लूका 19

चुगीं लैणे वाला जक्कई

1यीशु यरीहो ना रे सहर का जाया करदे थिये। 2तित्ते जक्कई ना रा मणू चुंगी वसूलणे वालेयां रा प्रधान, अते से बड़े पैसे वाला थिया 3से यीशु जो दिख्णा चाह्‍ंदा थिया पर, बड़े सारे मणूआं री वजह कने से दिख्खी नी थिया पाया करदा, किजोकी से बोणा थिया। 4इधेरे तांइ से दौड़ी करी त्रिम्बल रे बूट्टे पर चढ़ी गेया, जे कि तिसी रस्ते पर लगे दा थिया, अते जित्ते का यीशु ने जाणा थिया। 5जां यीशु तिस्स तिस रस्ते का होई करी जाणा लग्गे जित्ते से बूट्टा थिया तां तिन्हा ने बूट्टे पर जक्कई जो दिख्खेया, अते तिसजो बोल्लेया, ओ जक्कई, झट्ट थल्ले उतर किजोकी अज्ज तेरा घरे रैणा जरुरी है 6जक्कई झट्ट तिस बूट्टे का थल्ले उतरेया अते बड़ी खुसी कने यीशु कने मिलेया अते तिन्हा जो अपणे घरे लेई गेया। 7पर मणूआं जो ए गल्ल ठीक नी लग्गी, अते बुड़बुड़आणा लग्गी पेय अते बोलणा लग्गे से तां पाप्पी मणू रे उत्ते प्रोणा बणी करी तिसेरे घरे जो गेया 8जां यीशु ते तिन्हेरे चेल्‍ले तिसेरे घरे रोट्टी खाया करदे थिये तां जक्कई खड़े होई गेया अते यीशु जो बोलणा लग्गेया, ओ प्रभु जी, मैं अपणी धन-दौलत रा अद्दा हिस्सा गरीबां बिच्च बन्डी दैणी अते प्रभु जी मैं जिन्हा मणूआं जो ठग्गी करी तिन्हा का जरुरत का जादा लित्ते दा है तिन्हा जो मैं चार गुणा मोड़ी दिह्गां। 9यीशु ने तिसजो बोल्लेया, अज्ज तेरा अते तेरे घरे वालेयां रा छुटकारा होया है किजोकी अज्ज तू अब्राहम औलाद बणेया। 10किजोकी मणू रा पुत्तर, जे मैं ही है तेरे जदेय होर भी मणूआं जो हमेसा री सजा का बचाणे तांइ आए रा है।

दस मुहरां रा उदारण

11जां से गल्लां सूणेया करदे थिये, तां तिन्हा ने इक्क उदहरण बोल्लेया, इधेरे तांइ किजोकी से यरुशलेम सहर रे नेड़े थिये ते से सोचदे थिये कि परमेश्वर रा राज आणे वाला है, 12इक्क ठीक पैसे वाला मणू अपणे देस रा राज्जा बणने दी इजाज़त लैणे तांइ इक्क देस जो गेया 13जाणे का पैल्ले तिन्ने अपणे नौक्करां जो सद्देया अते बोल्लेया, कि मैं जां तांइ हटी नी आन्दा तां तांइ मैं तुसा जो दस सोन्ने रे सिक्के देई जान्दा, अते तिन्हा कने किच्‍छ कमाई करे, 14पर तिसेरे सहर रे मणू तिसजो सुखान्दे नी थिये, इधेरे तांइ तिन्हा ने किच्‍छ मणू तिसेरे पीच्छे ए बोल्ली करी उस देस जो भेज्जी दित्ते, कि असी नी चाह्‍ंदे कि ए असा रे पर राज करण 15जां से राज्जा अपणे राज्जा बणने री मंजूरी लेई करी आई गेया, तां तिन्ने जे सोन्ने रे सिक्के नौक्करां जो दित्ते रे थिये, तिन्हेरा साह्ब-किताब लैणे तांइ तिन्हा जो सद्देया कि तिन्हा लैण दैण बिच् कै कमाये रा है 16तां पैल्ले नौक्कर ने आई करी बोल्लेया, ओ मालक, तुसा जे सिक्के मेरे जो दित्ते थिये, तिन्हा सिक्के कन्ने मैं दस गुणा होर सिक्के कमाई लै 17मालक, ने तिसजो बोल्लेया, शाबास, तू तां बड़ा खरा कन्ने भरोसे रे लायक नौक्कर है, इधेरे तांइ मैं तिज्जो दस राज रा अधिकारी बणाई दिन्दा 18दूज्जे ने आई करी बोल्लेया, ओ मालक, तुसा ने जे सिक्के दित्ते थिये तिन्हा कन्ने मैं पान्ज गुणा होर सोन्ने रे सिक्के कमाए हिन 19तिन्ने तिसजो बोल्लेया, तिज्जो भी पान्ज राज रा अधिकारी बणाई दिन्दा 20तिज्जे ने आई करी बोल्लेया, ओ मालक, मैं तुसा रे दित्ते रे सिक्केयां जो कपड़े बिच बन्नी करी संभाली रख्खे दा थिया 21किजोकी मेरे जो तुसा का डर लगदा किजोकी तुसा इक्क सख्त मणू हिन, इधेरे तांइ कि तुसा जेह्ड़ा, तुसा रा नी है तिसजो भी लेई लिन्दे अते जे तुसा बाया भी नी तिसजो भी कट्टी लिन्दे 22से राज्जा तिस पर टुटी पेया, अते बोलणे लगेया, ओ नलायक नौक्करां मैं तेरी ही गल्लां का तिज्जो दोषी बणादा! जे तू मेरे बारे अन्दर इन्ना किच्‍छ जाणदा थिया कि मैं बुरा मणू है जे कि बांदा भी नी अते तिसजो कट्टी भी लिन्दा 23तां तू मेरे सोन्ने रे सिक्केयां जो ब्याज पर उधार किजो नी देई दित्ता ताकि मैं जां वापस हटी करी तां मेरे जो किच्‍छ ब्याज तां मिली जान्दा? 24जे नौक्कर नेड़े खड़ितेरे थिये तिन्हा जो राज्जे ने बोल्लेया, इस नौक्करां का से सोन्ने रे सिक्के लेई लो अते जिनिये सबका जादा सिक्के कमाए तिसजो देई दो 25नौक्करां ने तिन्हा जो बोल्लेया, ओ मालक, तिसेरे का तां दस्स सोन्ने सिक्के हिन 26इस गल्ल पर राज्जे ने बोल्लेया, जिन्हा जो जे दित्ते दा है, तिसजो से सह्ई तरिक्के कने बरतगे तां तिन्हा जो होर मिलणा, पर जे ईयाँ नी करगा तां तिन्हेरे का जे है से भी खोई लैणा 27अते जे नी चाह्‍ंदे कि मैं तिन्हा पर राज्जा बणी करी राज करां तिन्हा बैरियां जो मेरे सामणे लै आई करी मारी देयो।

यरुशलेम सहर बिच विजय-प्रवेश

28फिरी जां यीशु ए गल्लां करी बैठ्ठे तां से तिसेरे बाद यरुशलेम जो चलणा लगे अते तिन्हेरे पीच्छे उन्हेरे चेल्‍ले थिये। 29जां से जैतून पहाड़ पर बसे रे बैतफगे अते बैतनिय्याह सहर पर पूज्जे तां यीशु ने अपणे चेल्‍लेयां बिच् का दो जो ए बोल्ली करी अग्गे भेज्जेया, 30कि सामणे वाले ग्रां बिच जाओ अते जिय्यां ही तुसा तिस ग्रां बिच बढ़ गे, तां तुसा जो इक्क गधी रा बच्चा बन्ने रा मिलणा जिस पर हल्ले तांइ कोई भी नी बैठ्ठे रा होणा, तिसजो खोली करी लेई आओ 31जे कोई भी तुसा का पुछगा कि कै हिन करेया करदे? तां वस इन्ना ही बोल्लेयो कि प्रभु जी जो ईधेरी जरुरत है 32तां से चेल्‍ले गे, अते जिय्यां यीशु ने बोल्ले दा थिया, तिय्यां ही खोती रे बच्चे जो बनितेरा दिख्खेया 33अते जां से तिसजो खोल्णा लगे तां तिसेरे मालक ने आई करी तिन्हा जो पूच्छेया, तुसा इसजो किजो खोलदे हिन? 34तां चेल्‍लेयां ने बोल्लेया कि प्रभु जी जो ईधेरी जरुरत है 35फिरी से गधी रे बच्चे जो यीशु का लेई आए अते चेल्‍लेयां ने अपणे कपड़े तिस पर पाए अते यीशु जो तिस पर बिठाई दित्ता 36जां यीशु खोती रे बच्चे पर बेई करी यरुशलेम जो जाया करदे थिये तां मणू भी अपणे कपड़े यीशु रे रस्ते बिच बछाँदे जान्दे थिये ते से यीशु कने चले दे थिये 37तां से, जित्ते का जैतून पहाड़ री घार सुरु हुंदी, तिस जगाह् पर पूज्जे तां परमेश्वर रे कित्ते रे चमत्कारी कम्म तांइ सारे चेल्‍ले बड़े जोर कने गांदे-गांदे परमेश्वर री बड़ाई करणा लगे 38धन्न है से राजा, जे प्रभु रे नां कने आंदा, स्वर्ग बिच सांती अते आसमान बिच परमेश्वर री जे जे कार हो 39तां यीशु रे पीच्छे चलणे वाले मणूआं बिच किच्‍छ फरीसी भी थिये अते से बोल्णा लगे, ओ गुरु जी, ए जे बोल्लेया करदे हिन इस गल्ल तांइ अपणे चेल्‍लेयां जो झिडको। 40यीशु ने जवाब दित्ता जे ए मणू चुप होई गे तां रस्ते रे बट्टेयां ने बोल्ली पैणा।

यरुशलेम सहर तांइ रोणा

41जां से यरुशलेम सहर रे नेड़े पूज्जे तां यीशु ने तिस सहर पास्से दिख्खेया अते रोया 42किन्ना खरा हुन्दा कि तू, हाँ तू ही सांती रे रस्ते जो जाणी पान्दा, पर अवे बड़ी हाण होई गे री है अते सांती तुसा री हाख्खी का गैब होई गे रा है। 43किजोकी से दिन तेरे पर इणे जां तेरे दुश्मणा ने मोर्चा बन्नी करी तेरे जो घेरी लैणा, ते चारों पास्से का तेरे जो दब्बी लैणा। 44ते तेरे दुश्मणा ने तिज्जो ते तेरे बच्चेयां जो जे तेरे बिच हिन, मिट्टी बिच मिलाई दैणा, ते तेरे बिच बट्टे पर बट्टा भी नी छडणा, किजोकी तू तिस मौक्के जो नी पेहचाणेया जां परमेश्वर तिज्जो बचाणे तांइ आए थिये।

मन्दिर का दुकानदारां जो कडणा

45जां यीशु मन्दिर बिच बड़े अते जे तित्ते समान बेचया करदे थिये तिन्हा जो सभास्थल का बाह्र कडणा लगे 46यीशु ने तिन्हा जो बोल्लेया, कि पवित्रशास्त्र बिच लिख्खे दा है कि मेरा देह्रा प्रार्थना दा घर है पर तुसा ने इसजो डाकू री कुड बणाई रखे दा है 47इसका बाद यीशु हर रोज मन्दिर बिच उपदेस दैणे लगे पर बड्डे पुरोत्त शास्त्रियहूदी लोका रे प्रधान यीशु जो मारणे री सलाह करणा लगे 48पर, से यीशु जो मारणे तांइ कोई बेतर नी लाई सके, किजोकी मणू बड़ा मन लाई करी यीशु री गल्लां सूणदे थिये।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

लूका 19: CDHNT

Highlight

ಶೇರ್

ಕಾಪಿ