Mark 6
6
Giimi ku Nazaret dowway ɗa galbigeeco oko Iisa
(Elloŋ Matiye 13.53-58, Lik 4.16-30)
1Gaa min iŋaa girti Zayrus, ga Iisa yookiɗe ma jobookeetee geegar ka Nazaret were maa ga maɗawɗe. 2Gaa ma meene ta nambiti, ga kaatiɗe ga deeɗe un̰n̰a girco Yawudigeyyo ka giraaniti. Gaa garawɗiyo beneyyi oko giimo. Guu giimi ku maani kotti ma geewa ajjibiɗe ta tirta oko beneyti kaaka. Guu beneyɗo aacco goo: «Beneyyi keeke appe soo ga gasakkiya min taŋaa, o ibino ta gaaro teete o gudirane ta liyaawi gaari ku ajjibiti kooko ga gassiy min taŋaa? 3Keeke ay gata ɗa aɗe ma lobokka ettee e? Gata ay runti Mariyam o seneetee pa ay ini Zak o Yosee o Yud o Simo! Seneetee ku daatta kulla aaye iŋee aɗe aattine.» Gaa keeke appe deeɗiyo botol oko giimi ku Nazaret gu poociɗe amanno oko gata. 4Gaa Iisa beneyyiyyoo gaa: «Nabiinice gu cepellay semeetee were paratti, illa ay darriti soo maa ga maaɗiɗe, o wikirco gimtee o gayyeetee gu cepellay ɗa semeetee.» 5Gaa iŋaa ga Iisa alɗe gederra ɗa ga leeɗe gaari ku ajjibiti ya kaƴi, illa ay giimi daare soo ga gagiyoogu pittee gaa rayyidiɗiy. 6Gaa ajjibiɗe asan gu giimi koo ku geegarti dowwiy ɗa galbigeeco oko gata.
Iisa n̰amakkay jobookeetee ku orro o seera
(Elloŋ Matiye 10.1,5-14, Lik 9.1-6)
Gaa Iisa tan̰n̰iyyoo oko diyargee ku katta ga garawɗiyo beneyyi oko giimo. 7Gaa kolliɗiy jobookeetee ku orro o seera, gaa n̰amaɗɗiy paaɗe seera seera o ga biryoo gudirane ku maa gu peteɗɗo awaaradgee. 8Gaa toɗɗiyyo gaa gu addo icca ɗa ya maatiki ka turguwwi. Illa ay gombol ka ga gimu baamu pitti. Gaa gu addo gulma ɗa ya mappa, o bala karaatalgee, o bala gurus aacco kaɗiŋgeeco, 9o gaa gu issu n̰uura o gaa ga kulla gimu aɗe iccu kaɗiyyu kaƴi ka.
10Gaa beneyyiyyoo payya gaa: «Kulla darre aɗe maa kuu kaate, ga ger maa gu joobittoŋ kaaka ku nuntoŋ pe iŋaa aɗe namma ga wikinnitoŋ ka ƴiiliti asiɗo. 11Kuu kaate soopa were maa gu alɗitoŋ jooba ɗa o gu giyyiya ɗa beneytoŋ, kuu okomma min iŋaa ku kokkoŋga buruntulle ka asintoŋ. Goŋŋa ku garaayo kadar gu leelo miɗɗa.» 12Guu jobookeetee Iisa guta kaatiɗe. Guu beneyɗiyo oko giimo goo gu meeliy gaarco ku miɗɗa. 13Gaa maa gu kaatiɗe gu peteɗɗo awaaradgee maani o gu rayyadda giimi ma kallo ta siwinni kayyeeco.
Muutti Yaaya ma batasayya giimi
(Elloŋ Matiye 14.1-12, Lik 9.7-9, 3.19-20)
14Gaa sultan Erod Antipas giyyiɗe ma gaartee Iisa, asan gi kabarriti tacile were paratti. Giimi daare beneyya goo ga ay Yaaya ma batasayya giimi ma naɗe min muuti, ay ɗakko appe ga lekkiɗo gudirane ta liyaawi gaari ku ajjibiti. 15Daare pa goo ga ay nabiinice Eliyas. Daare payya pa goo ga ay nabiinice aleŋ nabiinigee ku tippa. 16Gaa maa ga sultan Erod Antipas giyyiyya beneyco giimo kaaka gaa beneyyiɗe gaa: «Miiɗi keeke ay Yaaya ma batasayya giimi! Gata pa ay naata saa ma beneyye gu reepiyyeeca kayaati. Ay gata appe ma naɗe min muuti.»
17-18A gata pa, Erod beneyyiya keeke asan ga moyaa baŋ ga deyya Yaaya gaa me. Botol ka mutti Yaaya ma batasayya giimi pa ay keeke: Sultan Erod Antipas cawwica Erodiyad daatti sinti kee Pilip ma aaye ma hayaatanti. Gaa Yaaya beneyyiyyee oko Erod gaa: «Ki lekka ɗa botol ku maa ki iccicca daatti sincum#6.17-18 Elloŋ Soƴoowee ku Saɗikaŋgeyyo 18.16, 20.21..» Ay kaaka appe ga Erod beneyyiɗe gaa gu baamiya Yaaya, guu onniyya ma jinzirre, guu nuuƴiyya daŋayi. 19Erodiyad pa gita bakammiyee gaari oko Yaaya. Ay ɗakko appe gi aŋaɗɗe diyawti. A gii alɗo gederra ɗa soo 20asan ga sultan Erod Antipas karmayyiya o ga lekke kabarre kadar ga gimu ɗayaŋ o ga ay gimti Mellayi, ay ɗakko appe ga taraɗɗiya. Maa ga Erod Antipas gewɗiya beneyti pa, ga kakawweeca pe gonek ka kayaati, innasoopa ga beneyti daanee giyyiti.
21Gaa meene kaƴi ga sultan Erod Antipas leeɗe laalane ta wiyawti. Gaa n̰aamiyyoo oko taattuwee ku hakuumati o taattuwee ku asaakargeyyo o taattuwee daare ku kiɗa ta Galilee gu asiɗo tee tiyaw yaata wikirti. Ma keeke pa gi Erodiyad gassiyyee paaɗe botol oko Yaaya. 22Gii runtí Erodiyad asiɗe un̰n̰a were maa gu taattuwee alɗo kaaka, gii waariɗe. Gii waarití taata deeɗiyo daanayo oko Erod Antipas ma gittee kotti ma aaye. Gaa sultan innicca mica gita gaa gi taaleega latta maa gi aŋka, gaa birittiiga. 23Gaa halpiyɗe saa gaa ga latta maa gi enaa ga beraatiiga caŋ ga dee nussane ka kiɗaati maa ga hekemeyye kulla ga beraatiiga. 24Gii gomosso oomiɗe gi deeɗiti beneyya oko yaatí gee gi innu pe ini me? Yaatí pa tiiliti gee gi addo inna kayaati Yaaya ma batasayya giimi. 25Gii gomosso yokkiɗe wikirti sultanni gi deeɗiya inna gee ga biraatiica haŋka aɗe kayaati Yaaya ma batasayya giimi supirati. 26Gaa sultan Erod zorontiyɗe ta kaw. A mileŋ ga halpayye soopa unco giimi maa ga kolee laalanti, ga gederre ɗa ga poociɗe. 27Gaa n̰aamiɗe ma haŋka keeke aɗe kaƴi min oko taraakeetee ga ɗeeɗe un̰n̰a daŋayi ga deeɗica reepa kayaati Yaaya. 28Gaa duwicca supirati, gaa asittiica n̰aama oko gomosso gita. Gita pa iccica gi itirittiica oko yaatí. 29Gaa maa gu jobookeetee Yaaya giyyicca kabarre teete, guu asiɗe gu asiyya icca ziiti guu deeɗiya saaya.
Iisa beraayo tiyaw oko giimi maani
(Elloŋ Matiye 14.13-21, Lik 9.10-17, Yaaya 6.1-14)
30Guu n̰amaakeetee Iisa asiɗe timma saripti, guu asiyyeegu gemma gaari paracco maa gu leelo o beneyyi maa gu gaariyoo oko giimo. 31Guu giimi maani asawɗiyo o daare yooka namma gu alɗo gasakka ɗa wikinne ka tiyaawi. Ay ɗakko appe ga Iisa beneyyiyyoo gaa: «Asoŋ, anne ta were ma lekka ɗa giimi, ku deeɗo namba paalta.» 32Guu deeɗe kalpa kayco ka markabati guu kaatiɗe kayni were ma lekka ɗa giimi.
33Gaa maa gu katawɗo kaaka soopa gu giimi maani elliɗiy, guu ibinɗiy. Guu giimi ku helelgeyyo paracco ku katta ɗiimiɗe ma gaɓira gu ommiyyoo oko were kaaka maa ga Iisa ma jobookeetee katawɗo. 34Maa ga Iisa beeriɗe min markabati, gaa elliɗiy giimi ku maani kotti, gaa elliɗe saamuwco asan ga ellay aleŋ hidibe ta tameyyo ma lekka ɗa maggu. Gaa diiliɗe ga garawɗiyo beneyyiŋgee maani.
35Maa gi paato aŋkiɗo galaw, guu jobookeetee asiyyee saripti, guu beneyyiyyee goo: «Gita paato aŋka galaw o kee aaye kayni arro min helelgeyyo. 36Beneyyayo paaɗe oko giimo kii gu addo helelgeeco giimi ma beree kayni o diyargee ku katta katta ku maa gu deeɗo giɗa lawwi ku tiyaawi.» 37Gaa Iisa soopa tiiliyyoo gaa: «Kuŋ saa biraaniyo tiyaw.» Guu guta pa beneyyiyyee goo: «Ki aŋka pe ni deeɗo giɗa mappa ma gurus ka lubbiti gimi ka koyyee paysara ni asiyyo bira oko giimo e?» 38Gaa inniɗiy gaa: «Aɗoŋ ella ƴa baŋ ku lekka mappa minaw?» Guu tiiliyyee goo: «Lekka mappa beeƴa o buusi seera.»
39Gaa Iisa beneyyiyyoo gaa gu nuntiy giimi kiɗaati durgee maani. Were kaaka pa lekka n̰aalu ɓayta. 40Guu nuntiɗe maani jeppenta ma caar̰ee. Caar̰ee daare ƴa lekka orooruwee beeƴa beeƴa gimu, daare pa orooruwee orro orro. 41Gaa Iisa icciyya mappa ka beeƴa gata o buusi ku seera. Gaa cukilɗe ta uwwa samaani, gaa leeɗiyee barkinti oko Mellayi. Gaa erriyya mappa ga biriyyooga oko jobookeetee ku maa gu ɗeddiyyooga oko giimi paracco. Gaa ɗeddiyyoogu kulla buusi ku seera. 42Guu teeɗe paracco gu ayyiɗe. 43Guu jobookee bulɗiy kollee paracco ma mare ku mappayi o ku buuso. Guu onniɗe laŋgee orro o seera. 44Giimi kotti pa ma teero mappa, gu koo ku alpaŋgee beeƴa ay miɗi.
Iisa tan̰aa kayaaco ammo
(Elloŋ Matiye 14.22-33, Yaaya 6.16-21)
45Gaa maa gu timmiyya mappa ma mare, gaa koɗokka saa ga Iisa beneyyiyyoo oko jobookeetee gaa gu kalpu markabati gu ommiɗo ta nussanti katik oko baharre ta yaata ta gidaane ka geegar ka Betsayda, kadar kee ga gata pa marakka ga beneyyiyoo oko giimi ku maani kotti gu tacilɗo. 46Gaa maa gu giimi tacilɗe, ga kalpiɗe jappiti ku maa ga deeɗo inna Mella. 47Maa gi paato galɗe, gi markaba maa gu jobookeetee kalappe tee pa sarakke appe ɗaɗɗakití baharriti. Iisa pa aaye missa kiɗaati kayti ka. 48Gaa elliɗiy appe maa gu awalɗo markaba ma diigane asan ga ussu azakka ga gaabalɗica. Gaa ƴekker ka ma walawti wiri, ga Iisa min jappiti beeriɗe baharriti, gaa tan̰awɗo kayaaco ammo, gaa aaniyɗiy. Gaa ma tan̰n̰iti taata aɗe ga aŋkiɗo ga ƴiiliɗiy. 49Gaa maa gu elliyya ga tan̰aa kayaaco ammo, guu leeɗiki kir̰mu. Guu waciɗe kawwikiti, 50asan gu elliya paracco guu kellemco oomiɗe. Gaa Iisa beneyyiyyoo saa koɗok gaa: «Asarroŋgu galbigeetoŋ gata ay naa ka, aɗoŋ ɓaya ɗa.» 51Gaa kalpiɗe markabati ma guta, gaa ussu ƴaapiɗe yil min azaawi. Guu ajjibiɗe saa pe ta kaw, 52asan gu gaari ku mappayi kotti gu ibine ɗa missa dagganco maa ga Iisa ɗeddiyooga. Kayyeeco eyee ɗa missa.
Iisa rayyadday giimi ma parayya
(Elloŋ Matiye 14.34-36)
53Gaa Iisa ma jobookeetee tappicca baharre ta yaata. Guu sarɗe kiɗa ta Zenezaret, guu onnicca markabaco goŋgomni. 54Gaa maa gu beeriɗe min markabati ka gu giimi ibiniyya koɗok saa Iisa. 55Guu ɗiimiɗe gaɓirati min wereeriyee paracco ku kiɗa taata. Guu nagalɗiy gimco paracco ma parayya ma ɗeberwee gu eterɗeegu. 56Guu gawaagargee o diyargee o helelgee ku giimi ma beree kayni maa ga Iisa tan̰aayo eterɗiyee gimco ma parayya paar maa gu giimi temeɗɗo. Guu malmiliyya goo ga ban̰n̰u ga duwiyo gu esewɗica balti kaɗiyyiti ka kulla. Guu ma esaa kotti rayyaɗɗo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mark 6: mmy
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
