Joni 8

Mukaintu wakajatwa mubumambe

1Lino Jesu wakainka kucilundu camisamu ya Oliva. 2Nkabela cifumo-fumo wakabweeda kuŋanda ya Leza, wakanjila. Wakakkala akwiisya bantu, nkaambo bantu banji-banji bakasika kulinguwe. 3Mpoonya aawo bamayi ba Mulawo a Bafalisi bakamuletela mukaintu umwi wakajatwa mubumambe. Bakamwiimika akati. 4Eelyo bakaambila Jesu kuti, “Omwiiyi, ooyu mukaintu wajatwa mubumambe. 5Nkabela mu Mulawo Mozesi ulailila kuti bakaintu banga bajatwa mubumambe mbuli ooyu kabajaigwa cakuumwa mabwe. Ino yebo uti nzi mukaambo aaka?” 6Mukumubuzya boobo bakali kumuteya kutegwa bamujanine mpawo kaambo.

Pele Jesu wakakotama akutalika kulemba ansi amunwe. 7Lino nibakacili kumugubizya amubuzyo ooyu, wakakotamuka akubaambila kuti, “Muntu uutakwe cinyonyoono akati kanu aawa asaangune kufusa bbwe kumukaintu ooyu.” 8Amane wakakotama alimwi akulemba ansi amunwe. 9Nibakamvwa boobo, bakatalika kusomooka omwe-omwe kabainka, kutalikila kuli balupati mane limwi kwaakusyaala mukaintu ooyo alikke kaimvwi kumbele lya Jesu. 10Jesu naakakotamuka, wakabuzya mukaintu ooyo kuti, “Mukaintu, ino balikuli basimulandunyoko? Sena taakwe wakupa mulandu?”

11Walo wakati, “Peepe, taakwe, O Mwami.” Mpawo Jesu wakamwaambila kuti, “Ambebo nsikupi mulandu pe. Koya, pele ono utakabisyi limbi!”

Bumboni bwakwe Jesu mbwabwini

12Alimwi Jesu wakaambila Bafalisi wakati, “Ndime mumuni uumunikila bantu bamunyika. Kufumbwa uunditobela takeendi mumudima pe, pele uyooba amumuni uupa buumi.”

13Mukaambo aaka Bafalisi bakamubuzya bakati, “Oobu mbolilungulula omwini, bumboni bwako taakwe ncobwaamba.”

14Jesu wakaingula kuti, “Nikuba kuti ndilalilungulula ndemwini, bumboni bwangu mbwabwini, nkaambo mebo ndizi nkondakazwida ankweya. Pele nywebo tamuzi nkondakazwida ankweya. 15Nywebo mulabeteka aziyanza zyabuntunsi, pele mebo nsibeteki muntu naba omwe pe. 16Nikuba kuti ndabeteka, kubeteka kwangu kuliluleme, nkaambo nsili endike pe, Taata ooyo wakandituma ngotubeteka aawe. 17Tee kayi mumilawo yanu kulembedwe kuti bumboni bwabantu bobilo mbwakasimpe. 18Iiyi mebo ndalilungulula ndemwini, pele awalo Taata wakandituma ulandilungulula.”

19Balo bakamubuzya kuti, “Ino Uso ooyo uli kuli?” Jesu wakabaingula kuti, “Mbubonya mbomutandizi mebo awalo Taata tamukonzyi kumuziba pe. Kuti nimwali ndizi, nimwalimuzi Taata awalo.” 20Makani aaya Jesu wakaambila muŋanda ya Leza, mubusena bwakutambwida mulumbo. Pele taakwe muntu wakakonzya kumujata, nkaambo ciindi cakwe tiicaanasika.

Jesu mbwaakaamba zyakuunka kwakwe

21Mpoonya aawo Jesu wakabaambila kuti, “Ndainka mebo. Nikuba kuti mukandiyandaule, muyoofwa buyo muzinyonyoono zyanu. Ooko nkweya tamukonzyi kusika pe.” 22Bafalisi bakatalika kubuzya-buzya kuti, “Sena uyanda kulijaya ncaambila kuti, ‘Ooko nkweya tamukonzyi kusika pe.’” 23Pele Jesu wakati kulimbabo, “Nywebo muli baansi aano mebo ndi wakujulu. Nywebo muli banyika eeyi, mebo nsili wanyika eeyi pe. 24Ncindamwaambila kuti muyoofwa muzinyonyoono zyanu naa tamundisyomi kuti ndendime nguwe.” 25Bakati, “Ino nduweni?” Jesu wakaingula kuti, “Ndime nguwe ooyo ngondamwaambila kale kumatalikilo. 26Ndijisi makani manji-manji aakwaamba, alimwi aakumubeteka. Ooyo wakandituma ulasyomeka, nkabela oonse makani ngindakamvwa kulinguwe ngangawo ngelungulula munyika.”

27Balo tiibakaziba kuti Jesu wakalikwaamba Wisi. 28Nkaambo kaako wakabaambila kuti, “Mwaakumwaanzika Mwanaa Muntu nomutikazibe kuti ndime nguwe, akuti nsilicitili cintu ndemwini, pele ngamba makani mbuli mbwaakandiiisya Taata. 29Ooyo wakandituma ulaandime, tandisiyi endike pe, nkaambo lyoonse nncita zintu zimubotezya walo.” 30Naakali kwaamba makani aaya bantu banji bakamusyoma.

Zyabulubusi naa buzike

31Lino Jesu wakaambila Bajuda aabo bakamusyoma, wakati, “Kuti mwabamba majwi aangu, mulaba basikwiiya bangu ncobeni. 32Eelyo muyooziba zyakasimpe, nkabela eezi, ziyoomulubula.” 33Bamwi bakaingula kuti, “Swebo tuli bana ba Abulahamu, taakwe nitwakali bazike bamuntu mbutwakabeda. Aboobo mbuti mbotwaambila kuti, muyoolubulwa?” 34Jesu wakati, “Ncobeni muntu woonse uucita cinyonyoono muzike waco. 35Nkabela muzike tali wamukwasyi ciindi coonse pe, ccita mwana wamuŋanda. 36Nkaako kuti mwana wamulubula, mwalubulwa ncobeni. 37Ndilizi kuti muli bana ba Abulahamu, nikuba boobo muyanda kundijaya nkaambo majwi aangu taakkalilili mumyoyo yanu. 38Ngamba zintu nzindakabona kuli Taata, nywebo mucita zintu nzyomwakamvwa kuli uso.”

39Balo bakaingula kuti, “Taata ngu Abulahamu.” Eelyo Jesu wakabaambila kuti, “Kuti nimwali bana ba Abulahamu nimwali kucita milimo njaakali kucita walo. 40Pele lino mukanza kundijaya mebo neemwaambila makani aakasimpe ngindakamvwa kuli Leza. Abulahamu taakali kucita zili boobo pe. 41Nywebo mucita milimo ya uso.” Bakamwaambila kuti, “Tatuli bana bakazyalilwa mubumambe, tujisi taata omwe buyo, walo uuli ngu Leza.” 42Jesu wakaingula kuti, “Kuti Leza naali Uso nimwali kundiyanda, nkaambo ndakazwa kuli Leza. Nsiindakaliboolela ndemwini pe, Leza nguwakandituma. 43Ino nkaambo nzi ncomutamvwi nzeamba? Tee nkaambo kakuti tamujisi nguzu zyakumvwa majwi aangu? 44Nywebo muli bana bauso Saatani, aboobo muyandisisya kucita ziyanda nguwe. Walo mujayi kuzwa kumatalikilo. Usulide bwini, nkaambo tajisi bwini mulinguwe. Naamba cakubeja ulilungulula mbwabede mwini, mmubeji, alimwi ngowisi wababeji boonse. 45Pele mebo nemwaambila zyabwini, tamundisyomi pe. 46Nguni akati kanu uukonzya kundijanina kaambo mebo? Pele kuti nkeamba zyabwini, nkaambo nzi ncomutandisyomi? 47Muntu oonse wa Leza ulamvwa majwi aa Leza. Pele nywebo ncomutaamvwi nkuti tamuli bantu ba Leza pe.”

Jesu mbwaakaamba zya Abulahamu

48Eelyo bakati, “Ani twaambide ciluzi nitwati, ‘Uli Musamaliya, unjidwe sikazwa?’” 49Jesu wakaingula kuti, “Nsinjidwe sikazwa pe. Ndemya Taata. Walo nywebo ngomutalemyi. 50Nsilidumaizyi lwangu ndemwini. Mpali uumbi uundidumaizya, ooyu nguuti kamubeteke. 51Ncobeni, kuti muntu kabamba majwi aangu, takooyoofwa.” 52Mpawo bantu aabo bakamwaambila kuti, “Lino twaziba kuti ulaasikazwa, nkaambo Abulahamu wakafwa, abalo basinsimi mbubonya buyo, lino yebo waamba kuti, ‘Kuti muntu kabamba majwi aangu takooyoofwa pe.’ 53Sena yebo uli mupati kwiinda taata Abulahamu wakafwa? Abasinsimi bakafwa? Ino yebo uyeeya kuti nduwe ni?”

54Jesu wakati, “Kuti nkelilemya, bulemu bwangu mbwabuyo. Pele nkwali uundilemya ngu Taata ooyo nywebo ngomuti Leza wanu. 55Ooyo nywebo ngomutana ziba pe, pele mebo ndimuzi. Kuti ndaamba kuti nsimuzi ndaba mubeji mbuli ndinywe. Mebo ndimuzi ncobeni alimwi majwi aakwe ndaabamba. 56Uso, Abulahamu wakatangala kuti uyoobona kuboola kwangu. Wakakubona, aboobo wakakondwa kapati.” 57Balo bakati kulinguwe, “Yebo ootana kuba amyaka iili makumi osanwe, wakamubonena kuli Abulahamu?” 58Jesu wakati kulimbabo, “Ncobeni, Abulahamu katanazyalwa, mebo ndakaliko kale.” 59Mpoonya bakabweza mabwe kuti bamufuse pele Jesu wakabazeluka akuzwa muŋanda ya Leza.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Joni 8: Tonga96

Highlight

ಶೇರ್

ಕಾಪಿ