Luk 17
17
Terrta dɔ ɗa majalt
(Oo Mat 18:6-9,21-22; Mrk 11:22-26)
1Jeju el ngéndoog lon an: Nyag kɨkad deg son kam majalt a nalɨn ɗe al, na beto lo de'n ɗe kɨ nyag'n non. 2I sooat kad lan mbal kusɨ nya kɨbobe kɔat, lana ne ɓul bahbot tɔi kad ɗa nya mad kɨ a ad kɨkɨɗa ku ngan kɨdugt'n ɗan son kam majalt.
3Oon go rosɨ maj. Ĩla ngonkõi ɗa majal a ne, i ndánga, na ĩla tɔrr ndɨn a ne, i nyàgo majal loa kɔ. 4Ĩla ɗa sei majal nja tanãimɨta kam ndɔ kɨkɨɗat, na nja tanãimɨta tɔ tel kɨroit an: M'tɔrrndim a ne, kari na a i nyàgo majalg loa kɔ.
Ta dɔ kadkamt
5Ngombangkɨlag elɨn Bɨraɓe anan: I laj kadkam dɔ madt.
6Bɨraɓe el an: Ĩla awɨn kɨ kadkam kɨ asɨ kɨ kum mutard a ne, a elɨn kag ɓɔl'n ɗan anan: ɔrr kɨ ngɨraig be, i ɗa kam bahbot a ne, ĩ tɔ a tel ron go tat losɨ.
Kari na kɨ ɓer tel ron go tat lo ngeen
7Nõ kusɨt la hã ɓer loa a ndɔɔ, ke a ul batg, na lon tel kɔr ɗe ɓe a ne, a ela an: I ɗe tajigla i ndɨ ta tabɨlt a? 8A ela titbe al, na a ela kɨ ɗago nyasa adɨn, kamla kɨ la kub kɨmaj ront, na kɨ dɔ ɓon, kɨ oo go lo ndɨn ta tabɨlt ad maj, kamla a ada nyasa kɨ man kãi. Goot kamla, a sanya lon ho, a ãi man ho ye. 9A ɗa mersi ɓer'n non kɨta ɗa nya'n ela nõ a? 10Titbe tɔ la ĩn, lon i ɗan nyag tube'n ndasɨn mbera a ne, maj kad elɨn anan: Jĩ ɓerg kɨmaj loj goto kɨta kɨ ɗa nya kɨ sumba kad kɨ ɗa koon.
Ngébanjg kɨlah yootɨn, na kɨkɨɗa kudt tel ɗa mersi Luwah
11Lon Jeju ndɨ aw kɨ ɓebo Jerusalemt ɓaitɔ ye, a nda kam dɔning Samari kɨ dɔning Galile gang. 12Ndɨ and ngon ɓet mad, ngébanjg kɨlah ndɔdɨna. Ngébanjg'n non duba ɗan sãi: 13Unɨn ndid kɨ dõ kon ne anan: Jeju Ngendoo deg, oo kumtondo loj.
14Jeju ood na eld an: Awɨn i dan rosɨ ngéjamosɨ kadkarig. Lon ndɨ awɨn ɓaitɔ ye arɨn ad banj lod goto. 15Kɨ kɨɗa kudt, lon oo kad ni kɨ yoot ye, tel ndub tɔ Luwah kɨ ndɨn kɨbobe. 16So kɨ nja Jejut kɨ takumɨn ningt tɔ ɗaa mersi. De'n non i de kɨ Samarit. 17Jeju un tan an: Ngébanjg kɨlah arɨn ale? Kɨ jikɨɗag ye ĩn ɗa a? 18Ĩgɨn non tɔ asɨn tel kad ɗe ndubɨn Luwah al, na mbah'n ndɨn tã a? 19Kamla ela an: Ĩ ɓai dõ, aw, kadkam loi aji.
Ɗe kõɓe lo Luwah
(Oo Mat 24:3-42)
20Parisɨg ndɨjen Jeju ke kõɓe lo Luwah a ɗe ndɔ kɨɗat a? Jeju turd an: Kõɓe lo Luwah ndɨ ɗe kɨ lo koot kɨ kum al. 21Deg a anan oo. I nẽbe, ke i nube al, kɨta kõɓe lo Luwah i kusɨt. 22El ngéndoog lon an: Ndɔ madg a ɗen nõ lon a i ndigɨn koo ndɔ kɨkɨɗa kam ndɔgt lo Ngon de, na a oon al. 23A elsɨn anan: Oona nube, oona nẽbe, ot kawɨn, ot ndulon god. 24Kɨtɔ tit'n telndii a tel yolong, na nyẽr kunja a unj kɔt ko dɔrãt mad mbã kɨ kɔt ko dɔrãt mad ye, titbe la Ngon de a ĩn kam ndɔt lon ho ye. 25Na kari na a dai yon kɨ kõ ngãibe kamtã, deg kɨ kaglot'n ɗan tɔ a mbetɨna. 26Tit'n nya ɗan nya kaglot lo Noe, titbe tɔ la a ɗan nya kaglot lo Ngon de ye. 27Deg ndɨ san nya, ndɨ ãin, ndɨ taan na, ndɨ adɨn ngandg ɗanɓe mbã ndɔt'n Noe and kam toot kɨbo, ad man mbɔkɨ ɗe tɔl deg tube. 28A i titbe tɔ tit'n ɗan nya kaglot lo Lot, deg ndɨ san nya, ndɨ ãin, ndɨ ndugon nya, ndɨ ɗawɨn nya, ndɨ duwɨn nya kam ndɔɔgt, ndɨ ɗan kujg, 29na ndɔt'n Lot tee ɓebo Sodomt kɔ ye, horr kɨ kõ giling giling kɨ supɨr tuson ko dõ dɔrãt tɔlɨn deg tube. 30Ndɔ'n Ngon de a tee hɔi a ne, nyag'n ɗan nya kaglot'n non ye, a ɗan nya ɓaitɔ. 31Ndɔt'n non de'n ndɨ dɔ kujt, na nyag loa ton kam kujt a ne, ot ɗisɨ kand kam kujt lon kɨta kun nya mad. Titbe tɔ de'n i kam ndɔɔt a ne, ot kad tel kɨ ɓe. 32I gan kamsɨ dɔ nẽ Lot't. 33Dekɨɗen'n sa kɨ n'aj ron a ne, a laa kɔ, na dekɨɗen'n la ron kɔ a ne, a ngaha gog. 34M'ndɨ m'elsɨ: Kam ndɔt'n non deg joo kɨ ton tɨrat kɨɗa, a unɨn de kɨɗa, na a nyan kɨmad. 35Dekɨdẽg joo ɗa urrɨn nya natlot kɨkɨɗa a ne, a unɨn kɨɗa, na a nyan kɨmad. 36Deg joo a ndɨn kam ndɔɔt kɨkɨɗa a ne, a unɨn kɨɗa, na a nyan kɨmad. 37Ngéndoog loa ndɨjena anan: Bɨraɓe nya 'nten a ɗa nya lo kɨɗat a? Jeju turd an: Lon nĩn tot a ne, nõbe la malg a kawɨn na kɨtit ho ye.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luk 17: MlL
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
