JÃ 4
4
Jeju kɨ dekɨdẽ kɨ Samarit
(Oo Eja 55:1-3; Jã 7:37-39; Tnk 22:17)
1Parisɨg oon hoi Jeju kad aw kɨ ngéndoog ngãi ho, ɗa deg baptem tɔi kɨ lo Jã ngeɗa deg baptem ho. 2Na rota, i Jeju hã ɗa deg baptem al, na ngéndoog loa la ɗan deg baptem ye. 3Lon Jeju oo dɔ takel Parisɨg titbe ye, ɓai dɔning Judet, tel aw Galilet gog. 4Na kad aw tee Galilet, sumba kad ndah dɔning Samari gang. 5Aw tee ɓe madt kɨ dɔning Samarit kɨ tɔa i Sikar, nderbe kɨ kad ndɔɔt'n Jakob ad ngonɨn Jojep. 6Nõbe bulo man lo Jojep ɗa tit nõ maɗi nu, kɔr ndia asɨ Jeju nakɨ, ad ndɨ ber ta bulo mant'n non, kɨ kàd kɨ ɗa dan ɓet ad i midi.
7Dekɨdẽ mad kɨ Samarit ɗe ga mant, na Jeju ela an: Adɨm mant m'ãi.
8Kaglot'n non, ngéndoog loa awɨn kam ɓet kɨ'n ndugon nyasa. 9Dekɨdẽ'n non el Jeju an: Ĩ Juip ale? Ye titbãi hã i kɔm man kãi mĩ'n mĩ de kɨ Samarit a?
Dekɨdẽ'n non elta titbe kɨta Juipg hɔn nooj kɨ deg kɨ Samarit dɔ nyat mad al. 10Jeju tura an: Neni i ger kadkari lo Luwah, na i ger de'n ɗa kɔɔi man a ne, ni ĩla a i ndɨjea man kãi ye, na ĩ a adi man kumkajir.
11Dekɨdẽ ela an: Bɨraɓe, kini goto jiit, kamla bulo wo kɨɓing, ye titbãi a i gan man kumkajir'n hã i ɗa i eltaa nõ a? 12Ĩ ye, ĩ kɨbo tɔi kaaj Jakob'n adj bulo man'n ɗan, ĩ kɨɓe kɨ dɔn ãi mana kɨ nganɨn kɨ ɓut nyakulg lon nõ yo?
13Jeju tura an: Dekɨɗen a ãi man bulo'n ɗan a ne, kɨnda a õa gog tɔ. 14Na dekɨɗen a ãi man'n m'a m'ada a ne, kɨnda a õa gog al bat, na man'n m'a m'ada a tel man kɨ ɓa kamat tit mankɨɓa nũ bulbul be, na a ada kumkajir kɨ mbãkɨnõt.
15Dekɨdẽ el an: Bɨraɓe adɨm man'n i ndɨ eltaa nõ kad kɨnda õm gog al, kad m'tel m'ɗe m'ga man al ta.
16Jeju ela an: Aw i kun ngawi, na i tel i ɗe so.
17Dekɨdẽ tura an: Ngawɨm goto.
Na Jeju ela an: Elta kɨ rota la an: Ngawi goto ye; 18Kɨtɔ i taa ngawg kete asɨ mi, na dekɨdɨngã'n i ndɨ sia tajigla ye, i ngawi al, ad i ta kɨ rota la el ye.
19Taa ne, dekɨdẽ ela an: Bɨraɓe, m'ger, ĩ ngekelta kɨ ta Luwaht. 20Kaaj Samariag ɔsɨn dɔd nõ Luwaht dɔ mbalt'n ɗan, na ĩn Juipg elɨn anan: Lon sumba kad deg ɔsɨn dɔd nõ Luwaht tit i Jerusalem.
21Jeju tura an: Dekɨdẽ oo dɔ ta lom maj. Kaglo mad a ɗe nõ, a ɔsɨn dɔd ber nõ Luwaht dɔ mbalbot'n ɗan, ke Jerusalemt al. 22Ĩn Samariag i gerɨn nya'n i ndɨ ɔsɨn dɔsɨ ber nõat nõ al, na jĩ Juipg taa ne, kɨ ger nya'n kɨ ndɨ j'ɔsɨ dɔj ber nõat nõ. Kɨtɔ ngekaj deg a tee ko kɨ girr Juipgt. 23Na kaglo ndɨ ɗe nõ, tajigla ɗe woi, i kaglo'n, ngékɔsɨdɔd ber nõ Luwaht kɨ Bɔw a ɔsɨn dɔd ber kam Ndilt, kɨ kam rotat, kɨta ngékɔsɨdɔdber nõ Luwaht kɨ jeje titbe, nõ la Bɔw ndɨ sahd kad ɔsɨn dɔd ber nõat ye. 24Luwah i Ndil, ad maj kad ngékɔsɨdɔdber nõat, kɨ ɔsɨn dɔd ber nõat kam Ndilt kɨ kam rotat.
25Dekɨdẽ ela an: M'ger kad Mesi: Ad i Krist a ɗe, na lon a ɗe woi a ne, a ɔrrj girr nyag tube.
26Jeju tura an: mĩ'n m'ɗa m'eli ta la mĩ Krist ye.
27Kaglot'n non ngéndoog lo Jeju tel ɗen, na oona ɗa elta kɨ dekɨdẽ ad ta yad. Na de mad kɨ ndɨjea ta an: ɗi i ge roat a? A ke kɨtɔɗi i ɗa elta kɨ dekɨdẽ'n ɗan goto?
28Taa ne, dekɨdẽ nya ɓir man lon nõbe, na tel aw kam ɓet el deg an: 29I ɗen oon de mad ɗa ta bulo mant nõ, dam kɨlag tube'n m'ɗa ye, de'n non i Krist ale?
30Tala deg kɨjan butbut kam ɓet kɨ tɨga awɨn ro Jejut. 31Kaglot'n non, ngéndoog lo Jeju ndeena kad sanya, elɨna anan: I sanya ngon sĩ.
32Na Jeju turd an: M'aw kɨ nyasa mad la, kad m'sa, na i gerɨn al.
33Go tat 'nten, ngéndoog loa ndɨjen na ta kɨnadt anan: De mad ɗe kɨ nyasa ada a? 34Jeju eld an nyasam laten: Kɨ m'ɗago ndigt lo ngelam, kɨ m'tɔl kon kɨla loa tɔ. 35I ndɨ anan nãi nah sɔɔ kamla ɓal a ndɔ ale? Oon maj m'ndɨ m'elsɨ, unɨn kumsɨ kɨ dõ oon ne ndɔɔg. Nyako tut asɨ ja woi. 36Ngeja nyako ndɨ taa nyabajin, na ndɨ mbõ nyako kɨta kumkajir kɨ mbãkɨnõt, titbe ngeduw nyako kɨ ngeja nyako ndɨ ɗan ronel nat. 37Kɨtɔ ta'n terrta el ten ye, i rota: De mad ɗa duw nya, na kɨmad ɗa ja. 38M'lasɨ mad i jan nyako kam ndɔɔt kɨ i ɗan kɨla tit ɔrɨn al, madg la ɔrɨn kamt kete ye, na ĩn i ɓan maj kɨ kand kɔrd. 39Samariag ngãibe kɨ kam ɓet'n non adɨn kamd Jeju kɨta ta'n dekɨdẽ eld an: Dam nya ɗam tube. 40Titbe lon Samariag ɗen ro Jejut ye, ndɨjena kad ndɨ sed, na Jeju ndɨ kam ɓet'n non ndɔ joo. 41Samari madg ngãibe adɨn kamd Jeju kɨta tag'n Jeju ĩ kɨɓe eld. 42Na tel elɨn dekɨdẽ'n non anan: Tajigla jad kamj Jeju kɨta ta'n i elj nõ al, na kɨta jĩ kɨɓe j'oo dɔ ta loa kɨ mbij, na kɨ ger kad ĩ ngekaj deg kɨ dɔningt jeje.
Jeju yoot ngon kooj ngekɨla kɨbo lo ngékõɓeg
43Go ndɔt kɨ joo'n ɗa Samarit, Jeju ɓai nõbe aw dɔning Galilet; 44kɨta Jeju kɨ dɔn manaj kete woi an: Ngekelta kɨ ta Luwaht a ngah kɔsɨgon ɓekoojɨnt al.
45Lon aw tee Galilet ye, deg hɔna kɨ rodt maj maj, kɨta ĩn kaa ne awɨn lo ɗa nah Pakɨt Jerusalem; ad oon nyag tube'n Jeju ɗat nõ.
46Jeju tel aw Kanat dɔning Galilet, ad i lot'n mbel mant ad tel kasɨnduu; de mad ndɨ ɓebo Kapernawmt nõ, i ngeɗakɨla lo ngekõɓeg, ngona kɨdɨngã i mõi. 47Lon oo hoi Jeju kad ɓai dɔning Judet aw dɔning Galilet ye, aw roat, ndɨjea kɨ aw Kapernawmt kɨ yoot ngonɨn kɨdɨngã'n to ta koit. 48Jeju ela an: Asɨn kad kamsɨ Luwah al; ĩla oon nyakɔjg kɨ nya madg kɨ yaya al.
49Ngekɨla lo ngékõɓeg tura an: Bɨraɓe aw kam kujt lom kete kamtã la kad ngonɨm oi.
50Jeju ela an: Aw ɓe loi ngoni yoot woi. Ngekɨla lo ngékõɓeg adkamɨn ta'n Jeju ela nõ, ad tel ndɨ aw ɓe. 51I dɔ ɗobt ɓaitɔ la ngan ngékɨlag loa lan ta, na elɨna anan: Ngoni yoot woi. 52Na ndɨjed dɔkàd kɨ bãi ro ngonɨn ton soot a? La turɨna anan: Tagbe lokɨsɔle la, dɔga tɔrrɨn jĩn roat ye. 53Nõbe la, bɔw ngon gerɨn kad i dɔkàd'n Jeju elɨn ta an: Ngoni yoot woi. Na ĩ kɨ ngékɨɓe lon adɨn kamd Jeju. 54'Nten la, i nyakɔj kɨ ya kõjoo'n Jeju ɗa lon ɓain dɔning Judet aw dɔning Galilet ye.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
JÃ 4: MlL
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
