Matiye 27

Iisa gu katawki unti Guberner Pilat

(Elloŋ Mark 15.1, Lik 23.1, Yaaya 18.28)

1Gaa maa ga were walɗe, ƴekker ka, gu taattuweeco soƴoowee ku saɗikaŋgeyyo ma ajaawaŋgeeco Yawudigeyyo, paracco timme gu waaciɗiy kayyeeco ma ka diyawti Iisa. 2Guu onniya guu itiriyyeega oko Pilat. Pilat pa ay guberner maa gi hakuuma ta Rooma n̰akamme hikimiyti iŋaa kiɗa ta Yudee.

Yudas zewekka ziiti

(Elloŋ Lubaakico 1.18-19)

3Maa ga Yudas, gata ma birya Iisa picco taattuweeco Yawudigeyyo, elliɗe kadar gu caaɗiyee oko Iisa parlane ma ka muuti, ga ledemme oko lattaati maa ga leelo. Gaa yookiyyooga gurus kee ma ay orooruwee subba tammayigee ku poddani oko taattuweeco soƴoowee ku saɗikaŋgeyyo o oko ajaawaŋgeeco Yawudigeyyo. 4Gaa beneyyiɗe gaa: «Na leelo zunubgee, maa na biriyya muuti gimu maa ga aatti aaƴinta.» Guu guta pa tiiliyyee goo: «Nii, gi temekkini ɗa payya. Kaaka ay kii milco pe!» 5Gaa Yudas sooƴiyya gurus kee aatti girti Mellayi, gaa kaatiɗe ga deeɗe ziwwa ziiti. 6Guu taattuweeco soƴoowee ku saɗikaŋgeyyo buliyya gurus kaaka, guu beneyyiɗe goo: «Hukumnigeetine oyowwine ɗa ke tappiya gurus keeke oko sanduk ta kalliti gurus ka girti Mellayi, asan ga gurus keeke ay ka baartee gimi.»

7Guu boodiɗe, gaa ma gurus kaaka gu giɗiɗe gaan min oko gimu kaƴi aɗe ma ay gekeewa ka ondigeyyo. Gaan kaaka pa gu deeɗe tenekko turi ma ay Yawudigee ɗa. 8Ay ɗakko appe ya haŋka ga gaan kaaka gu kolowɗiya goo: «Gaan ka baaro.» 9Ay goŋŋa appe ga beneyti nabiinice Zeremi asiɗe butulti. Gata pa beneyye gaa: «Guu icciyya gurus ka orooruwee subba tammayigee ku poddani. Ay keeke ka ma ay tamanne ka gurus maa gu giimi ku Isirayel boodiki, gu gagiyeega oko gimi. 10Ma gurus kaaka pa gu giɗeero gaan min oko gekeewa ka ondigeyyo aleŋ maa ga Mella Miltine beneyyiyaw#27.10 Elloŋ Zakariya 11.12-13 o Zeremi 32.6-15..»

Iisa aaye unti Pilat

(Elloŋ Mark 15.2-5, Lik 23.1-5, Yaaya 18.28-38a)

11Guu kaatikkiki Iisa unti guberner kee Pilat. Gaa guberner kee Pilat inniyya gaa: «Ki ay sultanco Yawudigeyyo e?» Gaa Iisa tiiliyyee gaa: «Ay kii saa ma beneyyiya keeke.» 12Guu taattuweeco soƴoowee ku saɗikaŋgeyyo o ajaawaŋgeeco Yawudigeyyo bowoɗɗee, gaa gata pa alɗe tiila ɗa ya beneyyi kaƴi. 13Gaa Pilat beneyyiyyee gaa: «Kii geewaca ɗa bowwico giimo ta maani maani teete maa gu bowoɗɗam e?» 14Gaa Iisa alɗe tiila ɗa ya oko kaƴi min oko bowookico kotti. Gaa Pilat ga latta kaaka kaawiyyeeca kayaati.

Iisa gu beraa muuti

(Elloŋ Mark 15.6-15, Lik 23.13-25, Yaaya 18.38b–19.16)

15Kulla laalane ta Pakti aɗe ga Pilat capakkee oko gimu kaƴi min daŋayi maa gu Yawudigee aŋka. 16Gaa lekkiɗo oko wikinne kaaka, gimu kaƴi aɗe maa gu semeetee goo Barabas maa gu bakamme daŋayi. Gata pa ay gimu ibinenta. 17Gaa Pilat inniɗiy giimi kotti ma temekke gaa: «Ku aŋka na cappittoŋga Barabas e, e ga Iisa, gata maa gu kolaa goo Masi, gata maa ga Mella aparre?» 18A gata pa Pilat lekka kabarre kadar gu leyyee galbigee ku namta oko Iisa. Ay ɗakko appe gu itiriyyeega. 19Maa ga Pilat nowoɗɗe wikirti ka caaɗiti parlanti, gii daatti n̰aamiyyee gimu ga deeɗiyee beneyya gaa: «Warru maaƴi min oko gimu keeke, gata ga aatti aaƴinta asan ga aandoŋ keeke na diigiye ta tirta ma waano ma gaartee.»

20Guu taattuweeco soƴoowee ku saɗikaŋgeyyo o ajaawaŋgeeco Yawudigeyyo issiyyooca oko giimi ku maani goo gu innu ga cappiyyee oko Barabas, Iisa soopa ga birayooga gu deeɗiya. 21Gaa Pilat inniɗiy payya gaa: «Min oko giimi ku seera kooko, ku aŋka na cappiyyee oko ŋawwa?» Guu tiiliɗe ma cayyiko goo: «Barabas.» 22Gaa Pilat inniɗiy gaa: «A na leyya pe naa me Iisa maa gu kolaa goo Masi?» Gaa paracco guu tiiliɗe goo: «Paapiya kuruwayi!» 23Gaa Pilat inniɗiy payya gaa: «Ay ini me gaarta ku miɗɗa maa ga leelo?» Guu cayyikiɗe ma raɗɗa ƴiila goo: «Paapiya kuruwayi!» 24Maa ga Pilat elliɗe appe kadar ga beneyti gu ecekkaa ɗa, o gi hawwane gayaa ka gi gayawɗo ta ƴiila, gaa icce ammi, gaa apilɗiy pittee unco giimi paracco. Gaa beneyyiɗe gaa: «Naa ɗakko ɗa oko muutti gimu keeke. Kaaka ay ta kayyeetoŋ.» 25Guu giimi paracco tiiliɗe goo: «Gu baartee gimu keeke yookani oko nii o oko rontini.» 26Gaa Pilat cimmiyyooga Barabas min daŋayi. Iisa soopa gu r̰occiyya. Gaa biriyyooga oko asaakargeyyo ku maa gu deeɗiya paapa kuruwayi.

Asaakargee noƴokkee gaari oko Iisa

(Elloŋ Mark 15.16-20, Yaaya 19.2-3)

27Guu asaakargeetee guberner kee Pilat kaatikkiki Iisa ɗakko were maa ga guberner hekemeyɗe. Guu kollicca dazze parattí ta asaakargeyyo guu asiyya kadira. 28Guu settiyyeegu kaɗiŋgeetee, guu issiyyee kaɗiyyu binta tun̰ aleŋ kaɗiyyu ka sultanni. 29Guu paariɗe jiɗimo ma mataari ma lekka ejjemmi, guu issiyyeeca kayaati. Guu biriyyee pitti ka tiyaawa ettu ka torommi. Guu darasɗe unti gu noƴoɗɗee gaari goo: «Iŋŋe sultanco Yawudigeyyo!» 30Guu peseɗɗee olo, guu icciyya torom kee gu tamanɗiya kayaati. 31Gaa maa gu noƴƴiyyee paaɗe pa gaari, guu cimmiyya kaɗiyyu ka binta kee maa gu issiyyee. Guu issiyyeegu kaɗiŋgeetee ku omma koo. Guu kaatikkiki ku maa gu deeɗiya paapa kuruwayi.

Paapiti Iisa kuruwayi

(Elloŋ Mark 15.21-32, Lik 23.26-43, Yaaya 19.17-24)

32Gaa wikinne maa gu asaakargee okomɗiki Iisa min geegarri, guu waagiɗe ma miiɗi kaƴi aɗe maa gu semeetee goo Simo ma ay ka geegar ka Siren#27.32 Geegar ka Siren pa aaye kiɗa ta Libi.. Guu asarriyya goo ga goyyiya kuruwati Iisa, ga icciyya. 33Guu sarɗe were maa gu kolaa goo Golgota. Golgota pa goo ‘were ka gugur̰u ka kayaati’. 34Iŋaa pa gu biryee oko Iisa mirmi ku mor̰mor̰oskeyyo ma amasse ma maatiki kaƴi aɗe ƴelepta ma olaaca raɗɗo ta zii. Maa ga aawiyya pa, gaa poociɗe aar̰o. 35Guu paapiyya kuruwayi. Guu ɗeddiɗiy kaɗiŋgeetee ma liyaw ta jollo jolloti. 36Guu nuntiɗe paaɗe iŋaa kiɗaati gu taraɗɗiya. 37Guu paapiɗe ettu ɓeterter uwwa min kayaati. Ettu kaaka pa gu ketepeyyica er̰n̰e ta diyawti goo Gata keeke ay Iisa, Sultanco Yawudigeyyo. 38Oko wikinne kaaka saa guu paapiɗe kulla marŋi seera ma gata, kaƴi ma kuruwati nussane ka tiyaawati o kaƴi ma kuruwati ma nussane ka n̰ugilati.

39Guu giimi ma ƴelaa ma iŋaa torowɗiy kayyeeco o gu n̰elekkaa 40goo: «Ki ma beneyye kii ki ɗemekka girti Mellayi, kii geewiyya ma meeni subba ka, najjiyu paaɗe ziicum! Kii ay Runti Mellayi aɗe goŋŋa, ki beeru min kuruwayi!» 41Guu taattuweeco soƴoowee ku saɗikaŋgeyyo kulla o aalimnigee ku Kitamniti Muusa o ajaawaŋgeeco Yawudigeyyo noƴoɗɗe gaari goo: 42«Gata najjiye giimi daare, gaa alɗo gederra ɗa soopa ga najjiyɗo ziiti. Gaa ay sultan ka Isirayel, ga beeru paaɗe haŋka min kuruwayi, nii duwɗiy ka pe galbigeetini oko gata. 43Gata dowwica galbanti oko Mellayi. Gaa Mella ƴekkaa aɗe goŋŋa, ga piriya paaɗe haŋka asan ga beneyye gaa ga ay Runti Mellayi.» 44Ya marŋi kulla maa gu papee ma gata n̰elekkaa aleŋ teete aɗe.

Muutti Iisa

(Elloŋ Mark 15.33-41, Lik 23.44-49, Yaaya 19.28-30)

45Gaa min gaayilti namma ya saha subba tee ta ooriti ga namtuwe taggicca kiɗa parattí tee ta Isirayel. 46Gaa oko saha subba taata ga Iisa kolliɗe ma raɗɗa gaa: «Eli, Eli, lema sabaktani?#27.46 Beneyyi keeke pa ay ma beneyco Arameyennigeyyo. Elloŋ Soom 22.2.» Beneyyi keeke pa gaa ‘Mella Miltu, Mella Miltu, ayme ki poocinoo?’ 47Guu giimi daare ma aaye iŋaa giyyiya maa ga kolowɗo. Guu beneyyiɗe goo: «Gata kolaa nabiinice Eliyas.» 48Gaa koɗok ga kaƴi min aacco gaɗɗiɗe, gaa deeɗe icca latta kaƴi aɗe ma lamatta aleŋ n̰iriye, gaa luƴƴiyya aacco mirmi ku saɗamta. Gaa isiriyya torommi, gaa n̰aamiyyeega oko Iisa ku maa ga miƴirɗo. 49Guu gicco daare pa goo: «Warru ƴa ke elliyya baŋ ga Eliyas asaa aɗɗe ga asiyya najjiya.» 50Gaa Iisa kawwikiɗe payya ma raɗɗa, gaa jootiɗe.

51Ga oko wikinne kaaka saa, gii kaɗiyye ta yaata ma caɗawwiya girti Mellayi peetiɗe durgee seera min uwwa ya kiɗaati. Gii kiɗa azirɗe o gur̰bee pette, 52o mooniŋgee iyye. Guu giimi maani min gimtee Mellayi ma matakke min tippa naɗiɗe min muutti. 53Guu oomiɗe min mooniŋgeeco. Gaa maa ga Iisa naɗiɗe pe, hatta guu giimi kotti ma naɗe un̰n̰iɗe aatti geegarti Mellayi ma ay Zerizalem. Guu giimi maani elliɗiy. 54Gaa tattuwco asaakargee orooruwee orro ku Rooma o giimi ma aaye ma gata gu taraɗɗiya Iisa ellicca aziro ta kiɗaati taata o gaari kooko ma deero, gaa ɓayaw galiyyoo ta tirta. Guu beneyyiɗe goo: «Ay ma tirta pe ga gimu keeke ay Runti Mellayi.»

55Guu lekkiɗo iŋaa daati maani ma waraɗɗe min arro gu elelɗo. Daati kotti pa jobokkiya Iisa min kiɗa ta Galilee o gu lobokkee. 56Min aacco daati kotti pa, gu ini Mariyam ta geegar ka Magdala o Mariyam yaaco Zak ma sinti kee Yuusup o yaaco rontee Zebedee kulla aayiyo.

Iisa gu esekkaa mooniti

(Elloŋ Mark 15.42-47, Lik 23.50-56, Yaaya 19.38-42)

57Gaa maa gi paato galɗe, ga miiɗi kaƴi aɗe ma ay ayaawa ka geegar ka Arimatee asiɗe. Gata pa gu semeetee goo Yuusup o ga deero kulla jobookati Iisa. 58Gaa kaatiɗe wikirti Pilat ga deeɗiya inna ziiti Iisa. Gaa Pilat beneyyiɗe gaa gu bireega. 59Gaa Yuusup icciyya ziiti Iisa, gaa kappiniyya ma kapanne samaane. 60Yuusup pa lekka moone maa gu giimi caare daaɓanti kolkilenta were ma ay dambee. Ay iŋaakite appe ga deeɗiya issa ziiti Iisa. Gaa tepelpilɗe gur̰bu tatta ga ubicca moone taata, gaa kaatiɗe. 61Mariyam ta Magdala pa ma gattí Mariyam kaƴi aɗe nowotte kiɗaati gu gaabalɗica moone.

Tarawtí mooniti

62Meene maa gu hassalɗica meene ta nambiti gaame, gii meene ta nambiti asiɗe. Guu taattuweeco soƴoowee ku saɗikaŋgeyyo o Pariziyennigee kaatiɗe sawa wikirti Pilat. 63Guu deeɗiyee beneyya goo: «Tattuwtini, ni mooyiya beneyti daɓaala keeke maa ga alɗe mataa ɗa missa gaa: “Oko meene ma daa ta subba, na akka naɗa min muuti.” 64Kaaka pa, ki beneyyayo oko asaakargeecam gu taricca moone namma ya meene ma daa ta subba. Goneka kee gu jobookeetee asaa gu asiyya maasa ziiti, guu beneyyiyyoo oko giimo goo: “Gata naɗe min muutti.” Kaaka pa ga daɓallico ka sulaayi keeke akka dee payya suura ƴiila min oko ka omma.» 65Gaa Pilat tiiliyyoo gaa: «Kooko aɗe ay asaakargee. Aɗoŋ ku deeɗica tara moone aleŋ maa ku aŋka.» 66Guu kaatiɗe mooniti, guu leeɗiyee gaaro ma garaa baŋ ga gur̰bu wesekke aɗe min wikirti kaaka. Guu mirɗiy asaakargee ku maa gu taricca moone.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 27: mmy

Highlight

ಶೇರ್

ಕಾಪಿ