लूका 2

यीशु रा जन्म

1तिन्हा रोज्जां बिच रोम देस रे सम्राट औगुस्तुस ने ए हुकम दित्ता की सारे रोमी साम्राज्य रे सारे मणू गिणे जाये ताकि तिन्हेरे का चुंगी वसूली जाए। 2ए जनगणना तिस्स बेल्ले होई थी, जां सीरिया प्रदेश रा राजपाल क्विरिनियुस थिया, अते ए जनगणना पैल्ली वरी होया करदी थी। 3सब मणू जनगणना तांइ अपणा नां लिखाणे तांइ अपणे-अपणे सहर जो गे। 4ते यूसुफ जे कि गलील प्रदेश रे नासरत कस्बे अन्दर रैहन्दा थिया, तिसजो भी यहूदियां प्रदेश अन्दर बैतलहम कस्बे जो जाणा पेया, किजोकी से दाऊद राज्जे रे टब्बरे रा थिया, ते तिसेरे पुरखे बैतलहम कस्बे अन्दर रैह्‍न्दे थिये। 5ते से अपणी मंगेतर मरियम, जे कि उस बेल्ले दुपराणी थी, तिसजो भी अप्पु कन्ने नां लखाणे जो लेई गेया 6जां से मणू बैतलहम कस्बे बिच ही थिये तां मरियम रे लोक्किणे रा समय आई गेया, 7ते तिनिये अपणे पैल्ले मुंडे, यीशु जो जम्मेया, अते तिसजो फालड़ी अन्दर लपेटी करी चरिह् अन्दर रखेया, किजोकी तिन्हेरे जो सराये बिच रैह्णे तांइ जगाह् नी मिल्ली थी।

पुहालां जो स्वर्गदूतां रा बसेख

8ते तिधाड़ी ही तिस इलाके अन्दर किच्‍छ पुहाल रात्ती बेल्ले अपणे धणा रा द्रबड़ा अन्दर पैह्रा देया करदे थिये। 9ते तिस बेल्ले इक्क परमेश्वर रा स्वर्गदूत तिन्हेरे मुहाग्गर आई खड़ा होया, ते प्रभु री महिमामय रौसनी ने तिन्हा जो चौंह्-पास्से का घेरी लेया, ते ए सब दिख्खी करी से बड़े-भरी डरी गे। 10ते तिस बेल्ले स्वर्गदूत ने तिन्हा जो बोल्लेया, तुसा डरो मत, किजोकी दिख्खो, मैं तुसा जो इक्क इदेया सुब बसेख सूणाणा, जे सबणी मणूआं तांइ होणा, 11ते से सुब बसेख ए है, कि अज्ज दाऊद राज्जा रे कस्बे बैतलहम अन्दर सबणी मणूआं तांइ इक्क छुटकारा दैणे वाले रा जन्म होया, अते से ही मसीह प्रभु हिन, 12ते तुसा जो इस गल्ल रा विश्वास कराणे तांइ ए पछाण दिन्दा, कि तुसा ने इक्क निक्के जो फालड़ी बिच लपटित्तेरा, चरिह् अन्दर दिख्खणा। 13तिस्सी बेल्ले, चाण-चक्केई तिस स्वर्गदूत कन्ने मते सारे स्वर्ग रे होर भी दूतां रा झुण्ड परमेश्वर री बड़ाई करदे करदे लिब्बेया ते से ए बोलणा लग्गे,

14“स्वर्ग अन्दर परमेश्वर री बड़ाई हो,

ते दुनिया अन्दर तिन्हा मणूआं अन्दर सांती हो

जिन्हा कने परमेश्वर खुस हिन।”

15जिस बेल्ले से स्वर्गदूत तित्ते का वापस स्वर्ग जो हटी गे तां पुहाल अप्पु-मिते बोलणा लग्गे, चलो, असा बैतलहम जाई करी ए जे अनौखी गल्ल होई, जिस्सेरे बारे अन्दर प्रभु जी ने असा जो अपणे स्वर्गदूत जो भेज्जी करी बोल्ली, असा दिख्खी आन्दे 16ते तिस्सी बेल्ले से चली गे ते तित्ते जाई करी तिन्हा ने मरियम ते यूसुफ जो इक्क गुआड़ी बिच, ते तिस निक्के जो फालड़ी अन्दर लिपटित्तेरा चरिह् अन्दर लेटे रा दिख्खेया। 17ए सब दिखणा का बाद तिन्हा पुहालां ने से सब किच्‍छ याद कित्तेया जे स्वर्गदूतां ने तिन्हा कने द्रब्बड़ बिच बोल्ली थियां। 18जितणे भी मणूआं ने पुहालां री ए गल्ल सूणी, से सब मणू हैरान होई गे। 19पर, मरियम इन्हा सबणी गल्लां जो अपणे मना बिच रख्खी करी सोचदी रेह्ई 20ते जिय्यां स्वर्गदूतां ने पुहालां जो बोल्ले रा थिया, तिय्यां ही सब किच्‍छ दिख्खी-सूणी करी परमेश्वर री जै-जै कार अते बड़ाई करदे-करदे वापस द्रबड़ा जो अपणे धणा का हटी गे।

यीशु रा नां रख्खेया जाणा

21यीशु रे पैदा होणे का बाद अठ्ठमे रोज्जे, तिन्हेरा खतना होया ते तिन्हेरा नां यीशु रख्खेया गेया, जिय्यां कि तिन्हेरे पैदा होणे का पैल्ले ही स्वर्गदूत ने मरियम जो बोल्लेया थिया।

मन्दिर बिच यीशु रा अर्पण

22मूसा रे कानून रे हिसाब कने मुंडे रे पैदा होणे रे चाली दिनां बाद, मन्दिर बिच मरियम री शुद्वीकरण री कुर्बानी दैणे रा समय थिया, ते मरियम ते यूसुफ यीशु जो परमेश्वर रे सामणे समर्पित करणे तांइ यरुशलेम रे मन्दिर बिच लेई गे। 23जिय्यां कि परमेश्वर रे कानून बिच लिख्खे रा है, कि जेठ्ठा मुडां परमेश्वर रा ही कम्म करणे तांइ समर्पित कित्तेया जाए। 24ते परमेश्वर रे कानून रे हिसाब कने घुग्घी रा इक्क जोड़ा या कबूतर रे दो बच्चेयां जो कुर्बानी करी के परमेश्वर जो चढ़ाण।

शमौन री भविष्यवाणी

25तिन्हा दिनां बिच, यरुशलेम सहर अन्दर शमौन नां रा इक्क मणू रैहन्दा थिया, से परमेश्वर रे रस्ते पर चलणे वाला, भला अते नेक मणू थिया, से बड़ी उम्मीद कने मसीह रे आणे रा इंतजार करेया करदा थिया ताकि से आई करी इस्राएल रे मणूआं जो सांती दये, ते शमौन पवित्रात्मा रे गलाये चलदा थिया। 26ते पवित्रात्मा ने तिस पर ज़ाहिर कित्तेया थिया, कि तैं तां तांइ नी मरणा है, जां तांइ तू परमेश्वर रे भेज्जे रे “मसीह” जो अपणी हाख्खी कने दिख्खी नी लैणा। 27फिरी शमौन जो पवित्रात्मा ने यरुशलेम रे मन्दिर अन्दर जाणे जो बोल्लेया, ते तिस्सी रोज्जे यूसुफ कने मरियम परमेश्वर रे कानून रे हिसाब कने अपणे निक्के, यीशु जो सभास्थल अन्दर लेई आये ताकि से अपणे निक्के जो परमेश्वर रे अग्गे सौंपी सकण। 28शमौन तिस बेल्ले सभास्थल अन्दर ही थिया, ते से यीशु जो अपणे हत्थां बिच चुक्की करी परमेश्वर री बड़ाई करदे-करदे बोलणा लग्गेया: 29ओ मेरे प्रभु जी, अवे मैं सांती कने मरी सकदा, किजोकी तुसा री बोल्ले री गल्ल अज्ज पूरी होई गई, 30किजोकी, मैं अपणी हाख्खी कने तुसा रे भेजे रे छुटकारा दैणे वाले जो दिख्खी लेया, 31जिस जो तुसा ने देस रे सबणी मणूआं तांइ भेज्जेया 32ताकि मसीह गैर यहूदी मणूआं जो परमेश्वर रा रस्ता दिखाणे वाली रौसनी बणना, ते इस्राएल रे मणू, जे कि तुसा रे अपणे हिन, तिन्हा तांइ ए परमेश्वर री महिमा लियाणे री वजह बणना। 33जे गल्लां शमौन ने यीशु रे बारे बिच बोल्ली थी, से सुणी करी, यूसुफ ते मरियम हैरान होई गे। 34फिरी शमौन ने तिन्हा जो आशीष देई करी यीशु री मां, मरियम जो बोल्लेया, इस निक्के री वजह कने इस्राएल रे मते मणू बचाए जाणे ते मते मणू नास होणे, ते बड़े लोक्कां ने इसेरे खिलाफ होणा। 35इस कने मते लोक्कां री दिल री लुके री गल्लां सामणे आई जाणी, ते लोक्कां ने तिस कने इन्नी क्रूर चीजां करणी कि से दिख्खी करी तुसा जो इन्नी तकलीफ होणी कि जिय्यां तुसा रे दिल बिच तलवार खूबी गे री हो।

हन्नाह री गवाई

36अशेर गोत्र बिच का फनुएल री कुड़ी हन्ना इक्क भविष्यद्वक्तिणी करणे वाली थी, तिसेरे ब्याह् जो हल्ले कोई सत्त साल ही होये रे थिये, कि तिसेरा लाड़ा मरी गेया। 37ते से फिरी चुरास्सी साल्लां तांइ विधवा ही रेई। तिनिए मन्दिर जो कदी भी नी छड्डेया, ब्रत्त अते प्रार्थना करदे परमेश्वर री भक्ति करदी रेह्न्दी थी। 38जां से मणू मन्दिर बिच ही थिये, तां हन्ना तिन्हा लोक्कां का आई, ते परमेश्वर री महिमा करणा लग्गी, ते तिसने लोक्कां जो तिस मुंडे रे बारे बिच दसणा लग्गी जे मणू तिस मसीह रे इंतजार बिच थिये जिस जो ने भेज्जी करी यरुशलेम रे लोक्कां जो छुटकारा दैणा।

नासरत जो वापस हटणा

39जां मरियम ते यूसुफ परमेश्वर रे कानून रे हिसाब कने सब किच्‍छ पूरा करी बैठ्ठे, तां से अपणे घरे, नासरत कस्बे बिच जे कि गलील प्रदेश बिच है, तित्ते जो हटी गे।

बचपन बिच यीशु रा सभास्थल बिच जाणा

40ते तित्ते यीशु जिस्मानी ते आत्मिक गल्लां अन्दर मुटिंदे गे से समजदार थिये ते परमेश्वर री दया तिन्हा पर थी 41फसह रा त्याहार पर हर साल, तिन्हेरे मां-प्यो, यूसुफ ते मरियम यरुशलेम जान्दे थिये। 42जां यीशु बारा साल्ले रे होये, तां से हर वरी सांई फसह रा त्यहार मनाणे तांइ यरुशलेम जो गे 43जां त्योहर मुकी गेया, तां मरियम ते यूसुफ घरे जो हटेया करदे थिये, तां यीशु यरुशलेम बिच ही रेई गे, ए गल्ल तिन्हेरे मां प्यो जो पैल्ले ध्यान बिच नी आई कि तिन्हेरा निक्का तिन्हा कन्ने नी है। 44तिन्हा ने ए समजेया, कि तिन्हेरा निक्का होरणी मणूआं कने होणा, जां से पूरी ध्याड़ी सफर करदे रे तां से यीशु जो अपणे रिस्तेदरां अन्दर तोपणा लग्गे 45पर जां तिन्हा जो अपणा निक्का नी मिल्लेया तां से दोह्ई जणे तिस्जो तोपदे-तोपदे यरुशलेम जो वापस हटी गे 46फिरी इय्यां होया कि त्रीय्ये रोज्जे तिन्हा ने यीशु जो मन्दिर रे अंगण बिच परमेश्वर रे कानून रे सखाणे वालेयां रे मंझाटे बैठ्ठे रा ते तिन्हेरी सूणदे ते तिन्हा कने सुआल पुछदे दिख्खेया। 47से सब जह्णे, जे कि यीशु री गल्लां सूणदे थिये, से तिन्हेरी समजदारी अते तिन्हेरे सुआलाँ का हैरान थिये 48जां यीशु रे मां-प्यो ने भी तिन्हा जो दिख्खेया तां से भी हैरान होई गे ते मरियम ने यीशु जो पूच्छेया, ओ निक्केया, तैं असा रे कने इय्यां किजो कित्ता, तू इत्ते किजो रुकी गे रा थिया? असा बड़े उदास होई गेरे थिये, तेरे प्यो ते मैं, तिज्जो कुते कुते नी तोप्पेया? 49यीशु ने तिन्हा जो बोल्लेया, तुसा मेरे जो किजो तोपदे थिये? कै तुसा ए नी जाणदे कि मेरे तांइ अपणे प्यो रे घरे रैह्णा कितणा जरुरी है? 50पर यीशु ने तिन्हा जो जे जवाब दित्तेया, से तिन्हेरी समझ अन्दर नी आया। 51ते फिरी से तिन्हा कने नासरत कस्बे बिच आई गे ते अपणे मां प्यो रे गलाए पर चलदे रे ते यीशु री मां ने इन्हा सब गल्लां जो अपणे मन बिच ही रख्खेया, 52ते यीशु समझ, कद-काठी अते परमेश्वर ते मणूआं री दया बिच बद्धदे गे।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 2: CDHNT

Highlight

ಶೇರ್

ಕಾಪಿ