Matie Sɛbɛ 3

3
A JÃ-BATII NAAŊMƖN ƳƐRƖ̃ HIERFƲ
(Mar 1.1-8, Lu 3.1-18, Jã 1.19-28)
1A ʋna daarʼãa pʋɔ a Jã-Batii cenʼã a Jude wɛkar pʋɔ ɩ̃ nyɔw a Naaŋmɩn ƴɛrɩ̃ ɩ̃ ƴɛrɛ yele nɩ:
2“Nyɩ́ lɩɛb a nyɩ yɛ̃, a-na-ɩ a saa juu fãw daar pɩɛlɛ na.” 3A Jã ɩ na a ʋlɔ a ƴɛr-hiere Ejayi na dãa ƴɛrɛ a ʋ ƴɛrɩ̃sɩ pʋʋr a mɩnɛ ʋ na ma dãa yele:
“Ba wõ na a nɩrɛ kɔkɩr
na hiere a wɛkar pʋɔ yele:
Nyɩ́ gbɛɛrɩ̃ a sɔr a Nɩ-kpɛ̃ɛ ɩnɛ,
ɩ̃ mɩ maal a ʋ sɔɛ a tor.”
4A Jã ʋlɔ su na a nyʋɔmɩ kɔbɔ kparʋ, ɩ̃ mɩ sɛ a gan cẽcen a sɩɛ pʋɔ; a sãsobo nɩ a sɩɩr ʋ dãa dɩrɛ. 5-6A Jerujalɛm tẽ-deme nɩ a Jude wɩɛr ʋ jaa nɩbɛ nɩ a Jʋrdɛ̃ man nʋɔr ten deme jaa cere na a ʋ sɛ caala a ba maal-faar, ɩ̃ a Jã mʋrɔ ba a kʋ̃ɔ a Jʋrdɛ̃ manɩ̃.
7A mɩnɛ a Jã na nyɛ a *Farɩsɩ nɩbɛ nɩ a *Saduse nɩbɛ a ba wɩɛrɛ yaw a kʋ̃ɔ mʋrfʋ ɩnɛ a ʋ sɛ, ʋ yel ba na:
“Nyɩna waab bibiirʼãa! Ala jaan nyɩ a nyɩ sɛw na na jɔ cɩ̃ɛ a Naaŋmɩn suur na pɩɛlɛ? 8Nyɩ́ ɩ a nyɩ maal-bie a miile áa nyɩ yɛ̃ lɩɛbʼã. 9A tɩɛrɩ̃sɩ nyɩ na tɛrɛ a nyɩ pʋʋr, áa Abʋraham ɩ na a nyɩ sãa-kʋmɔ, ma sɛw nyɩ wa. Ɩ̃-cɛ ɩ̃ yel nyɩ na, a kubie asɩmɛ nyɩ na nyɛ, a Naaŋmɩn na tʋɔ na lɩɛb ba a ba ɩ a Abʋraham bibiir. 10Ba gɔrʼã ƴɔ̃w a kpãakpo a tɩɩr nyɩbɛ pʋʋr. A tɩɛ lɛ na ma wɔnɔ a wɔ̃-vɛlɛ wa, ba na ŋmaa ʋ na lɔb ƴɔ̃w a vũu pʋɔ. 11A maa, kʋ̃ɔ tɛw ɩ̃ mʋrɔ nyɩ, na miile a nyɩ yɛ̃-lɩɛbfʋ, ɩ̃-cɛ nɩrɛ be na be na waara a ɩ̃ puo-sɔw na gãw ma, a maa mɩ sɛw na sɩɩr a ʋ nafaba wa. A ʋlɔ, ʋ nɔɔ mʋr nyɩ na a Naaŋmɩn Sɩɛ pʋɔ nɩ a vũu pʋɔ. 12Ʋ tɛrɛ na a ci-ŋme-daa a nuu pʋɔ ʋ na ŋmeere nɩ a ci, ɩ̃ yele diere a ci ƴɔnɔ a boor pʋɔ, ɩ̃ cɩɛrɛ a ure ƴɔnɔ a vũu ʋlɔ pʋɔ na ma tɛrɛ a kpiinfʋ wa.”
A JEEJU KƲ̃Ɔ MƲRFƲ ƳƐRƖ̃
(Mar 1.9-11, Lu 3.21-22)
13A daar ʋlɔ pʋɔ, a *Jeeju yi na a Galile ɩ̃ cen a Jʋrdɛ̃ manɩ̃ a Jã sɛ a kʋ̃ɔ mʋrfʋ ɩnɛ. 14A Jã ma bʋɔrɔ ʋ sɔw wa, ɩ̃ yel ʋ:
“Maa ɩ̃ sɛw a fʋ na mʋr ma a kʋ̃ɔ pʋɔ, ɩ̃-cɛ a fʋ lɛ waara a ɩ̃ sɛ̃?” 15A Jeeju yel ʋ:
“Bar a sɩ maal a lɛ a ƴɛ̃ƴɛrɩ̃, a-na-ɩ lɛ sɩ na maal a tʋmɔ a jaa a Naaŋmɩn na bʋɔrɔ sɩ maal,” ɩ̃ a Jã pãa sɔw. 16A lɛ ʋ na mʋr a Jeeju a kʋ̃ɔ pʋɔ baar ʋ yi na a kʋ̃ɔmɩ, ɩ̃ a jie naan a saꞌlon yuo na a ʋ ɩnɛ, ʋ nyɛ a Naaŋmɩn Sɩɛ ʋ wɔ̃ taa nɩ a ŋmam ʋ suure waara a ʋ sɛ̃. 17Ɩ̃ ba wõ na a kɔkɩr na yi a saa juu ɩ̃ yel:
“A naa ɩ a ɩ̃ Bi-nʋnaa na kpɛ ma a nyãa.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matie Sɛbɛ 3: BNT93

Highlight

ಶೇರ್

ಕಾಪಿ

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy