Matie Sɛbɛ 4
4
A JEEJU A SATÃ NA BƖƖR
(Mar 1.12-13, Lu 4.1-13)
1A ala ɩ̃ baar, a Naaŋmɩn Sɩɛ tɔw na a *Jeeju kpɛ nɩ a wɛkar pʋɔ a Satã na bɩɩr ʋ. 2Ɩ̃ a mɩnɛ ʋ na lũ a nʋɔr a bibie lɩjaayi, a kɔ̃ nyɔw ʋ na. 3A Bɩbɩɩrɛ wɩ na a ʋ sɛ ɩ̃ yel ʋ:
“A ala ɩ fʋ ɩ na a Naaŋmɩn Bie, yel a kubie na a ba lɩɛb ɩ a dɩb.” 4A Jeeju yel ʋ:
“A yelʼã a Naaŋmɩn Sɛbɛ pʋɔ:
‘Aa ɩ a dɩb tɛw na baa a nɩrɛ wa,
ɩ̃-cɛ a ƴɛrɩ̃sɩ a jaa na yire a Naaŋmɩn nʋɔr pʋɔ,
ala a nɩrɛ na baa nɩ.’ ”
5Ɩ̃ a Satã taw na a Jeeju cenʼɩ̃ a Jerujalɛm na ɩ a ba tẽ-son, ɩ̃ ɩ ʋ do ɩraa a Naaŋmɩn puor-yir kpɛ̃ɛ ju-sɔ̃w 6ɩ̃ ʋ yel ʋ:
“A ala ɩ fʋ ɩ na a Naaŋmɩn Bie, aw lo a tene, a-na-ɩ a yelʼã a Naaŋmɩn Sɛbɛ pʋɔ:
‘A Naaŋmɩn na kʋ na a nɩ-tʋnɩsɩ a ƴɛrɩ̃ a fʋ ɩnɛ,
a ba cɔw fʋ nɩ a ba nur a mɩnɛ fʋ kɔ̃ wa ŋme gbɛr wa.’ ”
7A Jeeju yel ʋ:
“A lɛ yelʼã a Naaŋmɩn Sɛbɛ pʋɔ:
‘Taa bɩɩrɛ a Nɩ-kpɛ̃ɛ na ɩ a fʋ Naaŋmɩn wa.’ ”
8A Satã lɛ taw na a Jeeju do nɩ a tã-kpɛ̃ɛ juu na miil ʋ a ten ten a jaa nɩ a ba yo-yifʋ yele 9ɩ̃ yel ʋ:
“A fʋ̃ʋ gburĩ a dume ɩ̃ puor ma, ɩ̃ na kʋ fʋ na a ana yele a jaa.” 10A Jeeju yel ʋ:
“Satã, cen be ɩ̃ cɛ ma! A-na-ɩ a yelʼã a Naaŋmɩn Sɛbɛ pʋɔ:
‘A Nɩ-kpɛ̃ɛ na ɩ a fʋ Naaŋmɩn, ʋlɔ fʋ na puoro,
ɩ̃ a ʋlɔ tʋn tɛw fʋ na mɩ tʋnɔ.’ ”
11A lɛ, a Satã bar ʋ na ɩ̃ a sɩ-tʋnɩsɩ wɩ sũono ʋ.
A JEEJU LƖƐB-CENFƲ A GALILE-TẼW PƲƆ
(Mar 1.14-15, Lu 4.14-15)
12A lɛ a *Jeeju na wõ a ba nyɔw a Jã ƴɔ̃w a kasu pʋɔ, ʋ lɛ lɩɛbʼã cen a Galile. 13A mɩnɛ ʋ na yi a Najarɛtɩ-tẽw, ʋ cenʼã na jɛ a Kapɛɛnam-tẽw na be a man nʋɔr, a Jabʋlɔ̃ nɩ a Nɛbtalɩ wɩɛr. 14A ta na a lɛ, a na ɩ a ƴɛr-hiere Ejayi ƴɛrɩ̃ na dãa yel:
15“A Jabʋlɔ̃ nɩ a Nɛbtalɩ wɛɛ
na be a man sɔɛ pʋʋr a Jʋrdɛ̃ man gaan,
a Galile ʋlɔ na ɩ a nɩ-bʋlsɩ tẽw,
16a bana nɩbɛ naa na dãa jɛ
a libe pʋɔ nyɛ na a cãa kpee;
a bala na mɩ dãa jɛ a kũu nʋɔr libe pʋɔ,
mɩ nyɛ na a cãa ʋ pur caarɩ̃ ba.”
17Wa nyɔw nɩ a daar ʋlɔ pʋɔ a Jeeju hiere na yele nɩ:
“Nyɩ́ lɩɛb a nyɩ yɛ̃, a-na-ɩ a saa juu fãw pɩɛlʼã.”
A JEEJU NA BƲƆL A JƖ̃-BƐRBƐ ANAAN
(Mar 1.16-20, Lu 5.1-11)
18A mɩnɛ a *Jeeju na lara a Galile man gbẽgbere, ʋ nyɛ na a yɛɛr ayi, a Sɩmɔ̃ ʋlɔ na mɩ dɩ a Pɩɛr nɩ a Ãdire, a ba bɛrɛ a jɩmɛ a manɩ̃ a-na-ɩ jɩ̃-nyɔɔrbɔ ba ɩ. 19A Jeeju yel ba:
“Nyɩ́ wa tuure ma, ɩ̃ ɩ̃ na lɩɛb nyɩ na a nyɩ na bʋɔrɔ a nɩbɛ kʋrɔ ma a jɩ̃-bɛrɛ kaarɩ̃.” 20A jie naan ba barʼã a ba jʋʋr ɩ̃ tuure ʋ.
21Ɩ̃ a lɛ ʋ na po a nii-sɔw, ʋ nyɛ na yɛɛr ayi go na ɩ a Jakɩ nɩ a Jã na ɩ a Jebede bi-dabsɩ, a ba be taa nɩ a ba sãa a gbor pʋɔ cɔɔrɔ a ba jʋʋr, ʋ mɩ bʋɔl ba. 22Ɩ̃ a jie naan ba barʼã a ba sãa nɩ a gbor ɩ̃ tuure ʋ.
A JEEJU NA KPAARA A WƲLƖ̃SƖ DEME
23A *Jeeju yʋɔrɔ na a Galile-tẽw ʋ jaa jaana a Jufisɩ a ba *puorfʋ yie pʋʋr, hiere nɩ a saa juu fãw ƴɛr-son, kpaara nɩ a wʋlɩ̃-bʋrɔ bʋrɔ deme. 24A ʋ yuor yɛrʼã pɔw a Sɩrɩ-tẽw ʋ jaa, a nɩbɛ wɩɛrɛ nɩ a bala ba jaa na tɛrɛ a wʋlɩ̃-bʋrɔ bʋrɔ, a bala na nyɛrɛ a hʋʋr, a kɔ̃tɔn-irbe, a ŋme-kpar deme, nɩ a bala na sãw a ɩ̃gana, ʋ kpaara ba. 25A nɩ-yayaw yi na a Galile, a Ten-Pie tẽ-daa, a Jerujalɛm, a Jude, nɩ a Jʋrdɛ̃ man gaan ɩ̃ wa tuure ʋ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matie Sɛbɛ 4: BNT93
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
