Luk 16
16
Terrta dɔ ngɔrɔkɨlat kɨmajal
1Jeju el ngéndoog lon an: Tag maɗi de mad kɨ ngenya ndɨ nõ. De'n non aw kɨ ngɔrɔkɨla. Deg unɨn dɔ ngɔrɔkɨla ro ngeat dɔ nujt'n ndɨ nuj nya ngah loa. 2Ngea kuna kɨ ront, ndɨjea, ke girr ta kɨ n'oo dɔat i ɗi a? Ela kɨ dan kɔrr kɨla koogo nyag kɨ jiat, kɨta asɨ ndɨ kam kɨla ngɔrɔkɨlat gog al ta. 3Ngɔrɔkɨla el kamɨnt an: Ka m'ɗa ɗi a? Ngeem a tuɓam kam kɨla koogo nyagt kɔ; m'oo tɔgɨm kɨ m'am ndɔɔn al. M'ndɨ m'ɗa rosɔl kad m'kɔ nya. 4El an: M'ger nya kɨ m'am ɗa kɨtakad lon ɔrrɨmɨn kam kɨla koogo nyagt a ne, kɨ m'ngaa deg'n a hɔmɨn kɨ rodt kam kujt lod. 5Kun ngégɨrrag lo ngen kɨɗa kɨɗa kɨ ront, el kɨdasa an: Girra lo ngeem kɨ dɔit i bãi a? 6Kɨdasa tur an: Ku yib ɓu. Ngɔrɔkɨla ela an: I ndɨ ber kanangbe un maktub loi i ndangt dɔmi. 7Kamla ndɨje kɨmad an: Ĩ tɔ girra kɨ dɔit i bãi a? De'n non tur an: Kamnyako ɓu, ngɔrɔkɨla ela an: un maktub girra loi i ndangt dɔjijoo. 8Bɨraɓe lo ngɔrɔkɨla kɨ ngeɗa nya kɨdenesew al'n non hita kɨta ɗa kumtɔg, kɨta deg kɨ kaglot'n ɗan awɨn kɨ kumtɔg tɔin ngan kunjg. 9Jeju el tɔ an: M'ndɨ m'elsɨ, maj kad i hɔn namg kɨtatɔsɨ kɨtakul nyamajg kɨ dɔningt, kɨtakad lon nyag'n non goton jisɨt a ne, deg'n non a hɔsɨn kɨ rodt kɨ lo kam ndigt kɨ to mbãkɨnõt. 10De kɨ ngeɗanya kɨro kam nyat kɨ tẽbe, a i de kɨro kam nyagt kɨbo, na de kɨ ngeɗanya kɨdenesew al kam nyat kɨ tẽbe a ne, a i ngeɗa nya kɨdenesew al kam nyat kɨbo ho.
11Kɨtɔ 'nten ĩla ĩn ngeɗa nya kɨro al dɔ nyamajgt kɨ gootal a ne, nõ a la nyag kɨrota jisɨt a? 12Na ĩla ĩn ngeɗanya kɨro dɔ nyat'n i lo de mad al a ne, nõ a adsɨ nyag'n i losɨ a? 13Ngekoogokuj asɨ ɗa ɓer lo bɨraɓeg joo al; a mbet kɨkɨɗa, na a tar kɨmad, ke a hɔ kɨkɨɗa, na a kid kɨmad. Ĩn tɔ asɨn ɗa ɓer lo Luwah kɨ nyamajgt tu al.
Ta madg'n Jeju el
(Oo Mat 11:12-13; 5:31-32; Mrk 10:11-12)
14Parisɨg tɔ, ĩn ngétar nar oon dɔ tag'n non tube na telɨn Jeju nya got. 15Jeju eld an: I ndɨ ɗan rosɨ tit deg kɨdenesew nõ degt, na Luwah ger ngarkamsɨ ɓet, kɨta nya'n deg ndɨ tɔin na ye, a i nya kɨ kid nõ Luwaht. 16Mberkɨnda lo Moij kɨ tag kɨndang lo ngékelta kɨ ta Luwaht ton mbã kaglot lo Jã kɨ ngeɗa deg baptem deg. Kaglot'n non la mbã tajigla kɨ ndɨ kɨ la mber hoita kɨmaj lo kõɓe Luwah na dekɨɗen sah lo kandt kɨ lo ngetɔgt. 17Kɨtɔ õ al kad dɔrã kɨ dɔning tɔin kɔ, tɔi kad ngon merke kɨ du tẽbe kɨɗa kam mberkɨndat to kɨkanj tɔl kona. 18Dekɨɗen'n tuɓa nẽn, na taa kɨɗang a ne, ndɨ ɗaa ngaw ta ɗa, na ĩn taa dekɨdẽ'n ngawa tuɓa a ne, i ngaw la ndɨ ɗaa ta ɗa ho ye.
Ta lo de kɨ ngenya, kɨ Lajar
19Tag maɗi de mad kɨ ngenya ndɨ nõ a la kub kɨ kɨrre wor wor kɨ lẽ kɨ sɔl lom lom a oo maj ron, a sanya kɨmaj maj kɨndɔgndɔg. 20Ngendo mad ndɨ nõ tɔ tɔa i Lajar, doobaig ɗoosɨn roa. A to ber ta kujt lo de kɨ ngenya. 21Ɓoo ɗaa ngãi ad ndig kɨ n'sa bud nyag'n ndɨ tuson dɔ tabɨlt lo ngenya'n non. Bisɨg ɗen ɗa tõnɨn ta doobaig kɨ roat. 22Na ngendo ɗe oi, malaikag unɨn na kɨ dõ awɨn sia kad Abrahamt. Ngenya ɗe oi ho ad duwna. 23Ngenya aw kam lot kɨ koo. Nyakɨto ndɨ ɗaa, un kumɨn kɨ dõ oon Abraham kɨ sãi nu kɨ Lajar kadat. 24Un ndin kɨ dõ kon an: Bɔwm Abraham, oo kum kɨlo to ndot. I la Lajar ad la ta kon jin kam mant sɔlɨn ndom kɨta m'ngaa kõ ngãi kam horrt 'nten. 25Na Abraham el an: Ngonɨm ad kami gah dɔ, lon i ndɨn kɨ dɔi dõ ɓaitɔ ye, i ngah nyamajg, na Lajar taa ne, ngah kõ ngãi, na tajigla ngah sɔlkam, na ĩ taa ne, nya kɨta ndɨ ɗai. 26Kɨ tɔi nyag'n non tube holɓe kɨwo kɨɓing to kɨnajt sesɨ kɨtakad ĩgɨn ndig gangɨn ko nẽbe kɨ n'awɨn kɨrosɨt a ne, ke ko nu kɨ n'ɗen kɨ rojt a ne, a asɨn al. 27Ngenya el an: M'kɔi Bɔwm, kɨ i la Lajar kɨ ro ngékɨɓet lo bɔwɨm. 28Kɨtɔ m'aw kɨ ngankom mi, kad ug eld ta dɔ nyagt'n non, kɨtakad ĩn tɔ ɗen lo kõt kɨ ngãi 'nten al. 29Na Abraham el an: Ngankõig ndɨn kɨ Moij kɨ ngékelta kɨ ta Luwaht nõ, kad oon dɔta lod. 30Na ngenya el an: Ãã Bɔwm Abraham, na ĩla de mad ɓai ku ngékoit aw rodt a ne, a tɔrrɨn ndid. 31Abraham el an: Ĩla oon dɔta lo Moij kɨ ngékelta kɨ ta Luwaht al a ne, ke de mad ɓai ku ngékoit kaa ne, a adɨn dum dɔd al.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luk 16: MlL
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
