Matiye 28

Naɗawti Iisa min muuti

(Elloŋ Mark 16.1-8, Lik 24.1-12, Yaaya 20.1-10)

1Maa gi meene ta nambiti ƴiiliɗe, meene ta ahatti ƴekker ka, gi Mariyam ta Magdala o Mariyam kaƴi aɗe kaate ellití mooniti. 2Gaa kaytiŋ ka, gi kiɗa azirɗe raɗɗa asan ga malaykatti Mella Miltine beere min samaani. Gaa tepelpiliyya gur̰bu min biití mooniti, gaa nuntiyyee. 3Gata pa ɓelaa aleŋ eln̰o o kaɗiŋgeetee purta tal aleŋ n̰iriye. 4Guu taraakee ku mooniti kotti ɓayɗe ta kaw namma gu azarɗo, guu solliɗe aleŋ mattenta. 5Gaa malaykat kaaka soopa beneyyiyyoo oko daati kotti gaa: «Kuŋ aɗoŋ ɓaya ɗa! Na lekka kabarre kadar ku deyekka Iisa, gata maa gu paape kuruwayi. 6Gata aaye ɗa payya iŋee, Mella naɗiya min muutti aleŋ maa ga beneyye. Asoŋga ella were maa gu ɗerewɗiya, 7o ku aɗoŋ koɗok ku deeɗiyo taasa oko jobookeetee kuu ga naɗe min muutti o kuu ga omokkatoŋ kiɗa ta Galilee. Ay iŋaa appe ku deeɗiya ella. Ay keeke appe maa na beneyyatoŋ.»

8Guu daati kotti ɓayɗe, innasoo gu ay parhaŋgee ta kaw. Gaa koɗok gu gaɗɗiɗe min mooniti ku maa gu deeɗiyooca taasa kabarre teete oko jobookeetee Iisa, 9guu elliyya Iisa gaa asaayo. Gaa joobiɗiy gaa: «Iŋŋe kantoŋ, daati!» Maa gu sappiyyee katta, guu darsiɗe unti gu baamiyyeegu asintee ku maa gu aabidiya. 10Gaa Iisa beneyyiyyoo gaa: «Aɗoŋ ɓaya ɗa! Aɗaaniyo taasa oko seneetaw gu kaatiɗo Galilee. Ay iŋaa appe gu deeɗino ella.»

Borolco taraakee ku mooniti

11Gaa maa gu daati katawɗo butuuli kaaka, gu asaakargee koo ma tarakkaca moone gu ku daare kaatiɗe geegarri. Guu deeɗiyo taasa oko taattuweeco soƴoowee ku saɗikaŋgeyyo ma gaari kooko paracco ma deero. 12Guu taattuweeco soƴoowee ku saɗikaŋgeyyo timmiɗe ma ajaawaŋgeeco Yawudigeyyo ku maa gu waaciɗiy kayyeeco. Boodico pa ay maa guu biriyyo gurus maani oko ma tarica kotti moone, 13ku maa gu deeɗo beneyyo goo: «Jobookeetee ase ma aandoŋ maa ni oƴowɗe gu asiyya maasa ziiti.» 14Guu taattuwee kotti pa beneyyiɗe goo: «Gaa guberner giyyeero kadar ku oƴee waani, ni ebenna ka pe beneyyi maa ni beneyye ku maa ga alɗitoŋ lee ɗa ya gaari.» 15Guu ma tarica moone kotti icciyya gurus kaaka. Guu leeɗiya saa tak aleŋ maa gu beneyyiyoo. Gaa beneyyi keeke tacilɗe aacco Yawudigeyyo min meene taata namma ya haŋka.

Iisa n̰akammay jobookeetee

(Elloŋ Mark 16.14-18, Lik 24.36-49, Yaaya 20.19-23, Lubaakico 1.6-8)

16Guu jobookeetee Iisa ku orro o kaƴi pa kaatiɗe kiɗa ta Galilee dambu maa ga Iisa beneyyooga gaa gu addo. 17Maa gu elliya Iisa, guu darsiɗe gu aabidiyya, daare soopa min aacco bamakkica seera seera. 18Gaa Iisa pa saapiyyoo saripco, gaa beneyyiyyoo gaa: «Mella birawca gudirane parattí, samaani o kiɗaati. 19Kaaka pa ku aɗoŋ oko giimi ku ballee paracco ku kiɗaati, kuu leeɗiy gu deeɗo jobookeetaw. Kuu batisiyɗiy ma semeetee Mella Baaba o ku Runti o ku Ruuhanti. 20Kuu garkiyɗiy maa gu jobbiɗiy beneyyiŋgeetaw paracco maa na beneyyitoŋ. Naa pa aaye aɗe goŋŋa ma kuŋ meeni paracco namma ya dessití dunuuniti.»

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 28: mmy

Highlight

ಶೇರ್

ಕಾಪಿ