JÃ 3
3
Jeju dan na ta kɨ Nikodem
(Oo Mat 18:3; Gal 6:15; 2 Kor 5:17)
1De mad i nõ ku Parisɨgt, tɔa i Nikodem, i kɨkɨɗa ku kɨbogt lo Juipg. 2De'n non ɗe ro Jejut ndɔ ela an: Rabi, ad i ngeem, kɨ ger kad ĩ ngendoodeg kɨ ɓai kokɨro Luwaht, kɨta de mad kɨ asɨ ɗa nyakɔjg kɨ yaya'n i ndɨ i ɗa nõ goto, na Luwah i nat sia tã. 3Jeju tura an: Rota, rota la m'ndɨ m'eli nõ; ĩla oojɨn de kooj kɨ kij al a ne, a asɨ ko kõɓe lo Luwah al. 4Nikodem ela an: titbãi a oojɨn de gog lon telɨn ngatɔg a? Asɨ kad and kam kont gog kad ooja kooj kɨ kõ joo'oo? 5Jeju tura an: Rota, rota la m'ndɨ m'eli nõ: Ĩla oojɨn de kam mant kɨ kam ndilt al a ne, a asɨ kand kam kõɓet lo Luwah al. 6De'n de ooja i dãro, na de'n oojɨna kam tɔg Ndilt kɨkunjɗang i Ndil. 7Ot kad ta'n m'eli m'an: A oojsɨn ko kɨ dõ nõ yai. 8Nel ndɨ la kɨ lot'n ge, i ndɨ oo kaa, na i ger lon ɓait ke lon ndɨ awt nõ al, titbe ho la i kooj de'n oojɨna kam tɔg Ndilt kɨkunjɗang ye. 9Nikodem ela an: Nya 'nten a i root e? 10Jeju tura an: Ĩ ngendoo Israel ye la i ger nyag 'nten al yo? 11Rota, rota la m'ndɨ m'eli ye; kɨ ndɨ kɨ j'elta nyag'n kɨ ger, kɨ ndɨ kɨ manaj dɔ nyagt kɨ j'oo kɨ kumj, na be kaa ne, i ndig taan najkɨma loj al. 12Ĩla m'elsɨ ta dɔ nyagt kɨ ndɨ ɗan nya dɔningt la na adɨn kamsɨ taa al ye, titbãi a kadmɨn kamsɨ ĩla m'elsɨ ta dɔ nyagt'n a ɗan nya dɔrãt a? 13Kɨtɔ de mad kɨ aw dɔrãt goto, na Ngon de kɨ ɗisɨ ko kɨ dɔrãt tã. 14Tit'n maɗi dɨlalot Moij dɔ li ningakasɨ ta kagt unan kɨ dõ ye, titbe ho la a dɔn ne Ngon de dɔ kagt unɨn na ne kɨ dɔ ho ye, 15kad dekɨɗen ada kamɨn a ne, kɨ ngah kumkajir kɨ mbãkɨnõt. 16Kɨtɔ Luwah tar deg kɨ dɔningt kɨ tar kɨ tɔitakɔl mbã ad ngonɨn kɨ kooj kɨɗabe kad dekɨɗen ada kamɨn a ne kɨ nuj kɔ al, na kɨ ngah kumkajir kɨ mbãkɨnõt. 17Kɨtɔ Luwah la Ngonɨn dɔningt kɨtakad'n gangɨnta dɔ degt kɨ dɔningt al, na kɨtakad deg kɨ dɔningt ngahn kaj kɨtakula. 18De'n ndɨ adkamɨn Ngon a ne Luwah gangta dɔat al bat, na de'n ndɨ ada kamɨn al a ne, Luwah gangta dɔat woi, kɨta adkamɨn Ngon Luwah kɨ kooj kɨɗabe al. 19Takɨgang la ten: Kunj ɗe dɔningt ne, na deg ndigɨn til tɔi kunj kɨta kɨlaɗad i kɨmajal. 20De'n ndɨ ɗa majal a ne, ndɨ ɔsɨta kunj, ndɨ ɗe ro kunjt al, na beta kunj kɨja kɨlaɗang kɨ tɨga wang ta kum degt. 21De'n ndɨ ɗa kɨgo rotat a ne, ndɨ ɗe ro kunjt kɨtakad kunj tee kɨlaɗang kɨgo ndigt lo Luwah kɨ tɨga wang ta kum degt.
Jã ngeɗa deg baptem manaj dɔ Jejut ɓaitɔ
(Oo Jã 1:6-12,19-34; Mrk 16:15-16)
22Go nyagt 'nten, Jeju aw dɔning Judet, nat kɨ ngéndoog lon. Ndit nu, na ɗa ɗa deg baptem. 23Jã kaa ne, ɗa ɗa deg baptem lot kɨ tɔa i A'n non, nderbe kɨ Salim, kɨta man i ngãi nõbe; deg ɗent kad Jã ɗad baptem. 24Kaglot'n non hɔn Jã dangait al ɓaitɔ. 25Na ngéndoog lo Jã majɨn na ta kɨ Juip mad dɔ kar ro dɔ nya kɨyerrt. 26Ngéndoog lo Jã awɨn ro Jãt elɨna anan: Rabi, de'n ndɨ sei maɗi gid bah Jurdẽt, de ka'n i mãanaj nõ ye, oo, ɗa ɗa deg baptem, na deg ndɨ awɨn roat.
27Jã turd ta an: De mad asɨ ngah nya mad kɨ dɔn al na ĩla Luwah ada tã. 28Ĩn kɨɓeg oon dɔ kɨ mbisɨ, m'an mĩ Krist al, na mĩ de'n Luwah lam nõat kad kɨ m'ɗa goɗob loa tã. 29De'n taa dekɨdẽ kij la i ngaw dekɨdẽ ye, na madkɨɗaa'n ndɨ kadat i ngaw dekɨdẽ al, na roa ndɨ nela ngãi lon ndɨ oo dɔ ndi ngetaa dekɨdẽkij. Lom i titbe ho, mĩ tit madkɨɗa ngetaa dekɨdẽkij be, ad rom nelɨm kɨdumbit. 30Maj kad tɔa ko ngãi kɨtɔi, na kɨ lom tel kɨ ber.
Jeju Krist Ngeɗisɨ ko kɨ dɔrãt
31De'n ɗisɨ ko dɔrãt i dɔ nyagt tube; na de'n i kɨ dɔningt la i kɨ lo dɔning, ndɨ elta nyag kɨ dɔningt tube; 32ndɨ manaj dɔ nyagt'n oo kɨ kumɨn, kɨ nyag'n oo dɔ kɨ mbin, na de kɨ oo najkɨma loa goto. 33Na de'n oo najkɨma loa a ne, so go najkɨmat kad Luwah el rota. 34De'n Luwah laa ye, ndɨ elta kɨ ta Luwaht, kɨta Luwah ɓaakot kɨ ndilɨn. 35Bɔw tar ngonɨn, ad la nyag tube jiat. 36De'n ndɨ adkamɨn Ngon a ne, ngah kumkajir kɨ mbãkɨnõt, na de'n adkamɨn Ngon al a ne, a ngah kumkajir al bat, na wong lo Luwah i dɔat.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JÃ 3: MlL
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
