaayo waattikhina. 15#Mat 9.34; 10.25Koma athu amodda yaallota wi, “Masiva ookhumihella minepa ddoonanaraalla anavahiwa ni Belezebulu,* muullupalli a minepa ddoonanara.”

16 # Mat 12.38; 16.1; Mrk 8.11 Amodda yaamweesa Yesu, voomuvekani echizindikiro yoovenyera oddullu wooniha wi Mulluku sika aamurumalle. 17Koma Yesu aadduwella maganizwiiwa nave aallota wi, “Orive omwene wakawaneya va weekhiiwa ni owana, khollekella omalla. Navettho naari nibanja nakawaneya va weekhiiwa ni owana khanillekella omalla. 18Sika mulloko mmodda waawanaka ni mmodda mu omwene wa Satana, oyo ari Belezebulu, omwene yooyo onaavirellelle mwawiidde? Kinuulleellani ddenndda vawi munallota wi kinnakhumiha minepa ddoonanara ni masiva a Belezebulu. 19Miyaano kaakhumihaka minepa ddoonanara kaambiiwa Belezebulu sika anakivaha masiva aweerella ddenndda, vano aanaavaha oothwarellellaanyu masiva ooddikhumiha ttaani? Ddineera oothwarellellaanyu ddineeroweeruzani wi nyuwaano tti oolakwa vookiphwanyellani mullatu! 20Koma kaakhumihaka minepa ddoonanara ni masiva a Mulluku ddinnooniha wi omwene wa Mulluku woowa khalle wa nyuwaano.

21“Muthu amasiva aaweheraka ddeko dda mu enyumbaaye akusalle ezida ddaye, ddeko ddayennddo ddinnakhalla phaama. 22Koma wawa muthu amasiva oomukhwaranya amugonjiha, annamwaakha ezida aroromelleeyennddo nave akawakawa ddeko aakhilleeyennddo.

23 # Mrk 9.40 “Muthu oyo ahiniiwanana ni miyaano, yooyo annakikhoota miyaano navettho oyo ahinakikavihera waatthukumaniha athu mu omwene wa Mulluku yooyo annaamwaramwasa athu mu omwene wa Mulluku.

Ohokollowa wa munepa woonanara

(Mat 12.43-45)

24“Munepa woonanara wakhuma mwa muthu, onneeteeta m'mapuroni awumma waashaasha vawiithuuwella. Koma waahiphwanya, onnallota weekhiiwa wi, ‘Kinahokollweella onyumbani waka yakhalle! 25Nave wawa onaphwanya mpammo muri mooshelliwa ni moopotokosiwa phaama.’ 26Vano onnakhuma oya wakusa minepa ddimodda mitthanu ni miilli ddoonanara ohiyana ni olliyooyo nave ddinnawa ddivollowa ddinakhalla mwemmo. Vano muthooyo makhallellwaaye voomallihella ennakhalla oonanara ohiyana ni vawaamba valle!”

Ehakallallo yawoona

27Yesu allotilleeye ddenndda, mutthiyana mmodda oovenyera m'mullokoni wa athwaayo aallota moollipiha wi, “Oodalisiwa tti mutthiyana oyo uuyanreni nave awaamwihani!”

28Koma Yesu aallota wi, “Oodalisiwa tti ayo eniiwa mawu a Mulluku ewiiwellella!”

Oveka echizindikiro

(Mat 12.38-42)

29 # Mat 16.4; Mrk 8.12 Athu yatthukumanniiwa moomwaapheella Yesu, ahaamba ollota wi, “Athu a mbadoolla tti oonanara, enakiveka echizindikiro. Kheyiivo echizindikiro enaavahiwiiwa koma ya namallotella Yonave. 30#Yon 3.4Vawi Yona aari echizindikiro ya athu a o Nineve. Emoddamoddave yeeyo Mwaana a Muthu aneerokhalla echizindikiro ya athu a mbadoolla. 31#1 Mam 10.1-10; 2 Epi 9.1-12Va nllapo na echiweruzo mwene aamutthiyana a ellapo ya Sheba aneerovenya ni athu a mbadoolla. Nave aneerewaavaanyiha kaambiiwa aheeta olendo woorekama ovenyera mu ellapwaaye wi iiwe ehuddiho ya ezeru ya Solomoni. Nave kinimuulleellani wi vookhalla vaava mmodda muullupalli oomukhwaranya Solomoni. 32#Yon 3.5Va nllapo na echiweruzo athu a o Nineve eneerovenya vamodda ni athu a mbadoolla. Athu a o Ninevaayo eneerewaavaanyiha athu a mbadoolla kaambiiwa alliwa yaarukunuwa murima yiiwalliiwa ollalleya wa Yona. Vano kinimuulleellani wi vookhalla mmodda vaava muullupalli oomukhwaranya Yona.

Miittho tti wonanko enyali ya mwiilli

(Mat 5.15; 6.22-23)

33 # Mat 5.15; Mrk 4.21; Luk 8.16 “Khaavo muthu anakhariha enyali, ayikhuneella ni muno.#11.33: Ddoolemba ddakhalle khaddinna mawu awi ayikhuneella ni muno. Koma enahiyiwa va yoohiyavo enyali wi athu ayo enavollowa mpammo yoone owalanko. 34Miitthwaanyu tti wonanko enyali ya mwiilli. Miitthwaanyu yakhalla aphaama mwiillaanyu muttheene onnaddalliwa owala koma miitthwaanyu yaahikhalla aphaama mwiillaanyu onnaddalliwa epiphi. 35Chenjerani wi owala ori mwa nyuwaano ohitthattuwe epiphi. 36Mwiillaanyu muttheene waddalliwa owala, ohikhalla ni epiphi vaamodda vene oneeromolleella virive veko wonanko enyali yaawuumolleellaka weyaano.”

Yesu anaahumullulla ahuddihi a malamulo ni Afarisi

(Mat 23.1-36; Mrk 12.38-40)

37Yesu amallihalleeye ollota, Mufarisi* mmodda aamwiithanella yoocha owaniwa. Aavollowa mpa nave aakeraatthi voochella. 38Nave Mufarisooyo aattikhina oonilleeye wi Yesu khaanawille m'mattani moollikana ni ehuddiho ya Ayuda, ahinaambe ocha. 39Vano Apwiya yaallota wi, “Nyu Afarisi, munnahuwa otte wa kapu ni embale koma muwari mwanyu muddanlle nrima ni ddoonanara. 40Nyu ookarangeya, ethiyo Mulluku oyo aapangille otte khahiyo yooyo aapangillettho muwari? 41Koma mwaavaheke oohoowa nnddo ddiri muwari mwa makapu ni embale ddanyu sika makapwaanyu mattheene ni embale ddanyu ddittheddene ddineerokhalla ddaweella vamiitthoni va Mulluku.

42 # Lev 27.30 “Nyu, awoottha, ahuddihi a malamulo* ni Afarisi, mookhalla ni otulli! Munnavelleella dda khumi dda ddoomella dding'onong'ono ddooddiviha yoocha. Nave munahiya weeruza mwa echilungamo ni omukonda Mulluku. Munaphwanella wi mweereke ddenndda oohihiya ddimoddannddo.

43“Mookhalla ni otulli nyuwaano Afarisi! Vawi munnakonda mipando ddoolemu mu enyumba ddamavekello* ni ovahiwa mooni moolemu m'misikani. 44Mookhalla ni otulli! Vawi muri wonanko mahame ootiwalliwa ayo athu enaanyingalliiwa moohidduwella.”

45Muhuddihi a malamulo mmodda aallota wi, “Ahuddihi, mwaallotaka ddiidda munanillotella epewe hiyaano.”

46Yesu ahaakhulla wi, “Mookhallattho ni otulli nyuwaano ahuddihi a malamulo kaambiiwa munnaawatihera athu wiiwellella malamulo ookatamiha ayo enakhalla wonanko ddeko ddoollemella ni ddookatamiha otukhulla. Koma nyuwaano khamunapaalla naari wookolla eyaallaanyu wi mwaakavihere otukhullanko. 47Mookhalla ni otulli kaambiiwa munnamaka mahame a anamallotella yiiphiwe ni makhollwaanyu. 48Sika nyuwaano tti amboni wi makhollwaanyu yaawiipha alliwaayo voomakani mahamaayo. 49Ella sika ekaambiiwa Mulluku aallotilleeye mweezeru wi, ‘Kineerewaarumihella anamallotella ni amurummwa nave amodda a yaayo eneerewiiphiwa amodda eneerohoosiwa.’ 50Sika athu a mbadoolla eneerollakiwa ekaamba ya wiiphiwa wa anamallotella waambeella mvo ellapo yavatthi yaphatusiwiiwa, 51#Gen 4.8; 2 Epi 24.20,21waambeella va wiiphiwa wa Abele ophiyera va wiiphiwa wa Zakariya, oyo iiphiwe variyari va nipuro naweella ni nikuwa na mukutho mu enyumba ya Mulluku. Ddawoona, kinimuulleellani wi athu a mbadoolla eneerollakiwa ekaamba ya wiiphiwa wa athu attheenaayo!

52“Nyu, ahuddihi a malamulo, mookhalla ni otulli! Moomukusa mumuvittha kiiyi a vamullakoni va enyumba ya ezeru. Nyuwaano weekhiinyu khamwaavollowillemo nave mwahaahiiha ayo yapaalla ovollowamo!”

53Nave Yesu akhumalleeye mpammo, ahuddihi a malamulo ni Afarisi yaamushella murima wunchichi sika yahaamba omukoha makoho manchichi. 54Vawi yapaalla omuphwanyella yoomwiipella mullatu voomuwakani muwano.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Luka 11: MW2019

Highlight

ಶೇರ್

ಕಾಪಿ