Mark 5
5
Iisa o gimu ma lekka awaaradgee
(Elloŋ Matiye 8.28-34, Lik 8.26-39)
1Gaa Iisa ma jobookeetee sarɗe ma nussane katik ka tappití baharre ta yaata tee ta Galilee kiɗa ta Geraasa. 2Gaa maa ga Iisa beeriɗe min markabati, gaa gimu kaƴi aɗe oomiɗe koɗok min kayyeyyo gaa asiyyee saripti. Gimu kaaka pa ga aarinne deegeyyiya. 3Gaa nowoɗɗe kayyeyyo ka o ga lekka ɗa gimu ma gederre ga onniyya ya ma jinzirre kulla. 4A gata pa, diiman ka gu papaa ma genne min asintee o gu onokkeegu pittee ma janaazargee, gaa ɗemeɗɗiy ka. Lekka ɗa gimu saa ma amma ga gederriyyee. 5Diiman, paato o aandoŋ ga amalla kayyeyyo o ga kalappa dambabbo. Gaa kawwakɗo o ga awarra ziiti ma dambee. 6Maa ga elliya Iisa min arro, gaa gaɗɗiɗe ga deeɗe darsa unti. 7Gaa kawwakɗo ma raɗɗa gaa: «Ki aŋkaw me Iisa, kii ma ay Runti Mella ka Uwwa ta kaw? Ban̰n̰u, ma semeetee Mellayi, ki anno diigiya ɗa!» 8Gata pa beneyye goŋŋa asan ga Iisa beneyyiyee ƴa omma gaa: «Aarinne, oomu maaƴi min oko gimu keeke!» 9Gaa Iisa inniyya pe gaa: «Semeecam goo we?» Gaa gata pa tiiliyyee gaa: «Semeetaw goo Goomane#5.9 Goomane pa ay giimi maani ma temekke. asan ni maani.» 10Guu malmiliyya maani Iisa goo ga aɗiy pitta ɗa arro min oko kiɗa taata.
11Wikirco kaaka pa lekka hidibe yaata ta kinzirnigeyyo#5.11 Yawudigee pa gu hukumnigee toɗokkiyooga kinziir aymiti. Elloŋ Soƴoowee ku Saɗikaŋgeyyo 11.7 o Ɗillico Hukumnigeyyo 14.8. ma tawakka jappiti. 12Guu awaaradgee kotti malmiliyya Iisa goo ga n̰aamiy gu deeɗo un̰n̰a kinzirnigeyyo. 13Gaa Iisa oyyiyyoo, gu oomiɗe min oko gimu kaaka, guu deeɗe un̰n̰a kinzirnigeyyo. Gaa ma haŋka keeke aɗe gi hidibe taata parattí zar̰agr̰igiɗe ridididi gi deeɗe suuba baharriti, guu ammi teeɗica. Kinzirnigee kotti pa deewa latta ka alpaŋgee seera.
14Guu maggee ku hidibe taata gaɗɗiɗe gu kaatikkiti kabarre geegarri o helelgeeco giimi ma beree kayni. Guu giimi oomiɗe gu deeɗiya ella latta ma deero. 15Guu asiɗe saripti Iisa. Guu elliyya gimu kee maa gu awaaradgee maani deegeyye, gaa nowotte o ga esekke kaɗiŋgee samaane o ga rayyadde caŋ caŋ. Gaa ɓayaw galiyyo. 16Guu giimi ma elliy gaari kotti jeppiyyoo oko giimo ma gaartee gimu kee maa ga Iisa pitteegu awaaradgeetee o ma gaarco kinzirnigeyyo. 17Guu giimi malmiliyya Iisa goo ga ƴiilu min kiɗaaco.
18Gaa wikinne kaaka maa ga Iisa kalapɗo markabati, ga gimu gata kee maa gu awaaradgeetee oome malmiliyya gaa ga duwe ga kaatiɗo ma gata. 19Gaa Iisa alɗiyee oyya ɗa. Gaa beneyyiyyee soo gaa ga yooku girti ga deeɗiyo taasa oko gimtee oko samaane teete parattí maa ga Miltine leyyee maa ga kawiyiyyee. 20Gaa gimu gata kaaka kaatiɗe aattí kiɗa maa gu kolaa goo ‘Gawaagargee ku Orro’, gaa deeɗiyoogu ɓerɓira gaari kooko paracco maa ga Iisa leyyee. Guu giimi paracco ma giyyiya ajjibiɗe.
Iisa rayyadda daate o ga naɗakka mica
(Elloŋ Matiye 9.18-26, Lik 8.40-56)
21Gaa Iisa ma jobookeetee tappiɗe ma markaba ta nussantí baharriti katik. Guu giimi maani asiyyee. Iisa pa aaye biití baharriti. 22Gaa gimu kaƴi ma ay min oko taattuwee ku gerra ku giraaniti ku Yawudigeyyo maa gu semeetee goo Zayrus asiɗe. Gaa elliyya Iisa, gaa asiɗe darsa unti. 23Gaa kuddiyyee wakkiti gaa: «Runtu ta rommata katta muuti. Ban̰n̰u, asu ki asittiigu gaga piccam ku maa gi rayyidiɗo, gi alɗo maata ɗa!» 24Gaa Iisa oyyiɗe ga kaatiɗe ma gata.
Guu giimi maani joboɗɗiy namma gu seƴewɗiya min nussaŋgeetee paracco. 25Gii lekkiɗo daate kaƴi aɗe min aacco giimi kotti ma ella baara, guu alɗiti caɗaa ɗa namma ƴilaakee orro o seera. 26Gii diigiyɗe ta tirta ma daawiyco dakaatargee maani. Gurustí parattí gii biriyyooga, gii alɗe rayyida ɗa soo. Gii diigiyɗe maani ta ƴiila. 27Maa gi giyyiɗe gu giimi beneyya ma gaartee Iisa, gii asiɗe aacco giimo taarti Iisa, gii eesiyya kaɗiyyiti, 28asan gi moyaa gee: «Naa eesiyya kaɗiyyiti ka kulla na rayyadda.» 29Gaa maa gi eesiyya kaaka saa gu baarti caaɗiɗe. Gii aawiya ziití kadar gi rayyide. 30Gaa wikinne maa gi eesiyya kaaka saa, ga Iisa aawiɗe kadar gi gudiranti ma rayyadda giimi oome gi rayyidiɗe gimu. Gaa jigirɗe, gaa leeɗiyoo oko giimo gaa: «Ay we ma eesiya kaɗiyyitu?» 31Guu jobookeetee tiiliyyee goo: «Ki ella appe giimi ku til til kooko ma asarrum, kii enewɗo kii ga ay we ma eesum?» 32Gaa Iisa elelɗo appe sariptee, ku maa ga ellicca gima ma eesiya. 33Gii daate gita ɓayɗe namma gi azarɗo ta cim cim asan gi leelo kabarre kadar gi rayyide. Gii asiɗe gala unti Iisa gii beneyyiyyeeca seenití parattí. 34Gaa Iisa pa beneyyitti gaa: «Runtu, mileŋ ka dowwica galbante oko naa, ka rayyide. Addo ma aapiya o ga parayte duwaate.»
35Iisa ƴa beneyya missa, guu gimtee tattuwe ka girco Yawudigeyyo ka giraaniti kee Zayrus asiɗe guu asiyyee beneyya goo: «Duwe paaɗe oko garaawayi. Runcum tara joote appe.» 36Gaa Iisa pa alɗiya baama ɗa beneyco kaaka. Gaa beneyyiyyee oko Zayrus gaa: «Gi kelemcum addo ooma ɗa. Duwca galbancum oko naa ka!» 37Gaa Iisa toɗɗiyyo oko giimo gaa gu ayya jobba ɗa, illa ay Piyer o Zak o sinti kee Yaaya. 38Gaa maa gu sarɗe girti Zayrus gata, gaa elelɗica laatiyco giimo taata maa gu erecɗo o gu cayyakka ma raɗɗa. 39Maa ga un̰n̰iɗe giiri, gaa Iisa beneyyiyyoo gaa: «Ayme ku laatayɗo o ku erecca? Gita mica matee ɗa, oƴee ka.» 40Gaa oko beneyti kaaka, gu noƴoɗɗe gaari. Gaa cimmiɗiy giimi paracco renta. Gaa kolliɗiy gayyeeti micaati serco o jobookeetee ku subba ma ezekkiya, guu deeɗe un̰n̰a were maa gi mica alɗo. 41Gaa baamicca mica min pittí, gaa leeɗiti gaa: «Talita kum#5.41 Beneyti Iisa maa gaa: «Talita kum!» keeke ay ma beneyyi ka Arameyyenigeyyo.!» Beneyyi keeke pa goo ‘Mica, na beneyyate, wacu!’
42Gii waciɗe koɗok gi tan̰n̰iɗe. Gita pa lekka ƴilaakee orro o seera. Maa gu giimi kotti ellica guu ajjibiɗe ta tirta. 43Gaa Iisa soopa sartiyiyyoo gaa gu addo beneyya ɗa oko giimo. Gaa beneyyiyyoo gaa gu biraati tiyaw oko micaati.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mark 5: mmy
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
