Matiye 23

Miɗɗa ta jobbico aalimnigeyyo o Pariziyennigeyyo

(Elloŋ Mark 12.38-39, Lik 20.45-46)

1Gaa Iisa beneyɗiyoo oko giimi ku maani kotti o oko jobookeetee gaa: 2«Aalimnigee ku Kitamniti Muusa o Pariziyennigee ay giimi ku duwenta ku maa gu garkayɗiy giimi ma hukumnigee paracco koo ku Kitamniti Muusa. 3Kaaka pa ku leewoŋga o ku jobokkoŋga paratti maa gu beneyyatoŋ. Innasoopa ku aɗoŋgu dalakka ɗa gaarco maa gu leewa, asan, ga maa gu beneyya kayti o maa gu leewa kayti. 4Guta garaayooga botol ka ibaadati oko giimo o gu gaaye gaari maani oko beneyti Mellayi kee ka Kitamniti Muusa ga dewɗiyo suura oko giimo. Guta pa gayay ɗa paalta ka kulla icciti. 5Garrarrico paracco maa gu leewa ay ku maa gu giimi ka elliɗiy. Ay goŋŋa appe gu tukki maa gu onokka onninco o gorreeco maa gu eseɗɗiy aayaŋgee ku Kitamniti Mellayi gu baramɗiy ƴiila min oko koo ku giimi ku maani. Picco o balleeco kaɗiŋgeeco gu leewiyo laskammi siƴƴa ƴiila min oko koo ku giimi ku maani. 6Guta ƴekka gu nowoɗɗo wereeriyee ku omma ku tiyaawo o gu ƴekka kulla gu nowoɗɗo wereeriyee ku omma gerraco Yawudigeyyo ku giraaniti. 7Guta pa gi daanayo guu giimi salamɗiy ma karaamane wereeriyee ku timmiti o gu kolowɗiy goo ‘Garaawee’.

8«A kuŋ soopa aɗoŋ aŋka ɗa gu giimi kolowɗitoŋ goo ‘Garaawee’, asan ga garaawatoŋ kaƴi ka, kuŋ pa parattoŋ ay seneeta ka. 9Iŋee kiɗaati ku aɗoŋ kolaa ɗa ya gimu kaƴi kuu ‘Tattu’, asan ga Tattoŋ kaƴi ka, gata pa ay Tattoŋ ma aaye samaani. 10Aɗoŋ aŋka ɗa gu kolowɗitoŋ goo ‘Aalimnigee’, asan ga Aalimnitoŋ kaƴi ka. Gata pa ay Masi, gata maa ga Mella aparre. 11Aŋka ga ka tatta ƴiila min aattoŋ deeɗo lubaakatoŋ. 12Ma cepellaca kayaati, ga Mella koyaa, o ma koyaa ziiti pa, ga Mella cepellaa.»

Diigane ma ocokkay aalimnigee o Pariziyennigee

(Elloŋ Lik 11.42-52)

13-14Gaa Iisa beneyɗiyoo missa gaa: «Kuŋ aalimnigee ku Kitamniti Muusa o Pariziyennigee, ku beneyya ma beneetoŋ ka, ka galbigeetoŋ pa kayti! Diigane ocokkitoŋ asan ku tagassayooga botol ka mulunniti Mellayi oko giimo. A gata pa kuŋ saa kulla ma kayyeetoŋ on̰aa ɗa o ma aŋka kulla un̰n̰o ga kuŋ pa toɗokkayo.

15«Kuŋ aalimnigee ku Kitamniti Muusa o Pariziyennigee, ku beneyya ma beneetoŋ ka, ka galbigeetoŋ pa kayti! Diigane ocokkitoŋ asan ku torgowwa kiɗaayeyyo o ku tapakka buhurgee ku maa ga gimu kaƴi ka kulla ku ribiliyya ga deeɗo Yawudince. Kuu ribiliya pa, ku negekkaa ga deeɗo gimu ka okkati ƴiila min oko kuŋ.

16«Kuŋ ma ay koor̰ee kuu ɗan̰aɗɗo giimi! Diigane ocokkitoŋ asan ku beneyya kuu gaa gimu halpiye ma girti Mellayi ay guu ɗa ga leeɗiy gaari kotti maa ga halpayɗe. A gaa halpiye soopa ma dahamne ka girti Mellayi, gu gaartee kotti maa ga halpayɗe ga leeway. 17Kuŋ gu kayyeetoŋ aaye ɗa o ku ay koor̰ee. Ay ŋawwa ma ƴiila? Ay dahamne e, e ga girti Mellayi ma leewa dahamne ga deeɗo duwenta oko Mellayi ka? 18Ku beneyya kulla kuu: Gaa gimu halpiye ma were ka sooƴiti saɗikaŋgeyyo, ay guu ɗa ga leeɗiy gaari kotti maa ga halpayɗe. A gaa halpiye soopa ma maatiki maa gu beraa were ka saɗikaŋgeyyo gu gaartee kotti maa ga halpayɗe ga leeway. 19Kuŋ ay koor̰ee. Ay ŋawwa ma ƴiila? Ay maatiki maa gu beraa were ka sooƴiti saɗikaŋgeyyo e, e ga were ka saɗikaŋgeyyo ma leewa maatiki maa gu beraa kaaka ga deeɗo duwenta oko Mellayi ka? 20Kaaka pa ga gimu ma halpayya ma were ka sooƴiti saɗikaŋgeyyo halpiye ma were kaaka o ma lawwi paracco ma aaye kayaati, 21o gimu ma halpayya ma girti Mellayi halpiye ma ger kaaka o ma Mella ma nowottiyee, 22o gimu ma halpayya ma samaane halpiye ma wikirti Mellayi ka mulunniti maa ga nowoɗɗe o ma gata ma nowottee.

23«Kuŋ aalimnigee ku Kitamniti Muusa o Pariziyennigee, ku beneyya ma beneetoŋ ka, ka galbigeetoŋ pa kayti! Ku beraa oko Mellayi durgu kaƴi min oko durgee ku orro ku tappitoŋ maa ku tomokka jineeniti, aleŋ naana o lawwi daare ku rootta ma nobokka daana maa ku amassa tiyaawi. Diigane ocokkitoŋ asan gu garrarri ku tirta soopa ma aaye Kitamniti Muusa ku dowwiyoo. Guta pa ay: nunto ta ɗayaŋ unti Mellayi o kawiyo o nunto ta damannenta ma Mella. Ay kooko appe ampane kee maa ku dee leewo bala rawtico oko ku daare. 24Kuŋ ay koor̰ee ma ɗan̰akka giimi. Kuŋ ƴerekkay lawtoŋ ku aar̰iti ku maa ku cimmiyya diwwu ka rootta, kuu seƴeɗɗo pe lokumu.

25«Kuŋ aalimnigee ku Kitamniti Muusa o Pariziyennigee, ku beneyya ma beneetoŋ ka, ka galbigeetoŋ pa kayti! Diigane ocokkitoŋ asan ku ay aleŋ giimi ma apallay kuraakeeco o taasayigeeco min taricco ka. Min aɗicco pa ku unenta ma lawtoŋ ku maasenta o ma moyoowiŋgeetoŋ ku kaarititi. 26Pariziyennice, kii ay koor̰! Diilu ya omma ki apilicca kuraakacum o taasacum min aɗicco, goŋŋa gu deewa kulla samaane min taricco.

27«Kuŋ aalimnigee ku Kitamniti Muusa o Pariziyennigee, ku beneyya ma beneetoŋ ka, ka galbigeetoŋ pa kayti! Diigane ocokkitoŋ asan ku saabayye aleŋ mooniŋgee maa gu sosoyyiyo maatiki ku maa gu alɗo purta tal gu alɗo samaane min renta. Min ɗakko soopa gu onokke ma assico giimi ku mattenta o ɗupaw paratti. 28Kuŋ kulla goŋŋa appe, iɗiico giimo ku saabayye aleŋ giimi ma ɗayaŋ unti Mellayi, innasoopa ku beneyya diiman ma beneetoŋ ka, ka galbigeetoŋ pa kayti o ɗakko galbigeetoŋ ku unenta ma gaari ku miɗɗa.

29«Kuŋ aalimnigee ku Kitamniti Muusa o Pariziyennigee, ku beneyya ma beneetoŋ ka, ka galbigeetoŋ pa kayti! Diigane ocokkitoŋ asan ku gekay samaane mooniŋgeeco nabiinigeyyo o ku r̰an̰akkay mooniŋgeeco giimi ku ɗayaŋ unti Mellayi. 30Ku beneyya kuu: “Nii alɗo wikinnico kookuweetini kaaka, ni esekka ɗa kayyeetini ma guta ni deeɗiy nabiinigee.” 31Ma beneytoŋ keeke pa ku gaare ga kuŋ saa kadar ku ay ronco ronco oko giimi ma deyyiy nabiinigee. 32Kaaka pa, ga maa gu kookuweetoŋ diile, ga kuŋ pa ɗoocoŋga paaɗe. 33Kuŋ ay barwee, ronco koykokko. Ku pakaa pe kuu me min diigane ta aattí okko ma batakka ɗa ta kaw?

34«Ay ɗakko appe ga naa asittoŋ n̰aama nabiinigee o giimi ma ibina gaari o aalimnigee ku Kitamniti Muusa ma akkitoŋ garkiya. Guu daare ku asiɗiy dee e baŋ pa ku deeway ma paapo kuruwayi. Daare pa ku akkiy r̰occa aɗicco gerratoŋ ku giraaniti o ku akkiy jobokko geegar ma geegar ku deegeyɗiy. 35Ma kaaka pa, gu baarco giimi maa gu aɗicco aaƴinta ma n̰aale yookatoŋ kayyeetoŋ, min oko baartee Abel ka ɗayaŋ unti Mellayi namma ya oko ku Zakariya runti Barasi#23.35 Zakariya pa ay nabiinice kaƴi ka Isirayel. Gata pa luumiyiy gimtee mileŋ gu poocica aabiditi Mellayi ta tirta guu soƴowɗo saɗikaŋgee oko zorro. Ay kaaka appe ga sultan ka Isirayel n̰aamiɗe giimi gu deeɗiya dee ɗakko girti Mellayi. Elloŋ 2 Jeppico Gaarco Salaataŋgeyyo 24.20-21. maa ku deero beenanne were ka sooƴiti saɗikaŋgeyyo o girti Mellayi. 36Na beneyyatoŋca seene, oko diyaawi kooko paracco, ga bogorti Mellayi akkiyoo gala oko giimi ku haŋka kooko.»

Iisa o giimi ku geegar ka Zerizalem

(Elloŋ Lik 13.34-35)

37Gaa Iisa beneyɗiyoo gaa: «Hayyii, kuŋ giimi ku Zerizalem! Hayyii, kuŋ giimi ku Zerizalem! Kuŋ ma deeway nabiinigee o ku deeway ma dawwo ta dambeyyo giimi maa ga Mella n̰amakkatoŋ. Diiman na aŋke na timmittoŋ sariptu aleŋ kukkira ma gomokkay ronti enderti, gaa kuŋ soopa poociɗe. 38Haŋka pa ga girtoŋ ma ay kee ka Mellayi akka dee poocenta, gaa nuntiɗo aaƴinta. 39A gata pa, na beneyyatoŋ ƴa, katta ku akkino ella ɗa payya namma ya meene maa ku asiɗo beneyya kuu: “Baarikenta ay gata ma asaa ma semeetee Mella Miltine#23.39 Elloŋ Soom 118.26..”»

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 23: mmy

Highlight

ಶೇರ್

ಕಾಪಿ