मर्कूस 9
9
1येशू कह्टीगैल, “मै जाट्टीसे टुँहन कहटुँ, अठे रहल कौनो-कौनो मनै परमेश्वरक राज्यह महान शक्तिम नैद्याखट्सम नैमुनेहुइट।”
येशूक रूप परिवर्तन
मत्ती १७:१-१३; लूका ९:२८-३६
2वाकर छ दिन पाछ पत्रुस, याकूब, ओ यूहन्नह आपनसँग लेक येशू पर्वत्वम गैल। उहाँ और कौनोजन फे नैरलह। चेलावँ हेर्टीहेर्टी येशूक रूप बद्ललन।#२ पत्र १:१७-१८ 3ओ उहाँक लुगा असिन चम्कना उज्जर हुइलन कि यी संसारम कुई फे धोक ओसिन झरझर उज्जर बनाइ नैस्याकट्। 4उहब्याला एलिया ओ मोशा, देखपर्ल। हुँक्र येशूसे बात बट्वाइटलह।
5तब पत्रुस प्वाक्क बोल्ल, “गुरुजी, हम्र यिहाँ रलक बरा मजा हुइल्। यिहाँ हम्र तीनठो झोँप्री बनाई, एकठो अप्नक लाग, एकठो मोशक लाग, ओ एकठो एलियक लाग।” 6ऊ असिक कल, काकरकि ऊ ओ हुँकहार सङ्घरेन एकदम डरारलह, ओ और का बात ब्वालपर्ना हो कैक हुँकहीन थाहँ नैहुइलन।
7 #
मत्ती ३:१७; मर्क १:११; लूक ३:२२ तब बद्री आक उहाँहुँकन छोप्लन ओ बद्रीमसे असिन आवाज आइल, “यी म्वार प्रिय छावा हुइट। टुह्र हिँकहार कहल मनहो।”#९:७ बद्री: यी पदम रहलअस पुरान नियमम फे, बद्री परमेश्वरक उपस्थिति रहल संकेत मानजैठा (प्रस्थान १३:२१)।
8यी सुन्टीकि हुँक्र यिहँरउहँर हेर्ल, तर येशूह केल देख्ल। मोशा, ओ एलिया ओठे नैरलह।
9उहाँहुँक्र पर्वत्वमसे ओल्हाइबेर, येशू आपन चेलन आज्ञा देल, “यी घटनक विषयम किहुसे जिन बटोइहो। मै मनैयक छावा, मुक फेदोस्र जिएम, त बट्वाइ सेक्बो।” 10उहओर्से हुँक्र उ घटनक बात मनम ढर्लरलह। तर “मुक फेदोस्र जिना कलक का हो” कैक हुँक्र अप्न-अप्न बट्वाइलग्ल।
11दोस्र उहाँह पुछ्ल, “ख्रीष्टसे पैल्ह एलिया फेदोस्र संसारम आइपर्ठा कैक शास्त्रीहुँक्र काजे कठ?”#मला ४:५; मत्ती ११:१४
12येशू हुँकन जवाफ देल, “हो, ‘ख्रीष्ट अइनासे आघ, सब चिज ठीकठाक पारक लाग, एलिया अवस्य आइपर्ठा,’ कैक परमेश्वर कल। तर फे मै मनैयक छावा, दुःखकष्ट भ्वागपर्ना ओ हेल्हा कर्वापैना कैक परमेश्वरक वचनम काजे लिखल बा? 13मै टुँहन कहटुँ एलिया फेदोस्र आरलह।#९:१३ जब येशू “एलिया फेदोस्र आरलह” कल, तब उहाँक मतलब यी रलहन “पैल्हहेँ आस्याकल बप्तिस्मा देहुइया यूहन्ना अगमवक्ता एलियाअस रलह।” ऊ एलिया अघट्टेक मनै रलह। मनैन जसहेँक मन लग्लन, हुँकहीनसे ओसहेँक दुर्व्यवहार कर्ल। हुँकहार विषयम धर्मशास्त्रम लिखल अनुसार ऊ करावापैल।”
भूत्वा लागल लौँरा चोखैलक
मत्ती १७:१४-२३; लूका ९:३७-४३
14येशू ओ तीनेउ चेलावँ पर्वत्वमसे घुम्क आइबेर, और चेलावँन बहुत मनै घेर्लरलह, ओ शास्त्रीहुँक्र हुँकनसे वादविवाद करटलह। 15येशूह आइट् देख्टीकि, सबजन अचम्म मन्ल ओ दौरटी जाक उहाँह अभिभावदन कर्ल।
16येशू पुछ्ल, “यी वादविवाद केँह्का बारेम हो?”
17तब मनैन्हक बगालमसे एकठो मनैया कहल, “गुरु, म्वार छावह चोखादी कैक अप्नकठे आनरख्नु। यहीह भूत्वा लग्लकओर्से, ब्वाल नैस्याकट्। 18जब-जब भूत्वा यहीह पक्रठस, तब-तब भूइँयम झट्कठस, दोस्र मुहमसे फेस्कुर आजैठस ओ दाँत पिस्क ठेट्कार होजैठा। मै अप्नक चेलावँन म्वार छावह चोखादेओ कैक बिन्ती कर्नु, तर हुँक्र नैसेक्ल।”
19तब येशू हुँकन कल, “टुह्र कस्सिन मनै हुइटो, एक्को विश्वास नैकर्टो! मै टुन्हक व्यवहार देख्क हुक्क होगैनु। मै कहाँसम सहुँ? उ लौँरह यिहाँ आनो।”
20उ लौँरह येशूकठे अन्ल। येशूह देख्टीकि, भूत्वा लौँरह झट्कलस, त उ लौँरा गिर्क झरफर-झरफर करलागल, ओ मुहमसे फेस्कुर आगैलस।
21येशू उ लौँरक बाबह कल, “कैह्यासे यहीह असिन हुइलस?”
ऊ जवाफ देल, “छोटीहमसे, 22भूत्वा यहीह मुवाइक लाग धेर फ्यारा, कबु पानीम, कबु आगीम, गिरासेक्लस। यदि अप्न करसेक्ठी कलसे, दया कैक हमन मद्दत करी।”
23येशू हुँकहीन कल, “अप्न सेक्ठी कलसे! का कह खोज्ली? विश्वास करुइयन्हक लाग सब काम हुइसेक्ठा।”
24तबहेँ उ लौँरक बाबा जोरसे कल, “म्वार विश्वास बा, तर कमजोर बा! बलगर बनादी!”
25तब मनैन्हक भीड आपनओर दौरटी आइट् देख्क, येशू भूत्वह असिक हप्कैल, “बहिर ओ लाट बनुइया भूत्वा! मै टोहीह आज्ञा देहटुँ, याकरमसे निकर्, ओ आबठेसे याकरम कबु जिन पैँठस।”
26तब भूत्वा चिल्लाइल, ओ उ लौँरह कर्रसे अइँठ्क वाकरमसे निक्रल, त उ लौँरा मुवलअस होगैल्। ओठे रहल मनै “लौँरा मुगैल्,” फे कल। 27तर येशू वाकर हाँठ पकर्क उठाइलग्ल त, उ लौँरा उठ्क ठह्र्यागैल्।
28तबदोस्र येशू घरम गैल त, चेलावँ उहाँह गुपचुपम पुछ्ल, “हम्र काकर भूत्वह निक्राइ नैसेक्ली?”
29येशू हुँकन जवाफ देल, “असिन भूत्वह [ब्रत रह्क] प्रार्थना कर्लसे केल निक्राइ सेक्जैठा।”
येशू अप्न मुना बारेम द्वासर फ्यारा बट्वइलक
मत्ती १७:२२-२३; लूका ९:४३-४५
30तबदोस्र उहाँहुँक्र उ ठाउँ छोर्क गालीलओर्से गैल। उहाँहुँकन्हक यात्रक बात कुई थाहाँ नैपाए कना येशूक चाहना रलहन, 31काकरकि येशू आपन चेलन सिखाइटलह, “मै मनैयक छावा, ध्वाखा पाक दुष्ट मनैन्हक हाँठम परम। हुँक्र महीह मुवहीँ, ओ मुलक तीसर दिनम फेदोस्र जिजैम।” 32तर चेलावँ येशूक कहल बात नैबुझ्ल, ओ उ बातक बारेम हुँक्र पुछ्ना आँट फे नैकर्ल।
सबसे बरा के हो?
मत्ती १८:१-५; लूका ९:४६-४८
33उहाँहुँक्र कफर्नहुम सहरम पुग्ल त, घरम रहबेर, येशू आपन चेलन पुछ्ल, “आइबेर डगरिम का वादविवाद करटलहो?” 34तर हुँक्र कुछु जवाफ नैदेल, काकरकि हुँक्र “मै सबसे बरा हुइटुँ” कह्टी अप्न-अप्न वादविवाद करटलह।#लूक २२:२४
35तब येशू बैठ्क बाह्र जन चेलावँन बलैल ओ हुँकन कल, “परमेश्वरक नजरम टुह्रमध्येम जे सबसे बरा हुइ चहठा कलसे, ऊ सबसे छुटी होक सक्कुजन्हक सेवाचाक्री कर।”#मत्ती २०:२६-२७; २३:११; मर्क १०:४३-४४; लूक २२:२६
36तब येशू हुँकन्हक आघ एकठो लर्का आन्क क्वारम लेल ओ आपन चेलन कल, 37“म्वार कहल मान्क, असिन लर्कन स्वीकार करुइया महीह स्वीकार कर्ठा। महीह स्वीकार करुइया महीह पठुइया परमेश्वरह स्वीकार कर्ठा।”#मत्ती १०:४०; लूक १०:१६; यूह १३:२०
येशू आपन पक्षम लगुइया ओ विरोध करुइयक बारेम बट्वइलक
लूका ९:४९-५०
38यूहन्ना येशूह कल, “गुरुजी, हम्र एकठो मनैयह देख्ली। ऊ अप्नक नाउँम भूत लागल मनैन चोखाइटह। हम्र ओहीह ओसिक कर नैदेली, काकरकि ऊ हमारसँग लग्ना मनैया नैहो।”
39तर येशू कल, “ओहीह जिन रोको, काकरकि जे म्वार नाउँम परमेश्वरक शक्तिले अचम्मक काम कर्ठा, ऊ म्वार बारेम दुष्ट बात नैबट्वाई। 40काकरकि जे हमार विरोधम नैहो, ऊ हमार पक्षक हो।#मत्ती १२:३०; लूक ११:२३ 41मै जाट्टीसे टुँहन कहटुँ, टुह्र ख्रीष्टम विश्वास करुइयन हुइटो कैक टुँहन एक गिलास पानी केल हुइलसे फे पियक लाग देहुइया अवस्य फे परमेश्वरसे इनाम पैठ।”#मत्ती १०:४२
बाधा देहुइयन चेताउनी
मत्ती १८:६-९; लूका १७:१-२
42म्वारम विश्वास करुइया यी छोटी लर्कामध्ये किहुह विश्वाससे जे बहकाई, वाकर घ्याँचम चक्या झुलाक बरा समुद्रम फाँकदेनासे त, परमेश्वरसे पैना दण्ड झन् डरलग्टिक हुहिँस। 43यदि टुँहार हाँठ पाप कर लगैठा कलसे, ओहीह काट्क फाँकदेओ! काकरकि दुनु हाँठ लेक नरकक् नैबुट्ना आगीम फँक्वापाइलसे त, एक्कठो हाँठ लेक स्वर्गम जैना धेर असल हो। 44[नरकम ना त कीरा मुट, ना त आगी बुटट्]#मत्ती ५:३० 45यदि टुँहार ग्वारा टुँहीन पाप कर लगैठा कलसे, ओहीह काट्क फाँकदेओ! काकरकि दुनु ग्वारा लेक नरकम फँक्वापाइलसे त, एक्कठो ग्वारा लेक स्वर्गम जैना असल हो। 46[नरकम ना त कीरा मुट, ना त आगी बुटट्] 47#मत्ती ५:२९यदि टुँहार आँख टुँहीन पाप कर लगैठा कलसे, ओहीह झिँक्क फाँकदेओ! काकरकि दुनु आँख लेक नरकम फँक्वापाइलसे त, एक्कठो आँख लेक परमेश्वरक राज्यम जैना धेर असल हो।#९:४७ येशू हम्र आपन हाँठ या ग्वारा काटीडारपर्ना, या आँख झिँकीडारपर्ना बात नैबट्वाइठुइट। अनुशासनम रलसे, पापम नैफँस्जाइट् कैक येशू कहट। 48नरकम ना त कीरा मुट, ना त आगी बुटट्।#यशै ६६:२४ 49बलिदानह न्वानले च्वाखा पारअस, सब मनै दुःखकष्टक आगीले खारजैनेबाट।#९:४९ बलिदानह न्वानले च्वाखा पारअस पुरान नियमक समयम यहूदीहुँक्र बलिदानम न्वान छिट्कँट्।
50“न्वान मजा वस्तु हो, तर न्वानक स्वाद हेराइल कलसे फेदोस्र केहीँले नोनार बनैना? एक-आपसम मेलमिलापम रहक लाग, टुन्हकम न्वानक गुण पलिरह।”#मत्ती ५:१३; लूक १४:३४-३५
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
मर्कूस 9: thl
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
