Mark 13
13
Ɗimmiti girti Mellayi
(Elloŋ Matiye 24.1-2, Lik 21.5-6)
1Gaa Iisa okomɗo min girti Mellayi, gaa kaƴi min oko jobookeetee beneyyiyyee gaa: «Miltini, ellu ƴa dambee ku samaane kooko o geewo ta samaane teete.» 2Gaa Iisa tiiliyyoo gaa: «Elliya samaane ger ka tatta keeke. Lekka ɗa ya dambu kaƴi maa gu akkee duwa ga jerewɗe kayaati giiti. Paracco gu akkiy rizila.»
Gaari ma akka asa omma min gaamití dunuuniti
(Elloŋ Matiye 24.3-14, Lik 21.7-19)
3Gaa Iisa nuntiɗe dambu ka olibiyeyyi. Gaa gaabiliyya girti Mellayi. Guu jobookeetee koo ini Piyer o Zak o Yaaya o Andire alɗo kayco ka ma gata, guu inniyya goo: 4«Beneyyani ƴa baŋ gu gaari kooko paracco akka dee ya minke o baŋ ga ini me ma garaanica asawco?»
5Gaa Iisa beneyyiyyoo gaa: «Warroŋ maaƴi! Ga gimu aɗitoŋ daɓalla ɗa ga cimmittoŋ min butuuli. 6Giimi maani akka asa ma semeetaw o gu beneyya goo gu ay Masi maa ga Mella aparre. Guu asiɗiy daɓalla pe giimi maani. 7Kuu geewa gu giimi beneyya ma gaari ku bokowwo katta e baŋ pa arro, ku aɗoŋ rawruwa ɗa, asan gu gaari kotti asaa ma tirta. A innasoopa, gi daa ɗa missa gaamití dunuuniti. 8Ku akka ella gi jollo akka waca balle ma balle, o mulunne ma mulunne. Akka lekekka aziro ta kiɗaati o mayyee wereeriyee pay pay. Kooko pa deewa aleŋ diilo ta buybuyne ka wiyaawi.
9«Kuŋ soopa, giyyoŋga samaane latta ma akkitoŋ asa! Giimi deeɗikitoŋ katawwo unco wereeriyee ku parlanti, gu r̰ocoɗɗitoŋ aacco gerraco Yawudigeyyo ku giraaniti, o gu deeɗikitoŋ katawwo unco gubernernigeyyo o unco salaataŋgeyyo asan ku ay jobookeetaw, o ku deeɗo suyuudigeetaw. 10A gata pa aŋka ƴa omma gi kabarre ta daana deeɗo taasenta oko ballee paracco. 11Wikinne maa guu bammitoŋ gu katawɗikitoŋ were ka parlanti pa, ku aɗoŋ karriya ɗa min omma oko beneyyi baŋ ku deeɗiya beneyya kuu me. Beneyyoŋ beneyyi ma asaatoŋ oko wikinne kaaka, asan ga beneyyi asaa ɗa min oko kuŋ, innasoopa ga asaa min oko Ruuhanti Mellayi. 12Sin akkiya bira sinti picco giimo gu deeɗiya o baaba akkiya bira runti picco giimo gu deeɗiya, o miici akkiyoo ribila oko gayyeeco, guu gaariɗiy gu giimi asiɗiy bamma diyaawi#13.12 Elloŋ Misee 7.6.. 13Giimi paracco akkitoŋ ɗakita asan ku ay jobookeetaw. Maa gaa deero soopa baatiyne namma ya dessiti, deewa najjiyenta.»
Diigane ta yaata
(Elloŋ Matiye 24.15-28, Lik 21.20-24)
14Gaa Iisa beneyyiyyoo payya oko jobookeetee gaa: «Oko wikinne ma asaa, ku akkiya ella gata ma leewa latta ka miɗɗa ta kaw ma ay ka aan̰iti, gaa waraɗɗe were ma ay kanti ɗa#13.14 Elloŋ Daniyel 9.27, 11.31, 12.11.. Ga gimu ma garkayya beneyyiŋgee kooko, ibinya samaane. Gu giimi ma aaye kiɗa ta Yudee gaɗɗu dambabbo. 15Gaa gimu nabakka renta, ga addo un̰n̰a ɗa ɗakko ga icciɗo maatiki min ɗakko, 16o gimu ma aaye maaƴi kulla ga addo yooka ɗa giiri ga asiɗo icca kaɗiyyu. 17Oko meeni kotti, gi diiganco oko daati ku maaɗiyeeta o ma ay maƴƴappi gi akkiyoo dee raɗɗa ta kaw. 18Innoŋga Mella ku maa gu gaari kotti alɗitoŋ asa ɗa wikinne ka sitiini! 19A gata pa oko meeni kotti, gi diigane akka dee yaata ta kaw, min maa ga Mella kilgiyicca dunuune ya haŋka gi lekke ɗa kaytiŋ diigane aleŋ taata o gi akka lekka ɗa payya#13.19 Elloŋ Daniyel 12.1.. 20A saananco giimi maa ga Mella Miltine aparre gu deeɗo kuntee pa, ga koyyiy meeni ku diiganti kotti. Gaa alɗiy koyee ɗa, ga lekekka ɗa ya gimu kaƴi ma pakaa. 21Gaa gimu beneyyitoŋ gaa: “Elloŋga Masi, gata maa ga Mella aparre aaye iŋaa”, e baŋ gaa: “Elloŋ gata ay gata appe keeke”, ku aɗoŋga amanna ɗa beneyti. 22A guta pa, giimi daare akka asa goo gu ay Masi, gata maa ga Mella aparre, o daare pa goo gu ay nabiinigee o ga ay borooli ka. Guu asiɗo leewo garaawi ku ajjibiti o gaari ma kakaaca kaya ku maa gu asiɗiy daɓalla ya giimi kulla maa ga Mella aparre guu gederra. 23Kuŋ pa warroŋ maaƴi! Na iyyitoŋgu paaɗe deytoŋ min haŋka ma gaari paracco ma akka asa ya omma.»
Asawti Runti Gimi
(Elloŋ Matiye 24.29-31, Lik 21.25-28)
24Gaa Iisa beneyyiyyoo payya oko jobookeetee gaa: «A wikinne maa guu meeni ku diiganti kotti ƴiile pa, gi paato rakamma o kooyo deewa ɗa payya purta, 25o kalli sobokka min samaani, o lawwi ma aaye samaani ma lekka gudirane yagaa#13.25 Elloŋ Esaya 13.10, 34.4 o Ezekiyel 32.7 o Zowel 2.10, 3.4.. 26Guu giimi elliyya Runti Gimi gaa asaa aacco n̰irɗo ma gudirane yaata o ma darjane ta tirta teete. 27Gaa asiɗiy n̰aama malaykatnigee gu asiɗiy timma gimtee maa ga aparre min wereeriyee paracco ku kiɗaati, min jarilti ya culumti.»
Beneyti Iisa ma gaarti booti
(Elloŋ Matiye 24.32-35, Lik 21.29-33)
28Gaa Iisa gaayiɗe payya masal gaa: «Ibinoŋca giraane ta booti. Guu linƴaƴƴiti ku rootta alle, o guu tappiti eɗice, ku leewa paaɗe kabarre kadar ga piɗiwaŋ katta. 29A kuŋ kulla, wikinne maa kuu elliy gaari kooko gu ase, ku leyyoŋ paaɗe kabarre kadar ga Runti Gimi asaa katta, aleŋ kuu ga aaye biití burgutti. 30Na beneyyatoŋca seene, giimi ku haŋka kooko matakka ɗa paracco omma min maa ga keeke paratti asiɗo asa. 31Samaane o kiɗa akka masila, beneyyiŋgeetaw soopa masalla ɗa ta kaw.»
Mella kayti ka ibinya wikinne ka asawti Runti Gimi
(Elloŋ Matiye 24.36-44)
32Gaa Iisa beneyyiyyoo payya oko jobookeetee gaa: «Lekka ɗa ma ibinca meene e baŋ gi saha ta asawti Runti Gimi, bala gu malaykatnigee ku samaani, bala ga Runti, illa ay Mella Baaba kayti ka ma ibinca. 33Warroŋ maaƴi! Nuntoŋ nadiraŋgee asan ku ibinya ɗa baŋ ga wikinne kaaka asaa ya minke. 34Gaari kooko pa marakke aleŋ gimu ma kataa turguwwi, ga miriyyooga ger oko lubaakeetee, o kulla kaƴi aɗe ga kappiyee lubbi, o taraaka ka biití burgutti ga beneyyiyee gaa ga nuntu nadirane, gaa kaatiɗe. 35Naa pa kulla beneyyatoŋ naa ku nuntoŋ nadiraŋgee, asan ku ibinya ɗa wikinniti maa ga milti giiri asawɗo, baŋ ga asaa ma pootimooko e, e baŋ ga asaa ma ɗaɗɗakiti aandoŋŋi e, e baŋ ga ma walawti wiri e, e baŋ ga ma sossoko. 36Oko yookiti ga aɗitoŋ gassa ɗa kuu oƴee. 37Beneytu keeke pa maa na beneyya ay ka parattoŋ. Nuntoŋ nadiraŋgee!»
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mark 13: mmy
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
