Mark 4
4
Masal ta luwaakayi
(Elloŋ Matiye 13.1-9, Lik 8.4-8)
1Gaa Iisa yookiɗe payya biití baharre ta yaata tee ta Galilee, ga garkayɗiy giimi. Guu giimi maani ta kaw asiyyee timma ta til til namma ga kalpiɗe markabati ga nuntiɗe. Markaba taata pa aaye baharriti o giimi ku maani kotti pa nowotte kiɗaati goŋgomni, 2gaa garawɗiyoogu gaari maani ma masalnigee. Gaa beneyyiyyoo ma masal teete gaa: 3«Giyyoŋ ƴa! Lekka gimu kaƴi aɗe ma oome soƴƴiti busino. 4Gaa maa ga soƴoɗɗo kaaka pa, gu busuntee daare suubiɗe biiti butuuli. Guu ɗiiɗi berriɗe gu teeɗiy. 5Daare pa suube were ma lekka dambee korsom korsom o kiɗaati percem percem ka. Kotti pa omme saa koɗok asan gi kiɗaati maani ɗa. 6Gaa maa gi paato poŋŋiɗe raɗɗa, gii ƴeeriɗiy. Guu aaƴiɗe saa koɗokka ka asan gu carco on̰ee ɗa ɗakko. 7Daare pa suube were ma lekka tetteesigee ma lekka ejjemmi. Gaa maa gu tetteesigee maaɗiɗe gu siiƴiɗiy, guu alɗe wee ɗa payya. 8Daare pa suube kiɗa ta samaane. Guu ommiɗe ta catata. Guu maaɗiɗe, guu cimmiɗe ganaadalgee gu neeɗe. Ganaadalgee daare ƴa weero miici orooruwee subba, daare pa orooruwee bizgiƴi, o daare pa orooruwee orro.» 9Gaa Iisa leeɗiyoo payya gaa: «Maa gaa lekka deyya ku giyyiti ga giyyu samaane.»
Ayme ga Iisa beneyɗo ma masal
(Elloŋ Matiye 13.10-15, Lik 8.9-10)
10Gaa Iisa ma giimi ma aaye ma gata diiman o jobookeetee ku orro o seera tirriyɗe min oko giimi ku maani kotti. Guu inniyya ma gaari ku beneyti ma masalnigee. 11Gaa Iisa tiiliyyoo gaa: «Oko kuŋ ɗe ga Mella gaaritoŋca paaɗe seene ta kiilenta ta gaarti mulunniti. A giimi daare pa aaye ɗa aattí mulunniti, geeway beneyyiŋgee ma masalnigee ka. 12Ay goŋŋa appe, aleŋ maa gi Kitamniti Mellayi beneyye gee:
“Guta ella, innasoopa gu ella ɗa samaane,
o gu geewa, innasoopa guu alɗiy ibina ɗa samaane,
goneka kee guu ebenɗiya gu rebella oko Mellayi,
gaa saamiyiyyoogu zunubgeeco#4.12 Elloŋ Esaya 6.9-10.!”»
Iisa garaayooga butulti masal ta luwaakayi
(Elloŋ Matiye 13.18-23, Lik 8.11-15)
13Gaa Iisa beneyyiyyoo payya oko jobookeetee gaa: «Kuu giyyica masal teete o ku ibinca ɗa! Ku ebennay pe kuu me masalnigee daare maa na akkitoŋ beneyya? 14Luwaaka ɗe ay gimu ma lowokka beneyti Mellayi. 15Giimi daare saabayye aleŋ biiti butuuli were maa gu busini suubiɗe. Guu giimi kotti giyyiya beneyti Mellayi, gaa koɗokka saa ga Seetanne asiyyooga cimma maaƴi ka luwenta galbigeeco. 16Giimi daare pa saabayye were ma ay dambee maa gu busini suubiɗe. Giimi kotti pa geewaa beneyti Mellayi, guu oyyiyya saa koɗokka ka ma parhane. 17Innasoopa, ga beneyti Mellayi esekkayo ɗa carri. Guta bakamma beneyti Mellayi wikinne paalta ka. Meene maa guu gasse pa gaari ku diiganti o gu giimi laayo miɗɗa asan gu amanne oko beneyti Mellayi, gu otokkati oko amannico daana ka. 18Giimi daare pa saabayye aleŋ were ma lekka tetteesigee ma lekka ejjemmi maa gu busini suubiɗe. Guta kotti geewaa beneyti, 19innasoopa gi hammane ta lawwi ku dunuuniti o ƴekko ta ayaawi ka dunuuniti o ƴekko ta lawwi daare pay pay pa bittiyooga beneyyi kaaka ga alɗe wee ɗa ya maatiki. 20Giimi daare pa saabayye aleŋ kiɗa ta samaane maa gu busini suubiɗe. Guta kotti pa geewaa beneyti Mellayi, guu oyyiya, guu weeɗo miici, daare ƴa orooruwee subba, daare pa orooruwee bizgiƴi o daare pa orooruwee orro korƴu.»
Masal ta lampayi
(Elloŋ Matiye 5.15, 10.26, Lik 8.16-18, 11.33, 6.38)
21Gaa Iisa beneyyiyyoo payya oko giimo gaa: «Gimu eterra aɗe lampa gaa zubbiyyee daakuwayyi e baŋ ga balco daŋgilo? Kaw, gata gagakka soo uwwa. 22A guta pa gaari paracco ku kiilenta haŋka akka dee dirn̰enta, gu giimi asiɗiy ella racal. 23Maa gaa lekka deyya ku giyyiti, ga giyyu samaane!» 24Gaa Iisa beneyyiyyoo payya gaa: «Giyyoŋga samaane beneytu keeke! Ku deyekka ibino ta beneytu, ga Mella akkitoŋca bira ibino aleŋ ta diyyitoŋ taata, o ga akkitoŋ gaaya payya ƴiila. 25A gata pa, gimu ma ibinya aɗe beneyti Mellayi, ga Mella gayee payya ta ƴiila ibino. A gimu ma lekka ɗa soopa ibino ta beneyti Mellayi ga Mella cemekkeeca ibinti ta paalta taata kulla maa ga lekka.»
Masal ta busini ma omokka kayco ka
26Gaa Iisa beneyyiɗe payya gaa: «Mulunniti Mellayi saabayye aleŋ maa gaa gimu soƴƴe busini gaanti. 27Gaa oƴowɗo pe kanti kulla meene o ga wacakka, busini pa omme gu maaɗiɗe. Gata pa ibina ɗa payya baŋ gu leewe pe goo me. 28Kiɗa pa omokka ƴa omma lawiine, gii lawiine cimmiɗo gandulle, gaa gata pa weeɗo korƴo. 29Guu korƴo neero pa guu giimi seɗekkay ma peer̰u asan ga wikinne ka seɗɗiti aseero#4.29 Seɗɗo pa garaa parlane tee ta gaamití dunuuniti. Elloŋ Zowel 4.13..»
Masal ta ettu ka tatta maa gu busuntee rootta ka
(Elloŋ Matiye 13.31-32,34-35, Lik 13.18-19)
30Gaa Iisa beneyyiɗe payya gaa: «Mulunniti Mellayi ke leewa kee gi saabayye pe ini me, o ke garaaca pe ma ini me masalta? 31Gita saabayye aleŋ busunti tappa ta jineeniti maa goo mutar. Maa gaa gimu lowokkay busini kotti, gu businti kotti rootta ƴiila min oko busini ku tappa parattí ta jineeniti. 32Gaa gimu luwiy pa, gu ommiɗe, gu maɗaa guu deeɗo taatta ƴiila min oko tappa parattí ta jineeniti. Guu maaɗiɗo gu leeɗo linƴaƴƴi taatta namma gu ɗiiɗi panaɗɗiy gerraco linƴaƴƴo.»
33Ay ma masalnigee maani aleŋ kooko appe, ga Iisa tasawɗiyooga beneyti Mellayi oko giimo ma gudirane ta ibinco. 34Gata pa beneyti paratti aɗe ga beneyyayooga ma masal ka oko giimo. A oko jobookeetee soopa ga garaayoogu bottolco masalnigeyyo wikinne maa guu aaye kayco ka.
Iisa ƴapaa ussu
(Elloŋ Matiye 8.23-27, Lik 8.22-25)
35Gaa meene taata saa ma ooro ga Iisa beneyyiyoo oko jobookeetee gaa: «Tappine ma ta nussantí baharriti katik.» 36Guu waciɗe gu cappiyyoo oko giimi ku maani. Guu kalpiɗe markaba maa ga Iisa alɗo, guu kaatiɗe. Saripco pa lekka kulla markabanigee daare. 37Gii ziiziyo yaata asiɗe. Guu lokkomco ammo wacaɗɗo gu soloɗɗo markabati namma gi onoɗɗo paaɗe gi markaba. 38Iisa pa oƴee kanti ta dessiti markabati ga sekenɗe ma usaadane. Guu jobookeetee miniyya, guu beneyyiyyee goo: «Garaawa, ke matakka pe. Muuttine keeke temekkum ɗa e?» 39Maa ga miiniɗe gaa makkiyyee oko ussi. Gaa beneyyitti oko baharriti gaa: «Ƴaapu!» Gaa ussu warriɗe gaa were ƴaapiɗe yil. 40Gaa Iisa beneyyiyyoo gaa: «Ayme ku ɓayaɗɗo? Ku amanne ɗa missa e?» 41Gaa ɓayaw soopa icciɗiy ta tirta. Guu beneyɗo aacco goo: «Gimu keeke ay me gimta namma ga ussu o ammi kulla gewɗiya kanti?»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mark 4: mmy
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
