लूका 20
20
यीशु रे हक्क पर सवाल
1इक्क रोज इय्यां होया कि जा यीशु मणूआं जो मन्दिर बिच वचना का सिखाया करदे थिये अते परमेश्वर रे सुब बसेख रे बारे दस्सेया करदे थिये तां किच्छ बुजुर्ग मणू शास्त्रि ते बड्डे पुरोत्त तिन्हा का आई रे। 2से तिन्हा का पूछणा लगे कि तुसा जो ए सारे कम्म जे तुसा करेया करदे हिन, इन्हा जो करणे रा हक्क कुन्ने दित्ता? 3यीशु ने तिन्हा जो बोल्लेया, पैल्ले तुसा मेरी इक्क गल्ल रा जवाब देयो फिरी मैं तुसा रे सुआल रा जवाब दिह्गां 4तुसा ए बोल्लो, कि यूहन्ना, जे बपतिस्मा दिन्दा थिया, तिसेरा बपतिस्मा परमेश्वर रे पास्से रा थिया की मणूआं रे पास्से का थिया? 5तां से अप्पु मिते सलाह् करणा लग्गी पे, कि अगर असा ने बोल्लेया कि परमेश्वर रे पास्से का थिया, अते तां इन्ने बोल्णा, तुसा तिसेरी गल्लां किजो नी मन्नीयाँ 6अते अगर असा ने बोल्लेया, कि मणूआं रे पास्से का थिया, तां इत्ते जितणे भी मणू हिन तिन्हा असा जो मारी छडणा, किजोकी इन्हा मणूआं री नजरा बिच यूहन्ना तां इक्क भविष्यद्वक्ता थिया 7फिरी तिन्हा ने सलाह् करी के यीशु जो जवाब दित्तया, असा जो नी पता है कि से कुसेरे पास्से का थिया 8फिरी यीशु ने बोल्लया, तां मैं भी तुसा जो नी दस्सणा कि ए कम्म मैं कुस हक्क कने करदा।
बुरे किसानां रा उदारण
9फिरी यीशु ने मणूआं जो ए उदारण सुणाया, इक्क मणू ने अंगूर रा बगीच्चा लगाया अते तिसेरी दिख-रिख्ख करणे रा ठेका जिमीदारां जो देई करी बड़े रोज्जा तांइ कुदखी चली गेया 10जां अंगूरा रे फलणे रा बेल्ला आया तां तिस मणू ने जिमीदारा का इक्क नौक्कर भेज्जेया कि से अंगूरा रे बगीच्चेयाँ का किच्छ अंगूर देई दैण, पर तिन्हा जिमीदारां ने तिसेरे नौक्कर जो मारी कुट्टी करी खाली हत्थ भेज्जी दित्ता 11फिरी तिन्ने इक्क होर नौक्कर भेज्जेया, अते तिन्हा ने तिस कने बुरा बर्ताव कित्या अते तिसजो भी मारी कुट्टी करी खाल्ली हत्थ भेज्जी दित्ता 12तां फिरी तिन्ने त्रीय्या नौक्कर भेज्जेया, पर तिस कने भी पैल्ले वाले दो नौक्करां सांई ही होया, अते तिसजो भी जख्मी होई करी खाल्ली हात्था हटणा पेया 13बगीचे रा मालक सोच्णा लगेया, मेरे त्रेन्ना नौक्करां रा तिन्हा ने बुरा हाल करी रख्या, अवे मैं कै करां? अवे मैं अपणे प्यारे मुंडे जो ही भेजदा, होई सकदा कि से जिमीदार तिस कने इय्यां नी करगे 14पर, तिन्हा जिम्मीदाराँ ने अपणे मालक रे पुत्तर जो दिख्खी करी अप्पु मिते सिक्ख सलाह करी के बोल्णा लगे, ए तां इस बगीचे रा वारस है, अगर असी इसजो मारी दैण तां ए बगीच्चा असा रा होई जाणा 15अते तिन्हा ने तिसजो बगीचे का बाहर धरीडी करी मारी रख्या फिरी यीशु ने तिन्हा मणूआं का पूच्छेया, अवे तुसा दस्सो, तिस बगीचे रे मालक ने तिन्हा जिमीदारां कने कै करणा? 16यीशु ने बोल्लेया, तिन्ने आई करी तिन्हा जिमीदारां जो मारी दैणा, अते अंगूरा रे बगीचे रा ठेका कुसकी होरणी जो देई दैणा ए सुणी करी मणूआं ने बोल्लेया, परमेश्वर ना करे कि इय्यां कदी हो 17फिरी यीशु ने तिन्हा पास्से दिख्खी करी बोल्लेया, पवित्रशास्त्र बिच कै लिख्खे रा है? जिस बट्टे जो मिस्त्रियां ने नक्कारी दित्तेया थिया, से ही बट्टा कुणे बिच लाणे वाला खास बट्टा बणी गेया। 18जे कोई भी तिस बट्टे पर पैंगा, तिसेरे चीत्थड़े होई जाणे अते से जिस पर पैंगा, तिसजो तिन्ने पीह् रखणा 19तिस्सी बेल्ले शास्त्रि अते बड्डे पुरोत्त ने कोई तिगड़म लाई करी यीशु जो पकड़ी लैणा चाह्ंदे थिये किजोकी से समजी गेरे थिये, कि यीशु ने से उदारण तिन्हेरे ही खिलाफ बोल्लेया पर से मणूआं का डरदे थिये।
कैसर जो कर दैणा
20ते से तिन्हेरी ताक बिच लग्गी रेय ते जासुस भेज्जे कि धार्मिक मणू सांई बणी करी तिन्हा कने रेहन ते तिन्हेरे गलती पकड़न, ते तिन्हा जो हाकिम का पकड़वाई दैण 21तां तिन्हा ने यीशु जो बोल्लेया, गुरु जी, असा जो पता है कि तुसा जे ठीक है से ही बोल्दे अते सेह्ई तुसा सिखांदे भी अते तुसा कुसकी कने कोई भेद-भाव नी करदे बल्कि तुसा सच्चाई अते परमेश्वर रे रस्ते पर चलणा सिखांदे 22असा जो ए दस्सो कि असा यहूदी मणूआं जो रोम रे सम्राट (कैसर) जो चुन्गी दैणा चाईन्दी कि नी? 23यीशु तिन्हेरी चाल समजी गे ते तिन्हा जो बोल्लेया, 24मेरे जो इक्क सिक्का #20:24 इक्क दिन री धियाड़ीदिखाओ, इस पर कुसेरी छाप अते नां लिखितेरा है? तिन्हा ने बोल्लेया, सम्राट दा 25यीशु ने बोल्लेया, तां ठीक है, जे सम्राट रा है से सम्राट जो ही देयो अते जे परमेश्वर रा है से परमेश्वर जो ही दो 26से मणू यीशु जो इस गल्ल पर गलत साबित नी करी सके, पर से भेदी यीशु रे जवाब का हैरान रेई गे अते से चुप होई गे।
फिरी जिन्दा होणा ते ब्याह रे बारे बिच
27फिरी किच्छ सदूकी मणू यीशु का आई रे ए सदूकी से मणू हिन, जे बोल्दे थिये कि मरणे का बाद मणू फिरी जिन्दा नी होई सकदा अते से तिन्हा का पूच्छणा लगे। 28गुरु जी, मूसा री नियम रे हिसाब कने जे अगर कुसेरा भ्याल मरी जाओ अते तिसेरी कोई औलाद भी नी हो तां तिसेरा भ्याल तिसेरी विधवा लाड़ी कने ब्या करी के तिसका इक्क निक्के जो पैदा करी सक्दा अते से निक्का तिसेरे बड्डे भ्याल रे खानदान जो बड़ाई सके।
29इय्यां ही सत्त भ्याल थिये पैल्ले भ्याल ने कुसकी जनानी कने ब्या कित्ता अते बगैर औलादे मरी गेया 30फिरी दूज्जे भ्याल ने तिसजो ब्याई लित्ता 31फिरी इय्यां त्रिये भ्याल ने भी कित्तेय इन्हा सत्त जणेया कने इय्यां ही होया अते सब जणे बगैर औलोदे मरी गे 32अते बाद अन्दर से जनानी भी मरी गई 33अवे असा जो ए बोल्लो कि जां से फिरी जिन्दे होणे का बाद से जनानी कुसेरी लाड़ी मन्नी जाणी? 34यीशु ने बोल्लेया, इस जुग रे मणूआं बिच तां ब्या होया करदा है 35पर जे मणू इस जोग्गे होणे कि तिस युग जो ते मुर्देयां बिच का फिरी जिन्दा होण, तिन्हा ने ब्याह नी करणे ते ना ही दुबारा ब्याह बिच दित्ते जाणे 36अते फिरी तिन्हा कदी मरणा भी नी, किजोकी से स्वर्गदूत सांई हिन, अते से नौई जिन्दगी बिच फिरी जिन्दे कित्ते गे परमेश्वर री औलाद हुणी 37पर, मरे रे मणू जिन्दा हुन्णे कि नी इस गल्ल जो मूसा ने बलदी झिल्लां री कहाणी बिच दस्से रा है कि से प्रभु जी जो अब्राहम रा परमेश्वर, इसहाक रा परमेश्वर, कने याकूब रा परमेश्वर, बोलदा थिया। 38से मरे रे मणूआं रा नी बल्कि जिन्दे मणूआं रा परमेश्वर है से सारे मणू जे तिन्हेरे हिन, से जिन्दा हिन 39तां ए सुणी करी किच्छ शास्त्रियां ने बोल्लया, गुरु जी, तुसा ने ठीक ही बोल्लेया 40इस्का बाद कुसकी जो भी यीशु का किच्छ पूच्छणे री हिम्मत नी पेई।
मसीह यीशु कुसेरा पुत्तर?
41फिरी यीशु ने तिन्हा का पूच्छेया, कि मसीह यीशु जो दाऊद रा पुत्तर किजो बोल्दे? 42किजोकी दाऊद ने तां अप्पु ही भजन संहिता री कताब अन्दर ए लिख्खे दा है कि प्रभु (परमेश्वर) जी ने मेरे प्रभु (मसीह यीशु) जी जो बोल्लेया, 43मेरे सज्जे हत्थ पास्से बेई जा, जां तांइ मैं तेरे दुश्मणा जो तेरे पैरा हेठ करी नी देयां 44अवे जां दाऊद अप्पु ही मसीह यीशु जो प्रभु जी बोलदा है, तां मसीह यीशु दाऊद री औलाद किय्यां होई सकदा?
शास्त्रियां का सावधान
45जां सब मणू इन्हा गल्लां जो सूणदे थिये तां यीशु ने अपणे चेल्लेयां जो बोल्लेया, 46इन्हा शास्त्रियां का बची करी ही रेया, जिन्हा जो लम्बे-लम्बे कपड़े पाई करी फिरणा खरा लगदा जां से बजार जान्दे, तां तिन्हा जो बड़ा खरा लगदा कि कोई तिन्हा जो निह्ठ्ठा होई करी प्रणाम करो अते सभास्थल अन्दर अते धामि अन्दर तिन्हा जो अग्गे जाई करी छैल का छैल जगाह् पर बैणा खरा लगदा 47से विधवा जनानियां रा घर-बार लुट्टी लिन्दे अते मणूआं रे सामणे ठीक बणने तांइ लम्मी-लम्मी प्रार्थना करदे इदे मणूआं जो होरणी मणूआं का जादा बुरी सजा मिलणियां हिन।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
लूका 20: CDHNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
