मर्कूस 10
10
छोडपत्र
मत्ती १९:१-१२
1येशू कफर्नहुम सहरसे यहूदिया क्षेत्रम आक यर्दन लद्यक उपार गैल। तब फेदोस्र बगालक बगाल मनै जम्मा हुइल, ओ सड्डकअस येशू हुँकन सिखाइलग्ल।
2फरिसीहुँक्र येशूकठे आक कुछु बातम चुकाइक लाग उहाँह पुछ्ल, “का कौनो मनै आपन गोसिन्या छोर्ना ठीक हो?”
3येशू उल्ट हुँकन पुछ्ल, “यी बारेम मोशा टुँहन का नियम देरख्ल?”
4हुँक्र कल, “छोडपत्र कागत लिख्क मनै आपन गोसिन्यह छ्वार सेकी कैक मोशा अनुमति देरख्ल।”#व्य २४:१-४; मत्ती ५:३१
5येशू हुँकन कल, “टुन्हक मन कठोर रलक कारण, मोशा टुँहन यी आज्ञा देरख्ल। 6तर सृष्टिक सुरुम परमेश्वर मनैन पुरुष ओ महिलक रूपम बनैलह।#उत १:२७; ५:२ 7उहओर्से त मनैया आपन डाई-बाबह छोर्क आपन गोसिन्यसे मिल्लरठा,#उत २:२४ 8हुँक्र दुनु जन मिल्क एक शरीर हुइठ। आब हुँक्र दुइ जन नैहुइट, तर एक शरीर हुइट। 9उहओर्से परमेश्वरक मिलाइल जोह्रेह कुई फे अल्गाइ नैपरट्।”
10पाछ येशू ओ चेलावँ घर घुम्ल त, चेलावँ यी विषयम उहाँह पुछ्ल। 11येशू हुँकन कल, “आपन गोसिन्यह छोर्क और गोसिन्या लिहुइया पैल्हक गोसिन्यह ध्वाखा देठ, उ काम त व्यभिचार हो।#मत्ती ५:३२; १ कोर ७:१०-११ 12ओसहेँक आपन गोस्या छोर्क और गोस्या लिहुइया फे व्यभिचार कर्ठ।”#१०:१२ मर्कूस १०:४ म रहल फुटनोट हेरी।
लर्कन आशिष देलक
मत्ती १९:१३-१५; लूका १८:१५-१७
13येशू हाँठ ढै-ढै आशिष देदेहीँ कना विचारले, मनै आपन लर्कन उहाँकठे आनटलह। तब चेलावँ ऊ मनैन हप्कैल। 14यी देख्क येशू आपन चेलनसे रिसैटी कल, “लर्कन म्वारठे आइदेओ, हुँकन जिन रोको, काकरकि परमेश्वरक राज्य अस्त मनैन्हक लाग हो। 15जाट्टीसे मै टुँहन कहटुँ, जे एकठो लर्कक्अस परमेश्वरक शासन स्वीकार नैकरी, ऊ परमेश्वरक राज्यम जाइ नैपाई।”#मत्ती १८:३ 16येशू उ लर्कन क्वारम लेल ओ एक-एक जन्हक कपारिम हाँठ ढै-ढै आशिष देल।
धनी मनैया ओ स्वर्गक राज्य
मत्ती १९:१६-३०; लूका १८:१८-३०
17येशू ओठेसे जाइलग्ल त, एकठो मनैया दगुर्टी आक उहाँक पाउ पर्टी कहल, “गुरु, अप्न असल बाटी। अनन्त जीवन पाइक लाग महीह का करपरी?”
18येशू ओहीह कल, “टुँ मैहेह काकर असल कहटो? परमेश्वर बाहेक कुई फे असल नैहो। 19परमेश्वरक आज्ञा त, टुँ जन्ठो, हत्या नैकर्ना, व्यभिचार नैकर्ना, चोरी नैकर्ना, झूट साक्षी नैबक्ना, नैठग्ना, ओ आपन डाई-बाबक आदर कर्ना।”#प्रस २०:१२-१६; व्य ५:१६-२०
20उ मनैया उहाँह कहल, “गुरुजी, यी सब आज्ञा त, मै छोटीहमसे मन्टिबाटुँ।”
21येशू ओहीह हेर्टी प्रेमसे कल, “टुँहीन आम्ही एक चिज करहीपर्ना बा। जाओ, आपन सब चिज बेँच्क गरीबन बाँट्देओ, ओ टुँ स्वर्गम धन पैबो। तब आक म्वार पाछ लागो।”
22यी सुन्क उ मनैया अन्धार मुह् लगाक चलगैल्। काकरकि ऊ आपनठे रहल धेर सम्पत्ति गुमाई नैचाहल।
23येशू चारिओर हेर्क आपन चेलन कल, “धनीय मनैन परमेश्वरक राज्यम जैना कर्रा परहीन।”
24यी सुन्क चेलावँ अचम्म मन्ल। तर येशू आम्ही कल, “हेरो लर्कौँ! धनसम्पत्तिम भरोसा कर्ना मनैन परमेश्वरक राज्यम जैना धेर कर्रा परहीन। 25धनी मनैन परमेश्वरक राज्यम जैनासे त बेनसे ऊँट्टोह सुइक नाखिमसे छिर्ना सजिलो हुहिँस।”
26हुँक्र आम्ही अचम्म मन्टी अप्न-अप्न कल, “ओसिन हो कलसे, के स्वर्ग जाइसेकी तो?”
27येशू हुँकन हेर्क कल, “मनैन्हक लाग यी बात सम्भव नैहो, तर परमेश्वरक लाग सब चिज सम्भव बा।”
28पत्रुस येशूह कहलग्ल, “हेरी, हम्र त सब चिज छोर्क अप्नक पाछ लागरली।”
29येशू कल, “मै जाट्टीसे कहटुँ, म्वार कहल मानक लाग ओ खुशीक खबर प्रचार करक लाग आपन दादुभैया, दिदीबहिन्या, डाई-बाबा, छाई-छावा, घरबार या जग्गाजमिन छोरुइया 30अवस्य इनाम पैहीँ। यी संसारम हुँक्र सतावट पैलसे फे, सय गुणा घरपरिवार ओ श्रीसम्पत्ति यिह जुनीम पैहीँ। अइना युगमजुन अनन्त जीवन पैहीँ। 31आब नामी-नामी धेर जन सबसे टर्का दर्जम रहहीँ। सबसे टर्का दर्जम रहुइयन सबसे नामी-नामी हुइहीँ।”#मत्ती २०:१६; लूक १३:३०
येशू आपन मृत्युक बारेम तीसर फ्यारा बट्वइलक
मत्ती २०:१७-१९; लूका १८:३१-३४
32उहाँहुँक्र यरूशलेम सहर जाइबेर, येशू आघ-आघ रलह। चेलावँ एक्कासी अक्कमक्क पर्ल, ओ पाछ लगुइयन डरैल। तब येशू बाह्र चेलावँन एकउहँर लैजाक आपनम परिअइना दुःखक बारेम बट्वाइभिर्ल। 33येशू कल, “हेरो, हम्र यरूशलेम जाइटी। उहाँ मै मनैयक छावा, ध्वाखा पाक मुख्य पूजारीन्हक ओ शास्त्रीन्हक हाँठम परम। हुँक्र महीह मृत्युदण्ड तोकहीँ ओ गैरयहूदीन्हक हाँठम सुम्पदेहहीँ। 34उ मनै महीह हिस्यैहीँ, थुकहीँ, कोर्रा लगैहीँ, ओ मुवैहीँ। तर तीसर दिनम मै फेदोस्र जिजैम।”
याकूब ओ यूहन्नक बिन्ती
मत्ती २०:२०-२८
35जब्दियक छावन, याकूब ओ यूहन्ना येशूकठे आक कल, “गुरु, हम्र बिन्ती करटी हमार इच्छा पूरा कैदी।”
36येशू हुँकन पुछ्ल, “मै टुन्हक का इच्छा पूरा कैदीऊँ?”
37हुँक्र उहाँह जवाफ देल, “अप्न महिमामय राजगद्दीम बैठ्बी त, हम्र दादुभाइ अप्नक दाहिन ओ बाउँ पाञ्जर बैठ पाई।”
38 #
लूक १२:५०
तर येशू हुँकन कल, “टुह्र का माङ्गटो उ बात टुह्र नैजन्टो। मै पियपर्ना दुःखक घुट्का का टुह्र पियसेक्बो? मै लिहपर्ना मृत्युक बप्तिस्मा का टुह्र लिहसेक्बो?”
39हुँक्र “सेक्बी” कैक जवाफ देल।
तब येशू हुँकन कल, “मै पियपर्ना दुःखक घुट्का टुँहन पियपरी, मै लिहपर्ना मृत्युक बप्तिस्मा टुँहन लिहपरी। 40तर म्वार दाहिन ओ बाउँ पाञ्जर बैठ देना म्वार अधिकारक बात नैहो। यी त ज्याकर-ज्याकर लाग तयार कैगिल् बा, हुँकन्हक लाग केल हो।”
41यी बात सुन्क और दश चेलावँ याकूब ओ यूहन्नसे रिसैल। 42तब येशू हुँकन सबजहन एक्कठे कराक कल, “टुँहन थाहाँ बा कि गैरयहूदी मनैन्हकम शासन चलुइयन मनमानी शासन चलैठ, ओ ठुलाठालीहुँक्रजुन हुँकन्हकम अधिकार जमैठ।#लूक २२:२५-२६ 43तर टुह्र ओसिन जिन हुइहो। टुह्रमध्ये जे सबसे बरा हुइखोजी, ऊ टुन्हक सेवाचाक्री कर।#मत्ती २३:११; मर्क ९:३५ 44ओ जे आघ सरखोजी, ऊ सबजन्हक कमारा बन। 45काकरकि मै मनैयक छावा, सेवा पाइक लाग नाही, तर सेवा कर, ओ और धेर जहन पापक दण्डसे छुट्कारा देहक लाग आपन प्राण देह आरनु।”
आन्धर भिखारी चोखैलक
मत्ती २०:२९-३४; लूका १८:३५-४३
46तबदोस्र उहाँहुँक्र यरीहो सहर पुग्ल। कुछ समय पाछ येशू आपन चेलन्हकसँग उ ठाउँ छोर्क जाइबेर, मनैन्हक बराभारी भीड उहाँहुँकन्हक पाछ लागल। तिमैक छावा बारतिमै, आन्धर भिखारी जुन डगरीक पञ्ज्र बैठल रह। 47जब नासरत सहरक येशू यिह डगर आइट कना सुनल, तब ऊ भिखारी जोरसे चिल्लाक कहलागल, “हे दाऊदक सन्तान, महीह दया करी!”
48तब ओहीह धेर जन “चूप लाग” कैक हप्कैल, तर ऊ झन् जोरसे चिल्लैटी कहल, “हे दाऊदक सन्तान, महीह दया करी!”
49येशू नेङ्ग्टी-नेङ्ग्टी, वाकर प्रार्थना सुन्क टक्कसे ठह्र्यैल ओ कल, “ओहीह बलाओ।” तब हुँक्र ओहीह “साँसा कर्, उठ्, येशू टोहीह बलाइट” कल। 50यी सुन्टीकि, ऊ आपन पिछौरी फाँकल ओ जुरुक्कसे उठ्क येशूकठे आइल।
51येशू ओहीह पुछ्ल, “टुँहीन का चाहल?”
ऊ कहल, “गुरुजी, मै देख्नाहा हुइ चाहटुँ।”
52येशू ओहीह कल, “टुँहार विश्वासले टुँ चोखारलो, आब जाओ।” तबहेँ ऊ देख्नाहा होगैल् ओ डगरीहमसे येशूक पाछ लाग्गैल्।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
मर्कूस 10: thl
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
