Matiye 22

Masal ta giimi maa gu kolee tiyaw ta jiizanti

(Elloŋ Lik 14.15-24)

1Gaa Iisa beneyɗiyo payya ma masalnigee gaa: 2«Mulunniti Mellayi saabayye aleŋ sultan ma leelo tiyaw oko jiizane ta runti. 3Gaa n̰aamiɗiy lubaakeetee gu deeɗiy kolla giimi maa ga beneyyiyoo jiizanti. Guu guta soopa poociɗe asaw. 4Gaa n̰aamiɗe payya lubaakee daare gaa: “Aɗaaniyo beneyya payya oko maa na kolee koo kuu: Koydigeetaw o ijjalgeetaw ku niirenta na daɓasayyiy paaɗe. Tiyaw parattí gu leewica appe. Kaaka pa gu asu appe jiizanti.” 5Guu guta soopa alɗikiti baama ɗa kollo taata. Kaƴi ɗe kaate ganti, o ka kaƴi pa kaate ma lawtee sunniti. 6Ku daare pa bammiy lubaakee kotti maa ga n̰aame. Guu diigiyɗiy, guu deeɗiy. 7Gaa sultan boŋsiɗe. Gaa n̰aamiɗe dazze ta asaakargeetee guu deeɗiy dee diyaawee kotti. Guu oosiyya geegarco. 8Gaa sultan beneyyiyyoo oko lubaakeetee gaa: “Tiyaw ta jiizanti gu leeca appe, giimi ku kollenta soopa saabayye ɗa gu teeɗica. 9Kaaka pa ku aɗoŋ bottolli ku taatta ma pacakka ku deeɗiy kolla giimi paracco maa ku gasse ka oko tiyaw ta jiizanti teete.” 10Guu lubaakee guta kaatiɗe bottollo. Guu timmiɗiy paracco maa gu gasse, ku gidaani ɗa o ku gidaani. Gaa daŋaye maa gu tewɗica tiyaw ta jiizanti unɗe ma giimi maa gu kolee. 11Gaa sultan un̰n̰iɗe ku maa ga elliɗiy giimi ku kollenta. Gaa elliɗe iŋaa gimu kaƴi ma esekke kaɗiyyu ma ay ka jiizanti ɗa. 12Gaa beneyyiyyee gaa: “Lanjo, ki un̰n̰e kii me iŋee bala kaɗiyyu ka jiizanti?” Gaa gimu kaaka pa alɗe gassa ɗa beneyyi ga tiiliɗe. 13Gaa sultan beneyyiyyoo oko lubaakeetee gaa: “Onnineegu asintee o pittee, kuu cimmiyya, kuu uwwiyya maaƴi renta namtuwwi. Iŋaa pa gu giimi erecca o gu ayammay saanco.” 14A guta pa giimi maani ma kollenta, ku apirenta soopa maani ɗa.»

Pilko ta miiri

(Elloŋ Mark 12.13-17, Lik 20.20-26)

15Maa gu giyyicca masalti teete, guu Pariziyennigee tirriyɗe, guu deeɗiy waaca kayyeeco ku maa gu ɗebbiyya Iisa ma inno ku maa gu baagiyya ma beneyti saa. 16Ay kaaka appe gu n̰aamiɗe minnaw min oko jobookeeco ma giimi ma gayaa lubbi sultan Erod Antipas#22.16 Giimi ma gayaa lubbi Erod pa, ay Yawudigee ma gayaa oko hikimiyco Roomennigeyyo taata. Erod Antipas pa ay guberner ka kiɗaayee ku Galilee o ku Pereya. Guta pa ma gicco Pariziyennigee gi galawwiyoo ɗa. Maa gu loboɗɗo sawa pa, ay asan gu aŋkica ɗa giraaniti Iisa. ma geewaa beneyti. Guu deeɗiya inna goo: «Garaawa, ni lekka kabarre kadar ki beneyya wacac o ki garay ma seene bottoltee Mellayi ma ay koo ku jobbiti. Kii, gi temekkum ɗa maa gu giimi moyaa oko kii, asan ki ɓayakka ɗa iɗiico giimo. 17Beneyyani ƴa! Oko mooyicum ka gu hukumnigeetine oyowwine e, e gu oyowwine ɗa ke peleɗɗo miiri oko tattuwe ka tatta ka Rooma kee Seezar?» 18Gaa Iisa soopa ibinicca mooyico ta miɗɗa, gaa beneyyiyyoo gaa: «Ayme ku aŋkiɗo ku cokkinno ma daɓaali, kuu baaminnawga beneytu, ga kuŋ ma beneyya ma beneetoŋ ka, ka galbigeetoŋ pa kayti? 19Gaarinaw ƴa tammaye kaƴi ta pilkiti miiri.» Guu gaariyyee kaƴi ku maa ga ellicca. 20Gaa inniɗiy gaa: «Wigisane keeke o kitipiyo teete ma aaye tammayi ay ku we?» 21Guu guta pa tiiliyyee goo: «Ay ku Seezar.» Gaa Iisa beneyyiyyoo gaa: «Kaaka pa, ga ma ay ka Seezar ku birneega oko Seezar o ma ay ka Mellayi ku birneega oko Mellayi.» 22Maa gu giyyicca tiiliti taata, guu ajjibiɗe ta tirta, guu cappiyyee iŋaa, guu ƴiiliɗe.

Inno ma gaari ku naɗaw min muuti

(Elloŋ Mark 12.18-27, Lik 20.27-40)

23Gaa oko meene taata saa, gu Saduseyennigee asiyyee oko Iisa. Guta kotti pa beneyya goo gu giimi ma matakke naɗakka ɗa. Guu inniyya Iisa goo: 24«Garaawa, Muusa beneyye Kitamniti gaa: “Gaa gimu icce daate, gii alɗiyee wee ɗa, gaa maatiɗe, ga sinti pa ecekkaca daatti ku maa gi weeɗe miici oko ma maate#22.24 Elloŋ Ɗillico Hukumnigeyyo 25.5..” 25Guu lekkiɗo pe seneeta paysara aattini. Gaa ka tatta icciɗe daate, gii alɗiyee wee ɗa gaa maatiɗe. Gii daatti ga miriyyeeca oko sinti ma danakka. 26Gaa ma daa ka seera kulla iccicca, gii alɗiyee wee ɗa, gaa maatiɗe, o ma daa ka subba kulla iccica. Gaa goŋŋa appe namma ya paysaraco gi deeɗe daacco. 27Gaa maa gu mattiɗe paracco paysaraco, gii daate taata kulla maatiɗe. 28Gaa meene maa guu giimi ase naɗa min muuti pa, gi daate taata akka dee pe tanti oko ŋawwa? Asan ga paysaracco gi deero daacco.»

29Gaa Iisa tiiliyyoo gaa: «Kuŋ keeke masile min seeniti asan ku ibinya ɗa ka Kitamniti Mellayi o gudiranti Mellayi. 30A gata pa, meene maa guu giimi ase naɗa min muuti, gu miɗi sokokka ɗa payya daati o daati sokokka ɗa miɗi. Innasoo gu nowotta pe aleŋ malaykatnigee ma aaye samaani. 31A gaa ma gaari ku naɗaawi min muuti pa, ku garkiya ɗa aɗe beneyyi maa ga Mella beneyyitoŋ Kitamniti e? Gata pa gaa: 32“Naa ay Mella Milti Biraayim, o ka Isaaka, o ka Yakub#22.32 Elloŋ Oomiti min Masir 3.6. Wikinne maa ga Mella beneyye keeke oko Muusa, Biraayim, Isaaka o Yakub guta pa matakke min tippa. Innasoo ma amanno ke lekka kabarre kadar gu aaye ma gata ma ay Miltí hayaatanti..”» Gaa Iisa gaayiɗe payya gaa: «Mella ay Milco ɗa oko giimi ku mattenta. Gata ay Milco oko giimi ma geewa.» 33Maa gu giimi ku maani kotti giyyicca tiiliti Iisa teete, guu ajjibiɗe ta tirta oko giraaniti teete.

Hukumne ta yaata ƴiila

(Elloŋ Mark 12.28-34, Lik 10.25-28)

34Maa gu Pariziyennigee guta pa giyyiɗe kadar gu Saduseyennigee gasse ɗa beneyyi maa gu tiiliyyee oko Iisa gu timme ku maa gu inniyya. 35Gaa kaƴi min aacco ma ay aalimne ka Kitamniti Muusa icciyya beneyyi ku maa ga ɗebbiyya Iisa gaa: 36«Garaawa, min hukumnigee ku Kitamniti Muusa, ay ŋawwa ma ay ta yaata ƴiila?» 37Gaa Iisa tiiliyyee gaa: «“Ƴekkiya Mella Milcum ma galbancum paratti o ma ruuhancum parattí o ma mooyicum parattí#22.37 Elloŋ Ɗillico Hukumnigeyyo 6.5..” 38Ay teete appe ay hukumne ta yaata ƴiila o gi lekka ɗa payya ma ƴiilaca. 39Gii lekkiɗo payya kaƴi ma danakkaca ma saabayyica. Gita pa gee: “Ƴekkiya giicum aleŋ maa ki ƴekkiyya ziicum#22.39 Elloŋ Soƴoowee ku Saɗikaŋgeyyo 19.18..” 40Ay hukumnigee ku seera kooko appe ma temekkiy Kitamniti Muusa o kutubgeeco nabiinigeyyo.»

Masi o sultan ka tatta kee Dawud

(Elloŋ Mark 12.35-37, Lik 20.41-44)

41Gaa maa gu Pariziyennigee temeɗɗe kaaka, ga Iisa inniɗiy gaa: 42«Oko kantoŋ ka, ga Masi, gata maa ga Mella aparre, ay runti we?» Guu tiiliyyee goo: «Ay Runti Dawud.» 43Gaa Iisa pa beneyyiyyoo gaa: «Masi deewa pe gaa me Runti Dawud asan ga sultan Dawud saa ma kayaati gi Ruuhanti Mellayi gaariyee ga kolliyya gaa Miltine, maa ga beneyyiɗe gaa:

44“Mella Miltine beneyyiyee oko Miltu kee Masi gaa:

Asu ki asiɗo nunta tiyaawatu

namma na asiɗiy gaga giimi ma ɗakattum kiɗaati min asincam ki urpiyyo ta rac#22.44 Elloŋ Soom 110.1..”

45A gaa Dawud appe pa kolaa Masi gaa ga ay Milti, ga Masi pa deewa pe gaa me runti ka?» 46Gaa alɗo lekka ɗa ya kaƴi ma gederre ga tiiliyyee ya beneyyi kaƴi. Gaa min meene taata ga alɗo lekka ɗa payya gimu ma baabire ga inniyya.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Matiye 22: mmy

Highlight

ಶೇರ್

ಕಾಪಿ