Joni 7

Jesu mbwaakainka ku Jelusalemu kupobwe lyamatente

1Musule akooku Jesu wakali kweenda mucisi ca Galilii. Taakayanda kusika kucisi ca Judiya nkaambo kakuti bapati ba Bajuda bakali kukanza kumujaya. 2Lino ciindi capobwe lya Bajuda lyamatente nicakaswena aafwiifwi, 3bana bokwabo Jesu bakati kulinguwe, “Weelede kuzwa akuya ku Judiya kutegwa basikwiiya bako bakabone milimo yanguzu njoyoocita. 4Nkaambo muntu uulisisa akucita zintu kumbali takonzyi kuba aampuwo pe. Ncibotu kucita milimo yako antangalala kuti bantu boonse baibone.” 5Banabokwabo bakaamba boobo nkaambo tiibakali kumusyoma.

6Lino Jesu wakaingula kuti, “Ciindi cangu tacinasika, pele canu mulaaco. 7Bantunsi tabamusulaiki, pele mebo balindisulide nkaambo ndibaambila zyamilimo yabo mibi. 8Kamuya nobeni kupobwe ooko mebo nsikooinka pe, nkaambo ciindi cangu cakuunka kupobwe eeli tacinasika.” 9Naakamana kwaamba boobo wakasyaala mu Galilii.

10Pele musule banabokwabo kabainkide kale kupobwe Jesu wakainka awalo, kaya buyubaila. 11Lino kupobwe ooko bapati ba Bajuda bakali kumulangaula. Bakali kubuzyanya kuti, “Ino uli kuli?”

12Nkabela bantu bakali kukazyanya amakani aakwe. Bamwi bakali kwaamba kuti, “Mmuntu mubotu.” Pele bamwi bakali kuti, “Peepe, ulacenga, uusowa bantu.” 13Lino akaambo kakuyoowa bapati ba Bajuda taakwe muntu wakaamba zyanguwe caatangalala.

Jesu mbwaakaiisya kupobwe lyamatente

14Pobwe nilyakakondela, Jesu wakanjila muŋanda ya Leza akutalika kwiisya. 15Lino bantu bakagambwa kapati bakati, “Ino muntu ooyu uutaiide wakaziziba buti zyoonse eezi?”

16Jesu wakaingula kuti, “Kwiisya ooku takuli kwangu pe, kuzwa kuli Taata wakandituma. 17Naa kuli muntu uuyanda kucita ziyanda Leza ooyo nguunga waziba kwiisya kwangu kuti naa kuzwa kuli Leza, naa ndilyaambila buyo ndemwini. 18Muntu waamba zyakupunga mwini, uyanda bulemu bwakwe mwini. Pele ooyo uuyandisya kudumya wakamutuma, nguusyomeka, nkabela unyina lweeno. 19Tee Mozesi wakamupa Milawo? Nikuba boobo taakwe naba omwe wanu wiitobela. Nkaambo nzi ncomukanza kundijaya?”

20Lino nkamu yabantu yakati, “Unjidwe sikazwa yebo. Nguni uuyanda kukujaya?”

21Jesu wakabaambila kuti, “Ndakacita mulimo wanguzu omwe, eelyo nyoonse mwakagambwa. 22Mozesi wakamupa ciyanza cakupalulwa (nikuba kuti ciyanzya eeci tiicakali cakwe ncamatata basikale). Nkaambo kaako mulapalula muntu mu Buzuba bwa Kulyookezya butegwa Sabata. 23Lino mbuli mbomupalula muntu mu Buzuba bwa Sabata kutegwa mulawo wa Mozesi utatyolwi, ino nkaambo nzi ncomundikalalila nkaambo ndakaponya muntu mu Buzuba bwa Sabata? 24Peepe, kamubeteka bantu cakululama mukutobela kaambo kamuntu mbokabede. Mutanoobeteki cakusalulula bantu pe.”

Jesu ngo Munanike wa Leza

25Ciindi eeci bamwi bantu bamu Jelusalemu bakatalika kubuzya kuti, “Sena ooyu teensi ngonguwe ngobakanza kujaya? 26Tee ngooyu ulakanana antangalala, taakwe ancobaamba kulinguwe. Ino nkokuti abalo balupati-pati balizi kuti muntu ooyu ngo Munanike wa Leza. 27Pele swebo tulizi nkwazwa muntu ooyu, pele Munanike aakuboola taakwe muntu uyooziba nkwatikazwide.”

28Jesu naakacili kwiisya muŋanda ya Leza, wakoongolola akuti, “Iiyi, ncobeni mulindizi, ankwezwa mulikuzi, pele nsiindakaza lwangu ndemwini pe. Lino ooyo wakandituma ulasyomeka, kwamana nywebo tamumuzi pe. 29Mebo ndimuzi nkaambo ndakazwa kulinguwe, nguwakandituma.”

30Aboobo bantu bakayanda kumujata, pele taakwe nibakakonzya nkaambo ciindi cakuti ajatwe tiicakanasika. 31Nikuba boobo bantu bakamusyoma, bakaamba kuti, “Sena Munanike ooyo azoosika inga azookonzya kucita zitondezyo zyanguzu ziinda eezi nzyacita muntu ooyu?”

32Lino Bafalisi bakamvwa bantu kabaamba majwi aaya. Mpoonya bapaizi basilutwe a Bafalisi bakatuma balindizi kuti bakajate Jesu.

33Jesu wakati, “Ndicinooli andinywe kwakaindi kasyoonto, nketanainka kuli ooyo wakandituma. 34Kuciindi eeco nikuba kuti mukandiyandaule tamukooyoondijana, akwalo ooko nkwenjooba tamukasiki pe.”

35Mpoonya bapati ba Bajuda bakatalika kubuzyanya kabati, “Ino muntu ooyu uyanda kuunka kuli nkotutakonzyi kumujana? Sena uyanda kuunka kuli aabo besu bamwaikide akati kabamasi kuti akabaiisye? 36Lino waamba nzi nati, ‘Muyoondilangaula, pele tamukooyoondijana pe!’ alimwi nati, ‘Ooko nkwenjooba tamukasiki pe?’”

Zyatulonga twamaanzi aapa buumi

37Mubuzuba bwamamanino, buzuba bupati kwiinda oonse mupobwe eelyo, Jesu wakanyamuka, wakoongolola wakati, “Kufumbwa uufwide nyota, aboole kulindime anywe. 38Alimwi ‘Kufumbwa uundisyoma, tulonga twamaanzi aapa buumi tuyookunka kuzwa mumoyo wakwe,’ mbubonya mbuli mbwaamba Malembe.” 39Naakakanana boobo wakali kwaamba zya Muuya Uusalala ngobayootambula aabo bamusyoma. Ciindi eeci Muuya Uusalala taakanapegwa pe, nkaambo kakuti Jesu taakananjila mubulemu bwakwe.

40Bamwi bantu nibakamvwa majwi aakwe aaya bakati, “Ncobeni, ooyu muntu ngonguwe musinsimi ooyo.” 41Bamwi bakati, “Ooyu muntu ngo Munanike wa Leza.” Pele bamwi bakali kubuzya kabati, “Sena Munanike weelede kuzwa ku Galilii? 42Sena Malembe taambi kuti Munanike ngwaciinga ca Devedi, akuti uyoozwa ku Betelehemu, mumunzi mwaakali kukkala mwami Devedi?” 43Aboobo bakaandaana akaambo kakwe. 44Bamwi bakayanda kumujata, pele taakwe nibakakonzya kucita oobo pe.

Zyakutasyoma kwabapati ba Bajuda

45Lino balindizi aabo bakabweeda kubapaizi basilutwe a Bafalisi. Nibakaakusika ooko, bakababuzya kuti, “Ino mwamusiila nzi?” 46Balo bakaingula kuti, “Tatunabwene muntu waamba mbuli yuulya pe!” 47Bafalisi bakaamba kuti, “Tee ambweni anywebo wamucenga kale muntu ooyu? 48Sena kuli bamwi beendelezi na Bafalisi bamuzuminina kale muntu ooyu? 49Bantu aabo batazi Milawo ya Mozesi, Leza uuyoobasubula.”

50Mpoonya aawo Nikodemasi, uulya wakainkide kuli Jesu masiku, wakali wankamu ya Bafalisi aaba, wakabuzya beenzinyina kuti, 51“Sena mulawo wesu ulatuzumizya kupa mulandu muntu katanabetekwa kutegwa kaambo kakwe kalondoke?” 52Balo bakamwiingula kuti, “Sena ayebo uli waku Galilii? Kolanga mu Malembe, ulajana kuti taakwe musinsimi naba omwe uuzwa mu Galilii.”

[ 53Mpoonya bakamwaika, aumwi wakaya kumunzi wakwe.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Joni 7: Tonga96

Highlight

ಶೇರ್

ಕಾಪಿ