Mark 12

Masal ta lubaakee ku jineeniti

(Elloŋ Matiye 21.33-46, Lik 20.9-19)

1Gaa Iisa icciɗe masal gaa beneyɗiyo oko taattuweeco soƴoowee ku saɗikaŋgeyyo o aalimnigee ku Kitamniti Muusa o ajaawaŋgeeco Yawudigeyyo gaa: «Gimu kaƴi aɗe tume jineene ta ettee ma tarakka ma saabayye mor̰mor̰oskee, gaa tirpicca. Gaa leeɗe ɗoogin̰a yaata ta miƴƴiti ronco ettee kotti#12.1 Ronco ettee kooko goo rezen ay aleŋ mor̰mor̰oskee. Ma amco rezen pa gu leewa mirmi.. Gaa geewiɗe ger siƴƴa oko taraakeyyo. Gaa onniɗe beneyyi ma lubaakee maa gu lubbicca jineeniti, gaa gata pa kulla gu deeɗeeca berewwo ka pe hagganti#12.1 Elloŋ Esaya 5.1-2.. Gaa turguwɗe paaɗe. 2Gaa wikinne ka jaawico ronco etteyyo ga n̰aamiyyooga lubaakati kaƴi oko lubaakee koo maa gu onoɗɗiya beneyco ku maa gu deeɗeeca bira hagganti ta ronco etteyyo. 3Gaa maa ga lubaakati sarɗe, guu lubaakeeti jineeniti baamiyya, gu tammiyya, guu pittiyya ma pittee ku orro. 4Gaa milti jineeniti n̰aamiyyooga payya lubaakati ka kaƴi. Maa ga sarɗe guu lubaakee ku jineeniti deeɗeeca kooɗa kayaati, guu n̰iliyya. 5Gaa milti jineeniti n̰aamiɗe payya kaƴi. Kaaka pa gu deyya saa pe. Gaa n̰aamiɗe saa pe payya lubaakeetee maani. Maa gu sarɗe guu lubaakee ku jineeniti tammiɗiy daare, daare pa gu deyyiy. 6Gaa milti alɗo lekka ɗa payya ya lubaaka kaƴi, illa ay runti ka kayti ka maa ga ƴekka. Gaa n̰aamiyyooga n̰aamo ta deesiti, asan ga moyaa gaa: “Runtu soopa gu karmayya paaɗe.” 7Gaa maa gu lubaakee ku jineeniti elliyya runti oko milti jineeniti gaa asaa, guu beneyɗo aacco goo: “Ay keeke appe maa ga artane akkee mara. Asineega dee, gaa artane ka jineeniti marinne!” 8Guu baamiyya gu deeɗiya. Guu yebbiyya gu uwwiyya renta min jineeniti.»

9Gaa Iisa inniɗiy pe gaa: «A oko gaari kooko pa ga milti jineeniti leewa pe gaa me? Asaa ga gata milco saa ga asiɗiy dee lubaakee ku jineeniti, gaa biriyyooca jineene oko giimi daare. 10Kitamniti Mellayi beneyye gee:

“Dambu maa gu gekeewee uwwe maaƴi

ay gata appe ma deero dambu ka samaane kee ka diiliti geewiti giiri.

11Ay Mella Miltine aɗe ma leyya keeke,

o ga ay latta ka ajjibiti maa gu iɗiitine elle#12.11 Elloŋ Soom 118.22-23.!”»

Ku garkiyya ɗa aɗe beneyyi keeke e?

12Guu soƴoowee ku saɗikaŋgeyyo o aalimnigee ku Kitamniti Muusa o ajaawaŋgeeco Yawudigeyyo reeɗica masalti teete kadar gi baarayye guta aɗe. Ay ɗakko appe gu deyeɗɗo pe botol ka maa gu baamiyya. Innasoopa gu tacile gu uttiyyee asan gu ɓayakka iɗiico giimo.

Pilko ta miiri oko Seezar

(Elloŋ Matiye 22.15-22, Lik 20.20-26)

13Guu taattuweeco soƴoowee ku saɗikaŋgeyyo o aalimnigee ku Kitamniti Muusa o ajaawaŋgeeco Yawudigeyyo n̰aamiyyee oko Iisa Pariziyennigee minnaw o giimi ma gayaa lubbi sultan Erod Antipas#12.13 Elloŋ Mark 3.6. ku maa gu deeɗiya ɗebba ma beneyti saa ga galɗo, guu baamiyyeega. 14Guu asiyyee beneyya goo: «Garaawa, ni lekka kabarre kadar ki beneyya wacac, o ki ɓayakka ɗa oko maa gu giimi moyaa. Kii passallay ɗa giimi, ki leeway sawa ka. Ki soopa garay ma seene bottoltee Mellayi ma ay koo ku jobbiti. Hukumnigeetine oyowwine e, e gu oyowwine ɗa ke peleɗɗo miiri oko tattuwe ka tatta ka Rooma kee Seezar?»

15Iisa pa lekka kabarre kadar gu beneyya ma beneeco ka, ka galbigeeco pa kayti. Gaa beneyyiyyoo gaa: «Ayme ku aŋkiɗo ku cokkinno ma daɓaali, kuu baaminnawga beneytu? Itirnaw ƴa tammaye kaƴi na elliɗo.» 16Guu itiriyyee kaƴi. Gaa Iisa inniɗiy gaa: «Wigisane o kitipiyo kooko maa na ella tammayiti ay ku we?» Guu tiiliyyee goo: «Wigisane o kitipiyo maa ki ella kooko ay ku Seezar.» 17Gaa Iisa beneyyiyyoo gaa: «Ma ay ka Seezar ku birneega oko Seezar, o ma ay ka Mellayi ku birneega oko Mellayi.» Gaa beneyti kaaka galiyo, guu ajjibiɗe ta tirta oko beneyti kaaka.

Inno ma gaari ku naɗaawi

(Elloŋ Matiye 22.23-33, Lik 20.27-40)

18Guu Saduseyennigee minnaw asiyyee oko Iisa. Guta kotti pa beneyya goo gu giimi ma matakke naɗakka ɗa. Guu inniyya Iisa goo: 19«Garaawa, Muusa ketepeyyineeca hukumne teete gaa: “Gaa gimu icce daate, gii alɗiyee wee ɗa gaa maatiɗe ga sinti pa ecekkaca daatti oko ma maate ku maa gi weeɗe miici oko sinti ma maate#12.19 Elloŋ Ɗillico Hukumnigeyyo 25.5-6..” 20Guu lekkiɗo pe seneeta paysara. Gaa ka tatta icciɗe daate, gii alɗiyee wee ɗa gaa maatiɗe. 21Gaa taarti iccicca kur̰aar̰a, gii alɗiyee wee ɗa gaa maatiɗe. Gaa ma daa ka subba kulla iccicca gii alɗiyee wee ɗa, gaa maatiɗe. 22Gaa paysaraco appe gu deeɗiti miɗi, guu mattiɗe. Gaa ya kaƴi saa gi alɗiyee wee ɗa. Gaa maa gu mattiɗe paracco, gii gita kulla maatiɗe. 23A meene maa guu giimi ase naɗa min muuti pa, gi daate taata akka dee pe ta we? Asan ga paysaracco gi deero daacco!»

24Gaa Iisa tiiliyyoo gaa: «Ku masile min seeniti asan ku ibinya ɗa ka Kitamniti Mellayi o gudiranti Mellayi. 25Wikinne maa guu giimi ase naɗa min muuti, gu miɗi sokokka ɗa payya daati o daati kulla sokokka ɗa miɗi. Innasoo gu nowotta pe aleŋ malaykatnigee ma aaye samaani. 26A gaa ma gaari ku naɗawco giimi ku mattenta pa, ku garkiye ɗa beneyyi ka Kitamniti Muusa maa ga Mella beneyyiyyee aatti tetteesane ma bakamme okko o ga agakka ɗa e? Mella beneyyiyee oko Muusa gaa: “Naa ay Mella Milti Biraayim, o ka Isaaka, o ka Yakub#12.26 Elloŋ Oomiti min Masir 3.2,6..”» 27Gaa Iisa gaayiɗe payya gaa: «Mella ay Milco giimi ma geewa. Gata ay Milco ɗa oko giimi ku mattenta. Kuŋ keeke masile ta kaw min butuuli.»

Hukumne ta yaata ƴiila

(Elloŋ Matiye 22.34-40, Lik 10.25-28)

28Lekka aalimne ka Kitamniti Muusa ma giyyica meelaco Iisa ma Saduseyennigee o ga giyyica tiiliti Iisa ta samaane. Gaa asiyya inna Iisa gaa: «Min oko hukumnigeetee Muusa paracco ay ŋawwa ma yaata ƴiila min oko gitti?» 29Gaa Iisa tiiliyyee gaa: «Hukumne ma yaata ƴiila min oko gitti beneyye gee: “Giyyoŋ ƴa kuŋ giimi ku Isirayel! Mella Miltine gata kayti ka ma ay Miltine. 30Ki ƴekekka Mella Milcum ma galbancum paratti o ma ruuhancum parattí o ma mooyicum parattí o ma gudirancum parattí#12.30 Elloŋ Ɗillico Hukumnigeyyo 6.4-5..” 31Hukumne ma danakka pa ay teete: “Ƴekkiya giicum aleŋ maa ki ƴekkiyya ziicum#12.31 Elloŋ Soƴoowee ku Saɗikaŋgeyyo 19.18..” Hukumnigee ku seera kooko lekka ɗa payya ma ƴiilay.»

32Gaa aalimne ka Kitamniti Muusa kaaka beneyyiyee oko Iisa gaa: «Garaawa, ay seene appe ga beneycum keeke: “Mella Miltine kayti ka. Lekka ɗa payya Mella kaƴi ma ay aleŋ gata#12.32 Elloŋ Ɗillico Hukumnigeyyo 4.35..” 33Kulla gimu aɗe ƴekekka Mella ma galbanti paratti o ma mooyiti parattí o ma gudiranti parattí, o ga ƴekekka giiti aleŋ maa ga ƴekkiyya ziiti. Hukumnigee kooko samaane ƴiila min oko saɗikaŋgee paracco maa gu giimi soƴee oko Mellayi o daare maa gu egekkay ɗamal#12.33 Elloŋ Ozee 6.6..» 34Maa ga Iisa giyyiyya kadar ga yookiya beneyyi ma ibino, gaa beneyyiyyee gaa: «Ki aaye ɗa payya arro min mulunniti Mellayi.» Gaa alɗo lekka ɗa payya gimu ma baabire ga inniyya.

Masi o Dawud

(Elloŋ Matiye 22.41-46, Lik 20.41-44)

35Iisa garkayyay giimi dooranti girti Mellayi, gaa inniɗiy gaa: «Ayme gu aalimnigee ku Kitamniti Muusa beneyɗo goo ga Masi, gata maa ga Mella aparre, ay Runti Dawud? 36Sultan Dawud saa ma kayaati gi Ruuhanti Mellayi gaariyee ga beneyyiɗe gaa:

“Mella Miltine beneyyiyee oko Miltu kee Masi gaa:

Asu ki asiɗo nunta tiyaawatu,

namma na asiɗiy gaga giimi ma ɗakattum kiɗaati min asincam ki urpiyyo ta rac#12.36 Elloŋ Soom 110.1..”

37A gaa Dawud saa ma kayaati kulla kolaa Masi gaa ga ay Milti, ga Masi deewa pe gaa me kulla runti ka?»

Miɗɗa ta jobbico aalimnigee ku Kitamniti Muusa

(Elloŋ Matiye 23.1-12, Lik 20.45-47)

Guu giimi maani gewɗiya beneyti Iisa o ga daanayo. 38Gaa Iisa garkayɗiy gaa: «Warroŋ maaƴi min oko aalimnigee ku Kitamniti Muusa ma ƴekka gu amalɗo ma kalaakabgee o gu aŋka gu giimi salamɗiy ma karaamane wereeriyee maa gu giimi temeɗɗo. 39Guta aparra wereeriyee ku omma gerraco ku giraaniti o gu nowotta wereeriyee ku omma ku tiyaawo. 40Guta teeway gerraco o lawco daati maa gu miɗicco matakke o gu beneyya maani maa guu enaa Mella ku maa gu giimi elelɗiy kadar gu ɗayaŋ. Saanane ka gaarco kooko ga Mella akkiy diigiya ƴiila min oko giimi daare!»

Kur̰aar̰a ta saamo

(Elloŋ Lik 21.1-4)

41Gaa Iisa nuntiɗe gaa gaabalɗiya ettu ka acipenta ma kolkolle ka kalliti guruzzi maa gu beree oko Mellayi. Gaa elelɗiy baŋ gu giimi kalaa goo me gurus. Guu lekkiɗo ayaawee maani ma kalaa gurus maani ta tirta. 42Gii lekkiɗo daate kaƴi saamo maa ga mittí matee ma ase kalla riyalen. 43Gaa Iisa kolliɗiy jobookeetee, gaa beneyyiyyoo gaa: «Na beneyyatoŋca seene: Daate ta saamo teete kalle ƴiila min oko giimi kooko ma kalle, 44asan gu guta paracco bire saɗikane oko Mellayi paalta ka min oko gurusco ka maani. A gita soopa ma saamuwti keeke aɗe, gi kalliya gurusti paratti ma nowottikiti.»

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Mark 12: mmy

Highlight

ಶೇರ್

ಕಾಪಿ