यूहन्ना 16

1मैं ए गल्लां इधेरे तांइ तुसा रे कने बोल्ली हिन, ताकि तुसा रा विश्वास डगमगाई नी जाओ। 2तिन्हा तुसा जो सभास्थल का बाहर कड्डी दैणा, बल्कि से बेल्ला आया करदा ए जां तुसा रे बिच का कुसकी जो भी मारी करी हर कोई ने सोचणा कि से परमेश्वर री सेवा करेया करदा है। 3अते तिन्हा ने इय्यां इधेरे तांइ करणा किजोकी तिन्हा ने ना ता स्वर्ग बिच रैह्णे वाले पिता जो जाणेया ते ना ही मेरे जो जाणेया, 4अते ए गल्लां मैं इधेरे तांइ बोल्ली कि जां से बेल्ला आये तां तुसा चेत्ता करेयो कि मैं तुसा जो इधेरे बारे बिच दस्सी दित्तेया थिया।

पवित्रात्मा रे कम्म

अते ए गल्लां मैं तुसा जो सुरु बिच इधेरे तांइ नी दस्सी किजोकी मैं तुसा रे कने थिया। 5पर अवे मैं अपणे भेजणे वाले का हटेया करदा है, जिनिये मेरे जो भेज्जे रा है, पर तुसा मेरे का नी पूच्छदे कि तू कुते चलेया?

6किजोकी मैं ए गल्लां तुसा जो दस्सी दित्ती हिन, ते तुसा दुखी होई गेरे हिन। 7पर मैं तुसा रे कने सच-सच बोलदा कि तुसा तांइ भला है कि मैं जाया करदा है, किजोकी जे अगर मैं नी जांगा तां पवित्रात्मा ने जे तुसा रा मददगार है, तुसा का नी आणा, पर जे अगर मैं चली जांगा तां तिसजो तुसा रे का भेजी दिंगा। 8अते जां पवित्रात्मा ने तुसा का आणा, तां तिन्हा ने पाप, परमेश्वर री धार्मिकता ते तिन्हेरे हिसाब-किताब रे बारे बिच दुनिया रे लोक्कां जो सच दसणा। 9पाप रे बारे बिच इधेरे तांइ, किजोकी दुनिया रे मणू मेरे पर विश्वास नी करदे। 10अते धार्मिकता रे बारे बिच इधेरे तांइ किजोकी मैं पिता का चलेया, अते तुसा मेरे जो फिरी नी दिख्खी सकणा। 11अते हिसाब-किताब रे बारे बिच, इधेरे तांइ कि दुनिया रे शासक, शैतान जो कसुरवार ठैहराई दित्तेया गे रा है। 12मेरे जो तुसा कने होर भी मती सारी गल्लां करणे जो हिन, पर हल्ले तुसा उन्हा जो सैह्‍ण नी सकदे। 13पर जां सच्चाई री आत्‍मा ने आणा, तां तिसने तुसा जो परमेश्वर रे सच बारे बिच सिखाणा, किजोकी तिसने अपणे पास्से का किच्‍छ नी बोलणा, पर जे किच्‍छ तिसने परमेश्वर का सूणेया हो, से ही बोलणा अते होणे वाली गल्लां जो तुसा रे सामणे लियाणा। 14तिन्हा ने तुसा जो से सारी गल्लां मेरे का सुणी करी तुसा जो दसणी ते इय्यां करी के मेरे जो महिमा दैणी। 15जे किच्‍छ पिता का है से सब मेरा है, इधेरे तांइ मैं बोल्लेया कि जे किच्‍छ मेरा है, तिन्हा गल्लां जो सुणी करी पवित्रात्मा ने तुसा जो दस्सी दैणा।

दु:ख सुख बिच बदली जाणा

16 # 16:16 इस वचन बिच यीशु मसीह अपणे मारे जाणे ते फिरी जिन्दा होणे रे बारे बिच बोल्लेया करदे हिन। थोड़ी देर बाद तुसा मेरे जो नी दिखणा, अते तिसेरे बाद तुसा मेरे जो फिरी दिखणा।

17तां तिन्हेरे चेल्‍लेयां बिच का किच्‍छ ने अप्पु-मित्ते बोल्लेया, ए कै गल्ल ए जे ए असा रे कने दस्सेया करदे हिन, थोड़ी देर बाद तुसा मेरे जो नी दिखणा, अते तिसेरे बाद तुसा मेरे जो फिरी दिखणा, किजोकी मैं पिता का चलेया? 18फिरी से बोलणा लग्गे, थोड़ी हाण बाद कै है! जिसेरे बारे बिच ए दस्सेया करदे हिन ए कै बोल्लेया करदे हिन असा जो नी ए लग्गेया करदा पता। 19यीशु समजी गे कि से मेरे का पूच्छणा चाह्‍ंदे हिन, अते यीशु ने बोल्लेया, कै तुसा इस गल्ल रे बारे बिच अप्पु-मित्ते सोच-विचार करेया करदे हिन, जे मैं बोल्ली, थोड़ी देर बाद तुसा मेरे जो नी दिखणा, अते तिसेरे बाद तुसा मेरे जो फिरी दिखणा? 20मैं तुसा कने सच-सच बोलदा कि मेरे मरणे रे बाद तुसा रोणा ते पीटिणा, पर इस दुनिया रे लोक्कां ने खुस होणा। तुसा दुखी होणा, पर दुख खुसी बिच बदली जाणा 21जां कोई जनानी बच्चा जमणा लगदी तां तिसजो पीड़ां हुंदी, किजोकी से तिसेरे बड़े वरी दर्द सैहणे रा बेल्ला हुदां, पर जां से बच्चे जो जन्म देई बैन्दी तां तिसेरा दुख खुसी बिच बदली जांदा किजोकी दुनिया बिच इक्क बच्चा पैदा होया, से तिस दुख जो भूली जादीं ते से तिसजो फिरी याद नी करदी। 22तिस्सी तरिक्के कने अवे तुसा दुखी तां हिन, पर मैं तुसा रे कने फिरी मिलणा, अते तुसा रे मन खुस होई जाणे, अते तुसा री खुसी जो कोई तुसा का खुस्सि नी सकदा। 23तिस रोज तुसा मेरे का किच्‍छ नी मंगणा। मैं तुसा रे कने सच-सच बोलदा, जे तुसा मेरे ना कने पिता का जे किच्‍छ भी मंगगे तिन्हा ने तुसा री हर जरुरत जो पूरा करणा। 24हल्ले तांइ तुसा मेरे नां कने किच्‍छ भी नी मंगेया: मंगो, अते तुसा जो मिल्ली जाणा, ताकि तुसा खुस होई जाओ।

दुनिया पर जीत हासिल करणा

25ए गल्लां मैं तुसा कने उदारण बिच बोल्ली हिन, पर से बेल्ला आया करदा ए जां मैं तुसा कने उदारण दैणे रे बजाए, साफ-साफ गल्लां करणी।

26तिस बेल्ले तुसा मेरे ना कने मंगणा, अते मैं तुसा कने ए नी बोलदा कि मैं तुसा रे तांइ पिता का प्रार्थना करगा, 27किजोकी पिता परमेश्वर अप्पु तुसा कने प्यार करदे, किजोकी तुसा ने मेरे कने प्यार कित्तेया अते ए विश्वास कित्तेया कि मेरे जो पिता ने भेजेया है। 28मैं पिता रे पास्से का आए रा है अते इस दुनिया बिच आया, मैं फिरी दुनिया जो छड्डी करी पिता का चलेया 29यीशु रे चेल्‍लेयां ने बोल्लेया, दिख्खो अवे तुसा बिना उदारण रे साफ-साफ गल्लां दस्सेया करदे हिन। 30अवे असी समजी गे कि तुसा सब किच्‍छ जाणदे, अते तुसा जो जरुरत नी है कि कोई तुसा का सवाल करे, इसेरी वजह कने असी विश्वास करदे कि तुसा जो परमेश्वर ने भेज्जे रा है। 31यीशु ने जवाब दित्तेया, कै तुसा अवे विश्वास करदे? 32दिख्खो, से बेल्ला आया करदा ए, बल्कि आई गेया कि तुसा तित्तर-बित्तर होई करी अपणे-अपणे रस्ते चली जाणा अते मेरे जो किल्ला छड्डी दैणा, फिरी भी मैं किल्ला नी ए, किजोकी पिता मेरे कने हिन। 33ए गल्लां मैं तुसा रे कने बोल्ली हिन कि तुसा जो मेरे जरिए सांती मिल्लो, दुनिया बिच तुसा जो तकलिफां मिल्ली हिन, पर हिम्मत रख्खो किजोकी मैं इस दुनिया रे सरदार, शैतान जो हराई दित्ते रा है।

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

यूहन्ना 16: CDHNT

Highlight

ಶೇರ್

ಕಾಪಿ