Matiye 26

Taattuweeco Yawudigeyyo aŋka diyawti Iisa

(Elloŋ Mark 14.1-2, Lik 22.1-2, Yaaya 11.45-53)

1Maa ga Iisa gaamiɗiy beneyyiŋgeetee kotti paracco, gaa beneyyiyyoo oko jobookeetee gaa: 2«Ku lekka kabarre kadar gi laalane ta Pakti gi marakkiti pe meeni seera ka, gii asiɗo. Gaa Runti Gimi gu asiyya bira ku maa gu paapiyya kuruwayi.»

3Gaa oko wikinne kaaka, gu taattuweeco soƴoowee ku saɗikaŋgeyyo o ajaawaŋgeeco Yawudigeyyo timmiɗe karaayiti Kayip ma ay tattuwco oko taattuweeco soƴoowee ku saɗikaŋgeyyo. 4Guu onniyya beneyco maa gu baamiyya Iisa ma n̰oor̰o ka, guu deeɗiya. 5Guu beneyɗo aacco goo: «Anneega baama ɗa ma meene ta laalanti, goneka kee gu giimi cepelleene hawwane.»

Daate kaƴi kalee itir kayaati Iisa

(Elloŋ Mark 14.3-9, Yaaya 12.1-8)

6Gaa Iisa alɗo darre ta Beetani, girti Simo ka jaddimenta#26.6 Simo keeke pa, diigiye ma judaam. Oko wikinne kaaka soopa ga rayyadde appe asan gu giimi tan̰aa paaɗe girti.. 7Gaa Iisa tewɗo iŋaa wikirti, gii daate kaƴi aɗe asiyyee katta. Gita pa bakamme koloŋgane ta dambeyyo ma onokke ma itir ka kaali ta tirta, gii kalliyyeega itir kaaka kayaati Iisa. 8Maa gu jobookeetee elliyya liyawti kaaka, guu ŋor̰omr̰omɗo aacco, guu beneyɗo goo: «Gayee pe ini me gi negeɗɗiya itir keeke? 9Ampane ke, ke geɗekkiki itir ka kaali keeke ma gurus maani ke ɗeddiyooga oko giimi ku saamo.» 10Maa ga Iisa leeɗiye kabarre oko beneyco kaaka, gaa beneyyiyyoo gaa: «Aɗaatiniiga niŋga ɗa ka galbantí. Lattaatí keeke maa gi leyyaw ay latta samaane. 11Giimi ku saamo ɗe aayitoŋ aɗe goŋŋa diiman aattoŋ. A naa soopa akkitoŋ ala ɗa diiman. 12Ma kallití ta itiri teete, gi hassiliya paaɗe ziitu tinaawi. 13Na beneyyatoŋca seene, dunuune parattí, were maa gu tasawɗica kabarre ta daana ta Mellayi, gu deeɗiy beneyyo gaarti daate teete maa gi leyyaw o gu deeɗica moyowwo.»

Yudas aŋka ga biriyya Iisa oko taattuweeco Yawudigeyyo

(Elloŋ Mark 14.10-11, Lik 22.3-6)

14Gaa kaƴi saa min oko jobookeetee Iisa ku orro o seera maa gu semeetee goo Yudas Iskariyot kaatiɗe gaa deeɗiy gassa taattuweeco soƴoowee ku saɗikaŋgeyyo. 15Gaa inniɗiy gaa: «Ku beraanaw minaw naa birittoŋga Iisa?» Guu biriyyee tammayigee ku poddani orooruwee subba#26.15 Kitamne tee ta Oomiti min Masir 21.22 beneyye gee ga gimu, gaa koydanti deero lawwu, ga pelekkee oko milti lawwi kaaka orooruwee subba tammayigee.. 16Ay min iŋaa appe ga Yudas deyeɗɗo pe wikinne ma wagee ku maa ga biriyyooga Iisa.

Iisa ma jobookeetee teewaca tiyaw ta laalane ta Pakti

(Elloŋ Mark 14.12-21, Lik 22.7-14,21-23, Yaaya 13.21-30)

17Gaa oko meene ta diilití laalane maa gu lewɗo mappa bala muɗugu#26.17 Laalane ta mappa bala muɗugu gu Yawudigee kolaaca kulla laalane ta Pakti. Elloŋ Oomiti min Masir 12.1-27., gu jobookeetee Iisa asiyya gassa. Guu inniyya goo: «Ki aŋka pe kii ni kaatiɗo taŋaa ni deeɗamca hassila tiyaw ta laalane ta Pakti?» 18Gaa Iisa pa tiiliyyoo gaa: «Ommoŋ geegarri, girti gimu kaƴi aɗe, kuu beneyyiyyee kuu: “Garaawatine gaa ga wikinne maa ga Mella caɗawwiyee ase. Haŋka pa, ga deeɗica tee tiyaw ta laalane ta Pakti ma jobookeetee gircum.”» 19Guu jobookeetee Iisa leeɗiya aleŋ maa ga Iisa beneyyiyoo. Guu leeɗica tiyaw ta laalane ta Pakti.

20Gaa maa gi paato galɗe, ga Iisa ma jobookeetee ku orro o seera nuntiɗe tiyaawi. 21Gaa maa gu tewɗo kaaka, ga Iisa beneyyiyyoo gaa: «Na beneyyatoŋca seene, kaƴi min aattoŋ akkino bira picco giimo.» 22Gaa oko beneyti kaaka, gu zorontiyɗe ta kaw. Gaa kulla kee aɗe enewɗiya gaa: «Miltu, ay naa ɗa ka ɗeɗe?» 23Gaa Iisa pa tiiliyyoo gaa: «Ay kaƴi aɗe ma nuuƴica lugumati kiɗiili ma naa, ay gata appe ma akkino bira picco giimo. 24Ta seene pa ga Runti Gimi gu akkiya dee aleŋ maa gi Kitamniti Mellayi beneyye ma gaartee. Raɗɗee soopa oko gimu ma akkiya bira picco giimo. Gimu kaaka guu weewiya ɗa kulla gi samaanee ƴiila.» 25Gaa Yudas ma beraa Iisa picco giimo inniyya gaa: «Garaawatu, ay naa ɗa ka ɗeɗe?» Gaa Iisa tiiliyyee gaa: «Ay kii saa ma beneyyiya keeke.»

Tiyawti Iisa ta Pakti ma jobookeetee

(Elloŋ Mark 14.22-26, Lik 22.14-20, 1 Korente 11.23-25)

26Gaa maa gu tewɗo kaaka, ga Iisa icciɗe mappa, gaa leeɗiyee barkinti oko Mellayi. Gaa erriyya, gaa biriyyooga oko jobookeetee o ga beneyya gaa: «Cawwoŋ ku teeɗo, keeke ay ziitu.» 27Gaa icciɗe kuraaka ta mirmi ku mor̰mor̰oskeyyo. Gaa leeɗiyee barkinti oko Mellayi. Gaa biriyyooca, gaa beneyyiyyoo gaa: «Aar̰oŋca parattoŋ, 28asan gu kooko ay baartaw maa ga Mella onniɗe liŋgane ta marawta ma gimtee o gu n̰alaa oko giimi maani ku maa ga Mella saamiyiyyoogu zunubgeeco. 29Na beneyyatoŋ, na ar̰aa ɗa payya ta kaw mirmi ku mor̰mor̰oskeyyo kooko namma ya meene maa na asiɗo aar̰a ku marawta ma kuŋ mulunniti Tattu.» 30Gaa min iŋaa gu reeɗe riyaawiŋgee ku laalane ta Pakti#26.30 Riyaawiŋgee ku laalanti kotti gu reeway Soomnigee 115–118.. Guu kaatiɗe gu deeɗe kalpa dambu ka olibiyeyyi.

Iisa beneyya ma ka meelati Piyer

(Elloŋ Mark 14.27-31, Lik 22.31-34, Yaaya 13.36-38)

31Gaa min oko kaaka ga Iisa beneyyiyyoo gaa: «Oko aandoŋ keeke aɗe ku capakkanaw parattoŋ, asan gi Kitamniti Mellayi beneyye gee: “Na akkiya uppa maggu naa deeɗiya, guu tameetee tacilɗo#26.31 Elloŋ Zakariya 13.7..” 32Na beneyyatoŋ naa ase naɗa min muuti soopa na omokka na deeɗitoŋ uca kiɗa ta Galilee.» 33Gaa Piyer tiiliyyee gaa: «Guu paracco kulla gu capakkam, ga naa pa capakkam ɗa ta kaw.» 34Gaa Iisa pa beneyyiyyee gaa: «Na beneyyamca seene: Oko aandoŋ keeke saa kadar ga kokkor bookiɗo ki melaa subbatiŋ kii ki ibinno ɗa.» 35Gaa Piyer tiiliyyee gaa: «Caŋ ga daw muutu ma kii kulla, na melaa ɗa ta kaw naa na ibinum ɗa.» Guu jobookeetee kulla paracco tiiliɗe aleŋ tanti taata aɗe.

Inniti Iisa Getsemani

(Elloŋ Mark 14.32-42, Lik 22.39-46)

36Gaa Iisa ma jobookeetee sarɗe were kaƴi aɗe maa gu kolaa goo Getsemani. Gaa beneyyiyyoo oko jobookeetee gaa: «Nuntoŋ iŋee aɗe, naa pa kadar kee kataa iŋaa na deeɗo inna Mella.» 37Maa ga katawɗo pa, ga gulmiya Piyer o rontee Zebedee serco. Gaa diiliɗe zorontiyo o gi galbanti koɗosse. 38Gaa beneyyiyyoo gaa: «Ziitu kallinoo ma ka muuti. Nuntoŋ iŋee aɗe ma naa bala ooƴo ta waano.» 39Gaa saapiɗe omma paalta. Gaa galɗe ga waaciyya unti kiɗaati. Gaa inniɗe Mella gaa: «Tattu, gii deewa, ki saapawca maaƴi kuraaka ta diiganti teete. Innasoopa gi addo dee ɗa ma aŋko tanni, gi dee ma aŋko tancum.» 40Gaa yookiɗe ga asiɗiy gassa jobookeetee ku subba koo guu oƴee. Gaa beneyyiyyee oko Piyer gaa: «Ku gederre ɗa ku nuntiɗe ma naa bala ooƴo saha kaƴi ka kulla e? 41Nuntoŋ bala ooƴo o ku enewwoŋga Mella ku maa ku alɗo gala ɗa sekelkilati. Galbanti gimi ɗe lekka niyyane ta samaane, ziiti pa lekka ɗa gudirane.»

42Maa ga beneyyiɗe goŋŋa, gaa yookiɗe payya ga deeɗe inna Mella gaa: «Tattu, gii deewa ɗa ki saapiyyawca kuraaka ta diiganti teete bala aar̰iti, na ar̰aaca. Gi aŋkicum dee!» 43Gaa yookiɗe payya, ga asiɗiy gassa jobookeetee guu oƴee. Waani appe ecekkiyooca namma gu alɗo gederra ɗa iyyico iɗiico. 44Gaa cappiyyoo. Gaa kaatiɗe payya oko ma daa ta subbatiŋ, gaa deeɗica ɗilla inniti gita ka. 45Gaa yookiɗe ga asiɗiy gassa jobookeetee, gaa beneyyiyyoo gaa: «Ku oƴaa missa ku nabaɗɗo e? Hiyya! Wikinne ase maa gaa Runti Gimi gu asiyya bira paaɗe oko giimi ma leewa zunubgee. 46Wacoŋ! Anne waaga ma giimi kotti. Elloŋga gimu ma beraano picco giimo ay gata appe keeke.»

Baamiti Iisa

(Elloŋ Mark 14.43-50, Lik 22.47-53, Yaaya 18.1-11)

47Iisa ƴa beneyya missa, gaa Yudas ma ay kaƴi min oko jobookeetee ku orro o seera asiɗe. Gata pa marawwiko giimi maani ma ecekke seepigee o gombolli. Ma n̰akammiy pa ay taattuweeco soƴoowee ku saɗikaŋgeyyo o ajaawaŋgeeco Yawudigeyyo. 48Yudas gata pa ma beraa Iisa picco giimo beneyyiyooga min omma oko giimi kotti latta maa ga leewayo ma garaa Iisa gaa: «Gimu maa na gogaa, ay gata appe maa ku deyekke, baamoŋga!» 49Gaa koɗok ga aaniyiyya cur Iisa. Gaa beneyyiyyee gaa: «Iŋŋe, garaawatu.» Gaa googiyya. 50Gaa Iisa pa tiiliyyee gaa: «Lanjintu, maa ki asee, liyawti keeke, ki leyya!» Guu daare tipiriyya Iisa, gu baamiyya.

51Gaa kaƴi min oko jobookeetee Iisa, jooticca seepanti min girtí. Gaa uppiyya lubaakati tattuwco oko taattuweeco soƴoowee ku saɗikaŋgeyyo. Gaa reepiyyeeca diiti kaɗak. 52Gaa Iisa beneyyiyyee oko jobookati kaaka ma uppe gaa: «Issica seepancum girti asan gu giimi ma bokaa ma seepane matakka ma seepane. 53Oko mooyicum ka, ki leewe kii walaŋ na gederra ɗa na wakkiyya Tattu ga n̰aamiyyaw alpaŋgee maani#26.53 Iisa beneyya iŋee ma ka orro o seera leziyon. Leziyon kaƴi pa ay alpaŋgee subba e baŋ ga alpaŋgee bizgiƴi asaakargee. ku malaykatnigeyyo gu mooginno e? 54A naa leyya aleŋ keeke pa, ga maa gu ketepeyye Kitamniti Mellayi asaa aɗɗe butulti? A gata pa ma ketepeyye Kitamniti aŋka ga deeɗo pe goŋŋa aɗe.»

55Gaa Iisa beneyyiyyoo oko giimi ku maani koo ma asee baamiti gaa: «Ku asee baamitu ma seepigee o ma gombolli aleŋ kuu na ay mariŋ ma onokka bottolli! Kulla meene na aaye aattoŋ doorane ta girti Mellayi na garkayɗiy giimi, kuu alɗino baama ɗa. 56A keeke soopa paratti deero ku maa gu beneyyiŋgee ku kutubgeeco nabiinigeyyo asiɗo butulco.» Guu jobookeetee Iisa paracco gaɗɗiɗe gu cappiyyee.

Iisa unco taattuweeco Yawudigee ku parlanti

(Elloŋ Mark 14.53-65, Lik 22.54-55,63-71, Yaaya 18.12-14,19-24)

57Guu giimi kotti ma baamiya kaatikkiki Iisa karaayiti Kayip. Kayip pa ay tattuwco oko taattuweeco soƴoowee ku saɗikaŋgeyyo. Iŋaa pa gu aalimnigee ku Kitamniti Muusa o ajaawaŋgeeco Yawudigeyyo temekke. 58Piyer soopa jobbiya Iisa min arro namma ya karaayiti tattuwco kee Kayip. Gaa un̰n̰iɗe ya dooranti. Gaa nuntiɗe ɗaɗɗakkico taraakee, ga elelɗo baŋ gu gaari kooko gakamma pe goo me.

59Guu taattuweeco soƴoowee ku saɗikaŋgeyyo o taattuweeco Yawudigeyyo ku parlanti paracco deyeɗɗo er̰n̰e ma borooli ka ku maa gu caaɗiyyee parlane ma ka muuti. 60Guu giimi maani bowoɗɗee oko Iisa. Guu alɗo lekka ɗa soo ma gassiyee er̰n̰e. Gaa sulaayi gu giimi daare seera asiɗe beneyya 61goo: «Meene kaƴi ni giyyiya gimu keeke maa ga beneyɗo gaa: “Na gederra na yeyyiyya girti Mellayi keeke, naa geewiyya ma meeni subba.”»

62Gaa tattuwco gata kee Kayip waciɗe ga inniyya Iisa gaa: «Ki telaa ɗa soo oko bowwico giimo maa gu bowoɗɗam teete e?» 63Gaa Iisa soopa ƴapawɗe kanti. Gaa tattuwco oko taattuweeco soƴoowee ku saɗikaŋgeyyo inniyya payya gaa: «Na halpayyam kii ma semeetee Mellayi, gata ma ay Miltí hayaatanti. Beneyyani ƴa, kii ay Masi, gata maa ga Mella aparre, ma ay Runti e?» 64Gaa Iisa pa tiiliyyee gaa: «Ay kii saa ma beneyyiya keeke. Na soopa beneyyatoŋ kadar ga katta ku akkiya ella Runti Gimi gaa nowotte tiyaawati Mella Miltí gudiranti o ku akkiya ella gaa asaa kayaaco n̰irɗa ku samaani.» 65Gaa oko beneyti Iisa kaaka ga tattuwco oko taattuweeco soƴoowee ku saɗikaŋgeyyo gi raɗɗiyee namma ga erriɗiy kaɗiŋgeetee. Gaa beneyyiɗe gaa: «Gata keeke n̰iliya Mella. Ke aŋka ɗa payya suyuudigee! Kuŋ saa kulla giyyiya maa ga n̰eleɗɗiya Mella. 66A oko mooyitoŋ ka kuu me pe?» Guu tiiliɗe goo: «Gata keeke ga kanti ay muutu ka pe.» 67Guu peseɗɗe olo wigisanti o gu kondossa, daare pa ɗacakka, 68o gu beneyye goo: «Kii ma ay Masi, gaa ay seene aɗe goŋŋa ki ay nabiinice, ki garaani ƴa, baŋ ga ay we ma kondissum?»

Piyer melaa gaa ga ibinya ɗa Iisa

(Elloŋ Mark 14.66-72, Lik 22.56-62, Yaaya 18.15-18,25-27)

69Gaa oko wikinne kaaka, ga Piyer nowoɗɗe ɗakko dooranti. Gii lubaaká kaƴi aɗe asiyyee saripti. Gii beneyyiyyee gee: «Kii kulla, ay kaƴi aɗe min oko gimtee Iisa ma ay ka kiɗa ta Galilee.» 70Gaa Piyer soopa meeliɗe unco giimi paracco gaa: «Naa ibinya ɗa beneyte keeke.» 71Gaa maa ga okomɗo paaɗe biití burgutti, gii lubaaká kaƴi payya elliyya. Gii beneyyiyyoo oko giimi kotti ma aaye gee: «Gata keeke kulla aaye ma Iisa ma ay ka geegar ka Nazaret.» 72Gaa Piyer meeliɗe payya gaa: «Na halpayya kadar na ibinya ɗa gimu kaaka!» 73Gaa oko wikinne paalta omma, gu giimi kotti ma aaye dooranti waciɗe, guu sappiyyee oko Piyer, guu beneyyiyyee goo: «Ma tirta aɗe ga kii keeke kulla ay giico oko giimi kooko. Liiccum saa kulla garaa kadar ki ay ka Galilee.» 74Gaa Piyer waciɗe beneyyi ma haliipine gaa: «Na ibinya ɗa gimu kaaka. Ga Mella boolino gaa beneytu keeke ay borooli.» Gaa oko wikinne kaaka saa ga kokkor bookiɗe. 75Gaa Piyer mooyiyya beneyti Iisa kee maa ga beneyyiyee gaa: «Kadar ga kokkor bookiɗo ki melaa subbatiŋ kii ki ibinno ɗa.» Gaa Piyer oomiɗe renta, gaa erciɗe ta tirta teete.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 26: mmy

Highlight

ಶೇರ್

ಕಾಪಿ